Gikan sa Among mga Magbabasa
Agwa Dili nako masulti kaninyo kon unsa kadako sa akong pagmahay sa dihang akong nabasa ang artikulo “Kanang Mahal nga mga Agwa.” (Oktubre 8, 1991) Tinuod kana nagtug-an sa mga tawo kon unsaon pagpili ug agwa nga walay bisag unsang pagpasidaan mahitungod sa daotang mga epekto niana sa dili maihap nga mga indibiduwal nga nag-antos gikan sa balatian gumikan sa palibot! Kaliboan ang grabe o igoigo nga naalerdyik sa mga agwa. Nganong dungagan ang suliran?
C. M., Tinipong Bansa
Kami nakadayeg niining mga komento. Hinuon, ang Bibliya wala magasaway sa paggamit ug mga pahumot, busa ang mga indibiduwal makahimo ug personal nga paghukom bahin niini. (Itandi ang Exodo 30:7; Juan 12:3-5.) Bisan pa, ang usa ka Kristohanon gusto gayod nga motagad sa daotang mga epekto nga lagmit mapahinabo sa agwa ngadto sa uban, pananglitan diha sa mga tigom sa kongregasyon.—ED.
Nabahin sa Relihiyon nga Panimalay Salamat kaninyo alang sa artikulo “Mga Batan-on Nangutana . . . Unsa man kon Dili Mopaluyo Kanako ang Akong mga Ginikanan sa Akong Pagtuo?” (Enero 8, 1992) Ang pag-alagad sa Diyos nga walay pagpaluyo sa pamilya subsob lisod kaayo ug usahay makapabugnaw. Kamo nagtabang kanako sa pag-apresyar nga ako may daghan mapaluyohon nga “pamilya” diha sa Kristohanong kongregasyon.
S. H., Tinipong Bansa
Kay minyo sa dili magtutuong kapikas, ako nakasinati sa susamang kakulang sa pagpaluyo. Ang artikulo nagtabang kanako sa pagkaamgo nga ako nakaamot sa suliran pinaagi sa pagkamug-oton ug pagkamakilalison. Kinahanglan nako ang yano apan maayong tambag sa pagbuhat ug unang lakang sa paghangyo ug tabang sa kongregasyon. Salamat kaninyo sa pagtabang kanako sa paghatag pagtagad ug pagkuhag dili mapihigon nga panlantaw sa akong kahimtang.
K. V., Tinipong Bansa
Radon Nasayop kamo sa inyong artikulo “Radon—Katalagman sa Inyong Panimalay?” (Oktubre 22, 1991) Inyong giingon: “Ang proporsiyon sa pagkabungkag sa radyoaktibong substansiya gitawag ug katunga-sa-kinabuhi.” Bisan tuod ang proporsiyon sa pagkabungkag ug ang katunga-sa-kinabuhi may kalambiggitan, dili sila pareho.
J. G., Tinipong Bansa
Salamat kanimo tungod sa pagpahibalo niini. Unta mas labawng tukma ang pag-ingon nga ang katunga-sa-kinabuhi mao ang gidugayon nga igugol alang sa katunga sa mga atomo diha sa radyoaktibo nga mga substansiya sa pagkabungkag. Ang proporsiyon sa pag-usab (gidaghanon sa atomo nga mabungkag matag segundo) sa pagkatinuod nagaus-os samtang ang gidaghanon sa radyoaktibong mga atomo nagkaus-os.—ED.
Mga Isport Ingong usa ka magtutudlo sa pisikal nga edukasyon ug isport, gihatagan nako ug linaing pagtagad ang serye “Mga Dula—Unsa ang Ilang Dapit?” (Agosto 22, 1991) Sa husto inyong nailhan ang mga kahiwian ug kapeligrohan sa modernong mga isport, sama sa hinobrang indigay, komersiyal nga mga intereses, kabangisan, ug panglimbong. Hinuon, may dalayegong kalainan sa paagi nga gidumala ang isport sa Uropa ug sa Tinipong Bansa; ang inyong mga artikulo halos nagpunting sa bug-os sa Amerikanhong mga isport.
S. O., Pransiya
Ang “Pagmata!” subsob nagluwat ug mga artikulo bahin sa mga isport nga nagahawas sa internasyonal nga panlantaw, lakip ang ubay-ubayng personal nga mga asoy mismo sa Uropanhon, Aprikanhon, ug Latin-Amerikanhong mga atleta. Ug samtang ang kinaulahiang mga artikulo natunong sa mga isport sa T.B., kami nagtuo nga ang mga magbabasa sa nagkadaiyang kayutaan makabenepisyo gumikan sa pagpadapat sa mga prinsipyo sa Bibliya nga nahisgotan didto.—ED.
Ako buhing pamatuod nga ang mga isport, o “pagbansay sa pisikal,” maoy “makaayo ug diyutay.” Sa katuigan sa akong pag-eskuyla, ako apil sa tem sa volleyball sa tunghaan ug nagdulag maayo diha sa mga dula ug mga bangga. Ang akong mga pakig-uban dili maayo, hinuon, ug ako naluya sa espirituwal. Busa daghang panahon ang nausik. Pagkatapos sa pag-eskuyla, nakahukom ako sa pagdedikar sa akong kaugalingon kang Jehova ug pagsulod sa bug-os panahon nga ministeryo. Karong adlawa nakaplagan nako ang tumang kalipay dinhi, sanglit ang “diyosnong debosyon maoy makaayo alang sa tanang butang.”—1 Timoteo 4:8.
P.G., Brazil