Unsang Mensahea ang Ilang Nadunggan?
SA UNSANG matang sa kalibotan gusto nimong mopuyo? Unsang matang sa umaabot ang gusto nimo alang sa imong mga anak? Kon imong mabatonan ang hingpit nga panglawas ug dili mamatay, mopili ka ba niana?
Unsaon nimo pagtubag ang maong mga pangutana? Ang kadaghanang tawo, bisan unsay relihiyoso o politikanhong kagikan, buot mopuyo sa usa ka kalibotan nga may kalinaw ug kadagaya. Kahinangpan nila ang usa ka kalibotan nga may hingpit nga hustisya ug harmoniya, diin wala unyay kahiwian; ni may usa unya ka balaod alang sa mga pribilehiyado ug lain alang sa mga kabos.
Ug alang sa imong mga anak, sa walay duhaduha buot nimong magbatog daghang pagkaon, maayong balay, ug maayong edukasyon. Sa laing mga pulong, buot nimong maseguro ang maayong kaugmaon alang sa imong kaugalingon ug sa imong mga anak. Ug kon hatagan sa higayon, palabihon nimo ang magbatog hingpit nga panglawas ug mabuhi nga may igong kadugayon aron sa pagtuman sa tanan nimong maayong mga tinguha ug mga ambisyon, bisan ang pagpahimulos ug kinabuhing walay kataposan sa malinawon, paraisong yuta.
Kining tanan dili kay damgo nga dili matuman. Kini ang mensahe nga ginawali sa mga Saksi ni Jehova sa tibuok yuta, apil sa mga nasod sa Silangang Uropa.
Ang Praktikal nga Paglaom sa Umaabot Diha sa Bibliya
Ang kasaligang mga tagna sa Bibliya nga gisulat daghang siglo nga miagi nagtagna sa mga panghitabo sa atong ika-20ng siglo, sa atong ‘mga gubat ug mga dinungogdungog sa mga gubat’; atong ‘mga linog ug mga kanihit sa pagkaon sa sunodsunod nga dapit’; atong ‘kagul-anan sa mga nasod, nga wala masayod sa lutsanan, samtang ang mga tawo panguyapan tungod sa kahadlok ug pagpaabot sa mga hitabo nga modangat sa yuta’; atong ‘paglaglag ug paghugaw sa yuta.’—Lucas 21:10-33; Pinadayag 11:18.
Bisan pa niana, kining tanang hitabo ug daghan pa maoy tinong ilhanan nga ang gisaad sa Diyos nga bag-ong kalibotan haduol na usab. Nalangkit niini ang “bag-ong mga langit ug usa ka bag-ong yuta,” nga mao, usa ka bag-ong pagmando sa kalibotan, usa ka langitnong kagamhanan, ug sa nabag-ong yutan-ong katilingban ‘diin ang pagkamatarong magapabilin.’ Nagkahulogan kini sa usa ka bag-ong kalibotan diin ‘ang kasakit, kamatayon, ug pagbalata mawala na.’—Isaias 65:17-25; 2 Pedro 3:13; Pinadayag 21:1-4.
Dayag, walay politikanhong sistema, bisan unsa ka sinsero ug makugihon, ang takos makatuman sa maong programa. Ang Soberanong Ginoo lamang sa uniberso, si Jehova nga Diyos, ang nagbaton sa hugot nga tinguha ug gahom sa pagtuman niini. Tungod niana ang iyang Anak, si Kristo Jesus, nagtudlo sa iyang mga sumusunod sa pag-ampo: “Amahan namo nga anaa sa mga langit, balaana ang imong ngalan. Umanhi ang imong gingharian. Matuman ang imong pagbuot, ingon nga natuman sa langit, dinhi usab sa yuta.”—Mateo 6:9, 10.
Ang pagbuot sa Diyos mao nga ang yuta mahimong masidlakong pahiyas sa uniberso, nga puy-anan sa mahigugmaon-sa-kalinaw nga tawhanong banay. Sa dili madugay ang Diyos molihok na sa pagpahinabo niana. Kini unya maoy lihok sa paghinlo aron ang yuta mawad-an sa tanang kahugawan ug mga maghuhugaw. Ang tanang polusyon, kon kaha pisikal o moral, mapapas na gikan sa yuta. Kinsay magpabilin? Si Jesus miingon: “Malipayon ang mga malumo, sanglit sila magapanunod sa yuta.”—Mateo 5:5; Pinadayag 16:14-16.
Buot ba nimong mahiapil sa mga malumo nga magbaton sa panalangin sa Diyos? Nan pakigkita sa mga Saksi ni Jehova diha sa inyong silinganan ug pangayog usa ka libreng pagtuon sa Bibliya sa balay, nga walay bayad. Susiha sa imong kaugalingon kon unsa ang “maayo ug dalawaton ug hingpit nga kabubut-on sa Diyos.” Ug unya tumana kana.—Roma 12:2.