Gikan sa Among mga Magbabasa
Seksuwal nga Batasan
Bag-o pa lang nakong nabasa ang artikulo bahin sa Seksuwal nga Pagbag-o sa Pebrero 8, 1985, sa Pagmata! Sa akong nadiskobrehan nga ako adunay herpes, buot akong mopahilayo ug nga adunay mosulti kanako nga wala ako matakdi niini. Sakit kaayo kini ug dili gayod mawala. Apan, gitalikdan na nako ang pakighilawas. Nalipay kaayo ko sa inyong artikulo.
D. G., Missouri
Wala pa ako sukad sa akong kinabuhi makabasag artikulo nga sobra ka makilingon. Kining pagpuyopuyo, sumala sa inyong pagtawag niana, maoy pagmahal nga bation taliwala sa duha ka tawo ug angayng dili pagatawgong daotang pamatasan. Walay gihisgotan diha sa Bibliya bahin sa seremonya sa kaminyoon tali kang Adan ug Eva, apan gitawag ni Adan si Eva nga iyang asawa ug gitawag si Adan nga iyang bana. Ug bahin sa homoseksuwal, si Jehova magatan-aw sa kasingkasing. (1 Samuel 16:7) Gihatagan kita sa atong Maglalalang ug sekso ingong paagi sa pagpahayag sa lalom nga gugma, ug ang pagkahimong heteroseksuwal (mahimo bisan hain sa magkaatbang nga sekso) dili madanihon sa uban. Basta adunay mutuwal nga pagmahal ug pagtahod ang homoseksuwal, dili ba makasunod gihapon sila sa mga prinsipyo sa Bibliya? Ang ubang tawo mosunod sa diyosnong prinsipyo sa paagi nga ilang gibati nga giuyonan sa Diyos, dili sa paagi sa pag-uyon sa tawo sa usay-kiling nga mga artikulo sama niini.
D. J., New York
Sa gipresentar si Eva kang Adan, iyang gidawat nga sila iya sa matag usa uban niini nga ekspresyon: “Kini mao na karon ang bukog sa akong bukog ug unod sa akong unod.” Ug wala nay lain pang butang nga mas mabugkoson kay sa kaugalingong pulong sa Diyos: “Tungod niini ang lalaki magabiya sa iyang inahan ug sa iyang amahan ug moipon siya sa iyang asawa ug sila mahimong usa ka unod.” (Genesis 2:23, 24; Mateo 19:5) Dili mga indibiduwal ang magtino kon unsa ang giuyonan sa Diyos kondili sa iyang espisipikong mga pulong nga makita diha sa iyang Pulong. Sa Hebreohanon 13:4 kini nag-ingon: “Himoa nga ang panagtiayon makabaton sa pagtahod sa tanan, ug ang higdaanan sa panagtiayon dili mahugawan, kay ang Diyos magasilot sa mga makihilawason ug sa mga mananapaw.” Ang pagtunglo sa Diyos sa mga buhat sa mga homoseksuwal tin-awng gilatid sa Levitico 20:13; Roma 1:27, 32 ug sa 1 Corinto 6:9, 10.—ED.
Pagtambal sa mga Paso
Diha sa lokal nga restawran, ang akong kamanghurang anak nga babaye napaso sa nagbukal nga tubig. Tungod sa kasayoran kon unsaon sa pagtambal sa mga paso, nga akong nahibaloan sa pagbasa sa Awake! (July 22, 1966; Marso 22, 1980; Abril 22, 1980 sa Ingles), akong gibuboan dayon ug bugnawng tubig ang paso nga gitabonag panapton, gibutangan ug yelo ang napasong panit, ug gidala siya sa lokal nga ospital nga hapit usa ka milya ang kalay-on. Sa ospital nangutana ang mga empliyado kon nganong nahibalo kami nga mao kini ang labing maayong tambal sa akto. Akong gisaysay nga nabuhat ko kini tungod sa pagkahimong maikagong magbabasa sa Pagmata!
F. D., California
Makina sa Panahi
Di pa dugay miabot ang akong anak nga babaye gikan sa eskuylahan ug miingon nga ang iyang maestra sa panahi buot makigkita kanako. Ang bag-ong Pagmata! (Abril 8, 1985) miabot sa koreyo nga may artikulo bahin sa makina sa panahi. Mihikay ako sa pakigkita sa maestra sa akong anak ug akong gipakitaan siya nianang magasina. Sa milabay ang pipila adlaw, gipakita sa maestra sa tibuok klase ang artikulo, nagtinguha siya nga mabasa nila kini aron mahibalo sila kon unsaon sa pagmentinar niini, sa paglana, ug sa pagtaod sa hilo.
S. W., Oregon