Gikan sa Among mga Magbabasa
Tabi Salamat kaayo sa inyong tukma sa panahong mga artikulo mahitungod sa tabi. (Hunyo 8, 1991) Ako nahimong sumsoman sa madinaoton nga tabi dili pa dugay, ug pinaagi sa pagpadapat sa prinsipyo sa Kasulatan diha sa Mateo 18:15-17, natul-id ko ang maong butang uban sa tagsala.
B. C., Australia
Alang kanako ang mga artikulo impormatibo ug maayong pagkasulat. Apan, nahibulong lang ako sa mga hulagway nga inyong gigamit. Upat kanila naglarawan sa mga babaye nga nagtabi. Ang wala-malitok nga mensahe mao nga ang pagtabi maoy kinaiya sa mga babaye.
H. W., Tinipong Bansa
Dili namo tuyo nga ilarawan ang mga babaye o mga lalaki sa negatibong paagi. Duha ka hulagway nalangkit sa mga lalaking nagtabi. Laing hulagway naglarawan sa duha ka babaye nga nag-ambitay ug makalig-ong kolokabildo. Usa ka babaye gipakita usab nga midumili sa pagpamati sa tabi.—ED.
Mga Gang Mao pay akong pagdawat sa akong Hunyo 8, 1991, nga gula nga may artikulong “Mga Batan-on Nangutana . . . Angay ba nga Moanib Ako sa Usa ka Gang?” May mga panahong nabalaka ang akong bana ug ako sa among kamanghurang anak, nga nadani sa mga gang. Siya misugod sa pagpamesti sama kanila ug gisundog ang ilang mek-ap ug kopyor sa buhok. Wala kami makaamgo kon unsay nagakahitabo hangtod nga halos ulahi na kaayo. Maayo na lang, among nasakmit siya gikan sa daotang impluwensiya. Nanghinaot ako nga ang inyong artikulo mohatag ug kaayohan. Nagplano ba kamo sa pagsulat ug dugang pa bahin niining ulohana?
D. N., Tinipong Bansa
Tan-awa ang among Hulyo 22, 1991, nga gula.—ED.
Mga Baga Kinahanglang pasalamatan ko kamo alang sa artikulong “Ang mga Baga—Usa ka Kahibulongang Desinyo.” (Hunyo 8, 1991) Kini nakapukaw kanako ug pagbati sa katingala sa kahibulongang mga buhat ni Jehova nga Diyos. Ang artikulo maayo kaayong pagkasulat ug nakatabang kanako sa katingad-anan yanong paagi aron makasabot sa mga butang nga lisod kaayong sabton.
B. T. A., Brazil
Pagkabuang sa Loteriya Ang inyong artikulo mahitungod sa ‘Pagkabuang sa Loteriya’ (Mayo 8, 1991) nakapahinumdom kanako sa wala pa ako mahimong usa ka Kristohanon, ako may mga higalang nagapanugal. Ang usa napriso tungod sa pagsundog sa pirma tungod sa sugal. Lain ang nakulatahan sa mga tigpatanto ug gibiyaang paralisado tungod kay wala makabayad sa utang. Ang sugal tinuod gayod nga makadaot sa mga kinabuhi sa mga tawo.
R. B., Tinipong Bansa
Mga Kamera Dili pa dugay nga mipalit ako ug usa ka kamera nga may igpasibo sa tig-abre sa lente ug pagpangay sa gikusgon sa pagtak-op sa lente, apan lisod sabton ang basahon sa instruksiyon sa paggamit. Ang inyong artikulo “Mga Handomanan—Sa Pagpislit sa Usa ka Buton!” (Hulyo 8, 1991) nakatubag sa akong mga pangutana. Salamat sa inyong pagpatin-aw sa teknikal nga mga butang nga sayong sabton.
S. H., Japan
Pag-abiabing Hapones Nalingaw ako sa artikulo “Usa ka Gabii sa Panimalayng Hapon.” (Abril 22, 1991) Mahadlok kaayo akong mosakay ug ayroplano nga maoy nakapugong kanako sa pagbiyahe. Apan tinuod kaayo ang inyong artikulo ug makalingaw nga maoy nakatukmod kanako sa pagbiyahe diha sa akong hunahuna—nga dili na kinahanglang molupad pa.
K. R., Tinipong Bansa
Mga Bandang Rock Kini maoy bahin sa inyong artikulo “Kalaw-ayan nga Gibuhatan ug Musika.” (Marso 8, 1991) Ang unang mga pahayag sa artikulo naghisgot bahin sa ‘sagradong misyon sa mga bandang rock—sa pagsakit sa mga ginikanan.’ Makahunahuna ako ug daghang popular nga bandang rock nga nagagamag maayo, positibong musika. Tingali naghisgot kamo bahin sa “pila” ka mga bandang rock.
L. H., Tinipong Bansa
Wala namo hukmi ang tanang modernong musika. Ang pahayag nga gihisgotan maoy usa ka direktang pangutlo gikan sa magasing “U.S.News & World Report.” Sa unahan ang artikulo nag-ingon nga ang partikular nga mga bandang rock nga gihisgotan maoy “halayo sa presenteng kiling.” Kami usab miingon nga ang “pila” ka musika karong adlawa—dili tanan—malaw-ay.—ED.