Komunikasyon sa Pamilya Nganong Nadaot?

BALIK sa mga adlaw ni Sir Stamford Raffles, ang magtutukod sa Britanikong dunggoanan sa Singapore, kasagaran na niadto nga siya magpaabot ug tibuok tuig alang sa tubag sa usa sa iyang mga dispatso ngadto sa London. Apan kadto maoy sa ika-19ng siglo. Karong adlawa ang mga kahibulongan sama sa mga satelayt sa komunikasyon nagatugot sa dihadihang komunikasyon ngadto sa hapit tanang dapit sa yuta.

Ugaling, kataw-anan nga samtang ang tawo sayon makakomunikar uban sa laing tawo sa laing kontinente, kasagaran siya pakyas kon bahin na sa pagpakigkomunikar sa mga sakop sa iyang kaugalingong pamilya. Ang misulbong nga mga proporsiyon sa diborsiyo sa masulob-on nagapamatuod niining kamatuorana. Nan, dili katingad-an nga sa usa ka pagtuon bahin sa “malipayon” ug “dili-malipayon” nga mga magtiayon, ang mga tigdukiduki mihimo niining konklusyona: “Ang pangunang panginahanglan diha sa daghang gubot nga kaminyoon mao ang mas maayong mga paagi sa pagpakigkomunikar tali sa mga kapikas.” Apan pila ka pamilya ang tinuod nakigkomunikar​—nga mao, makigsulti nga sandurot uban ang “dakong mental o espirituwal nga giladmon,” sumala sa pagbatbat sa usa ka diksiyonaryo sa pulong? Kasagaran adunay gamay o walay pag-uyonay sa mga hunahuna, labi nang wala sa mga kasingkasing. Nan, nganong nahitabo ang maong pagkadaot?

Ang Pagkadaot sa Komunikasyon: Mga Hinungdan Niini

Daghan ang mga hinungdan nga nagbuhat supak sa kalidad sa pamilyahanong kinabuhi. Sa wala pa ang industriyalisasyon, ang “trabaho” kapin kun kulang maoy kalihokan sa pamilya, apan karon kini nausab na. Sa kadaghanang bahin sa kalibotan, ang usa ka lalaki kinahanglang mogugol ug daghang oras sa pagtrabaho nga halayo sa balay alang sa pangabuhi. Tungod sa nagkaus-os nga ekonomiya sa kalibotan daghang kababayen-an ang napugos sa pagbuhat ug sama. Sa ingon ang mga anak sa kadaghanan isalig sa sinuholang mga tig-atiman o biyaan sa pag-atiman sa ilang kaugalingon. Gibanos sa mga eskuylahan ang bug-os nga buluhaton sa pag-edukar sa mga anak​—usa ka buluhaton nga sa nangaging panahon mao ang responsabilidad sa mga ginikanan. Ang teknolohiya​—ang samang galamiton nga nakapauswag sa komunikasyon​—may panahong nakapaluya sa pamilyahanong kinabuhi.

Una pa sa adlaw sa mga radyo, TV, stereo, video taperecorder, ug mga dulang video, ang mga sakop sa pamilya sa kadaghanan mogugol ug panahon sa pagpakig-estorya sa usag usa. Apan ang kadagaya karon nianang mga kasangkapana nakapatay gayod sa arte sa pagpakig-estoryahay diha sa pipila ka pamilya. Ang taho sa National Institute of Mental Health (U.S.A.) nga nag-ulohang Television and Behavior nagaingon: “Ang mga panagkatigom sa pamilya sa daoban o sa lamesa karon mopatim-awng miiway alang sa mga panagkatigom atubangan sa telebisyon.” Makapatugaw sa linain mao ang kaplag sa Tinipong Bansa, “Ang mga pamilya nagagugol sa duolag katunga sa ilang mga takna sa pagmata diha sa ilang mga balay nga nagalantawg telebisyon.” Ug ang makapasubong kamatuoran mao nga, diha sa daghang pamilya, sa dihang paandaron ang TV, mapalong ang pamilya; ang pakig-estoryahay mahimong kinaubsan.

Ang sangpotanan? Ang pamilyahanong kinabuhi mahimong mabaw. Ang panag-uban mous-os ug ang mga sakop sa pamilya tinong sa inanay magkalagyo. Apan aron ang pamilya magkahiusa, nga mabugkos sa bugkos sa pagsinabtanay ug gugma, kinahanglan adunay pagkahiusa sa mga hunahuna ug mga kasingkasing. Ang mga sakop sa pamilya nga nagakalipay sa maong komunikasyon makapalig-on sa usag usa aron sa pagsagubang sa mga kalisod sa lisod, gubot nga katilingban. Nan, sa unsang paagi maugmad sa usa ka pamilya ang maong panagsandurot? Ang tambag dagaya gikan sa daghang tinubdan. Apan ang kinamaayohang tinubdan sa tambag mao ang labing karaang basahon nga nagalungtad​—ang Bibliya! Atong susihon sa unsang paagi epektibong ikapadapat ang pipila sa mga prinsipyo niini.