Usa ka Mabungahong Kinabuhi Bisan pag Ako Baldado
ANG akong bana, si Gary, ug ako nagdako sa Iowa, U.S.A. Kami bata pa kaayo sa dihang kami naminyo, nga mga tin-edyer pa. Natural lamang, sama sa kadaghanang batan-on, gibati namong diha sa among unahan ang malipayong kinabuhi ug wala kami mag-isip nga ugdang niana. Ang usa ka ebidensiya niana mao nga gusto kaayo namong mosakayg motorsiklo.
Usa ka adlaw samtang si Gary ug ako nag-angkasay sa usa ka motorsiklo, kami nabangga sa laing sakyanan. Seryoso kaayo ang aksidente. Nasamdan si Gary apan naulian ra sa bug-os. Ugaling, ang akong kadaot labawng grabe. Ako nabalian sa akong bukobuko.
Tungod sa aksidente ako naparalisado gikan gayod sa ilalom sa akong mga bukton paubos. Sa maong panahon ako makalakawlakaw lang nga nagsakayg silya sa bakol o wheelchair. Oo, ang tibuok kong kinabuhi, ingon man ang sa akong bana ug akong anak lalaki, dihadiha nausab.
Mga Pangutanang Wala Matubag
Bisan sa wala pa ang akong aksidente, ako naglisod sa pagsabot sa mga pangutanang sama sa: Nganong adunay hilabihang pag-antos? Nganong adunay daghan kaayong inhustisya sa kalibotan? Nasayod ako nga ang relihiyosong mga pangulo kadaghanan nagtudlo nga ang Diyos maoy nagdumala niining kalibotana ug kon unsay mahitabo maoy sumala sa iyang pagbuot. Apan kadto mipatim-aw nga pag-ingong ang Diyos gayod ang responsable sa inhustisya ug pag-antos. Sa ingon, gibati kong kon adunay Diyos ug kanang tanan tinuod, nan dili ako mosimba kaniya. Ang akong pagkabaldado maorag milig-on lamang nianang pagtuoha.
Sa ulahi, sa gipaadto namo ang among anak lalaki sa usa ka relihiyosong kampo, dugang kong gipalandong ang relihiyosong mga pangutana. Ug sa dugang akong namalandong mahitungod sa kahulogan sa kinabuhi ug sa inhustisya ug pag-antos, sa dugang gibati ko nga lagmit walay Diyos. Busa mipatim-aw nga ang labing maayo alang kanamo mao nga dili motuo sa bisan unsang relihiyon. Mao nga si Gary ug ako halos maoy ateyista.
Kausaban sa Panghunahuna
Tapos sa pila ka tuig, kami namalhin ngadto sa Colorado, ngadto sa kabukiran. Dihang kami nakapahimutang na didto, nadiskobrehan namong ang among silingan namalhin sa susamang panahon sa among pagbalhin. Unya among nabatiang siya usa sa mga Saksi ni Jehova. Akong gibati nga makasulti ako kaniya sa usa o duha ka butang bahin sa relihiyon, sanglit nakagugol akog daghan kaayong panahon sa pagpalandong, pagbasa, ug paghisgot bahin sa ulohan.
Usa ka adlaw ang maong silingan miduaw kanako. Ako naghunahuna: ‘Panahon na karon. Ihisgot ko lang kaniya ang pila niya ka tinuohan sa pagpakita kon unsa niya ka sayop.’ Apan sa miabot siya, akong nasayrang siya dili pa diay usa sa mga Saksi ni Jehova. Siya nagtuon sa Bibliya uban kanila. Busa sa gipangutana ko siya sa usa ka lisod nga pangutana, mitubag siya: ‘Oy, bag-o pa lang akong nagsugod sa pagtuon sa Bibliya, ug wala ako mahibalo sa tubag. Nganong dili ka moadto sa balay sa panahong kami magtuon, ug makapangutana ka sa mga Saksi mismo?’
Kana gayod ang akong gibuhat. Sa wala madugay nagsugilon na ako kang Gary sa daghang butang akong natun-an ug sa unsang paagi natubag ang lisod kong mga pangutana. Tapos sa pila ka bulan siya misugod usab sa pagtuon.
Nalipay kaayo akong masayod mahitungod sa katuyoan sa Diyos sa pagtapos niining presenteng sistema sa mga butang nga puno kaayo sa pagkadaotan ug pag-antos ug pagpuli niini sa usa ka bag-ong sistema sa mga butang, apil ang “usa ka bag-ong yuta,” sumala sa pagtawag niini sa Bibliya. (2 Pedro 3:13) Nasayran ko ang makapasadya sa kasingkasing nga saad sa Bibliya: “Ang mga matarong mismo magapanunod sa yuta, ug sila magapuyo niana sa walay kataposan.”—Salmo 37:29.
Kahibulongan usab kaayo alang kanako ang pagkasayod niining saara mismo bahin sa umaabot nga duol na: “Pagapahiran [sa Diyos] ang tanang luha gikan sa ilang mga mata, ug mawala na ang kamatayon, ni may pagbalata pa ni paghilak ni kasakit. Ang unang mga butang miagi na.”—Pinadayag 21:4.
Sa wala madugay akong nasabtan dayon ang gipasabot ni Jesus sa miingon siya: “Kamo mahibalo sa kamatuoran, ug ang kamatuoran magapahigawas kaninyo.” (Juan 8:32) Sa unang panahon sa akong kinabuhi, ako nahigawas sa pagkaulipon sa panghunahuna sa wala-matubag nga mga pangutana, mga pagduhaduha, bakak nga mga ideya, ug sa pagpasangil sa Diyos sa pagkadaotan ug pag-antos. Ug ako nahigawas sa pagkawalay paglaom sa umaabot.
Nahiapil sa saad sa usa ka matarong Bag-ong Kahikayan mao ang giingon ni manalagnang Isaias mahitungod sa baldado: “Nianang panahona ang mga mata sa mga buta mangabuka, ug ang mga igdulongog sa mga bungol makadungog. Nianang panahona ang bakol mokatkat sama sa lagsaw, ug ang dila sa amang mosinggit sa kalipay.”—Isaias 35:5, 6.
Pagkaanindot niana alang kanako! Akong gipangandoy ang adlaw sa dihang ako ‘makakatkat sama sa lagsaw’!
Unsay Akong Mahimo?
Dihang ako moadto sa silingang balay sa pagtambong sa pagtuon sa Bibliya sa akong silingan, usa ka hagit ang pagpaligid sa akong silya paingon didto. Apan unya moabot ang akong silingan aron sa pagbulig. Usab, buot kong motambong sa mga tigom sa mga Saksi ni Jehova aron makakuhag dugang kahibalo. Niini ako gibuligan ug dako sa uban sa kongregasyon.
Sa sinugdan, sa wala pa si Gary mosugod sa pagtuon, sila manganha ug pasakyon ako sa ilang mga kotse. Akong gamiton ang akong mga bukton sa pagpadailos ngadto sa lingkoran sa kotse, ug unya ang drayber o uban pa magbutang sa akong silya sa bakol sa kargahanan sa kotse. Inig-abot namo sa Kingdom Hall, ako ilang buligan nga makabalik sa silya sa bakol.
Unya nabatonan namo ang usa ka sakyanang may linaing kontrol sa kamot sa pagdrayb. Dihang si Gary magtrabaho sa turno sa magabii ug dili makakuyog kanako ngadto sa tigom, ako mosakay sa kotse ug ibutang ang silya sa akong likod. O himoon kana sa akong anak lalaki alang kanako. Ngani, siya kanunay maoy dakong tabang sa silya, sama ra kang Gary. Niining paagiha ako nakamaneho sa akong kaugalingon sa dapit nga buot kong adtoan.
Samtang nagtambong ako sa mga tigom ug nakatuon ug dugang mahitungod sa atong Maglalalang ug iyang mga katuyoan, buot kong ipaambit ang maayong mga butang sa uban. Ang mga Saksi regular nagduaw sa ilang mga silingan sa pagbulig kanila nga makakat-on mahitungod sa Bibliya, ug buot kong mokuyog nianang makapalig-ong buluhaton. Apan sa unsang paagi ako makahimo niana, dihang ako naggamit man ug wheelchair? Aw, determinado ako nga kadto dili magpugong kanako. Gibati ni Gary ang sama sa akong gibati, mao nga kaming duha misugod sa pag-apil sa ministeryo. Iya akong ubanan ngadto sa mga balay sa uban, nga magtulod kanako diha sa silya sa bakol.
Tinguha nga Makahimog Dugang
Sa 1967, si Gary ug ako nabawtismohang dungan, ug ang tinguha mitubo diha kanamo nga mahimong labi pang mabungahon sa pagbulig sa uban nga makakat-on sa among nakat-onan. Ginatos ka libong Saksi ni Jehova sa tibuok yuta nagabuhat sa bug-os-panahong ministeryo. Ilang gihimo kana nga panguna nilang buluhaton. Nabatonan ko ang samang tinguha. Apan tungod sa akong pagkabaldado, gibati ko nga kadto dili alang kanako.
Usa ka adlaw ako gikuyogan sa usa ka Saksi nga diha sa bug-os-panahong buluhaton. Miingon ako kaniya: “Oy, pangandoy ko gayod nga makabuhat niining buluhatona nga bug-os panahon sama kanimo!” Mitubag siya: “Nan, nganong dili nimo buhaton kana?” Naghunahuna ako sa akong kaugalingon: ‘Aw, tungod sa dayag nga mga hinungdan!’ Apan positibo gayod siya kaayo bahin niadto!
Unya, sa usa ka dakong asembliya sa mga Saksi ni Jehova sa Denver, ang usa ka babayeng naggamit ug wheelchair mihatag sa iyang kasinatian sa entablado. Siya nakaarang sa paghimo sa bug-os-panahong buluhaton sa pagsangyaw bisan pa sa iyang pagkabaldado. Naghunahuna ako: ‘Makahimo usab ako niini, sa tabang sa Diyos!’ Ug nahimo ko kana—sulod sa milabayng 14 ka tuig! Sulod sa milabayng napulo ka tuig si Gary anaa sa bug-os-panahong buluhaton uban kanako.
Ang nakatabang ug dako kaayo kanako mao ang espesyal nga sakyanang among nabatonan. Kini regular ug gidak-ong van, apan dunay espesyal nga mga kontrol nga gidesinyo sa laing baldado nga Saksi. Kini nagaapil sa usa ka pang-alsa nga moalsa kanako ngadto sa sakyanan. Unya akong ibalhin ang akong kaugalingon gikan sa akong silya ngadto sa lingkoran sa drayber. Hinuon, kon ako may kauban ug sila ang magadrayb, nan ang ako lang buhaton mao ang pagpabilin sa silya sa bakol, ug ako makasulod ug makagula sa akong kaugalingon. Ang pang-alsa nahisamag bara sa sirkador nga molabyog pagawas sa sakyanan. Itaod ko ang akong silya niana pinaagig mga kaw-it ug unya iduot ang timring “pataas” o “paubos.” Niining paagiha ako makagawas ug makaduaw nga regular sa katawhan diha sa ilang mga balay, ug ako kasagarang makadumalag ubay-ubayng pagtuon sa Bibliya.
Pag-atubang sa mga Hagit
Sa Colorado, ug sa ulahi sa Idaho diin kami namalhin, ang mga tingtugnaw dakong hagit, tungod sa tugnaw kaayong mga adlaw ug mga semana. Sa kadugayan gidapit kaming mobalhin sa Alaska diin kami pagkakaron nagapuyo. Hisgoti ang katugnaw, yelo ug niyebe—kana halos sa tibuok nga tuig! Bisan pa niana, kanang tanan mabuntog.
Sa usa ka butang, isul-ob namo ang ekstrang biste. Gipalitan pa gani ako ni Gary sa tradisyonal nga mga mukluk, nga maoy makapainit kaayong mga botas nga isul-ob ibabaw sa delana nga medyas. Ug uban sa mainit panggawas nga biste, ako makaagwanta sa tugnaw nga mga temperatura. Ngani, sa una namong bulan didto sa Alaska—kadto Disyembre—ang temperatura miaberids ug 30 degrees ubos sa sero Fahrenheit (-34° C.)! Bisan pa niana, among nabatonan ang mabungahon kaayong bulan sa ministeryo.
Ako wala mag-ingong sayon kining tanan. Ibabaw sa yelo, ilabina, ang pugong sa ligid sa wheelchair dili maayo. Akong mahinumdomang ako didto ibabaw sa usa ka dike nga nakigsulti sa usa ka tawo mahitungod sa Bibliya, ug misugod sa pagdalus-os ang akong wheelchair. Ngadto sa ubos sa dike ako miligid! Kalit ako nakahunong sa ubos ug ako nahigawas nga nagtukod sa akong mga kamot ug mga tuhod nga naibabawan sa akong wheelchair! Apan gibuligan ako nga makabangon, ug walay kadaot. Hinuon, sa Anchorage, ibabaw sa mga asiras sa siyudad, labi pang sayon kay sa didto sa kabukiran sa Colorado ug Idaho.
Magantihong Katuigan
Kadaghanan ako suknaon kon unsay nagadasig kanako sa pagpadayon sa pagduaw sa uban bisan pa sa akong pagkabaldado. Sa usa ka butang, kanang tanang katuigan sa paningkamot maoy magantihon kaayo. Ang akong bana ug ako nakahibalag ug nakabulig sa daghang tawo sa pagkaila sa Maglalalang ug sa iyang kabubut-on.
Gawas pa, ako natagbaw ug dako sa pagkakitag ubay-ubayng tawo nga nadasig sa pagbuhat ug labaw sa ilang mga kinabuhi mismo inigkakita nila sa akong maarangan sa pagbuhat bisan pa sa maong pagkabaldado. Kana, sa baylo, labaw pang nagadasig kanako.
Bisan pa niana, igaingon ko nga ang pangunang butang nganong ako nagapadayon mao ang akong gugma sa Diyos. Ang bisan unsa nga lahi niana mahimong sayop nga hinungdan. Sa wala pa ako makabatog tukmang kahibalo sa Diyos, ako lagmit magbasol kaniya sa tanang pag-antos sa yuta. Apan tapos masayod sa kamatuoran mahitungod sa Maglalalang, buot ko siyang dayegon. Ug sa dugang gibuhat ko kini, ug gitabangan ang uban sa pagbuhat sa sama, ako nasuod pa sa Diyos. Busa dili ko gayod buot nga biyaan ang akong pangunang katuyoan sa kinabuhi. Kini usa ka dakong pribilehiyo. Unya, kon puliki ako sa pagtabang sa uban, wala akoy daghang panahon sa pagkaluoy sa kaugalingon!
Pagbaton sa Hustong Tinamdan
Nahibalo ako nga hinungdanon kaayo nga akong huptan ang hustong tinamdan bahin sa akong ginabuhat ug sa paglaom sa umaabot. Sa pagkakaron, ako makaarang sa pagpadayon sa akong buluhaton sa pagtabang sa uban nga nagsakayg wheelchair. Apan angkonon kong ang akong panglawas nagkaluya. Kana kasagarang mahitabo sa mga nagagamit sa wheelchair.
Bisan pa niana, kon moabot ang panahong ako dili na makalakawlakaw, buhaton ko gihapon ang akong mahimo. Ang ubang Saksi nga dili gayod makagawas nagatabang sa katawhan pinaagig telepono o pinaagi sa pagsulat. Usahay, ang mga estudyante sa Bibliya moanha sa ilang mga balay alang sa pagtuon. Tingali may adlaw nga kinahanglang buhaton ko kana. Apan basta ako makaarang pa, akong pakigsultihan ang mga tawo sa nawong ug nawong diha sa ilang kabalayan. Kana gayod ang gusto nako.
Bisan kon unsa man ang mahitabo sa dili na gayod madugay, ako nasayod nga sa Bag-ong Kahikayan sa Diyos akong mabatonan ang maayong panglawas. Unya labaw pa unya ang akong mabuhat. Ngani, ako nagapanglantaw ug dako gayod nianang kahibulongang panahon nga gihisgotan sa Bibliya sa nagaingon kining “adunay pagkabanhaw sa mga matarong ug mga dili matarong.” (Buhat 24:15) Hunahunaa ang tanang tawo nga mahibalik unya gikan sa mga patay ug pagatudloan bahin sa Diyos ug sa iyang mga katuyoan! Buot ko gayod nga makabatog bahin niana, uban ang lawas nga mahimsog.
Ayaw, ayaw gayod pagkaluoy kanako! Akong nabatonan ang mabungahon kaayo ug makapahimuot nga kinabuhi. Ug ako nagapanglantaw sa pagbatog labaw pang mabungahon ug makapahimuot nga kinabuhi sa dili madugay dihang sugdan na sa Diyos ang pagpasig-uli sa Paraiso dinhi sa yuta. (Lucas 23:43)—Sumala sa giasoy ni Harriet Beckwith.
[Blurb sa panid 18]
“Ako naghunahuna: ‘Makahimo usab ako niana, sa tabang sa Diyos!’”
[Blurb sa panid 19]
“Kon puliki ako sa pagtabang sa uban, ako walay daghang panahon sa pagkaluoy sa kaugalingon!”
[Letrato sa panid 17]
Si Harriet ug ang iyang sakyanan nga gipasibong linain