Gikan sa Among mga Magbabasa

Luwas nga Pagmaneho

Ingong Kalihim sa Estado sa Illinois, buot kong dayegon kamo ug sa mga magsusulat sa Pagmata! sa inyong dili pa dugayng publikasyon nga nagpasiugda sa luwas nga pagmaneho. (Enero 8, 1988) Ang mga taho sa kaihapan ug mga sugyot sa luwas nga pagmaneho nga gigamit sa mga artikulo maayo kaayo ug nagpasiugda nga ang batasan sa luwas nga pagmaneho dili lamang kabalaka sa nasod kondili usa usab ka internasyonal nga kabalaka. . . . Ang sibiko ug relihiyosong mga organisasyong sama sa inyo nakahatag dugang pagpaalinggat sa publiko sa pagkaseryoso niining problemaha. . . . Sa makausa pa, kamo angay dayegon sa inyong mga paningkamot sa pagdasig ug luwas nga pagmaneho. Bililhon kaayo ang kinabuhi sa tawo nga ipameligro sa danghag nga batasan. Ako sa personal nagahatag sa akong pahalipay ug pasalamat sa paglangkit sa inyong grupo.

Jim Edgar, Kalihim sa Estado, Illinois, Tinipong Bansa

Daling Masuko

Sa usa ka gabii samtang gihagpat ko ang mga artikulong “Mga Batan-on Nangutana . . . ” mihunong ako sa pagkakita sa pangutana “Why Do I Lose My Temper?” (Abril 22, 1987 sa Ingles) Human nabasa ang tibuok artikulo duha ka besis, nahibulong ako nganong ang tambag bahin sa dili pagkasuko angay gayod nako. Ako 22 anyos, ug bisan pa, nianang adlawa, akong nadiskobrehan sa unang higayon nga dali akong masuko. Wala ako maghunahuna nga ingon ako niana kaniadto. Karon pa lang, ang akong paagi sa pagsanong sa akong mga pagbati mao, ‘Angay nga ikasuko kini niining kasoha,’ apan sukad karon, maningkamot gayod ako sa pagpugong sa akong kasuko.

Y. O., Japan

Relihiyosong Pagtaho

Wala ako malipay sa pagkakita diha sa Disyembre 8, 1987, nga Pagmata! sa artikulo sa likod nga naghisgot bahin sa “Gikomersiyo ang Pagduaw sa Papa.” Akong gibati ang pulong—“Ang gitahong paborito nga gibaligya ngadto sa mga pari ug mga madre nagpasundayag sa ‘iro nga simbolo sa serbesa . . . nga nagsul-ob sa purong ug biste sa papa.’” Usa ra gani—nagtuo ba gayod kamo niini? Gibati ko nga ang kanunayng pagbomba batok sa Katolisismo dili-angay. Ang tanang mga relihiyon kinahanglang magtahod nga sila mga Kristohanon ug usa diha sa Amahan. Ang bisan unsang relihiyon nga dili motahod dili tinuod nga Kristohanon ug walay katungod sa pagwalig talamayong materyal bahin sa uban. Dili gayod maayo, ikaingon ko!

S. H., Tinipong Bansa

Diha sa Hulyo 8, 1988, sa Pagmata! giakusar kamo ni “B.P.” sa Pransiya nga nanglibak ug namasipala. Halos dili ako makatuo nga tinuod nga magbabasa kining tawhana sa Pagmata!, kay ang Pagmata! kanunayng nagasulat uban ang malumong gugma bahin sa kamatuoran gikan sa Bibliya. Kon kini magkasumpaki sa mga buhat sa mga relihiyon sa kalibotan, wala pa ako makakitag suko nga akusasyon batok kang bisan kinsa! Ang mga kalainan gihatag kanato. Ang testimonyal nga mga kinutlo mainampingong gikutlo. Giapresyar ko ang paagi sa pagpresentar sa mga Saksi ni Jehova sa mga kamatuoran ug gipasagdan ang intelehenting magbabasa sa paghimog iyang kaugalingong mga konklusyon. Gikan sa siyensiya ngadto sa sari, nakakat-on ako sa pagsalig sa inyong pagdukiduki ug mainampingong pagsulat.

C. K., Tinipong Bansa

Ang among ikadugang lamang sa mga pahayag ni C. K. nga ang suliran sa magbabasang S. H. daw uban sa “Newsweek” (Hunyo 29, 1987), kansang report among gisumariya ug gikutlo nga walay komento. Kon bahin sa “tinuod nga Kristohanon” ba ang pagkuha sa pagtagad sa mga relihiyosong mga kahuyangan, angay natong tan-awon ang pananglitan ni Jesu-Kristo mismo, kinsa mitamay sa relihiyosong mga lider sa iyang adlaw diha sa mga termino nga mas grabe pa kay sa migula diha sa “Pagmata!”—Mateo 15:1-14; 23:2-32.—ED.