Fevereiro

Mbimo yi Mkoma Ezekhiyele a nga txi lwala, a kombete txivhuno ka Jehovha ku e mu hanyisa. Jehovha a mu hanyisile. (2 Vafu. 20:1-6) Ku hambana nito, mbimo yi mpostoli Paulo a nga kombela Jehovha ku e mu thavisa “m’pa ha mmidini,” Jehovha kha wu thavisa. (2 Vak. 12:7-9) Mpostoli Jakobe ni Pedro Mkoma Herodha, a txi lava kuva daya ngu wumbidi wawe. Jakobe a datwe, kambe Pedro a hulukisilwe ngu ngelozi. (Mith. 12:1-11) Se hi nga ti wotisa to: ‘Ngu kutxani Jehovha a di hulukisile Pedro e tumelela to Jakobe e dawa.’ Bhiblia kha yi wombi to ngu kutxani. Kambe ti hi nga tsanisekako ka tona, ngu ti to “totshe tinzila ta Txizimu ti lulamile.” (Dhewut. 32:4) Mbimo yimwani ti nga maha Jehovha a si xamuli mikombelo yathu ngu nzila yi hi nga ti yi emete. Kambe a ku hi thembako to, nzila yi Jehovha a xamulako ngu yona mikombelo yathu, mbimo yotshe, nja lirando ni wululami, hi na mbi ngura-ngura ngu nzila yi a nga yi sawula kuxamula ngu yona mikombelo yathu.—Jobe 33:13. w23.11 21 ¶6

Jakobe, m’bhali wu a nga huhutelwa a wombile ti to vathu va wutxhari va ti emisete “kuengisa.” Pimisa ngu ti to ti lava ku womba txani toneto. Ti lava hi va ni mixuvo ni ku tiemisela kuengisa avale Jehovha a nga va ninga mpimo wo kari wa wuthangeli. Ti ha kubasani ti to Jehovha kha lavi hi engisa awule a hi kombelako ku hi ndaka milayo yakwe. (Mith. 4:18-20) Ku tilava ti nga hi hehukela nguto kuengisa Jehovha kupinda kuengisa m’thu wa nyama. Nguku milayo ya Jehovha yotshe mbimo njo hetiseka. (Mas. 19:7) Kambe vathu va nyama a va i ku vathangeli kha va hetiseka. Hambi keto Tate wathu wa nzumani a ningile wulawule wo kari vaveleki, vakoma ni madhota. (Mav. 6:20; 1 Vat. 5:12; 1 Pedro 2:13, 14) Mbimo yi hi va engisako hi va hi txi engisa Jehovha. w23.10 6 ¶2-3

Nzila yo tsanisa likholo lathu ngu alakanyisisa ngu mtamo wa Jehovha. Ene a ni mtamo wo hetisisa sotshe sithembiso sakwe. Nguko ene Txizimu txa mtamo. (Jobe 42:2; Marku 10:27; Vaef. 3:20) Ene a thembisile Abrahamu ni Sara ti to va di na va ni mwanana hambiku va nga di kute ngu tanga. (Gen. 17:15-17) A tshumete e thembisa Abrahamu ti to adi na ninga liveleko lakwe ditiko da Kanana. Mbimo yi liveleko la Abrahamu i ku Vaisrayeli va nga heta malembe o tala i di sibotxhwa a khe Egipta ti txi woneka nga txithembiso txiya txi na mbi maheka. Kambe ti mahekile. A tshumete e gela Mariya wa mbiri ti to a ndina veleka Mwanana wa Txizimu eto ti ndi na hetisisa txithembiso txi Jehovha a ngadi txi mahile kudingana malembe o tala khe jaradhi ka Edheni! (Gen. 3:15) Hi nga tsanisa likholo lathu ka mtamo wa Jehovha ngu kualakanyisisa ngu sotshe sithembiso si a nga si maha ni nzila yi a si hetisisako ngu yona.—Jox. 23:14; Isaya 55:10, 11. w23.04 28 ¶10-12

Jehovha a xamute mkombelo wa Dhavhidha nguko m’hulukisa. (1 Sam. 19:10, 18-20; 2 Sam. 5:17-25) Nathu hi nga va ni themba yi yi fanako. (Mas. 145:18) Ti nga maha Jehovha a si xamuli mikombelo yathu ngu nzila yi hi ngadi yi emete ngu yona. Paulo a kombete Txizimu ti to e thavisa “m’pa ha mmidini kwakwe.” Ene a kombete makhambi mararu mayelano txikarato txonetxo. Ina Jehovha a xamute mikombelo yoneyo? Ina, kambe kha xamula ngu nzila yi Paulo a ngadi yi emete ngu yona. Hahanze ko thavisa txikarato txile, Jehovha a mningile mtamo wu a nga txi wu lava to e simama e mthumela a di thembekile. (2 Vak. 12:7-10) Mbimo yimwani nathu hi nga xamulwa mikombelo yathu ngu nzila yo hambana ni yi hi ngadi yi emete. Hi nga tsaniseka ti to Jehovha wa yi ziva ngu kukongoma nzila yi a nga hi vhunako ngu yona. Ene ‘a na hi mahela sa singi ngutu kupinda asi hi mkombelako mwendo asi hi si pimisako.’ (Vaef. 3:20) Ngu toneto, tixamulo ta mikombelo yathu ti nga ta ngu mbimo ni ngu nzila yi hi nga mba yi emela. w23.05 8-9 ¶4-6

Nda lisima ku mbimo yotshe hi alakanyisisa ngu txithembiso txa Bhiblia txa mbimo yi yi tako txa kuwuswa ka vafi. Ngu kutxani? Nguko hi nga thuka hi humelelwa ngu sikarato sa malwati mwendo kufelwa ngu wu hi mdhundako ngu txitshuketi. (Ekl. 9:11; Jak. 4:13, 14) Se themba yathu ya kuwuswa ka vafi yi nga hi vhuna kutimisela sikarato soneso. (1 Vat. 4:13) Mibhalo ya hi tsanisekisa ti to Tate wathu wa nzumani wa hi ziva kwati ni ku wa hi randa ngutu. (Luka 12:7) Phela Jehovha wa hi ziva kwati aha ko hambi hi txo thuka hi fa, a na ta hi wusa hi di ni wuthu ni mapimiselo athu a kale. Ta tsakisa kuwona lirando la Jehovha ngu ku hi ninga mkhanjo wo ta hanya ngu ha ku si gumiko, se hambi hi txo thuka hi fa a na ta hi wusa! Ina hi nga kholwa ka txithembiso txa kuwuswa ka vafi? Ina nguko ha tsaniseka ti to awu a mahako txithembiso txiya wa ti navela ngutu ni ku a ni mtamo ni wusikoti wo txi hetisisa. w23.04 8-9 ¶2-4

Josefa ni Mariya va txi thuma kumweko kasi ku ve simama ve tsanisa wuxaka wawe ni Jehovha. Va txi li pfisisa lisima lo simama ve thumela Jehovha ngu wumwewo kota mwaya. (Luka 2:22-24; 4:16) I di ti to nawe u ni vanana kufana ni Mariya ni Josefa ti nga maha ti ku karatela kuxalela mitshangano ni ku ti vekela mbimo yo va ni wukhozeli wa mwaya. Ti nga maha ti mi karatela ku mana mbimo yo gonda ni kumaha mkombelo mi di motshe kota mwaya. Kambe, khumbula ti to ngako mi txi khozela kumweko Jehovha, mi ya mi tshuketa kwakwe ni ku mi tsanisa wukati wanu. Ngu toneto, thangetisa wukhozeli wa Jehovha. Ngako mi txi wonisana ni sikarato ka wukati wanu ti txi woneka nga ku va ni wukhozeli wa mwaya mi di motshe kha ti vhuni, sawulani timhaka ta didotho to tsakisa. Eto ti nga mi vhuna ku mi randana ngutu ni ku mi na lava kukhozela Jehovha kumweko. w23.05 22 ¶7-8

Txithavo txa hombe atxi Obhadhiya a nga ti natxo ngu Jehovha txi mu vhunisile kutxani? Aku i nga ti wamwamna wo thembeka ni kuthava Txizimu, mkoma a mu vekile ku e thangela nyumba ya wukoma. (Fananisa ni Nehemiya 7:2) Txithavo atxi Obhadhiya a nga ti natxo txi mu ningile txibindi txa hombe i ku fanelo ayi a nga txi yi lava. Ene a hanyile ka timbimo ta mkoma wo biha ngutu, Akabhe. (1 Vafu. 16:30) Se ni msikati wa Akabhe, Jezabheli awu a nga txi khozela Bhahali, a txi mu nyenya ngutu Jehovha aha koza e zama kufuvisa wukhozeli wa ditshuri ka mfumo wa wuphemba. Jezabheli a date vaprofeti vo tala va Jehovha. (1 Vafu. 18:4) Mbimo yi Jezabheli a nga khata kuxota vaprofeti va Txizimu kasi ku e va daya, Obhadhiya a tekile 100 wa vona e va sisa ngu mitxawa ya “mtxhanu wa magumi, ni mtxhanu wa magumi ka maphala o kari, na a txi va ninga mapawu ni mati.” (1 Vafu. 18:13, 14) I ti ku Obhadhiya a to tumbulwa, wamwamna wuwa wa txibindi ha themba ti to a di datwe. Kambe Obhadhiya a txi randa ngutu Jehovha ni vale va nga txi Mthumela kupinda ati a nga ti randisa tona wutomi wakwe. w23.06 16 ¶9-10

Jehovha wa simama e kongomisa vathu vakwe nyamsi kufana ni kale. A maha toneto ngu kuthumisa Dipswi dakwe, ni Mwanana wakwe, Jesu Kristu, msungo wa dibanza. Ina hi ni sikombiso sa hakubasani si kombisako ti to Jehovha wa simama e thumisa vathu kasi kukongomisa vathu vakwe? Ina. Ngu txikombiso, wona ti ti nga maheka kukhukhela ngu dilembe da 1800. Charles Russell ni vangana vakwe ava ni vona va nga txi gonda Bhiblia, va khatile kupfisisa ti to dilembe da 1914 di ndi na va da lisima ngutu nguko di txi tsimbitisana ni kusimekwa ka Mfumo wa Txizimu. (Dhan. 4:25, 26) Kasiku ve hokelela magwito oneyo, vona va gondile ngutu wuprofeti wa mu ka Bhiblia. Ina Jehovha a txo kongomisa wuxolisisi wu va nga txi wu maha? Ina! Ati ti nga maheka ngu 1914 ti vekile hakubasani ti to Mfumo wa Txizimu ngu ditshuri wu ti simekilwe. Ka dilembe donedo ku khatile Yimbi yo Khata ya Mafu, se kukhukhela koneho malwati, nzala, ni kuzinginikela ka mafu si yite si engetela. (Luka 21:10, 11) Jehovha ngu ditshuri a thumisile vavamna vale vo thembeka kasi kuvhuna vathu vakwe. w24.02 23 ¶11

Kota vathu va Jehovha, ha tiziva to ene wa hi randa ni ku a lava ti to hi tidila ngu wutomi wa wunene nga ha hi nga tikotako ngu kona. (Var. 8:35-39) Ni ku ha tsaniseka to ngako hi txi thumisa matshina a Bhiblia mbimo yotshe hi na va ni wuyelo ya yinene. (Isaya 48:17, 18) Se hi nga maha txani ngako hi txi wonisana ni sikarato so mbi si rinzela? Ngu txikombiso, txiro txa mwaya txi nga thuka txi womba mwendo kumaha to kari ati ti nga hi henyisako. Hi nga thuka hi wonisana ni malwati a hombe aya ma nga hi tsivelako kumaha to tala ka mthumo wa Jehovha. Mbimo yimwani hi nga thuka hi wonisana ni tiphango ta mtumbuluko mwendo kuxaniswa ngu mhaka ya likholo lathu. Ngako hi txi wonisana ni sikarato so fana ni siya mbimo yimwani hi nga thuka hi ti wotisa tiya: ‘Ngu kutxani tiya ti txi maheka kwangu? Ina ni to maha to biha? Ina ti lava kuwomba to Jehovha kha ni katekisi?’ Ina u khala kutipfa ngu nzila yoneyo? Ngako xamulo i di ina, u nga godholi. Ku ni malanda o tala o thembeka a Jehovha aya ma nga ti pfa ngu nzila yi yi fanako.—Mas. 22:1, 2; Hab. 1:2, 3. w23.04 14 ¶1-2

Ngako hi txi dukwa kumaha to biha, ha vayilela ngu txi kuluveta simaho mwendo mipimiso ayi yi nga onhako wuxaka wathu ni Txizimu. Jehovha a emela ti to athu “hi ti ningetela ngu yotshe mbilu.” (Var. 6:17) Ati Jehovha a hi gelako ku hi ti maha yotshe mbimo ndinene kwathu, ni ku athu hi nge txitxi milayo yakwe. (Isaya 48:17, 18; 1 Vak. 6:9, 10) Sathani wa hi xanisa ngu didhawa da nyama ni da matipfelo kasi ku onha ku ti emisela kwathu. Txikongomelo txakwe ngu ku hi “kakatxula,” kasi kuhoxota wungana wathu ni Jehovha. (1 Pedro 5:8) Makristu o khata ni ona ma xanisilwe, me kwapwa, ni kudawa ngu mhaka ya ku ti emisela ka ona kusimama ma di tsani. (Mith. 5:27, 28, 40; 7:54-60) Ni nyamsi Sathani wa thumisa xanisa. Atiya ta ti komba ngu nzila yo biha ayi vanathu va khe Rússia ni mamwani matiko va ñolwako ngu yona ni kukanetwa ku hi mananako nako. Sathani a thumisa “siduko” kasi ku hi xasela.—Vaef. 6:11. w23.07 15-16 ¶6-9

Mbimo yi u gondako dipswi da Txizimu, lirando lako ngu Jehovha lia li kula. Lirando lonelo li ku susumetela ku u thumisa ati u ti tigondako, u maha sisungo sa sinene si si tsimbitisanako ni matshina a milayo a Bhiblia. U tshukwatisa mahanyelo ako nguko u lava ku tsakisa Txizimu. Kufana ni mwanana wu a etetelako Tate wakwe awu a mdhundako, nawe u etetela Tate wathu wa nzumani. (Vaef. 5:1, 2) U nga ti wotisa tiya: ‘Lirando langu ngu Jehovha li tsani ngutu konku kupinda mbimo yi ni nga khata kuva Mkristu? Ku khukhela ni nga bhabhatiswa, ina mapimiselo ni simaho sangu sa tsimbitisana ni mapimiselo a Jehovha, ngutu-ngutu ko kombisa lirando ka vanathu?’ Se ngako “lirando lako lo khata” li di hote ka kudotho, u nga godhole. Atiya ti humelete ka Makristu o khata kambe Jesu kha ma tsukula, se nathu kha na mbi hi tsukula. (Mtu. 2:4, 7) Ene wa ti ziva to hi nga tshumela hi wuseta lirando ali hi ngadi nalo mbimo yi hi nga khata kugonda ditshuri. w23.07 8 ¶2-3

Mpostoli Pedro a mahile tiphazamo ta tingi. Pedro atxi tsaniseka ti to a ndi na simama a di thembekile hambi vapostoli vamwani va txi leka Jesu. (Marku 14:27-29) Mbimo yi va nga ti jaradhi ka Getsemani, Pedro ngu kuwuyeletela a tandekile kusimama e wonelela. (Marku 14:32, 37-41) Mbimo yi dibutho da hombe di nga ta ni matxhari ni migomba di ta ñola Jesu, Pedro a to tutuma. (Marku 14:50) Ngu magwito, Pedro a lambile Jesu kuraru, aha koza e xambanya makuho oneyo. (Marku 14:66-71) Pedro a mahile txani mbimo yi a nga tumbula ti to a ti mahile txionho txa hombe. A karatekile ngutu, e khata kudila ngu ku nemelwa ngu txionho txakwe. (Marku 14:72) Hahanze ko mu kawuka, mbimo yi Jesu a nga wuswa a humelete ka Pedro kasi ku ta mtsanisa. (Luka 24:34; 1 Vak. 15:5) Ku di pindile mbimo nyana, Jesu a ningile mngana wakwe wutixamuleli wa hombe. (Joh. 21:15-17) Pedro a txi ti ziva ti to a ti mahile txionho txa hombe, kambe a simamile e zama kumaha ati i ku ta tinene. Pedro a txi ti ziva ti to mngana wakwe Jesu atxi ngadi atxi m’dhunda. Hi gonda txani? Jehovha a lava hi tsaniseka ti to ene wa hi randa ni ku ati emisete ku hi divalela.—Var. 8:38, 39. w24.03 18-19 ¶13-15

Wugango wu thela tingana, ku tipfa u si nga wa txilo, txirumbu txo mbi txi rinzela ni kuhoxota timwaya. Ngu toneto, mbutxhari kuvayilela “nyumba” ni sakudya sa wamsikati wuwa wa txiphuku-phuku. Ava va mahako wugango va nga luza wungana wawe ni Jehovha ni ku va nga mana malwati aya ma dayako. (Mav. 7:23) Mavingu kapitulo 9 vhersikulo 18 yi txi ya magwito yi womba tiya: “Kona hale vaho vo fa.” Ngu kutxani vo tala va txi tumela txirambo txiya txi yisako phangoni? (Mav. 9:13-18) Mlawu wa hombe awu hi fanelako ku wu vayilela i pornografiya. Vamwani va pimisa ti to kuxalela pornografiya kha ta biha. Kambe pornografiya yi ni phango, ava va yi xalelako kha va xoniphi vamwani ni ku ya vhisiyarana. Sithombe sa walo sa karata ku si thavisa ka mapimo. Pornografiya kha yi thavisi minavelo ya ta mataho; kambe yo engetela. (Vakl. 3:5; Jak. 1:14, 15) Ava va xalelako pornografiya va gwitisa kumaha wugango. w23.06 23 ¶10-11

Hambiku matiko mamwani ma wukelako wukoma wa mafu otshe, i ku Anglo-Americano, kha va na mbi wu thavisa. Hi tiziva toneto nguko “dirigwi” adi di emelako Mfumo wa Txizimu di na ganja mikondo ayi yi emelako Anglo-Americano ya txithombe txile txa hombe. (Dhan. 2:34, 35, 44, 45) Ina wa tsaniseka ti to wuprofeti wa Dhaniyeli awu wu womba-wombako ngu mkondo wa simbi yo patwa ni dibumba, mbwa ditshuri? Xamulo i di ina, eto ti na gwesa nzila yi u hanyako ngu yona. Khu na mbi veka mapimo ko lavetela male ya yingi mwendo tithomba to tala ka mafu yawa nguko wa tiziva ti to i si nga kale si na loviswa. (Luka 12:16-21; 1 Joh. 2:15-17) Kupfisisa wuprofeti wuwa ti na kuvhuna kuveka mapimo ka mthumo wo txhumayela ni kumaha vagondiswa. (Mat. 6:33; 28:18-20) Ti wotisi tiya: ‘Ina sisungo si ni si mahako sa kombisa ti to na kholwa to i si nga kale Mfumo wa Txizimu wu na lovisa yotshe mifumo ya mafu yawa?’ w23.08 11 ¶13-14

Tumela to ngu kona ha ka tanga, dihanyo mwendo txiemo u nge sikoti kumaha ti u nga txi fanela ku ti maha konku. Kufana ni Bharzelayi ti emiseli kumba tumela malungelo o kari ngako txiemo txako txi si ku tumeleli. (2 Sam. 19:35, 36) Kufana ni Mosi, tumela txivhuno, ninga siavelo vamwani ngaku ti txi fanela. (Eks. 18:21, 22) Ngaku u txi dinganisela u na vayilela kuzumbela kupimisa to kha ni mahi ta boti ati ti nga ku mahako u karala. Kha hi faneli ku tipfa mnando ngu sisungo si vamwani va si mahako. Hi nge maheli sisungo vamwani, ni ku hi nge sikoti ku mbimo yotshe hi va vhikela kuwonisana ni wuyelo ya sisungo so mbi tsakisa si va si mahako. Ngu txikombiso mwanana a nga maha txisungo txo ema kuthumela Jehovha. Txisungo txonetxo txi nga tisa kupandiseka ka hombe ngutu ka vaveleki. Hambiketo, vaveleki va va tipfako mnando ngu sisungo so mbi tsakisa si vanana vawe va si mahako va rwala thundu yo nemela ngutu. Eyo hi nga thundu yi Jehovha a lavako ku ve yi rwala. w23.08 29 ¶11-12

Samsoni i ti m’thu wo mba hetiseka kufana ni nathu, ngu toneto, mbimo yimwani a ti maha sisungo sa walo. Ngu kukongoma, txisungo tximwani a nga txi maha txi m’tisete wuyelo yo karata ngutu. Ku di pindile mbimonyana, Samsoni a txi thuma kota mlamuli, ene “a to randana ni mmweyo wamsikati wa mkovani ka Soreke, ditina dakwe i ti Dhalila.” Msananyana kheya, Samsoni a ti tekile wamsikati wa m’filista, kambe toneto “ti txi ta ngu ka MKOMA,” a nga txi “lava nzila ya kutsayisa Vafilista.” Ku di pindile mbimonyana, Samsoni a to ya zumba ka wamsikati wa digelegele ka txidhoropana txa Filista khe Gaza. Mbimo yoneyo Txizimu txi ningile mtamo Samsoni wo gwanda matimba a didhoropa, toneto ti mahile to di si vhikeleki. (Val. 14:1-4; 16:1-3) I di ta Dhalila ti ti hambani, nguko, ti nga maha ene i ti Muisrayeli. Kasi ku e kota kuningela Samsoni ka Vafilista Dhalila va m’ningile male ya yingi ngutu. w23.09 5 ¶12-13

Kupfisisa ku nga hi vhuna to hiva vo thutha. M’thu wo pfisisa wa kombisa ku ti ñola mbimo yi a wonisanako ni sikarato sa ti a ti kholwako. Mbimo yimwani vathu va txi maha txiwotiso, vona kha va hi geli to ngu kutxani va txi maha txiwotiso txonetxo. Ngu toneto, hi si se kuxamula hi nga maha kwati kupfisisa ti to ti nga maha hi si ti zivi a ti ti nga susumetela m’thu eneyo kumaha txiwotiso txonetxo. (Mav. 16:23) Wona nzila yi Gidhiyoni a nga xamula ngu yona vavamna va Efrayime. Vona va mu wotisile ngu ku henya ti to ngu kutxani a nga mbi va ramba kasi ku yalwa ni valala va Israyeli. Ina txi diho txivangelo txo ve mu wotisa ngu nzila yoneyo? Kutilava va txo ti guleta. Hambi keto Gidhiyoni ngu wuzivi a xoniphile matipfelo yawe ni ku angula ngu nzila yo thutha. I ve yihi wuyelo? Mbimo yi a nga xamula ngu kuthutha “txiviti txawe txi to relela.”—Val. 8:1-3. w23.09 16 ¶8-9

Ti hakubasani ti to Jehovha a karatekile ngutu mbimo yi a nga txi wona mwanana wakwe a txi ñolwa ngu nzila yo biha, a txi wonwa i si nga wa txilo ni kuxaniswa. Vaveleki va va nga felwa ngu mwanana va kuziva kupanda ku kukuho ngu kuluzekelwa koneko. Athu ha kholwa ngutu ka kuwuswa ka vafi. Hambiku hi ku ni likholo lonelo, ngako m’thu a txi fa, ha pandiseka ngutu timbiluni kwathu. Eto ti hi vhuna kupfisisa nzila Jehovha a nga ti pfa ngu yona mbimo yi a nga wona mwanana wakwe wo dhundeka a txi xaniseka ni kufa. (Mat. 3:17) Ti ngo txani kukhukhela ka konku u gonda mayelano ni mterulo ka gondo yako upune mwendo ka wukhozeli wa mwaya? Niku ka ditshiku da Txialakanyiso, u nga divale kuxalela wukhozeli wa ni mixo wo sawuleka. Ngako hi txi lulamisela mbilu yathu para Txialakanyiso, hi nga sikota kuvhuna vamwani ti to ve wuyelwa ngu tximahakalo txonetxo.—Ezra 7:10. w24.01 11 ¶10-12

Jehovha a na xamula mikombelo yathu ngu ku hi ninga “mtamo wa hombe.” (2 Vak. 4:7) Hi nga tshumela hi tsana ngu kugonda dipswi dakwe ni ku alakanyisisa ngu dona. (Mas. 86:11) Kwathu, dipswi da Txizimu di ku mu ka Bhiblia “di ni mtamo.” (Vaheb. 4:12) Mbimo yi u mahako mkombelo ni ku gonda dipswi da Txizimu, u na amukela mtamo wu u wu lavako kasi kutsanisela, u simama u va ni litsako ni ku hetisisa txiavelo txo karata. Wona nzila yi Jehovha a nga tsanisa ngu yona mprofeti Jona. Ene a thavile txiavelo txo karata a txi a nga ningwa ngu Jehovha. Ngu mhaka ya eto, Jona a vekile wutomi wakwe ni wa vathu va a ngadi navo ha phangoni, nguku va di datwe ngu moya wa hombe lineneni. Mbimo yi a nga vinzwa ha matini a ti mani a di ka wukhalo wu a nga si khali kuva ka wona kale mndani ka txihaka txa hombe. Nji txani txi Jona a nga maha kasi ku e amukela mtamo a di mndani ka txihaka? A do tekela kumaha mkombelo.—Jona 2:1, 2, 7. w23.10 13 ¶4-6

Hambiku mpostoli Pedro a nga bhala mapasi akwe a txi alakanyela Makristu o khata, Jehovha a patile mapasi oneyo ka dipswi dakwe. Ngu toneto nathu hi nga vhuneka ngu mapasi oneyo. (Var. 15:4) Hi zumba hi di randetwe ngu vathu va va si kholwiko ka wuprofeti wa Bhiblia. Vakaneti va nga hi poyila nguku hi nga womba i di ngadi kale to magwito ma na hoka. Vatseketseli vamwani va womba ti to magwito kha ma na mbi thuka ma di hokile. (2 Pedro 3:3, 4) Ngaku hi txi pfa mapswi oneyo ka va hi va txhumayelako, vakolega vathu va txikolwani mwendo maxaka athu, likholo lathu li nga hola. Pedro a txhamusete ti ti nga hi vhunako. Mapswi a Pedro ma nga hi vhuna ni ku hi khumbuxeta ti to nzila yi Jehovha a yi wonisako tona mbimo kha yi fani ni ya vathu. (2 Pedro 3:8, 9) Ka Jehovha, 1000 wa malembe ti fana ni ditshiku dimwedo. Jehovha wa laphisa mbilu nguko kha lavi ti to ni wa mmweyo e lova. Ngaku ditshiku dakwe di txi hoka, mafu yawa o biha ma na loviswa. w23.09 26-27 ¶2-5

Ngu kutxani mpostoli Paulo a di bhalete dipasi Makristu a Vahebheru khe Judheya? Txo khata, kasi ku va tsanisa. Wungi wawe va ti kulete ka wukhozeli wa txijudha. Ti nga maha vathangeli va wukhozeli wonewo va ti va poyilete mbimo yi va nga hunduka ve va Makristu. Ngu kutxani? Nguko Makristu ma si nga ni dithempele do tshura do khozela ka dona, va si nga ni txiluvelo txo yisela ka txona magandelo Txizimu, ni ku va si nga ni vaphaxeli vo va thangela ka toneto. Ti nga maha toneto ti di godholisile valondeteli va Kristu ni ku holisa likholo lawe. (Vaheb. 3:12, 14) Ti nga maha vamwani va di dukekile kutshumela ka wukhozeli wa txijudha. Txa wumbidi, Paulo a ti vekile hakubasani to Makristu a Vahebheru ma si mahi mizamo yo pfisisa tigondo ta moya ta tiphya to tshima, i ku “sakudya so banga” si manekako ka Dipswi da Txizimu. (Vaheb. 5:11-14) Vamwani va ti nga di ve londisa Mlayo wa Mosi. w23.10 24-25 ¶3-4

Vavasikati vamwani va nga sawula kuzumba va si tekwi. (Mat. 19:10-12) Kambe awe u nga tsaniseka ti to Jehovha ni Jesu va ninga lisima awu a nga sawula kwa mbi txhadha. Hamafuni kotshe, vanathu va txisikati ava va nga mbi txhadha makatekwa dibanzani. Ngu kona ha ka lirando ni kukhatala ngu vamwani, vona va va tindiya ni vamame ka vo tala dibanzani. (Marku 10:29, 30) Vamwani va belela ka mthumo wa mbimo yotshe. Mthumo wa wungi wo txhumayela hamafuni kotshe wu mahwa ngu vanathu va txisikati. (Mas. 68:11) U nga va nyaphandule, ku ti ningetela ka mthumo wo aka mwendo kuthumela Bhetele. Maha mkombelo mayelano ni makungo ako. Bhula ni vamwani ava va nga sikota kuhokelela makungo oneyo ni kuzama kuwona ti u nga ti mahako kasi kuhokelela makungo ya ma fanako. Tsaniseka ka ti to kubela ka mthumo wa mbimo yotshe ti na ku tulela mikhanjo yo tsakisa ka mthumo wa Jehovha. w23.12 22 ¶16-17

Mbimo yi ku yako ku tshuketa xanisa ya hombe, nda lisima nguto kupfisisa ti to nda txikuluveta kuengisa txirumo txo pateka ka mthumo wo txhumayela. Ti nga maha ti hi karatela kuveka mapimo ka mthumo wo txhumayela ngako hi txi wonisana ni sikarato sa timale mwendo kuwukelwa. Ngu tihi ti nga hi vhunako ku hi thangetisa mthumo wa Mfumo? Ngu kuzumba hi di tsani to “Mkoma wa Mabutho” ani nathu. Ene a na hi vhuna ngako hi txi simama hi thangetisa silaveko sa Mfumo. Ngu toneto kha ha fanela hi thava txilo. (Hag. 2:4) Jehovha a lava hi veka mapimo ka mthumo wo hulukisa vathu ngu kusimama hi maha vagondiswa. Hagayi a kuzetile vathu va Jehovha ku va khateta kambe mthumo wo wuseta dithepele. Ngako va ti ko maha toneto Jehovha a ti na va “katekisa.” (Hag. 2:18, 19) Nathu hi nga tsaniseka ka ti to Jehovha a na katekisa mizamo yathu ngako hi txi thangetisa mthumo wu a nga hi ninga ku hi wu maha. w23.11 16 ¶8; 17 ¶11

Ka dipasi dakwe di a nga bhalela Varoma, mpostoli Paulo a txhamusete ti to votshe vathu va onhile. Se, ti kotekisa kutxani to Txizimu txi wona vathu vo kari i di vo lulama ni ku va si na txisolo? Kasi kuvhuna Makristu kupfisisa mhaka yiya, Paulo a wombawombile ngu Abrahamu. Ku vite mbimo yi Abrahamu a nga ti zumba ka ditiko da Kanana, a ha Jehovha a nga womba to Abrahamu m’thu wo lulama. Ngu kutxani Jehovha a di wombile toneto? Ina i nga va ngu ku Abrahamu a nga txi londisela ngu kupelela mlayo wa Mosi? Ahim-him. (Var. 4:13) Ha ti ziva toneto nguko mlayo wa Mosi wu ningilwe Vaisrayeli ku di pindile 400 wa malembe msana ka kuva Txizimu txi di wombile to Abrahamu m’thu wo lulama. Se ngu kutxani Jehovha a di wombile to Abrahamu m’thu wo lulama? Jehovha a kombisile wunene wu wu si faneliko ka Abrahamu se e womba ti to mbwo lulama ngu kona hawa ka likholo lakwe.—Var 4:2-4. w23.12 3 ¶4-5

Ka wusiku wonewo mprofeti Nathani a nga womba mapswi a ma ku txitimwi hawa, Jehovha a gete Nathani ti to Dhavhidha hi nga ene adi no akela dithepele Jehovha. (1 Mak. 17:3, 4, 11, 12) Dhavhidha a angulisile kutxani mbimo yi a nga amukela didungula donedo? Ene a khatile kusengeleta male ni silo simwani asi Solomoni a ndi no si lava kasi kuaka dithepele. (1 Mak. 29:1-5) Msana kova Jehovha adi gete Dhavhidha ti to hi nga ene a ndi no aka dithepele, a mahile txitumelelano nayo. Jehovha a thembisile Dhavhidha ti to mmweyo wa liveleko lakwe a ndina fuma kala kupinduka. (2 Sam. 7:16) Alakanya ti Dhavhidha a no ta tsakisa tona ka mafu ya maphya ka Mfumo wa Jesu wa 1000 wa malembe, mbimo yi a no ta ziva to Jesu i mmweyo wa liveleko lakwe. Atiya ti hi vhuna kuwona to hambi hi si ti koti kumahela Jehovha totshe ti hi nga txi ti navela ene a nga hi ninga makatekwa mamwani aya hi nga sa ma rinzela. w23.04 16 ¶8-10

Ngako u txi thava awe u nga thavelelwa ngu kugonda madungula o kari amu ka Bhiblia. Ngu txikombiso u nga mana kutsaniswa ka dibhuku da Jobe, Masalmo, Mavingu ni mapswi a Jesu ma manekako ka Matewu kapitulo 6. Ngako u txi maha mkombelo ni kugonda Bhiblia, awe u na mana kuthavelelwa ku kutako ngu ka Jehovha. Athu hi ngava ni kuthemba ti to mbimo yotshe Jehovha a na hi vhuna ngako hi txi wonisana ni timbimo to karata ka wutomi wathu. Athu gwita hi no va hokha. (Mas. 23:4) Jehovha a thembisa ku hi vhikela, ku hi tsanisa, ku hi seketela, ni ku hi thavelela. Isaya 26:3 yi hi ninga txitsanisekiso tximwani mayelano ni Jehovha. Yona yi womba tiya: “Awe u na xayisa ngu kudikha awule mapimo akwe ma nga tsana kwako; nguko ene wa kuthemba.” Ngu toneto, themba Jehovha ni ku londola totshe ti a mahako kasi ku kuvhuna. Ngako u txi maha toneto, u na simama u di tsani hambi ka timbimo to karata. w24.01 25 ¶16-17

Mapswi yawa ka m’bhalo wa nyamsi ma nga huhutelwa ma hetiseka nyamsi. Hahanze keto mapswi a Isaya a ya ma ku: “Se votshe vanana vako va na maha vagondiswa va Mkoma, ni kudikha ka vanana vako ku na maha ko enela. U na tsaniswa ngu kululama. . . . Nguko khu na mbi thava, hambi kuxamala, nguko kha ku na mbi kuhokela.” (Isaya 54:13, 14) Ni ona ma hetiseka ka timbimo tathu ni ku, ma hi thavelela. Hambi Sathani “Txizimu txo biha txa ha mafuni,” kha sikoti kuemisa mthumo awu wu mahwako kasi kugondisa vathu mayelano ni Jehovha. (2 Vak. 4:4) Wukhozeli wa ditshuri wu wusetilwe, ni ku kha wu nambi swa kambe wu nyetiswa ngu wukhozeli wa makuhu. Wona wu na simama kala kupinduka. Kha di ngaho ditxhari di no sikota kufuvisa vathu va Jehovha! w24.02 4 ¶10

Athu ha kuninga lisima ku ti ningetela kwathu ka Jehovha. Eto ta gwesa sisungo sathu mayelano ni timhaka ta mwaya. Athu ha ti karatela kasi kuhetisisa silaveko sa mwaya wathu. Kambe kha hi veki kudhunda ka mwaya wathu txitimwi ka kudhunda ka Jehovha. (Mat. 10:35, 36, NM; 1 Tim. 5:8) Mbimo yimwani ti lava hi maha sisungo asi si si tsakisiko maxaka athu kambe si tsakisako Jehovha. Jehovha mvangi wa mwaya. Ene a lava ti to mwaya wathu wu tsaka. (Vaef. 3:14, 15) Ngako hi txi lava kutsaka ngu ditshuri, ti lava hi maha timhaka ngu nzila ya Jehovha. U nga thuke u kanakana ti to Jehovha wa tsaka mbimo yi u mahako mizamo yo mthumela, mbimo yi u khatalelako mwaya wako ni ku wu ñola ngu lirando ni txixonipho.—Var. 12:10. w24.02 17 ¶11, 13