Ang Atong Nagakausab nga Kalibotan—Unsa ba Gayod ang Umaabot?

ARON mahimong mas maayo ang atong kalibotan, unsang mga paagi ang atong kapilian? Ang usa ka kapilian mao ang pagtuo nga ang mga magmamando ug mga pangulo sa kalibotan ngadtongadto mahimong dili hakog alang sa kaayohan sa uban ug manguna sa katawhan ngadto sa mga paagi sa kamatinugoton sa usag usa, sa pagsinabtanay, ug kalinaw.

Kana nagkahulogan nga tuohan nga mawala ang tribo-tribong tinamdan ug nasyonalismo ug ilisan sa usa ka saylo-sa-nasodnong-utlanan nga tinamdan nga makadalag kaharmoniya sa kalibotan.

Kana usab naglangkit sa pagtuo nga ang mga pangulo sa kapitalistang mga ekonomiya moila nga ang motibo alang sa ganansiya lamang dili igo nga batasan diha sa usa ka kalibotan nga daghang walay trabaho, walay puloy-anan, ug dagkong mga bayronon sa pagpatambal.

Dugang pa kana nagkahulogan nga tuohan nga ang mga tiggama ug armas sa kalibotan mosugod sa pagpangandoy alang sa kalinaw sa kalibotan ug mosalsal sa ilang mga espada ngadto sa mga punta sa daro.

Dugang pa, kana nagkahulogan nga ang mga kriminal sa kalibotan, lakip na ang mga capos sa Mafia, ang mga haring-gangis sa Oriental nga mga gang sa krimen, ug ang mga hawod sa droga sa Habagatang Amerika, maghinulsol ug mosugod sa pagbag-o sa batasan!

Sa laing pagkasulti, kana nagkahulogan sa pagtuo sa hinimog-tawo nga Utopia​—usa ka imposibleng damgo. Kon kining tanan gidahom nga mahitabo nga walay tabang gikan sa Diyos, nan kita anaa sa susamang kahimtang nga gihubit sa historyador nga si Paul Johnson sa iyang librong A History of the Modern World. Siya misulat nga usa sa nagpaluyong mga kadaotan nga nakaamot ngadto sa “malaglagong mga kapakyasan ug mga katalagman” sa atong siglo mao “ang mapagawalong pagtuo nga ang mga lalaki ug mga babaye makasulbad sa tanang misteryo sa uniberso pinaagi sa ilang kinaugalingong mga panghunahuna.”​—Itandi ang Isaias 2:2-4.

Hinuon, adunay balidong kapilian alang sa positibong kausaban. Kana mao ang pagtuo nga ang Maglalalang sa yuta, ang Tag-iya sa atong planeta, ang Dakong Arkitekto sa kausaban, si Jehova nga Diyos, mangilabot sa tawhanong kalihokan aron luwason ang buhat sa iyang kamot. Ang kasaysayan sa Bibliya nagpakita nga ang Diyos milihok sa miagi aron ipatuman ang iyang mga katuyoan, ug ang tagna sa Bibliya nagpaila nga siya sa dili madugay molihok pag-usab aron tumanon ang iyang unang katuyoan alang sa katawhan ug sa yuta.​—Isaias 45:18.

Usa ka Tagsaong Tinubdan sa Kasaligang Impormasyon

Ang tagsaong Tinubdan sa tinuod nga kahibalo mahitungod sa paglaom sa umaabot alang sa katawhan gihulad diha sa mga pulong sa propeta sa Bibliya nga si Isaias: “Hinumdomi ang unang mga butang sa karaan, kay ako mao ang Balaang Usa ug wala nay laing Diyos, wala nay lain nga sama kanako; ang Usa nga nagasugid sa kataposan gikan sa sinugdan, ug gikan sa karaang mga panahon mga butang nga wala pa mahimo.”​—Isaias 46:9-11.

Nganong si Jehova nga Diyos angayng mahibalo daan sa mga panghitabo nga hapit nang moapektar sa katawhan? Sa makausa pa si Isaias mitubag: “Kay maingon nga ang mga langit hataas kay sa yuta, mao man ang akong mga dalan labi pang hataas kay sa inyong mga dalan, ug ang akong mga hunahuna kay sa inyong mga hunahuna.” Ang mga hunahuna sa Diyos alang sa kaugmaon sa katawhan gipahayag diha sa Bibliya.​—Isaias 55:9.

“Mga Panahon nga Lisod Sagubangon”

Unsay gitagna sa Pulong sa Diyos, ang Bibliya, alang sa atong kaliwatan? Ang Kristohanong apostol nga si Pablo mipasidaan: “Apan sayri kini, nga sa kataposang mga adlaw managpangabot ang panahon nga lisod sagubangon.” (2 Timoteo 3:1) Sukad gayod sa 1914 ug sa Gubat sa Kalibotan I, kita nagkinabuhi sa mga panahon nga nagkalisod ug samot. Ang kahakog sa tawo, kadalo, ug kahangol sa gahom nakaagak kaniya sa paghimo ug nagkahilabihang kapintasan dili lamang batok sa iyang isigka-tawo kondili batok usab sa kinaiyahan mismo. Ang kawalay-pagtagad sa tawo sa iyang kalikopan maoy nagahulga sa umaabot nga paglungtad sa iyang mga anak ug mga apo.

Kining grabeng katalagman gipasiugda sa kanhing presidente sa Czechoslovakia, si Vaclav Havel, nga misulat mahitungod sa mga kahimtang nianang nasora. Kon susihon, ang iyang mga pulong mapadapat sa tibuok-kalibotan: “Kini mao lamay sangpotanan sa . . . tinamdan sa tawo sa kalibotan, sa kinaiyahan, sa ubang tawo, sa kinabuhi mismo. Mao kini ang sangpotanan . . . sa kamagarbohon sa modernong tawo, nga nagtuo nga iyang nasabtan ang tanang butang ug nahibaloan ang tanang butang, nga nagtawag sa iyang kaugalingon nga agalon sa kinaiyahan ug kalibotan. . . . Mao kana ang panghunahuna sa tawo nga dili moila sa bisan unsa . . . nga labaw sa iyang kaugalingon.”

Ang gikutlo ganiha nga si Al Gore misulat: “Ako kombinsido nga daghang tawo ang nawad-an ug pagsalig sa ugma-damlag, tungod kay sa halos matag bahin sa atong sibilisasyon kita nagalihok nga morag wala nay kaugmaon nga ang pagtagad lamang sa atong presenteng mga panginahanglan ug mubog-tagal nga mga suliran mao ang mas makahuloganon.” (Earth in the Balance) Sa pagkamatuod ang madulom nga panan-aw mahitungod sa umaabot morag maoy nagapalabing tinamdan.

Kining kahimtanga sa bahin miabot tungod kay ang dugang mga pulong ni Pablo natuman: “Kay ang mga tawo unya mga mahigugmaon sa ilang kaugalingon, mahigugmaon sa salapi, tigpagawal, hambogiro, tampalasan, masukihon sa mga ginikanan, dili mapasalamaton, dili maunongon, walay kinaiyanhong pagbati, dili ikasabot, tigbutangbutang, walay pagpugong sa kaugalingon, mabangis, walay gugma sa maayo, mabudhion, gahig-ulo, magarbohon, mahigugmaon sa kalingawan inay sa Diyos unta hinuon, nga nagabaton sa dagway sa tinuohan apan nagapanghimakak sa gahom niini; ug likayi kining maong mga tawhana.”​—2 Timoteo 3:2-5.

Usa ka Maayong Kapilian

Apan ang Diyos nagtuyo nga ang mga butang mausab ibabaw niining yutaa​—alang sa mas maayo. Siya misaad nga mopatungha siya ug “bag-ong mga langit ug usa ka bag-ong yuta . . . , diin nagapuyo ang pagkamatarong.” (2 Pedro 3:13) Sa pagpasig-uli niining nahugawang yuta ngadto sa kahimtang sa Paraiso, si Jehova nga Diyos kinahanglan unang “molaglag sa mga nagalaglag sa yuta.” (Pinadayag 11:18) Sa unsang paagi kini mahitabo?

Pinaagi sa simbolikong pinulongan, ang Bibliya nagatudlo nga sa dili madugay ibutang sa Diyos diha sa mga kasingkasing sa politikal nga mga elemento, lakip na sa Hiniusang Kanasoran, ang paglaglag sa gahom ug kabantog sa tingali ang labing negatibong puwersa sa kasaysayan sa tawo​—ang nasyonalistiko ug mabahinbahinong impluwensiya sa relihiyon sa tibuok yuta.a Sumala kang Martin van Creveld, diha sa iyang librong The Transformation of War, “kita may katarongan sa pagdahom nga ang relihiyosong mga tinamdan, mga tinuohan, ug mga panatisismo modula ug dakodakong papel sa pagdasig sa gubat kay sa kaniadto, sa labing menos diha sa Kasadpan, sa miaging 300 ka tuig.” Malagmit tungod sa pag-apil-apil sa politika, ang relihiyon magaantos diha sa mga kamot sa politikanhong mga gahom. Apan, nga wala tuyoa kanang mga gahoma magatuman sa kabubut-on sa Diyos.​—Pinadayag 17:16, 17; 18:21, 24.

Ang Bibliya mipadayon sa pagpakita nga ang sunod tagdon sa Diyos mao ang mapahimudsanon, samag-mapintas-nga-mananap nga politikanhong mga elemento sa dunot nga sistema sa kalibotan ni Satanas ug atubangon sila sa iyang kataposang gubat, o gubat sa Armageddon. Tapos hanawa ang walay-kaluoy nga politikanhong mga sistema ug ang ilang batid nga tigmaneobra, si Satanas, ang dalan maandam na alang sa malinawong bag-ong kalibotan nga gisaad sa Diyos.b​—Pinadayag 13:1, 2; 16:14-16.

Ang mga Saksi ni Jehova nagasangyaw sa balay ug balay mahitungod niining umaabot nga mga kausaban sa hapit 80 na ka tuig. Nianang panahona, sila usab nakakita ug nakasinatig daghang mga kausaban nga nahimo sa tawo. Sila nakasinatig pagkabilanggo sa mga bilanggoan ug mga kampo konsentrasyon sa Nazi tungod sa ilang pinasikad-sa-Bibliya nga mga prinsipyo. Ilang nasinatian ang mga kasakit ug ang pag-antos sa kinabuhi sa daghang mga dapit sa Aprika, lakip sa mga gubat sibil ug tribonhong away. Miantos sila sa mga paglutos diha sa mga kamot sa kadaghanang politikal ug relihiyosong mga sistema tungod sa ilang neyutralidad ug sa ilang masibotong pagwaling buluhaton. Apan, bisan pa niining tanan, ilang nakita ang pagpanalangin sa Diyos sa ilang tibuok-kalibotang edukasyonal nga buluhaton samtang sila mitubo gikan sa pipila ka libo niadtong 1914 ngadto sa mga upat ug tunga ka milyon sa 1993.

Mga Katarongan sa Kamalaomon

Inay kay madaog sa kawalay-paglaom, ang mga Saksi may malaomong panglantaw tungod kay sila nahibalo nga ang kinamaayohan ug kinadak-ang mga kausaban sa dili madugay mahitabo niining yutaa. Ang mga panghitabo sukad sa 1914 nagtuman sa mga tagna nga gihatag ni Jesus, nga nagtimaan sa panahon sa iyang dili-makitang presensiya sa gahom sa Gingharian ug nagpaila nga kita anaa na sa panahon sa kataposan alang sa bisan unsang dinasig-sa-tawo nga “bag-ong kahikayan sa kalibotan,” sama sa gihubit sa usa ka Pranses nga magsusulat sa Le Monde mahitungod sa mga kalaoman sa haduol nga umaabot. Si Jesus nag-ingon: “Inigkakita ninyo niining mga butanga nga magakahitabo, sayra ninyo nga nagakahiduol na ang gingharian sa Diyos.”​—Lucas 21:7-32.

Ang tawhanong “bag-ong kahikayan sa kalibotan” puno sa kahuyangan sa tawhanong kinaiya​—ambisyon, kahangol sa gahom, kahakog, kahiwian, ug inhustisya. Ang bag-ong kalibotan sa Diyos magagarantiya sa hustisya. Mahitungod kaniya kini nasulat: “Ang Bato, ang iyang buhat hingpit man, kay ang tanan niya nga mga dalan mga matul-id. Diyos sa pagkamatinumanon ug walay kasal-anan; siya matarong ug matul-id.”​—Deuteronomio 32:4.

Ang “bag-ong kahikayan sa kalibotan” sa tawo sumala kang McGeorge Bundy, eksperto sa T.B. bahin sa langyawng polisa, madinawaton sa iyang gitawag nga “mapihigong nasyonalistikong mga pagbati nga niana ang mga manggugubot makadangop.” Sa pagpadayon, siya miingon: “Atong nahibaloan gikan sa kasaysayan kon sa unsang paagi ang kapakyasan sa ekonomiya ug sa sosyedad makahatag kusog sa maong mga ekstremista. Nasayod usab kita nga bisan diin kana mahitabo, kanang matanga sa nasyonalismo maoy peligroso.”

Ang bag-ong kalibotan sa Diyos nagagarantiya sa kaharmoniya ug kalinaw tali sa mga tawo sa tanang tribo ug mga nasod tungod kay sila pagatudloan sa mga paagi ni Jehova mahitungod sa walay-pagpalabi ug gugma. Si Isaias nagtagna: “Ug ang tanan nimo nga mga anak pagatudloan ni Jehova, ug dako ang pakigdait sa imong mga anak.” (Isaias 54:13) Ug ang Kristohanong apostol nga si Pedro nag-ingon: “Sa pagkatinuod naila ko nga ang Diyos wala diay ing pinalabi sa mga tawo, hinunoa nga sa matag-usa ka nasod iyang pagakahimut-an si bisan kinsa nga magakahadlok kaniya ug magabuhat sa matarong.”​—Buhat 10:34, 35.

Walay duhaduha, aduna unyay tagsaong mga kaugmaran diha sa duol nga umaabot sa kalibotan ingon sa atong nahibaloan. Hinuon, ang kinadagkoang mga kausaban, ang permanente ug makaayong mga kausaban, maoy kadtong gisaad sa Diyos nga himoon, ug siya “dili arang makabakak.”​—Tito 1:2.

[Mga footnote]