Tsaniseka to Jehovha a ku divalete

1-2. Ngu tihi ati Jehovha a ti mahako ngako hi txi tisola ka sionho sathu? (Wona mfota wa kapa.)

MKOMA Dhavhidha a ti zumbela kutipfa mnando ngu mhaka ya sionho si a nga ti si mahile. (Mas. 40:12; 51:3) Kambe mbimo yi a nga tisola, e maha kutxitxa ka wutomi wakwe, Jehovha a m’divalete. (2 Sam. 12:13) Kota wuyelo, Dhavhidha a tsakile mbimo yi a nga wona to Jehovha a m’divalete sionho sakwe.—Mas. 32:1.

² Kufana ni Dhavhidha, nathu hi nga tsaka ngu kuziva ti to Jehovha a hi divalete e tshumela e hi komba wuxinji. Hambi i di ti to hi mahile sionho sa hombe, kambe hi txo maha mkombelo, hi ya womba-womba ni madhota, hi maha ti hi nga ti kotako kasiku hi si tshumeli hi maha sionho soneso, Jehovha a na hi divalela ngu ditshuri. (Mav. 28:13; Mith. 26:20; 1 Joh. 1:9) Phela ta hi thavelela kuziva to ngako Jehovha a txi hi divalela, o pfhuta sionho sathu, kha si khumbuli kambe!—Eze. 33:16.

3-4. Mwanathu mmwani wa txisikati a tipfisile kutxani msana kova a di bhabhatisilwe, ni ku hi na bhula ngu txani ka gondo yiya?

³ Mbimo yimwani hi nga thuka hi kana-kana to Jehovha a hi divalete ngu ditshuri. Jennifer nene a ti pfisile toneto. Ene a gondisilwe ditshuri ngu vaveleki vakwe. Kambe mbimo yi a nga kula, a khatile kumaha timhaka to biha e sisela vaveleki vakwe. Se ku di pindile malembenyana, a txitxile mahanyelo akwe, e ningetela wutomi wakwe ka Jehovha e bhabhatiswa. Ene a womba tiya: “Mbimo yi ni nga si se bhabhatiswa ni txi maha wugango, ni ti didevi, ni ti m’thu wa mazunga ni kudhunda ngutu tithomba. Ani ni txi tiziva to Jehovha a nga divalela sionho sathu ngu kuthumisa digandelo da Jesu Kristu. Hambiku ni ngadi tisote, ni si kholwi ti to Jehovha a ni divalete ngu ditshuri.”

⁴ Ina mbimo yimwani nawe wa thuka u tipfa nga Jehovha kha kudivalela? Jehovha a lava ti to u tsaka kufana ni ti Dhavhidha a nga tipfisa tona mbimo yi a nga divalelwa sionho sakwe. Ka gondo yiya, hi na wona to ngu kutxani i di ta lisima kutsaniseka to Jehovha a hi divalete ni ti ti nga hi vhunako kumaha toneto.

NGU KUTXANI I DI TA LISIMA KUTUMELA TO JEHOVHA A HI DIVALETE?

5. Ngu tihi ati Sathani a lavako hi kholwa ka tona? Ningela txikombiso.

⁵ Ngako hi txi tumela to Jehovha a hi divalete, hi na vayilela mlawu wa Sathani. Khumbula ti to Sathani a na maha ti a nga tikotako kasiku e hi tsivela kuthumela Jehovha. Ene a maha toneto ngu kuzama ku hi maha hi kholwa to sionho sathu kha si divalelwi. Alakanya ngu txikombiso txa wamwamna wa khe Korinto, awu a nga thaviswa dibanzani ngu kuva a di mahile wugango. (1 Vak. 5:1, 5, 13) Ngu kutsimbila ka mbimo, wamwamna wule a ti sote. Kambe Sathani a txi lava ti to vanathu va Korinto va si m’divaleli nem va si mu amukeli dibanzani. I singeto dwe, Sathani a txi lava ti to wamwamna wule e tiwona a si fanelwi ngu kudivalelwa, ‘e tipfa ngutu mnando, e guma mtamo’ aha koza e leka kuthumela Jehovha. Ni nyamsi, Sathani a lava hi tipfa mnando hi pimisa to Jehovha kha na mbi thuka e divalela sionho sathu. Kambe kha na mbi hi kanganyisa, nguko “ha tiziva tipulani takwe.”—2 Vak. 2:5-11.

6. Nji txani atxi txi nga hi vhunako kwambi zumbela kutipfa mnandu?

⁶ Ngako hi txi tumela to Jehovha a hi divalete, hi nga tshumela hi va ni litsako. Ngu mtolovelo, mbimo yi hi mahako txionho ha tipfa mnando. (Mas. 51:17) Phela eto ndinene, nguko hi txi tumbula to hi mahile to biha, hi nga maha kutxitxa hi maha tatinene. (2 Vak. 7:10, 11) Phela hi txo zumbela kutipfa mnandu hambi msana kova hi di tisote ka sionho sathu, hi nga godhola hi leka kuthumela Jehovha. Kambe ngako hi txi tumela to Jehovha a hi divalete ngu ditshuri, hi na ema kutipfa mnandu. Hi na simama hi mthumela hi di ni livhalo lo basa ni ku hi na va ni litsako. (Vakl. 1:10, 11; 2 Tim. 1:3) Nji txani atxi txi nga hi vhunako kutumela ti to Jehovha a hi divalete?

NJI TXANI ATXI TXI NGA HI VHUNAKO KUTUMELA TI TO JEHOVHA A HI DIVALETE?

7-8. Ngu tihi ati Jehovha a nga ti womba ngu ngene, ni ku ngu tihi ati hi nga tsanisekako ka tona? (Eksodha 34:6, 7)

⁷ Pimisa ngu ti Jehovha a nga tiwomba mayelano ni nene. Ngu txikombiso, wona ti a nga gela Mosi ka Mmango wa Sinayi.a (Lera Eksodha 34:6, 7.) Hambiku Jehovha a ku ni tifanelo ta tingi tatinene, a sawute kugela Mosi ti to ene “Txizimu txa wumbilu ni kupfela.” Ina Txizimu txo nga tiya, txi nga lamba kudivalela dilanda da txona a di di nga tisola ngu ditshuri? Jehovha kha nga ni tshofu ni ku ene Txizimu txa wumbilu, kha nge tandeki ku hi divalela.

⁸ Hi nga tsaniseka ti to ati Jehovha ati wombako to ene Txizimu txa wumbilu, ditshuri nguko kha hembi. Se hi nga kholwa ka ti a ti wombako. (Mas. 31:5) Ngako ti txi kukaratela kudivala sionho si singa pinda, tiwotise tiya: ‘Ina na kholwa to Jehovha Txizimu txa wumbilu ni wuxinji ni ku wa divalela votshe va va ti solako ngu ditshuri? Ngu kutxani ni si kholwi to Jehovha ani divalete?’

9. Masalmo 32:5 a hi gondisa txani mayelano ni nzila yi Jehovha a divalelako ngu yona sionho sathu?

⁹ Pimisa ngu ti Jehovha a nga hi gondisa amu ka Bhiblia mayelano ni nzila yi a hi divalelako ngu yona. Ngu txikombiso, wona ti Dhavhidha a nga ti bhala mayelano ni divalelo ya Jehovha. (Lera Masalmo 32:5.) Ene a ti khene: “U divalete txionho txangu.” Dipswi da Txihebheru a di di nga hunduluxelwa va txi “kudivalela,” di nga txhamusela “kugula” mwendo “kuthavisa.” Mbimo yi Jehovha a nga divalela Dhavhidha, ti txi fana ni ku a di ko gula sionho sakwe eya si tshotsha kule. Phela Dhavhidha a tipfite a di pepile ka sionho si si nga txi mnemela. (Mas. 32:2-4) Nathu hi nga pfa kupepa ku kufanako. Ngako hi txi tisola, kha ha fanela kusimama hi nemelwa ngu sionho si Jehovha a nga si thavisa eya si tshotsha kule kasiku hi sala hi di pepile.

10-11. Mapswi ya ma ku “a tiemisete kudivalela” ma hi gondisa txani ngu Jehovha? (Masalmo 86:5)

¹⁰ Lera Masalmo 86:5. Ahawa Dhavhidha a womba ti to Jehovha “a tiemisete kudivalela.” Bhiblia yimwani yi womba tiya mayelano ni Jehovha: “[Ene] wa ‘divalela,’ eyo ‘mazumbelo akwe.’” Ngu kutxani a di zumbisile tiya? Bhiblia yi simama yi txhamusela tiya: “Wa amukela ngu mbilu votshe vale va ku khozelako.” Ngaha hi nga tiwona ngu kona ka gondo yi yi nga pinda, Jehovha a thembisa kukombisa lirando lakwe lo thembeka ka va va m’dhundako ni ku kha na mbi thuka eva leka. Se ngako va txi onha ve tisola, Jehovha wa simama e kombisa lirando lakwe lo thembeka ni kuva divalela nguko ‘mbwa hombe ngutu mu ko divalela.’ (Isaya 55:7) Ngako ti txi ku karatela kutsaniseka to Jehovha a ku divalete, u nga tiwotisa tiya: ‘Ina na kholwa ti to Jehovha a tiemisete kudivalela votshe vale va ti solako? Ina na tsaniseka ti to Jehovha a na ni divalela ngako ni txi tisola?’

¹¹ Ta hi thavelela kuziva ti to Jehovha wa tiziva ti hi nga mahiswa tona. (Mas. 139:1, 2) Ahi woneni a ti Dhavhidha a nga tiwomba ka Masalmo mamwani, ati ti no hi vhuna kuwona to Jehovha wa ti lava ku hi divalela.

NGU TIHI TI JEHOVHA A TI KHUMBULAKO NGU NGATHU?

12-13. Ngu kuya Masalmo 103:14, ngu tihi ati Jehovha a ti khumbulako ngu ngathu?

¹² Lera Masalmo 103:14. Dhavhidha a wombile ti to Jehovha “wa ti alakanya ti to athu hi lithulu dwe.” Ngu mapswi yawa, Dhavhidha a txhamusete txivangelo tximwani txi mahako Jehovha e ti emisela kudivalela ava va ti solako ka sionho sawe: Ngu ti to ene wa tiziva to kha ha hetiseka. Kasiku hi pfisisa kwati mhaka yiya, a hi xolisiseni mapswi aya Dhavhidha a nga ma womba.

¹³ Dhavhidha a wombile ti to Jehovha wa “tiziva ti athu hi nga wumbiswa tona.” Jehovha a mahile Adhamu ngu “lithulu la dibumba.” Ene wa tiziva ti hi nga mahiswa tona ni silaveko sathu. Ngu txikombiso, hi ni txilaveko txo dya, txo otela ni kuhefemula, hambi vathu vo hetiseka va natxo txilaveko txiya. (Gen. 2:7) Kambe mbimo yi Adhamu ni Evha va nga onha, vathu va ve lithulu ngu nzila yimwani, ti kombetelako kwambi hetiseka. Kota vanana va Adhamu, nathu hi tshapetwe ngu txionho atxi txi hi mahako hi maha timhaka to biha. Jehovha wa tiziva kwati eto. Mbimo yi Dhavhidha a nga womba to Jehovha wa ti “khumbula” to hi lithulu, a txi lava kuwomba ti to ene wa tiziva to hi vaonhi. Se mbimo yi hi mahako txionho hi tshumela hi tisola, Jehovha wa hi komba wumbilu ni ku wa hi divalela.—Mas. 78:38, 39.

14. a) Ngu tihi ati Dhavhidha a nga tiwomba mayelano ni nzila yi Jehovha a hi divalelako ngu yona? (Masalmo 103:12) b) Txikombiso txa Dhavhidha txi hi gondisa txani ngu Jehovha? (Wona dikwadru adi di ku “Nzila yi Jehovha a hi divalelako ngu yona.”)

¹⁴ Nji txani tximwani atxi txi nga hi tsanisekisako to Jehovha wa hi divalela? (Lera Masalmo 103:12.) Dhavhidha a womba to ngako Jehovha a txi hi divalela, Ene a tshotsha kule sionho sathu “nga ti wutxani ku kule ni mswa-ditambo.” Nguha hi tizivako ngu kona, wutxani ku kule ngutu ni mswa-ditambo, se kha si na kuthuka si di mananile. Se eto ti womba to mbimo yi Jehovha a divalelako sionho sathu, ti fana ni ku a txo si teka eya si tshotsha kule ngutu tatinene. Kha txi ngaho atxi txi no mmaha e khumbula mwendo e hi khumbutisa sionho sathu kasiku e hi tsayisa.—Eze. 18:21, 22; Mith. 3:19.

15. Hi nga maha txani ngako hi txi zumbela kutipfa mnandu ngu sionho si hi nga maha kale?

¹⁵ Mapswi a Dhavhidha ma ku ka Masalmo 103, ma nga kuvhunisa kutxani kasi kutsaniseka to Jehovha a ku divalete? Ngako hi txi simama hi tisotela ngu sionho si singa pinda, hi nga khumbula ati Jehovha a ti pfisako tona. Ene wa khumbula ti to athu kha ha hetiseka ni ku a tiemisete kudivalela votshe vale va ti solako. Khumbula kambe ti to Jehovha kha zumbeli khumbula sionho si se a nga hi divalela, ni ku kha na mbi thuka e hi tsayisa ngu mhaka sionho asi si nga pinda. Se nathu kha ha fanela ku tisotela ngu sionho a si hi nga divalelwa. (Mas. 130:3) Ngako hi txi tsaniseka to Jehovha a hi divalete ngu ditshuri, hi na mbi zumbela kutipfa mnandu kambe hi na simama hi thumela Jehovha hi di tsakile.

16. Ningela txikombiso txa nzila yi ti ku ni phango ngu yona kuzumbela ku tisotela ngu sionho si Jehovha se a nga hi divalela. (Wona ni mfota.)

¹⁶ Alakanyisisa ngu txikombiso txiya. Ngako m’thu a txi tsimbitisa mmovha, mbimo yimwani ti nga lava e wona ka txibuko kasi kuwona ti ti mahekako msana. Kambe ti nga va ni phango ngako a txo zumbela kuwonetela ha ka txibuko. Kasiku e tsimbitisa kwati, ti lava e wonetela masoni i ku mu a yako kona. Nguha kufanako, mbimo yimwani ndinene kukhumbula tiphazamo ti hi nga maha kale, nguko ti na hi vhuna ku hi si tshumeli hi maha tiphazamo toneto ta timweto. Kambe hi txo zumbela kuveka mapimo ka tiphazamo ti hi nga ti maha, ti nga hi godholisa ti hi maha hi leka kuthumela Jehovha. Hahanze keto, hi fanete kusimama hi thumela Jehovha, hi veka mapimo ka wumangwana wu a nga hi thembisa, mbimo yi ‘hi no mbi alakanya timhaka tile ti nga pinda.’—Isaya 65:17; Mav. 4:25.

U NGA KANAKANI TO JEHOVHA A KU DIVALETE

17. Ngu kutxani hi sa fanela kukanakana to Jehovha wa hi dhunda ni ku wa ti lava ku hi divalela?

¹⁷ Hi fanete kutsaniseka to Jehovha wa hi dhunda ni ku mbimo yotshe a tiemisete ku hi divalela. (1 Joh. 3:19) Ngu kutxani? Nguko Sathani a na simama e maha totshe ti a nga tikotako kasiku e hi maha hi kanakana to Jehovha wa hi dhunda ni ku wa divalela. Eto timwani ta tipulani a ti a ti thumisako kasi ku hi maha hi leka kuthumela Jehovha. Se aku magwito ma yako me tshuketela, a na simama e thumisa tipulani toneto nguko wa tiziva to mbimo yakwe yi komile. (Mtu. 12:12) Se hi fanete kusimama hi di thembekile ka Jehovha!

18. U nga maha txani kasi kukombisa to Jehovha wa kudhunda ni ku a tiemisete ku kudivalela?

¹⁸ Ka gondo ayi yi nga pinda, hi woni ati u nga ti mahako kasiku u tsaniseka to Jehovha wa kudhunda. Ka gondo yiya, hi woni ati u nga ti mahako kasiku u tsaniseka to Jehovha a ku divalete ngu ditshuri. Ngu toneto, tihe mbimo yo alakanyisisa ngu nzila yi Jehovha a hi divalelako ngu yona. U nga divali to Jehovha wa tiziva to khwa hetiseka ni ku a tiemisete ku kukomba wumbilu. Tshumela u khumbula to ngako Jehovha a txi kudivalela, ene o kudivalela ngu ditshuri. Phela etxo txivangelo txo u va ni litsako nguko wa tsaniseka to Jehovha a ni wumbilu. Se u nga womba kufana ni Dhavhidha mbimo yi a nga khene “na bonga Jehovha nguko u divalete ‘mnandu wa txionho txangu’!”—Mas. 32:5.