Mga Palaaboton sa Protestantismo—Ug Nimo!

“AKO karon nagatuon sa Luteranong teolohiya sa pito na ka semestre ug busa umaabot nga ministro sa simbahan,” mao ang pagsugod sa usa ka sulat ngadto sa editor sa Nobyembre 1986 Alemang mantalaan. Kini nagpadayon: “Buot kong iawhag sa pagtagad ang kamatuoran nga ang among pagbansay nalangkoban ilabina sa pagbungkag sa Bibliya—mga hapin na lang ang nabilin. . . . Samtang ginadugmok ang pagtuo sa estudyante o ang pundasyon niini, ang Kasulatan, ang kadaghanan sa iyang mga lektura nagatudlo kaniya sa ‘bag-ong ebanghelyo’ sa sosyalismo, nga niana ang simbahan gihatagan sa bug-os bag-o nga unod. Ang Diyos patay—mabuhi ang sosyalismo! Si Jesus nadunot sa iyang lubnganan, luwason nato ang atong kaugalingon! Kini ang mensahe nga gidala sa daghang ministro sa iyang pulpito, sa sunodsunod nga Dominggo. Gikinahanglan namo pag-ayo ang bag-ong mga pasilidad aron tudloan kami sa Bibliya, apan sa pagkakaron gipukgo kana ang simbahan.”

Tungod kay gitamay kaayo ang Pulong sa Diyos, may paglaom ba nga ang iglesya ug mga sakop sa parokya maulian gikan sa ilang espirituwal nga kagubot? Usa ka 18-siglong maghuhubad sa Bibliya tukmang mipahayag: “Ang panglawas sa iglesya mahukman sa paagi sa pagtratar niini sa Kasulatan.”

Makatabang ba ang Usa ka Bag-ong Repormador?

“Si Dietrich Bonhoeffer gipasidunggan ug gikutlo karong mga adlawa nga labaw kay ni bisan kinsang laing teologo sa atong siglo,” matud sa Propesor sa teolohiya si Georg Huntemann. Si Bonhoeffer, usa ka pangunang membro sa “Confessional Church,” gipriso sa mga Nazi sa 1943 ug gipatay sa 1945 tungod sa giingong pagkalangkit sa sabutsabot sa pagpatay kang Hitler. Si Huntemann miingon nga si Bonhoeffer basi mao ang bag-ong repormador nga gikinahanglan sa simbahan. Matikdi ang mosunod nga mga kinutlo gikan sa pipila sa iyang mga wali. Suknaa ang imong kaugalingon: Unsay kahulogan sa pagsunod sa iyang mga pulong alang sa Luteranong Iglesya? alang sa akong iglesya?

“Sa relihiyon usa ra ka butang ang hinungdanon, nga kini matuod.” Kini nahauyon sa giingon ni Jesus: “Ang Diyos Espiritu: ug sila nga nagasimba kaniya kinahanglang magsimba kaniya sa espiritu ug sa kamatuoran.”a—Juan 4:24; tan-awa usab ang 8:32; 14:6; 16:13.

Nakatino ka ba nga matuod gayod ang tanang ginatudlo sa imong iglesya? Nagatudlo ba kini nga ang tawo dunay kalag nga imortal—nga dili mamatay—o nahauyon ba kini sa Bibliya, nga nagaingon: “Ang kalag nga makasala, kini mamatay”? (Ezekiel 18:4, 20) Ang imong iglesya nagatudlo ba nga ang Diyos walay ngalan o nga ang iyang ngalan mao ang Jesus, o nahauyon ba kini sa Bibliya, nga nagaingon: “Ikaw, kansang ngalan mao lamang si JEHOVA, mao ang labing hataas sa tibuok nga yuta”? (Salmo 83:18) Ang imong iglesya nagatudlo ba kanimo nga ang tanang maayong tawo dad-on sa langit sa dihang ang yuta laglagon pinaagi sa kalayo, o nahauyon ba kini sa Bibliya, nga nagaingon: “Ang matarong magapanunod sa yuta, ug magapuyo niana sa walay kataposan”?—Salmo 37:29; tan-awa usab ang Salmo 104:5.

“Kini [ang iglesya] maningkamot alang sa maputling pagtulon-an.” Kini nahauyon sa giingon ni Jesus: “Pagbantay kamo sa igpapatubo . . . , sa doktrina sa mga Pariseo ug sa mga Saduseo.”—Mateo 16:12; tan-awa usab ang 1 Corinto 5:8.

Ang imo bang iglesya nagadawat sa “haluag nga natad sa tinagsa ka paghubad,” o nagalihok ba kining nahauyon sa balaang tambag: “Mga igsoon, timan-i kadtong nagapahinabo sa mga pagbahinbahin ug mga sala nga supak sa doktrina nga inyong nakat-onan; ug likayi ninyo sila”?—Roma 16:17; tan-awa usab ang 2 Timoteo 2:16-18; 2 Juan 9, 10.

“Sa Adlaw sa Paghukom, ang Diyos tinong dili mangutana kanato: Nagsaulog ba kamog makapahinganghang mga pangilin sa Repormasyon, apan hinunoa: Kamo nagpatalinghog ba sa akong Pulong ug nagbantay niini?” Kini nahauyon sa giingon ni Jesus: “Ang akong mga igsoon mao kadtong nagapatalinghog sa pulong sa Diyos, ug nagabuhat niini.”—Lucas 8:21; tan-awa usab ang Mateo 7:21; Juan 15:14.

Ang imo bang iglesya labaw pang nagapasiugda sa rituwal, mga seremonyas, ug mga simbahan inay kay sa pagbatog tukmang kahibalo sa Pulong sa Diyos? Ang panagsa bang pagtambong sa simbahan panahon sa pangilin giisip nga igo na, nga kasukwahi sa tambag nga “dili biyaan ang panagkatigom sa atong kaugalingon . . . ilabina gayod, sa dihang inyong makita nga nagkahiduol na ang adlaw [sa paghukom]”?—Hebreohanon 10:25.

Ang imo bang iglesya nagadasig kanimo sa pagbasa sa matag adlaw sa Pulong sa Diyos, nga nagahatag kanimog personal nga tabang sa pagsabot niini ug pagtagana sa panukmod sa pagbuhat kon unsay gikinahanglan niini?

“Ang relihiyon maoy buluhaton, tingali ang labing lisod ug tinong labing balaang buluhaton nga mabuhat sa usa ka tawo.” Kini nahauyon sa giingon ni Jesus: “Ang akong pagkaon mao ang pagbuhat sa kabubut-on sa nagpadala kanako, ug sa pagtapos sa iyang buluhaton.”—Juan 4:34.

Ang imo bang iglesya nagasulti kanimo nga ang buluhaton sa Diyos alang sa mga Kristohanon karong adlawa mao ang pagwali “niining ebanghelyo sa gingharian . . . sa tibuok kalibotan ingong pamatuod sa tanang nasod”? (Mateo 24:14; tan-awa usab ang Mateo 28:19.) Nagadasig ba kini kanimo sa pagpakig-ambit niining mahimayaong mensahe sa Gingharian ngadto sa “tanang tawo nga mangayo kanimog katarongan sa paglaom nga anaa kaninyo”?—1 Pedro 3:15.

Labing menos sa mga hitabo sa ibabaw, si Bonhoeffer naghatag sa iyang iglesya ug maayong tambag. “Apan nganong ang iyang mga pulong, ang iyang tambag sa pagpabag-o sa iglesya, bug-os wala pamatii?” nangutana si Huntemann. Ugaling, labi pang hinungdanon mao ang pangutana: Nganong ang mas awtoritatibong mga pulong ni Kristo Jesus wala pamatii sa labi pang dakong paagi?

Ang teologong si Ulrich Betz nag-ingon nga ang Kasadpang Alemang katilingban nagahunahuna ug nagalihok sa “tapos-Kristohanon, dili tawgong neopagano” nga paagi. Ang Luteranong Iglesya kinahanglang mabasol sa labing menos 25 milyong membro nianang katilingbana nga Luterano. Maingon nga kaduhaduhaan ang usa ka kahoy nga nagabungag daotang bunga, mao usab ang usa ka iglesya nga nagabungag mini nga mga Kristohanon. Si Jesus mipatin-aw: “Ang usa ka maayong kahoy dili makabungag walay pulos nga bunga, ni ang walay pulos nga kahoy makabungag maayong bunga.”—Mateo 7:16-18.

Himoa kining matinud-anong pagtulotimbang. Unsang matang sa bunga ang ginabunga sa imong iglesya? Gipaarang-arang ba ang mga personalidad sa mga membro niini? Ginapauswag ba ang kalinaw ug panaghiusa sa pamilya, komunidad, ug tibuok-yutang mga kahimtang? Kini ba usa ka sagang batok sa pag-abusar sa droga, imoralidad, ug krimen? Ikaw ba, nga walay pagpanuko, makasulting ang kalibotan mahimong mas maayong dapit nga puy-an kon ang tanan sakop sa imong iglesya?

Matikdi sa atbang nga panid nganong ang pila ka kanhi Luterano sa Alemanya, tapos sa paghimo nianang matinud-anong pagtulotimbang, miliso sa laing dapit alang sa espirituhanong pagtultol.

Kon ang Imong Iglesya Mapakyas sa Paglihok, Molihok Ka Ba?

Kon, tapos sa paghimog matinud-anong pagsusi, ikaw wala mahimuot sa imong makita, ayaw lamang pagreklamo. Ang usa ka magsusulat, samtang nagkomento bahin sa gipamulong ni Karl Barth nga ang iglesya mao ang mga membro niini, makataronganong mihinapos: “Ang mga membro sa iglesya . . . maoy responsable sa ginasulti ug ginabuhat sa iglesya.” Busa suknaa ang imong kaugalingon: Andam ba akong moambit sa responsabilidad alang sa tanang butang ginasulti ug ginabuhat sa akong iglesya? Makapasigarbo ba ako nga ang tanang membro niini akong espirituwal nga mga igsoon?

Samtang nagapalandong niining mga pangutanaha, ayaw hikalimti ang kahulogan sa Pinadayag 18:4, 8. Sa paghisgot sa imperyo sa kalibotan sa bakak nga relihiyon, nga wala makapahimuot sa Diyos, kini nagaingon: “Gumula ka kaniya, akong katawhan, aron dili ka makaambit sa iyang mga sala, ug dili ka makadawat sa iyang mga hampak . . . [kay] ang iyang mga hampak moabot sa usa ka adlaw, ang kamatayon, ug pagbalata, ug kagutmanan; ug siya pagasunogon sa bug-os sa kalayo: kay kusgan ang Ginoong Diyos nga naghukom kaniya.”

Tingali sinsero kang nagtuo nga ang imong iglesya dili bahin sa bakak nga relihiyon nga giingon sa Diyos nga iyang laglagon sa dili madugay. Apan ang imong kinabuhi nagadepende sa pagkaseguro nga 100 porsiento. Nakapaneguro ka ba niana?

Ang bakak nga relihiyon walay umaabot, ni kadtong nagapaluyo niini. Ang matuod nga relihiyon molungtad sa walay kataposan, kauban niadtong nagatuman niini. Ikaw ang magpili nahiuyon niana.

[Mga footnote]

[Kahon/Letrato sa panid 9]

Panahon sa ilang mga kombensiyon—pananglitan, pinaagi sa mga drama sumala sa makita dinhi—ang mga Saksi ni Jehova ginahatagag praktikal nga instruksiyon bahin sa pagpadapat sa mga prinsipyo sa Bibliya sa matag-adlawng kinabuhi. Kining tin-aw nga tingog sa trompeta bahin sa kamatuoran, nga wala matuis sa politikanhong away o mga kalainan sa doktrina, nagalig-on sa ilang paglaom sa umaabot ug nagadasig ngadto sa Kristohanong kagawian ug buluhaton. Tambong sa usa ka kombensiyon ug tan-awa sa imong kaugalingon!

[Kahon sa panid 11]

Kanhing mga Luterano Nagpatin-aw Nganong Sila mga Saksi ni Jehova Na Karon

“Ang unang nakadani kanako sa mga Saksi ni Jehova mao ang kahinlo ug kamaminatud-on nga akong nakita panahon sa usa sa ilang mga kombensiyon. Akong gidasig ang uban sa pagtambong sa usa ka kombensiyon ug pagsinati mismo sa tinuod nga gugma taliwala sa mga Saksi.”—W. R., kanhing sakristan.

“Ako tigsimba kada Dominggo. Apan ang sermon, nga labing taas 20 minutos, talagsa rang magtubag sa akong mga pangutana mahitungod sa katuyoan sa kinabuhi o sa kinabuhi tapos mamatay. Ang mga Saksi ni Jehova naghatag kanako sa mga tubag gikan gayod sa Bibliya, ug ako nakig-estorya kanila nga personal. Labaw pa ang angay iapil sa balaang mga serbisyo kay sa yanong pagsanong sa mga lingganay sa kampana sa simbahan kada buntag sa Dominggo, pagkanta sa mga alawiton, ug pagpamati sa usa ka sermon. Walay sinserong nangita sa kamatuoran ang matagbaw niana! Buot niya nga may pagabuhaton.”—E. B., kanhi magtutudlog Sunday-school.

“Ang akong kalihokan isip ansiano sa simbahan wala gayod maglangkit sa Biblikanhong mga butang, naglangkit lang sa mga butang pamatigayon. Ang labing nakatabang kanako mao ang pagkahibalo sa ngalan sa Diyos, si Jehova, usa ka ngalang wala gayod nako madungog nga gihisgotan sa simbahan. Ako nahibulong sa daghang kamatuoran nga unod sa Bibliya.”—E. M., kanhing ansiano sa simbahan.

“Sa unang panahon nga ang mga Saksi ni Jehova nakigsulti kanako, ang kalainan [tali kanila ug kanamo] nadayag. Nga sila buot makigsulti kanako bahin sa Bibliya bug-os bag-o ug katingad-anan. Ang una kong pangutana mao kon sila gibayran ba sa ilang trabaho. Miingon silang wala. Ang ikaduha kong pangutana mao kon sila nakigbugno ba panahon sa gubat. Sila nagsaysay nga daghang Saksi ang didto sa mga kampo konsentrasyon. Sa kataposan, akong nakaplagan ang mga tawong andam, kon kinahanglan man, nga magpakamatay tungod sa ilang pagtuo.”—H. M., kanhing sakristan.

“Sa akong gihangyo ang akong pastor sa pagpatin-aw nganong ang matag pastor may kaugalingong interpretasyon, siya miingon: ‘Ang matag pastor may katungod sa paghanduraw sa Diyos sa paagi nga motugot nga Siya mapahimuslan sa labing maayo sa kongregasyon.’ Sa ulahi ako nagpulipuli sa pagtambong sa duha ka nagkalaing kongregasyon sa mga Saksi ni Jehova. Ang nakapahibulong kanako mao ang bug-os nga panaghiusa sa ilang taliwala. Ug ang mga pakigpulong naundan sa mapuslanon kaayong mga kasayoran, nga kanunayng gipaluyohan sa mga teksto sa Bibliya nga imong mabasa dayon gikan sa imong Bibliya! Pagkalahi sa daghang sermon nga akong nadungog!”—U. P., kanhi sosyal nga magbubuhat sa simbahan ug nars sa parokya.

[Letrato sa panid 10]

Ang distritong mga kombensiyon nagadasig sa mga Saksi ni Jehova sa pagbuhat sa buluhatong pagwali sa Gingharian sa Diyos