Napalig-on sa Paglaom sa Gingharian
NIADTONG Abril 1987 si Lila, usa ka babaye sa iyang tungatungang 80 nga edad, nakakita sa iyang bana nga namatay sa ospital duol sa Portland, Oregon. Ang mga mata sa naluoy nga mga nars nagtan-aw kaniya. Iyang gitan-aw ang patayng lawas ug dayon miduol ug gipikpik kana.
“Buotan ka nga bana,” siya miingon. “Magkita ra unya kita sa pagkabanhaw!” Dayon siya milingi ug miingon: “Gisulti ko kana tungod kay usa ako sa mga Saksi ni Jehova. Pasagdi ako sa pag-asoy.” Siya mipadayon sa pag-asoy mahitungod sa pagkabanhaw ug sa bag-ong kalibotan sa Diyos.
Sa ulahi, sa dihang taligawas na siya sa ospital, ang espesyalista sa kasingkasing nga nagtambal sa iyang bana miduol niya sa pasilyo. Ang doktor mihunong ug mipahayag sa iyang simpatiya. Siya misugod dayon sa pagpatin-aw nga sa dili madugay makita ra unya niya ang iyang bana diha sa bag-ong kalibotan pinaagi sa pagkabanhaw. Nakahatag siya ug maayong pamatuod sa doktor nga sa wala pa makalakaw, miingon: “Lila, naghinaot ako nga mahitabo kana alang kanimo.” Sa mitalikod na siya, si Lila miingon: “Mahitabo kini, ug buot kong makita ka usab didto!”
Wala mahibalo si Lila, naduaw na sa mga Saksi ni Jehova ang doktor. Karon, sa nakakita kon sa unsang paagi napalig-on si Lila sa iyang pagtuo sa panahon sa kalisod sa kamatayon sa iyang bana ug sa pagpamati sa iyang positibong paglaom alang sa umaabot, ang doktor nadasig. Siya ug ang iyang asawa nagpadayon sa ilang mga panaghisgot uban sa mga Saksi ni Jehova.
Sa milabay ang pila ka bulan sa ulahi, sa Enero 1988, nagkasakit si Lila ug naospital. Ang tambal wala moepekto kaniya ug daw hapit nang mamatay. Ang espesyalista sa kasingkasing nakadungog mahitungod niana ug dihadiha miadto sa pagduaw kaniya sa intensive care unit. Siya nangutana: “Buweno, Lila, komosta ka?”
“Dili maayo, tingali.”
“Gimingaw ka kang Erick, dili ba?”
“Oo, gimingaw kaayo ako.”
Dayon gisultihan siya sa doktor mahitungod sa saad sa Bibliya sa pagkakita kang Erick pag-usab diha sa pagkabanhaw, ug sa paglaom sa walay kataposang kinabuhi diha sa kahingpitan sa bag-ong kalibotan. Sa pagkatinuod, kining mismong mga butanga ang gisulti ni Lila kaniya sayo pa niana sa dihang namatay ang iyang bana! Kadto mao ang labing maayong tambal nga iyang ikahatag kaniya. Mibaskog dayon siya, migawas sa ospital sulod sa semana, ug mibalik sa Kristohanong ministeryo uban sa nabag-ong kalagsik.
Ug komosta ang iyang espesyalista sa kasingkasing? Siya ug ang iyang asawa nagpahinungod sa ilang mga kinabuhi sa Diyos ug gibawtismohan sa distritong kombensiyon sa mga Saksi ni Jehova sa Corvallis, Oregon, sa Hunyo 1988.—Tinampo.