Tsaniseka ti to Jehovha wa kudhunda

1. Ngu kutxani u di ti ningetete ka Jehovha? (Wona ni mfota.)

INA wa di khumbula ditshiku di u nga tiningetela ngu dona ka Jehovha? Awe u mahile txisungo txonetxo nguku u mzivako kwati Jehovha ni ku u mrandako. U mthembisile ti to u na thangetisa kumaha kudhunda kwakwe ka wutomi wako ni ti to u na mranda ngu mbilu yako yotshe, ngu wutomi wako wotshe, ngu otshe mapimo ako ni ngu wotshe mtamo wako. (Marku 12:30) Kukhukhela koneho, lirando lako ngu ngene liya masoni li kula. Se u nga xamulisa kutxani ngaku m’thu a txo kuwotisa tiya: “Ina awe wa m’dhunda Jehovha ngu ditshuri?” Ha tsaniseka ti to u ndi na xamula u txi: “Ani na m’dhunda Jehovha kupinda vathu votshe ni silo sotshe.”

2-3. a) Ngu tihi ati Jehovha a lavako ku hi tsaniseka ka tona? (Jeremiya 31:3) b) Hi na bhula ngu txani ka gondo yiya?

² Kambe u ndi na xamulisa kutxani ngaku va txo kuwotisa tiya: “Ina awe wa tsaniseka ti to Jehovha wa kudhunda?” Ina u ndi na khata nguku titshuva msungo u si se xamula ngu kupimisa ti to khu fanelwi ngu lirando la Jehovha? Mwanathu wo kari wa txisikati awu a nga ñolwa ngu nzila yo biha i di ngadi mwanana a womba tiya: “Ani na tsaniseka ti to na m’dhunda Jehovha. Kambe makhambi mamwani na tiwotisa tiya: ‘Ina Jehovha wa ni dhunda?’” Se u nga tsanisekisa kutxani ti to Jehovha wa kudhunda ngu ditshuri?

³ Jehovha a lava ti to awe u tsaniseka to ene wa kudhunda. (Lera Jeremiya 31:3.) Phela ngene a nga kundindela ditshurini. Mbimo yi u nga tiningetela ni kubhabhatiswa, awe u mani ningo ya lisima ngutu i ku lirando lo thembeka la Jehovha. Eto ti lava kuwomba ti to ene wa kudhunda ngutu ni ku kha na mbi thuka e kuleka. Phela lirando lonelo li maha ti to Jehovha e wona vakhozeli vakwe kupata ni nawe kota ‘vathu vakwe.’ (Mal. 3:17) Jehovha a lava u tipfa ngaha mpostoli Paulo a nga tipfa ngu kona. Ene a ti tsaniseka ti to Jehovha wa m’dhunda aha koza e bhala tiya: “Nguko na tsaniseka ti to hambi lifo, hambi wutomi, hambi tingilozi, hambi mifumo, hambi silo sa konkuwa, hambi silo si tako, hambi mitamo, hambi kudemba, hambi kutshima mwendo txivangwa txihi ni txihi, kha si na kusikota ku hi hambanisa lirandoni la Txizimu, ali li ku ka Jesu Kristu Mkoma wathu.” (Var. 8:38, 39) Ka gondo yiya, hi na wona ti to ngu kutxani hi di fanete hi tsaniseka ti to Jehovha wa hi dhunda ni ti ti hi mahako hi tsaniseka ka toneto.

NGU KUTXANI I DI TA LISIMA KUTSANISEKA TI TO JEHOVHA WA HI DHUNDA?

4. Ngu yahi makuhu aya Sathani a lavako ti to hi ma kholwa ni ku hi nga maha txani kasiku hi ma lamba?

⁴ Ngaku hi txi tsaniseka ti to Jehovha wa hi dhunda, hi na sikota kuxula “siduko” sa Sathani. (Vaef. 6:11) Sathani a na maha totshe ti a nga tikotako kasiku hi lekisa kuthumela Jehovha. Mlawu wumwani awu a wu thumisako makuhu ya ti to Jehovha kha hi dhundi. Kambe eto hi nga ditshuri. Bhiblia yi fananisa Sathani ni “Ngonyamo.” (1 Pedro 5:8, 9) Ngonyamo yi dhunda kuxasela sihari asi si si nga ku ni mtamo ni si si si tikotiko kutivhikela sipune. Nguha kufanako, Sathani a dhunda ku hi xasela mbimo yi hi ti pfako hi di gumile mtamo, mbimo yi hi tipfako hi di karate, mbimo yi hi tipfako hi di karatekile ngu ti ti nga hi humelela kale, mbimo yi hi tipfako hi di karatekile ngu mhaka ya sikarato si hi wonisanako naso konku mwendo hi di karatekile ngu ti ti no humelela mbimo yi yi tako. (Mav. 24:10) Sathani wa tsaniseka ti to a nga hi lekisa kuthumela Jehovha ngaku hi di gumile mtamo. Kambe hi nga ‘lamba kutiningela ka Sathani’ nguku maha totshe ti hi nga tikotako kasi ku hi tsaniseka ti to Jehovha wa di dhunda.—Jak. 4:7.

5. Ngu kutxani hi di fanete kutsaniseka ti to Jehovha wa hi dhunda ni ku wa hi ninga lisima?

⁵ Ngaku hi txi tsaniseka ti to Jehovha wa hi dhunda, wuxaka wathu ni nene wu naya masoni wu tsana. Ngu kutxani hi txi womba toneto? Jehovha a hi wumbile hi di ni wusikoti wo kombisa lirando ka vamwani ni ku nathu ha tilava kukombiswa lirando. Ngaku m’thu wo kari a txi hi dhunda, nathu ha kuzeteka ku hi m’dhunda. Se mbimo yi hi tsanisekako ti to Jehovha wa hi dhunda ni ku wa hi ninga lisima, eto ta hi kuzeta ku nathu hi m’dhunda. (1 Joh. 4:19) Mbimo yi hi yako hi m’dhunda, nene aya masoni e hi dhunda. Bhiblia yi womba tiya: “Tshuketani hafuhi ka Txizimu, kasi ni txona txi na tshuketela hafuhi kwanu.” (Jak. 4:8) Se hi nga maha txani kasiku hi tsaniseka ti to Jehovha wa hi dhunda ngu ditshuri?

NJI TXANI ATXI TXI NO HI VHUNA KUTSANISEKA TI TO JEHOVHA WA HI DHUNDA?

6. Nji txani txi u nga txi mahako ngaku u si tsaniseki ti to Jehovha wa kudhunda?

⁶ Maha mkombelo mbimo sotshe. (Luka 18:1; Var. 12:12) Kombela Jehovha kasiku e kuvhuna u ti wona nga ti ene a kuwonisako tona. Maha toneto makhambi ya mangi ngu ditshiku ngaku ti txi laveka. Ditshuri ti to mbimo yimwani mbilu yako yi nga kukanganyisa, se ti kukaratela kukholwa ti to Jehovha wa kudhunda. Kambe khumbula ti to Jehovha mbwa hombe kupinda mbilu yako. (1 Joh. 3:19, 20) Ene wa wona tifanelo ta lisima kwako to nem awe khu tizivi to u nato. (1 Sam. 16:7; 2 Mak. 6:30) Ngu toneto, u nga leke kugela Jehovha ati u ti pfisako tona ni ku mkombela ti to e kuvhuna ku u tsaniseka ti to ene wa kudhunda. (Mas. 62:8) Kambe ku ni timwani ti hi fanelako ku timaha msana ko maha mkombelo. Ngu tihi ta kona?

7-8. Dibhuku da Masalmo di hi vhunisa kutxani ku hi tsaniseka to Jehovha wa hi dhunda?

⁷ Themba ati Jehovha a ti wombako. Jehovha a thumisile moya wakwe wo sawuleka kasi kuvhuna vabhali va Bhiblia ku ve bhala mayelano ni tifanelo takwe. Wona ti Dhavhidha a nga tiwomba mayelano ni nzila yi Jehovha a hi dhundako ngu yona. Ene ati khene: “Mkoma a hafuhi ka vale va ku kupandisekani ka mbilu, ene wa hanyisa avale va si swiko va di ni kuthemba.” (Mas. 34:18) Mbimo yi u nga pandiseka, ti nga maha u pimisa to kha ngaho wu atxi pfisisako txikarato txako. Kambe Jehovha a thembisa kuva hafuhi ni nawe, nguku wa ti ziva ti to ka mbimo yoneyo awe wa txi lava txivhuno txakwe. Dhavhidha a tshumete e bhala tiya: “U sengeletile mirongo yangu amu ka txiya.” (Mas. 56:8) Jehovha wa kuwona mbimo yi u nga pandiseka ni mbimo yi u xanisekako. Ene wa khatala ngu ngawe ni ku wa kupfa kupanda ku u kupfako. Kufana ni mati i ku ya lisima ka m’thu wu a ku txiwulani, mirongo yathu nja lisima ka Jehovha. Masalmo 139:3 yi womba tiya: “Mkoma wa tiziva totshe tinzila tangu.” Jehovha wa tiwona totshe a ti u ti mahako, kambe ene a veka mapimo ka timhaka tatinene ati u ti mahako. (Vaheb. 6:10) Ngu kutxani? Nguku ene wa tininga lisima totshe ti u ti mahako kasiku u mtsakisa.a

⁸ Jehovha wa thumisa tindimana ta Bhiblia kasiku e kutsanisekisa ti to ene wa kudhunda ni ku wa khatala ngu ngawe. Kambe ngaha hi nga tiwona ngu kona makhatoni, Sathani a lava to u kholwa to Jehovha kha kudhundi. Se ngaku u txi kanakana ti to Jehovha wa kudhunda ti wotise tiya: ‘Na kholwa ka mani, ka “tate wa makuhu” mwendo ka “Txizimu txa ditshuri”?’—Joh. 8:44; Mas. 31:5, NM.

9. Ngu tihi ati Jehovha a tsanisekisako votshe vale va m’dhundako? (Eksodha 20:5, 6)

⁹ Alakanyisisa ngu nzila yi Jehovha a tipfako ngu yona ngu vale va m’dhundako. Pimisa ngu ti Jehovha a nga gela Mosi ni va Israyeli. (Lera Eksodha 20:5, 6.) Jehovha a thembisa kusimama e kombisa lirando lo thembeka ka votshe avale va m’dhundako. Mapswi oneyo ma hi tsanisekisa ti to Jehovha wa va dhunda avale va m’dhundako. (Neh. 1:5) Se ngaku u txi lava kutsaniseka ti to Jehovha wa kudhunda tiwotise tiya: ‘Ina ani na m’dhunda Jehovha?’ I di ti to awe wa m’dhunda Jehovha ni ku u maha totshe ti u nga tikotako kasi ku u mtsakisa, tsaniseka ti to ene wa kudhunda ngu ditshuri. (Dhan. 9:4; 1 Vak. 8:3) Se aku awe u m’dhundako Jehovha, u nga kanakani ti to nene wa kudhunda.

10-11. Ngu tihi ati Jehovha a lavako to u ti khumbula mayelano ni mterulo? (Vagalatiya 2:20)

¹⁰ Alakanyisisa ngu mterulo. Mterulo i ningo ya lisima ayi Jehovha a nga ninga vathu. (Joh. 3:16) Kambe ina nawe ya kuvhuna ningo yiya? Ina! Pimisa ngu txikombiso txa mpostoli Paulo. Ene a ti mahile timhaka tatingi to biha. Hambi msana kova a di vite Mkristu, ti txi lava e simama e lwisana ni kwambi hetiseka kwakwe. (Var. 7:24, 25; 1 Tim. 1:12-14) Kambe Paulo a txi wona mterulo kota ningo yi Jehovha a nga mninga ngu kukongoma. (Lera Vagalatiya 2:20.) Khumbula ti to Jehovha a thumisile moya wakwe wo sawuleka ti to e vhuna Paulo ku e bhala mapswi yawa, ni ku totshe ati ti ku mu ka Bhiblia ti bhaletwe ku hi vhuna. (Var. 15:4) Ngu toneto, Jehovha a lava ti to u tsaniseka to mterulo i ningo ayi yi wuyelisako awe ngu kukongoma. Ngaku u txi wona mterulo ngu nzila yiya, u na tsaniseka ti to Jehovha wa kudhunda ngu ditshuri.

¹¹ Athu ha m’bonga ngutu Jehovha ngu kuva a di rumete Jesu kasiku e ta hi fela. Kambe txivangelo tximwani txi nga maha ti to Jesu eta hamafuni, ngu ta hi gondisa ditshuri mayelano ni Jehovha. (Joh. 18:37) Ditshuri donedo di pata lirando li Jehovha a kunalo ngu ngathu.

JESU A HI VHUNISA KUTXANI KASIKU HI TSANISEKA TI TO JEHOVHA WA HI DHUNDA?

12. Ngu kutxani hi nga thembako ati Jesu a nga tiwomba mayelano ni Jehovha?

¹² Mbimo yi a nga ti hamafuni, Jesu a txi tidhunda kubhulela vathu mayelano ni Jehovha. (Luka 10:22) Nathu hi ni sivangelo so pfala so hi themba ati Jesu a nga ti womba mayelano ni Jehovha. Ngu kutxani? Nguku Jesu a hetile mbimo yo lapha a di ni Jehovha khe nzumani a si se kuta hamafuni. (Vakl. 1:15) Jesu atxi tipfa a txi dhundwa ngutu ngu Jehovha. Ene a tshumete e wona nzila yi Jehovha ava dhundako ngu yona vathu vo thembeka. Kambe Jesu a hi vhunisa kutxani ku hi tsaniseka ti to Jehovha wa hi dhunda?

13. Ngu tihi ati Jesu a lavako hi tiziva mayelano ni Jehovha?

¹³ Jesu a lava hi ziva nzila yi Jehovha a tipfako ngu yona ngu ngathu. Ka dibhuku da Matewu, Marku, Luka ni Johani, Jesu a dhani Jehovha kota “Tate” konamu ka 160 wa makhambi. Se mbimo yi a nga txi womba-womba ni va londeteli vakwe, Jesu a txi dhana Jehovha kota “Tate wanu.” (Mat. 5:16; 6:26) Malanda a mangi a Jehovha aya ma nga hanya Jesu a si se kuta hamafuni, ma txi dhana Jehovha kota ‘wa Mtamo Wotshe,’ ‘Nyatxitimwi’ ni ‘Mvangi.’ Kambe makhambi a mangi, Jesu atxi thumisa dipswi adi di nga ti tolovelekile da ‘Tate.’ Ngu nzila yoneyo, Jesu a kombisile to Jehovha a lava ti to malanda akwe me va vangana vakwe. Ti hakubasani ti to Jesu a lava hi wona Jehovha nga ti ene a m’wonisako tona, kota Tate wa wunene awu a dhundako ngutu vanana vakwe. A hi woneni sikombiso simbidi asi si kombisako nzila yi Jesu a nga thumisa ngu yona dipswi “Tate” atxi womba-womba ngu Jehovha.

14. Jesu a ti kombisisile kutxani ti to hi va lisima ka Jehovha? (Matewu 10:29-31) (Wona ni mfota.)

¹⁴ Wona ti Jesu a nga ti womba ka dibhuku da Matewu 10:29-31. (Lera.) Sinyana asi si dhanwako ku sindili nza sidotho, ni ku si na mbi thuka si dhunda mwendo kukhozela Jehovha. Hambiketo, Tate wathu wa si ninga lisima ni ku kha txi ngaho ni txa tximwetxo txi wako a si tizivi. Se pimisa ngu nzila yi Jehovha a ningako ngu yona lisima vathu ava va m’dhundako ni ku mkhozela! Jesu a tshumete e hi gela ti to Jehovha wa wu ziva mtengo wa misisi ayi yi ku ka msungo wathu. Se a ku Jehovha a zivako ni timhaka ta tidotho ngu ngathu, hi nga tsaniseka ti to mbimo yotshe a na hi khatalela. Ngu ditshuri, Jesu a lava ti to hi tsaniseka to hi va lisima ka Tate wathu wa nzumani.

15. Hi gonda txani ka mapswi a Jesu mayelano ni Tate wathu wa nzumani? (Johani 6:44)

¹⁵ Wona txikombiso txa wumbidi aha Jesu a nga thumisa dipswi “Tate” ka Johani 6:44. (Lera.) Phela ngene Jehovha a nga kundindela ditshurini. Ngu kutxani a di mahile toneto? Nguku Tate wako wa nzumani a woni to awe u ni mbilu ya yinene ni tifanelo tatinene. (Mith. 13:48) Mbimo yi Jesu a nga womba mapswi ya ma ku ka Johani 6:44, ti nga maha a txi pimisa ngu mapswi ya hi ma manako ka dibhuku da Jeremiya 31:3. Ka ndimana yiya Jehovha a gela tiya vathu vakwe: “Ni ku randile ngu lirando li li si gwitelwiko.” (Jer. 31:3; fananisa ni Hoseya 11:4.) Eto ti lava kuwomba ti to Tate wako wa nzumani wa simama e wona tifanelo tatinene ati awe u ku nato, to ku ti lava awe nem khu tizivi to u nato.

16. a) Ngu tihi ti Jesu a hi gondisako mayelano ni Jehovha ni ku ngu kutxani hi di fanete ku ti kholwa? b) Nji txani atxi txi nga kutsanisekisako ti to Jehovha i Tate wamnene kupinda votshe? (Wona ni dikwadro adi di ku ‘Tate awu hotshethu hi mlavako’.)

¹⁶ Jesu a wombile ti to Jehovha hi nga Tate wakwe dwe, kambe i Tate wako nawe. Jesu a lava ti to u tsaniseka to Jehovha wa kudhunda ni ku wa khatala ngutu ngu ngawe. Se ngaku mbimo yimwani u txi kanakana ngu lirando la Jehovha ti wotise tiya: ‘Hi nga tshuku ku ni themba mapswi ya Jesu awu a mzivako kwati Tate wathu ku pinda votshe vathu ni wu mbimo yotshe a wombawombako ditshuri?’—1 Pedro 2:22.

SIMAMA U TSANISEKA TO JEHOVHA WA KUDHUNDA

17. Ngu kutxani hi di fanete kusimama hi kholwa ti to Jehovha wa hi dhunda?

¹⁷ Hi fanete kumaha totshe ti hi nga tikotako kasi ku hi tsaniseka to Jehovha wa hi dhunda. Ngaha hi nga tiwona ngu kona ka gondo yiya, Sathani mlala wo txhariha ni ku a na maha totshe kasiku hi leka kuthumela Jehovha. Ene kha na mbi humula kuzama ku hi maha hi kholwa to Jehovha kha hi dhundi. Ngu toneto, hi fanete kutiwonela ka mlawu wonewo!—Jobe 27:5.

18. U nga tsanisekisa kutxani ti to Jehovha wa kudhunda?

¹⁸ Kasiku u tsaniseka ti to Jehovha wa kudhunda, simama u maha mkombelo kasiku u tiwona nga ti ene a kuwonisako tona. Alakanyisisa ngu tindimana ta Bhiblia ati ti kombisako nzila yi Jehovha a kudhundako ngu yona ni nzila yi ene a khatalako ngu yona ngu vale va m’dhundako. Khumbula ti to Jehovha wa va dhunda vale va m’dhundako. U nga divale ti to mterulo i ningo yi Jehovha a nga kuninga ngu kukongoma. Tshumela u themba ati Jesu a nga tiwomba mayelano ni Jehovha, to ene i Tate wako wa nzumani. Se ngaku m’thu a txi kuwotisa tiya: “Ina awe wa tsaniseka ti to Jehovha wa kudhunda?” awe u na xamula u si titshuvi msungo u txi: “Ina wa ni dhunda! Ni ku ni maha totshe a ti ni nga ti kotako kasiku ni kombisa ti to nani na m’dhunda.”