Pagpaniid sa Kalibotan
Nangahadlok nga mga Naulian sa Pagkahubog
Ang mga huwes sa California naghatag “dosis sa kamatuoran” ngadto sa mga tin-edyer nga gidakop tungod kay hubog nga nagmaneho, mitaho ang The New York Times. Gawas nga gipamulta ug gipaniid ang batasan ingong unang-higayong paglapas sa balaod, sila gisentensiyahan sa pagduaw sa morge. Sumala sa Times, ang mga huwes nag-ingon nga ang sentensiya “dili tuyo sa pagpakurat sa batan-ong mga tagsala aron sa pagladlad kanila sa pagkadelikado sa tawhanong kinabuhi.” Ang katarongan? Ang usa ka awtoridad mibatbat: “Ang mga tin-edyer nagtuo nga sila dili-madutlan,” busa “sila nagkinahanglag dosis sa kamatuoran.” Ang usa ka huwes sa California mitaho nga kapin sa 400 ka batan-ong gihatagan niining sentensiya sa Sacramento, 6 lang ang gidakop pag-usab. Laing huwes nakamatikod nga ang normal nga proporsiyon sa pagbalik maoy 30 ngadto sa 50 porsiento. Ang kalamposan sa programa nakadasig sa ubang mga estado sa pagsugod ug samang mga programa sa pagsentensiya.
Baha sa Bangladesh
Gilamoy sa tubig sa baha ang kadaghanang bahin sa Bangladesh sa miaging Septiyembre, nga nagbilin ug duolan sa 28 ka milyong mga tawo nga walay mga balay o nabara. “Grabe kaayo kadto nga tawhanong katalagman,” miingon ang brigadier heneral sa nagdumala sa pagpakaon ug pagpabalay sa 30,000 ka biktima sa usa ka lugar niining nasod sa habagatang Asia. Ang Bangladesh, nga dunay 110 ka milyong mga molupyo, naigo sa kusog kaayong pagbunok sa habagat nga ulan nga misugod sa Hunyo ug nga sa pagka Septiyembre nagbilin ug gibanabanang 75 porsiento sa yuta nga nailalom sa tubig. Ang gitaho nga nangamatay gikan sa tanang mga hinungdan sa panahon sa pagbaha miabot ug kapin sa 500.
Mga Kapeligrohan Alang sa mga Babayeng Nagapanabako
Nganong ang babayeng mga tigpanabako may kalagmitan kay sa mga babayeng dili-tigpanabako nga matugkan ug mga sakit sa kasingkasing, usa ka kondisyon nga mas komun diha sa lalaki? Ang usa ka katarongan tingali mao nga ang pagpanabako gilangkit sa hormonal nga mga kausaban diha sa babaye, nagsugyot ang usa ka pagtuon sa mga tigdukiduki gikan sa University of California, San Diego School of Medicine. Ang mga babaye nga tigpanabako human nga mohunong na ang regla dunay kapin sa duha ka lalaking matang sa mga hormone sa sekso diha sa ilang dugo kay sa makita diha sa dili-tigpanabakong mga babaye, mitaho ang mga tigdukiduki diha sa New England Journal of Medicine. “Ang among mga nakaplagan hayan mohatag dugang pamatuod sa pagdani sa mga babaye sa paghunong sa pagpanabako,” miingon ang usa ka doktor sa Kay-Tee Khaw, pangunang awtor sa pagtuon.
Ang mga Anglikano Nagtugot ug Poligamiya
Bisan pa nga ang 70-ka-milyong-membro nga Anglikanong Iglesya nagpasiugdag monogamiya ingong Kristohanong mithi, sa Agosto gibaliskad niini ang usa-ka-gatos-ka-tuig nga pagdili sa pagbawtismo sa mga poligamista diha sa iglesya. Ang resolusyon nga nagbaliskad sa pagdili gipasa diha sa tulo-ka-semanang komperensiya sa Anglikano diha sa Canterbury, Inglaterra. Sa miagi, kinahanglang talikdan sa poligamista ang tanan niyang mga asawa gawas sa usa aron mahimong bawtismadong Anglikano. Karong adlawa, sumala niana nga iglesya, diha sa mga kultura diin natukod sa katilingban ang poligamiya, ang lalaki mahimong makabaton ug kapin sa usa ka asawa ug mahimo gihapong usa ka inuyonang membro sa iglesya. Apan, sumala sa Pulong sa Diyos, kini usa gihapon ka pagpanapaw.—Efeso 5:31; 1 Timoteo 3:2.
Nabalakang mga Dentista
Kon buot kang makadawat sa labing posible nga pagtambal sa ngipon, ayaw ipakita ang imong kahadlok sa dentista. Kana mopatim-aw nga mao ang mensahe nga gipadayag sa Hamburg nga surbi sa 342 ka dentista diha sa Federal Republic of Germany. Ang surbi nagbutyag nga 71 porsiento sa mga dentista nga giinterbiyo mibating naglisod sa dihang nag-atubang ug wala-mahimutang nga pasyente. Ingong resulta, miingon ang mantalaang Aleman Frankfurter Allgemeine Zeitung, ang mga dentista “sagad moreaksiyon nga sobrang makapanagana ug nerbiyoson ug nagkinahanglag dugang reserba sa kusog aron mahimo ang de-kalidad nga pagpanambal.”