Gihimo ang Tanan sa Pagtabang sa Uban

NIADTONG 1973, sa dihang nahitabo kini, ako maoy usa ka mahimsog nga 22-anyos. Ang akong kinabuhi puno sa kalipay. Ako nakigbahin sa mga dula ug maikagon sa pisikal nga trabaho. Kon bakasyon ako nag-surfing. Gusto usab akong magmaneho. Apan ang binuang, mahinaykong pagsilaob sa kasuko mitapos ug kalit niining tanan.

Uban sa akong asawa, si Gemma, among giduaw ang mga paryente sa dihang nakuha ang among pagtagad diha sa batan-ong mga lalaki. Among gitan-aw sila nga gibalibali ang mga piraso sa koral sa hardin sa dihang sila nahidangat sa dalan. Sa dihang nakit-an nila kami, sila misugod sa paglabay sa mga putol nga kahoy ngadto sa hardin ug dayon ngadto sa pantaw sa balay, nga among gibarogan. Naigo si Pippa sa usa ka kahoy, ang akong kuwatro-anyos nga batang babaye. Sa dakong kalagot, akong gilambuyog ug gilabay ang bildong baso nga akong gigunitan ngadto sa mga nanghasi. Ang pantaw maoy 3.7 ka metro gikan sa yuta, ug sa ingon nawala ang akong panimbang. Ako nahulog, nag-una ang akong ulo, nalisa ug napiang ang ubay-ubayng taludtod sa akong liog.

Ako naospital halos usa ka tuig, nakapanahon ako sa pagpalandong sa akong kahimtang. Ang tawo nga tapad kanako nagpakamatay, ug ang uban nga akong nahibaloan didto mao usay gihimo. Ang kaguol ug kawalay-paglaom dili-matukib. Ang kabug-at nga akong gipapas-an sa uban ug ang kasayorang wala nay mahimo hilabihang nagpaguol kanako. Oo, daghang higayong nakahunahuna usab ako sa pagtapos sa akong kinabuhi. Ngani, gihangyo ko ang akong asawa sa pagtabang kanako sa pagbuhat niini pinaagi sa pagkuha ug pipila ka mga tabletas alang kanako. Apan iyang akong giingnan nga nabuang ako ug wala maminaw. Pagkadako sa among pasalamat karon nga siya midumili!

Ang mga butang misugod sa pagkausab sa dihang ang iyaan ni Gemma, nga usa sa mga Saksi ni Jehova sa daghang katuigan, misugod sa pagtuon sa Bibliya uban kaniya. Kini makataronganon alang kang Gemma, apan ako wala gayoy interes sa relihiyon. Ang mga butang nga akong nadunggan nga gisulti sa mga klero diha sa telebisyon nagpabugnaw kanako. Bisan pa, ako dili gayod tigtuon. Sa dihang si Gemma misugod sa paghisgot kanako bahin sa iyang bag-ong nakaplagang pagtuo, duha ka butang ang nakita ko nga madanihon.

Una, akong nahibaloan nga ang Bibliya nagkauyon sa usa sa mga ulohan nga akong gikaikagan sa eskuylahan, ang kasaysayan. Kana nakapatingala kanako. Ako wala gayod magtuo nga ang maong kalangkitan naglungtad. Ikaduha, ang hustisya sa Diyos nakapadani kanako ngadto kaniya. Abi kadto nako nga ang mga inhustisya sa kinabuhi dili gayod matul-id. Apan samtang ako nakakat-on bahin sa katuyoan ni Jehova ug sa iyang Gingharian, nakita ko nga ang hustisya mangibabaw.​—Deuteronomio 32:4; Lucas 18:7, 8.

Katuyoan sa Pagkinabuhi

Tapos niana kusog akong miuswag sa akong pagtuon sa Bibliya. Akong nakaplagan ang katuyoan sa pagkinabuhi, bisag dili ako makagahom sa lawas ug magpabiling ingon. Ako may katarongang magmapasalamaton. Apan ang akong panglantaw sa wala madugay misangkad sa naamgohan ko nga ako makabuhat ug dako pa sa pagtabang sa uban sa kahibalo nga akong ginabatonan.

Sa unsang paagi ako mouswag? Kana mao ang mahasol nga pangutana. Si Gemma ug ako dungang nabawtismohan, ug ako nagtuon pag-ayo, uban sa tabang sa daghang maayong mga magtutudlo, nga mouswag sa espirituwal. Ang lisoanang punto miabot, hinunoa, sa dihang nabasa ko ang mahitungod sa usa ka Saksi sa Lebanon.a Siya 46 anyos ug nag-ilaid sa banig sulod sa 18 ka tuig. Apan, bisag imposible kadto alang kanako, siya usa ka ansiano diha sa Kristohanong kongregasyon! Hangtod sa maong panahon, siya nakatabang sa 16 ka tawo nga nahimong dedikadong mga alagad ni Jehova ug nagadumala ug pito ka pagtuon sa Bibliya kada bulan. Ang iyang kasinatian maoy usa ka inspirasyon alang kanako.

Ang lokal nga awtoridad sa pamalay mitagana ug usa ka andanang balay alang sa akong pamilya, nga hitso sa mekanikal nga kahimanan sa balay nga nagtabang kanako nga makalihoklihok. Ako gipanalanginan sa tanang pisikal nga tabang nga akong gikinahanglan. Ang among pamilya nag-usa ug mipalit ug sakyanan nga sayong ikasulod ang akong lingkoranang may ligid diha niana. Kini nagpaarang kanamo ingong pamilya sa pagtambong sa mga tigom sa Kingdom Hall. Sa pagkamahigugmaon, ang lokal nga kongregasyon naghikay ug Pagtuon sa Libro sa Kongregasyon nga diha himoon sa akong balay.

Ang akong tinguha nga makasangyaw sa balay ug balay natuman sa dihang ang mga igsoong lalaki ug babaye mitanyag sa pagtulod sa akong lingkoranang may ligid. Ako makasulti ngadto sa mga tagbalay apan, dili makagamit sa akong mga bukton ug mga kamot, ang paggamit sa Bibliya suliran. Busa ako mokutlo ug mga kasulatan, ug ipakita sa akong kauban ang mga bersikulo gikan sa iyang Bibliya ug motanyag sa mga tabang sa pagtuon sa Bibliya nga akong nganlan.

Siyempre, daghang mga tawo moduaw nako sa balay, ug niining paagiha ako nakadumalag mga panagtuon sa Bibliya. Akong nabansay usab ang arte sa paghimog mga sulat pinaagi sa pagkapot sa pluma diha sa akong baba, aron ako mahimong aktibo sa pagsangyaw sa bisan unsa nga panahon sa adlaw. Ug regular nga tig-auxiliary payunir ako sulod sa tulo ka tuig.

Pagkahimong Takos Ingong Magtutudlo

Sa pagdagan sa panahon ako nahimong kuwalipikado ingong usa ka ministeryal nga alagad, apan sa unsang paagi ako makatudlo diha sa plataporma? Sa panahon sa akong mga pagtuon, akong nakat-onan ang pagpakli sa mga panid sa Bibliya pinaagi sa paggamit ug tusok nga akong paakon. Bisan pag nakatabang kini, siyempre makahunong ako sa pagsulti samtang akong kuhaon ug unya ibutang kinig balik. Dayon akong naamgohan nga ang solusyon mao ang paggamit sa akong dila​—sa pagpakli sa mga panid sa Bibliya! Ug kini mao karon ang akong ginabuhat.

Kining talagsaong teknik nagpaarang kanako nga maugmad ang akong katakos sa pagsulti, ug daghan ang akong nakat-onan gikan sa akong mga asaynment sa Teokratikanhong Tunghaan sa Ministeryo. Handurawa ang akong gibati sa 1984 sa dihang ako gitudlo sa pag-alagad ingong ansiano sa kongregasyon!

Ang sunod nga lakang mao ang paghatag ug pakigpulong sa publiko, nga mokabat ug 45 minutos. Kini nagkinahanglan ug makuting pagpangandam, ug bisag akong nakita kining hago sa pisikal, ako nagpadayon. Karon ako may dugang pribilehiyo sa pagduaw sa duol nga mga kongregasyon sa matag karon ug unya sa pagpakigsulti kanila. Ang mga bata maikag sa pagtan-aw kanako nga mopakli sa mga panid sa Bibliya uban sa akong dila, ug usahay sundogon nila ako. Apan sila mosurender. Kini nagkinahanglag daghang pagbansay sa pagbuhat niini nga may kahanas.

Sa maglantaw ug balik, tin-aw kong mahinumdoman ang kasub-anang akong gibati sa akong unang pagkagawas sa ospital. Ako nahibalo nga ang mga asawa sa kadaghanang mga baldado nga sama nako mibiya sa ilang mga bana. Kon biyaan ako ni Gemma, ako makasabot ra. Hinunoa, ingong usa ka mahigugmaong kauban, siya miunong kanako, sa pagpaluyo ni Pippa, nga among anak nga babaye. Uban sa ilang tabang ug sa tabang sa kongregasyon, ako nakagahom sa ‘paghimo sa tanan’ ug sa pagtabang sa uban. (2 Corinto 6:13)​—Sumala sa giasoy ni Tony Wood.

[Footnote]

[Mga hulagway sa panid 25]

Uban kang Gemma ug Pippa, akong asawa ug anak

Nagpakli sa mga panid pinaagi sa akong dila