LESÖN 34
Sitih Inlahen Öi Min Hameuktöre Hangenlōn Tö Yāvē?
Sīöp öng ngaich ngam hanangenlōn meh tö ngam Tēv, hēten tö meh öm haköp mat ngam Paipöl? Hòṅ asīöp ngam hanangenlōnre öm tö ò? Yěm hòṅ ngatī, ngaich mihôiṅ öm ṙatö-ellōnre tö Yāvē nö kirööngen hanangenlōn tö meh, haṙūötken meh min inrē. Ngih pöri intöönö, sitih inlahen öm min hameuktöre öm hangenlōn tö Yāvē?
1. Sitih inlahen öi min hameuktöre hangenlōn tö Yāvē?
Yēḵ hī öi hang nup chööngö Yāvē, ngaich hameuktöre ayī-ö öi hangenlōn tö ò. (Vë-evkūö 1 Yôhan 5:3.) Öt hěng tak tarik tö timlöng alaha tö Yāvē nö hang nup chööngö ò. Höng kētö minë chööngö anga-aṅ nö in hī, yēḵ hī hòṅ hāngö u hēk yěi hö-ö. Kūö yòh? Pön lōnu anga-aṅ tö hī öi ‘holtö ellōnre öi hang nup chööngö ò.’ (Rōma 6:17) Tö ngö manah angū-ö, tö hī öi kūö hanangenlōnre öi hang nup chööngö ò, öt höng kūö hī töölô tö ò. Hòṅ akahakūö pöri ayī-ö tö nup ööilōn Yāvē, tö nup sin-òkkūö ò inrē. Ṙūöhtö mikahkūöre in min tö u, öi in ngam seksön 3 töm 4 öi löknyö mat ngih līpöre. Yěi la-evṙen min tö nup ööilōn Yāvē, ṙūöhöngre inrē tö nup sin-òkkūö ò, ngaich hameuktöre min ayī-ö öi hangenlōn tö ò.
2. Asuh nup kò-òren kanihngen hī min öi hameuktö hanangenlōnre tö Yāvē?
Ngö kinūichngö an: “Pōyen kanihngen ön ngòh tölöök.” (Salmai 34:19) Asuh nup min kò-òren kanihngen? Ṙòkhöre in höng la-al ngam öt hanëtöre. Lohten inrē öi hāṅten tö rupīö, ötlēkaṙen hēk nup tahëng kanihngen. Kūö u lohten min tö lōn re öi kihngen hang chööngö Yāvē, ngaich lök el ngam tövaich talöökö, pön angū-ö tölööṙen tö lōn hī. Yēḵ hī pöri min höng iṙūöhen öi hang nup chööngö Yāvē, ngaich hameuktöre ayī-ö öi hangenlōn takô tö ò. Hameuktöre inrē ayī-ö öi höng haköpngöre öi in ò, ngaich öt hō min anga-aṅ nö ‘ṙāngen hī öi höng hěng tak.’—Heprāi 13:5.
MIKAHTÖKŪÖRE HĒK
Kūö yòh öng nö tökiröng nö in Yāvē, tö meh öm hòṅ hang chööngö ò? Asuh öp min mahayööken meh höng haköpngöre in Yāvē? Töi mikahtökūöre.
3. Sinūöchkö meh tö ngam Sī-ö
Löknyö mat ngam Paipöl in akahalōn, tö ngam Sī-ö nö sūöchlö fālen ök töhěng tak tarik ngam Tēv ang Yōp. Sinūöchkö yip tarik an inrē nö ṙòkhöre tö ò yip tö hòṅ kētöre nö löklōn Yāvē. Vë-evkūö Yōp 1:1, 6–2:10, ngaich kakkö minë intöönö yamih:
Asuh ök chö-öiny Yōp nö hang chööngö Yāvē, tö ṙô ngam Sī-ö?—Ngëichköm Yōp 1:9-11.
Asuh öp sinūöchkö yip tarik nö ṙòkhöre hēk sinūöchkö meh inrē tö ngam Sī-ö?—Ngëichköm Yōp 2:4.
Vë-evkūö Yōp 27:5b, ngaich kakkö ngih intöönö yamih:
Sitih inlahen ök Yōp nö hameuktöre nö kô-en hanangenlōn tö Yāvē?
Hameuktöre ang Yōp nö hangenlōn tö Yāvē nöng haköpngöre nö in ò
Hameuktöre in ayī-ö inrē hangenlōn tö Yāvē öi höng haköpngöre öi in ò
4. Haṙamlōn Yāvē man
Vë-evkūö Inchōḵ-oṙô 27:11, ngaich kakkö minë intöönö yamih:
Sitih inlahen lōn ang Yāvē yēḵ meh holtö mikah re öm hang chööngö ò? Kūö yòh anga-aṅ nö ngatī lōn?
5. Mihôiṅ man köp hangenlōn tö Yāvē
Kūö hanangenlōnre in min tö Yāvē, öi vë-eny nang yip tahëng. Kūö ngam tököp hanangenlōnre min ayī-ö tö ò öi höng iṙūöhen, pòrô öi kihngen. Röngnyöm VITIŌ, ngaich kakkö ngih intöönö yamih.
Kihngen öm ṙung öm vë-eny inlahen Yāvē öm in yip tahëng?
Sitih inlahen ang Krēsön nö ṙaptö ngam pinhë-ekūöre?
Öt kihngen in haköpngöre öi in Yāvē, yēḵ hī hangenlōn tö nup ööilōn ò ṙūöhöngre inrē tö nup sin-òkkūö ò. Vë-evkūö Salmai 97:10, ngaich kakkö minë intöönö yamih:
Sā minë haköp meh ngaich, asuh nup ṙô hanangenlōn Yāvē hēk surīkhö ò inrē?
Hòṅ sitih inlahen öm, hòṅ meh hangenlōn tö tölöök ngaich surīkhö nup tötlöök?
6. Yöölen in yěi hang chööngö Yāvē
Yöölen in yěi hang nup töng chööngö Yāvē. Vë-evkūö Isayā 48:17, 18, ngaich kakkö minë intöönö yamih:
Ṙatö-ellōnre öm tö nup la-en tinöölô hī tö Yāvē, tö u nö ṙòkhöre nö yanöölen hī? Kūö yòh öm ngatī mufē?
Im rò-òten meh ngaich haköp mat ngam Paipöl, haköp inlahen ngam tökô-en Tēv inrē Yāvē, asuh nup ngaich yanöölen meh?
ṘÔ YIP TAHËNG: “Öp töng yòh la-en kahëken chu, öthō ngam Tēv nö lökngöre tö u.”
Asuh öp min hameuktö meh miröökö vamënyen Yāvē tö ò nö lökngöre tö nup la-en hī?
MINË HAKÖP HĪ NGAICH
Yēḵ meh hang chööngö Yāvē, haköpngöre inrē öm in ò el nup kanihngen, ngaich hameuktöre më-eṅ öm hangenlōn tö ò.
Sitih ṙô öm më-eṅ?
Asuh öp ngaich haköplö meh in Yōp?
Sitih inlahen öm min hameuktöre hangenlōn tö Yāvē?
Asuh öp min mahayööken meh haköpngöre öm in Yāvē?
NGËICHKÖ NË INRĒ
Mikahtökūöre man tö inlahenre öm sitih inlahen haköpngöre in Yāvē hēk el māṅ inrē.
Asuh öp sinūöchkö fālen ngòh tarik tö ngam Sī-ö, töi mikahtökūöre.
“Köptī ang Yōp Töm Chaniplen re” (Tölöök Inhānga Aṅ Im Tēv—LAMÖÖ IN MEH? seksön 6)
Mihôiṅ vē nyīö nö hameuktöre nö hangenlōn tö Yāvē, yěm hòṅ mikahtökūöre ngaich ngëichköm vitiō.
Mihôiṅ ngam ṙāl tarik nö la-al minë kinlahare nöng haköpngöre nö in ngam Tēv. Töi mikahtökūöre tö inlahen ò.