Hi kombisa lirando ngu kuseketela kukawuka ka Jehovha

Kuthaviswa ka m’thu dibanzani ti vhikela dibanza ni kutsayisa vaonhi ava va si tisoliko. (1 Vak 5:6, 11) Mbimo yi hi seketelako kukawuka ka Jehovha, hi va hi txi kombisa lirando. Ngu kutxani i di kukombisa lirando ka Jehovha hambiku kuthaviswa ka m’thu dibanzani ti pandako ka siro sa mwaya ni ka komisawu ya wulamuli?

Ngako hi txi seketela lulamiselo yo thaviswa dibanzani hi kombisa to ha dhunda ditina da Jehovha ni milayo yakwe yo guleka. (1 Ped 1:14-16) Hi tshumela hi kombisa ti to ha dhunda m’thu wu a nga thaviswa dibanzani, nguko hambiku kukawukwa ti pandako kambe ngu magwito “kuninga mihando ya kudikha ni ya kululama.” (Vaheb 12:5, 6, 11) Kutitshanganisa ni m’thu wu a nga thaviswa dibanzani mwendo a nga ti thavisa apune tifana ni kueyisa kukawuka ka Jehovha. Hi fanete kukhumbula ti to mbimo yotshe Jehovha a kawuka malanda akwe ngu “wululamo.” (Jer 30:11) Ngu toneto, he simameni ni txiemiso txathu txa moya hi seketela kukawuka ka Jehovha ni ku hi si gumelwi ngu themba ya ti to awu a nga thaviswa dibanzani a na tshumelela ka Tate wathu wa wumbilu Jehovha.—Isa 1:16-18; 55:7.

XALELA VHIDHIYO YI YI KU: SIMAMA U THEMBEKA NGU MBILU YOTSHE U GWITA U XAMULA SIWOTISO SIYA:

• 

  Ngu kuhi kupanda aku vaveleki va nga kupfako ngako mwanana a txi leka Jehovha?

• 

  Dibanza di nga wu vhunisa kutxani mwaya wu ku ku ni m’thu wu a nga thaviswa dibanzani?

• 

  Ngu yahi matimu aya ma ku mu ka Bhiblia aya makombisako lisima lo thembeka ka Jehovha kupinda mwaya wathu?

• 

  Hi nga kombisisa kutxani ti to ha thembeka ka Jehovha kupinda mwaya wathu?