Txivhuno ka vavasikati ava va nõlwako ngu nzila yo biha
“ HAMAFUNI kotshe, timiliyoni ta mahorana ni vavasikati va khala kuñolwa ngu nzila yo biha. Ina nawe u khala kuñolwa ngu nzila yo biha? Phela Txizimu txa khatala ngu wuxayiseki wako. Se wona to ngu kutxani Txizimu txi txi khatala ngu wuxayiseki wako ni kutshumela u wona ati Txizimu txi no maha ngu vale va xanisako vavasikati.”
Mapswi aya ma ku txitimwi ma maneka makhatoni ka msungo mhaka awu wu ku Vuhlayiseki Bya Vavasati—Leswi Bibele Yi Swi Vulaka, ka site ya jw.org. Magwito ka gondo yiya, ku ni link ayi u nga bhaxarako ngu yona msungo mhaka wuwa ngu PDF. Awe u nga imprimira didungula di ku ka msungo mhaka wonewo. Mwanathu Stacy wa Estados Unidos a womba tiya: “Ani ni imprimirile didungula adi di ku ka msungo mhaka wuwa. Msana keto, ani ni mwanathu mmwani wa txisikati hi tekile makopiya yale hi tsula nawo ka wukhalo awu vavasikati ava va nga nõlwa ngu nzila yo biha va khatalelwako ka wona, ka teritoriyo ya dibanzani kwangu.”
Wamsikati mmwani a thumako aha ku khatalelwako vavasikati ava va nga nõlwa ngu nzila yo biha a wotisile ti to ina ti nga koteka ku ve m’siyela siphephana simwani kasiku e ta ninga vavasikati vamwani ava va hanyako ka wukhalo wule. Se kota wuyelo, ku ningetwe 40 wa siphephana ni 30 wa makartawu a site ya jw.org. Se ditshiku dimwani, muwoneleli wa wukhalo wule a kombete vanathu vale ti to ve komba ava va zumbako ka wukhalo wule ati yi mahiswako tona gondo ya Bhiblia.
Ka dikhambi dimwani, Stacy ni vanathu vambidi va vite ni wuyelo yo tsakisa ka wukhalo wumwani wo xayisa vavasikati ava va nga nõlwa ngu nzila yo biha. Kona kheya, va di ya siya 5 wa siphephana ni ku va kombetwe to ve siya simwani siphephana. Se mthumi mmwani a wombile tiya: “Txiphephana txiya txi na vhuna vavasikati ava va ku hawa. Phela ngu toneto hi nga txi ti lava.” Ka dikhambi dimwani, vavasikati vo tala va wukhalo wuleya va tshanganile kasi kuta wona nzila yi gondo ya Bhiblia yi tsimbitiswako ngu yona, se vavasikati vambidi va wombile to va txi tsakela kuxalela mitshangano ya magwito ka divhiki donedo.
Stacy a womba tiya: “Ti xamatisile ngutu kuwona nzila ayi votshe vathu va makhalo yale va nga tsaka ngu yona mbimo yi va nga lera didungula diya do tsakisa. Kuva hi di imprimirile msungo mhaka wuleya, ti mahile to vathu ve wu tsakela kulera ni ku hi woni to eyo i ti nzila ya yinene yo vhuna vavasikati va wukhalo wuleya kasiku vepfa mahungu a manene a mfumo. Ti hi gwesile ngutu kuwona nzila yi vona va nga amukela ngu yona didungula. Hi tiemete ngu maso o bhilivila kuwona nzila yi Jehovha a no katekisa ngu yona mizamo yathu yo vhuna vavasikati ava va nga ñolwa ngu nzila yo biha.”