Mga Butang nga Dili Malaglag sa Urakang Andrew

ANG pila ka urakan [hurricane] mas malaglagon kay sa uban.a Ang uban kusog lang ug diyutay sa unos, nga modala ug bunok sa ulan ug molukat ug mga kahoy. Unya dihay Urakang Andrew sa habagatang Florida (Agosto 24, 1992) ug sa Louisiana (Agosto 26, 1992), Urakang Iniki sa Kauai, Hawaii (Septiyembre 12, 1992), ug Bagyong Omar sa Guam (Agosto 28, 1992).

Kana sila mopahinabog kadaot nga mokabat ug binilyon ka dolyares. Dinosenang mga tawo ang nakalasan ug kinabuhi sa Florida. Linibo ka pamilya ang nawad-an ug balay. Ang mga ahente sa seguro naglibotlibot sa nagun-ob nga mga balay nga nangita sa mga tag-iya aron bayran ang mga kadaot.

Usa ka taho gikan sa Fort Lauderdale Relief Committee sa mga Saksi ni Jehova nag-ingon nga 518 sa 1,033 ka mga balay sa mga Saksi ni Jehova diha sa rehiyon ang mareper pa. Kon ipadapat ang proporsiyon sa katibuk-an, kana magkahulogan nga sa labing menos 50 porsiento sa tanang balay nga giagian ni Andrew ang naguba. Tapos niadto, kadtong nabulahan nga ang balay arang pang kapuy-an nagsulayg pauga sa ilang mga muwebles ug mga kortina ug gikuha ang puting mga lakra nga gipahinabo sa nahugnong mga kisame tungod sa pagbuhagay sa ulan agi sa nadaot nga mga atop. Daghan ang dili makaako sa pagtan-aw sa kagun-oban sa ilang mga balay. Tingali ang mas naalaot mao kadtong nanagpuyo sa dili kaayo lig-ong mga balay nga maguyod o mga treyler.

Ang Urakang Andrew Walay Gipili

Ang usa sa maong magtiayon mao si Leonard ug Terry Kieffer. Sa dihang ilang gibalikan ang parkingan sa ilang maguyod nga balay sa Siyudad sa Florida, kinahanglan nilang magpaila sa tsekpoint sa militar aron makasulod sa dapit. Ang ilang nakita maoy usa ka parkingan sa maguyod nga balay nga morag gibuthan sa gatosan ka dagkong mga bomba​—nga walay gibiling bisan unsang lungag. Ang mga kahoy nangalukat. Mga pinanid sa nangalukot nga aluminum, nga kanhi mga bungbong ug atop sa mga balay, nalambod sa mga kahoy ug nanagbitay sa mga sanga nga morag usa ka mangil-ad nga dayandayan sa piyesta. Ang mga linya sa koryente nangahulog sa tanang dapit, ang kahoyng mga poste nangabali nga samag mga palito. Ang mga kotse nangabalit-ad ug nangaguba.

Si Bob van Dyk, kansang bag-ong balay gideklarar nga dili na angay nga puy-an, naghulad sa nahitabo sa sulod sa iyang balay: “Ang kisame nahagsa, nga midugmok sa arang madugmok, nga mibaliko sa arang mabaliko ug naghadlok kanamo, ang mga hadlokonon.”

Ang personal nga mga kabtangan, mga dulaan, sapot, letrato, libro, nagkatag sa palibot ingong makasubong pahinumdom sa kanhing estilo-sa-kinabuhi. Usa ka minghoy itom nga iring ang naglaroylaroy nga walay padulngan latas sa kagun-oban. Kana misipat nga masuknaon sa magtiayong Kieffer. Ang gagming nga mga tabili nagdagandagan sa ibabaw sa kanhi bililhong mga pagkabutang sa uban. Ang baho sa nadunot nga pagkaon, nga nayabo gikan sa naguba nga mga refrigerator, nagpuno sa hangin. Sa matag direksiyon ang makita maoy kusganong kalaglagan​—ang tanan gipahinabo sa hangin, kusog nga hangin, nga mihaguros sa 260 kilometros kada oras.

Kadto maoy makadugmok sa kasingkasing nga hitabo alang sa mga tag-iya ug mga nanagpuyo nianang mga balaya. Tapos sa daghang tuig nga pagtukod ug pamilya ug pag-ambitay sa ilang mga kinabuhi diha sa ilang kaugalingong espesyal nga mga salag, tapos sa unos sila namauli aron makita ang tanang butang nga nangaguba ug nangakatag. Ang magtiayong Kieffer nakahipos pa sa pila nila ka butang sa unang pagduaw, apan kadto sakit kaayo alang kanila nga mangukay sa nabilin nga kagun-oban sa balay. Hinuon, sila mapasalamaton nga sila buhi gihapon ug makaalagad sa Diyos.

Ang urakang Andrew walay gipili. Ang mga shopping mall, mga paktorya, ug mga kamarin​—ang tanan nahimong punteriya sa pag-asdang sa kinaiyahan. Ang mga kodigo sa pagpanukod sa gamay lang nga tawo wala makapugong sa kadaot.

Ang Kinamaayohan ug ang Kinamaotan sa Tawhanong Kinaiya

Ang tabang misugod sa pagbul-og ngadto sa Florida gikan sa tanang dapit sa nasod samtang ang lainlaing mga ahensiya sa hinabang naorganisar. Ang Nagamandong Lawas sa mga Saksi ni Jehova sa Brooklyn, New York, dihadiha milihok ug nagtudlo ug komite sa hinabang aron magdumala gikan sa Fort Lauderdale Assembly Hall. Sila usab migahin ug dakong kantidad sa salapi alang sa pagpamalit ug mga materyales, pagkaon, ug mga butang pang-emerhensiya. Ingong sangpotanan, ang mga Saksi maoy usa niadtong kinaunahang misanong sa kahimtang ug miawhag ug mga boluntaryo. Sa pagkamatuod, daghan ang nangabot nga dili na kinahanglang tawgon.

Ang mga Saksing trabahante nangabot gikan sa California, North Carolina, Oregon, Washington State, Pennsylvania, Missouri, ug daghan ubang mga dapit. Ang Virginia Regional Building Committee nga kasagaran nagtukod ug mga Kingdom Hall nagpadala ug grupo sa 18 ka Saksi sa pagreper sa mga atop. Giabtan sila ug 18 ka oras sa pagbiyahe hangtod sa Florida. Ang mga relief workers o magtatabang nagbakasyon ug nagbiyahe latas sa nasod, ginatos ug ngani linibo ka kilometro, aron maabot ang ilang isigka-Saksi nga naalaot.

Ang nakatabang ug dako mao ang grupo nga naggikan sa dapit sa Charleston sa South Carolina. Sila may eksperyensiya sa Urakang Hugo balik niadtong 1989. Nasayod sila kon unsay dahomon ug wala madugay nag-organisar ug mga abiyo sa hinabang, lakip ang mga electric generator ug mga materyales sa pagpanukod. Sulod sa duha ka semana ang mga nagboluntaryo nakapauga ug mga 800 ka balay ug nakareper sa daghang atop.

Daghang dili-Saksi nga mga kapikas ug mga silingan nakabenepisyo gikan sa tabang nga gihatag sa mga tem sa mga tigreper nga mga Saksi. Si Ron Clarke gikan sa West Homestead nagtaho: “Ang dili magtutuong mga kapikas sa tinuod nakadayeg niining tanan. Nanghilak sila, nga nalumsan sa mga gihimo sa mga Saksi alang kanila.” Mahitungod sa dili-magtutuong bana sa usa ka Saksi, dugang niya: “Siya nalipay gayod​—ang mga Saksi atua na sa ibabaw nga nag-atop alang kaniya.”

Ang laing Saksi mihisgot mahitungod sa iyang dili-Saksi nga mga silingan nga iyang gisusi kada gabii. Sila miingon nga OK. Sa ikalimang adlaw, ang asawa wala makapugong ug mihilak. “Wala kami ing bisan unsang lampin alang sa bata. Hapit na usab mahurot ang pagkaon sa bata. Kulang pa kami sa pagkaon ug tubig.” Ang bana nagkinahanglan ug 20 ka litros nga gasolina apan walay makuhaan. Nianang maong adlaw, ang Saksi nagdala sa tanan nilang gikinahanglan gikan sa bodega sa hinabang sa Kingdom Hall. Ang asawa mapasalamatong nakahilak. Ang bana mihatag ug donasyon alang sa bulohatong pagtabang.

Ang hinungdanong papel gidula sa mga ansiano ug mga ministeryal nga alagad sa kongregasyon nga nagtimbayayongay sa pag-organisar sa hinabang sa lainlaing napasig-uli nga mga Kingdom Hall sa gihampak sa katalagman nga dapit. Sila wala moundang sa pagpangita sa tanang mga Saksi ug sa pagsuta sa ilang panginahanglan. Sa kasukwahi, usa ka opisyal sa Air Force gikutlo nga nakapamulong mahitungod sa hinabang nga gihimo sa laing dapit: “Ang tanang mga lider gusto lang nga mosugo, apan walay mausa ang gustong mangabaga ug sa aktuwal manglimpiyo ug mamanday.”

Ang mga katalagman makapalutaw sa kinamaayohan ug sa kinamaotan diha sa mga tawo. Ang pananglitan sa naulahi mao ang pagpangawat. Usa ka pamilya sa mga Saksi nakahukom nga sa labing menos sila makahipos pa sa ilang refrigerator ug washing machine aron magamit sa sentro sa hinabang sa lokal nga Kingdom Hall. Sila miadto sa hall aron mokuhag sakyanan. Sa wala pa sila makabalik, ang mga kawatan mikuha sa tanang butang!

Usa ka nakasaksi nagtaho: “Samtang kami nagpadagan latas sa walay tawong kadalanan, nakita namo ang mga pasidaang paskin aron abogon ang mga kawatan. Ang pila ka paskin mabasa, ‘Ang mga Kawatan Kinahanglang Mamatay’ ug, ‘Ang mga Kawatan Pusilon.’ Ang lain nag-ingon, ‘Duha ka kawatan gipusil. Ang usa namatay.’ Ang mga tindahan ug mga mall gilungkab.” Sumala sa usa ka sarhento sa 82nd Airborne Division, labing menos usa ka kawatan ang nadakpan ug gikulata sa mga tawo hangtod mamatay.

Daghan ang giaresto. Morag sa bisan unsang katalagman ang mga kriminal andam sa paghugop nga samag mga buwitre. Ug ngani ang giisip nga ordinaryong mga tawo nadala nga manglungkab. Ang relihiyon, lagda sa maayong pamatasan, ug moralidad morag mahanaw tungod sa tentasyon nga makakuhag butang nga walay bayad.

Ang Pagmata! gisuginlan nga sa sinugdan ang pipila mismo ka sundalo giilogan sa ilang wala-kargahig-bala nga mga pusil sa mga armadong kawatan. Ang pila ka sundalo nadunggan nga namulong nga ilang gilantaw ang sentro sa hinabang ang Kingdom Hall ingong usa ka oasis o tanaman sa disyerto “tungod kay,” sama sa ilang giingon, “kamo dili magdala ug mga pusil.”

“Ayaw Pagpuyo”

Unsay nakat-onan sa mga Saksi ni Jehova gikan sa ilang mga kasinatian uban sa kinaiyanhong katalagman? Ipadayon ang espirituwal nga mga kalihokan sa labing madali. Si Ed Rumsey, usa ka magtatan-aw sa Homestead, nagtug-an sa Pagmata! nga usa ka dupliks nga Kingdom Hall andam na alang sa mga tigom sa Miyerkoles human sa Lunes nga urakan. Ang pila ka atop nawagtang, ang mga kisame nahugno, ug nabanlasan. Ang mga boluntaryo nagdalidali ug trabaho aron mapasig-uli ang mga Kingdom Hall alang sa mga tigom ug aron gamiton kana ingong sentrong mga estasyon nga gikan niana ang hinabang nga buluhaton pagadumalahon diha sa ilang nagun-ob nga dapit. Nagtukod ug mga kusina aron mapakaon ang mga biktima ug ang mga trabahante sa hinabang.

Si Fermín Pastrana, ansiano gikan sa Princeton Spanish Congregation, nagtaho nga pito ka pamilya sa iyang kongregasyon nga may 80 ka Saksi ang bug-os nawad-an sa ilang mga balay. Unsang sulbad ang iyang gisugyot sa iyang isigka-Saksi? “Pagkaguol kon kinahanglan nimong maguol. Apan ayaw pagpuyo. Lihok sa pagtabang sa uban, ug, kutob sa maarangan, pagsangyaw. Ayaw biyai ang atong Kristohanong mga tigom. Sulbara ang arang masulbad, apan ayaw paglangan diha sa walay kasulbaran.” Ingong resulta, ang mga Saksi sa wala madugay nagsangyaw na ug nagdala ug mga kahon sa hinabang ngadto sa balay ug balay. Si Andrew wala makapalid sa ilang kasibot.

‘Sa Sunod Higayon Mobakwet Kami!’

Si Sharon Castro, 37-anyos nga babaye gikan sa Cutler Ridge nag-asoy sa Pagmata! sa iyang kaagi: “Ang akong amahan nakahukom nga dili mobakwet. Iyang gibati nga tungod kay ang miaging urakan milikay sa baybayon sa Florida, si Andrew mohimo sa sama. Dili gani niya haklapan ang mga bintana. Maayo na lang, ang akong manghod nga lalaki miduol ug mipugos nga hampilan ang mga bintana ug plywood. Walay duhaduha ang iyang gihimo nakaluwas sa among mga kinabuhi. Ang among mga bintana nangabuak unta, ug nangahiwa unta kami.

“Sa mag alas 4:30 s.b., napalong ang elektrisidad. Ang kabanha sa gawas makalilisang. Kadto maoy kokaamgid sa kagahob sa dakong tren. Mipaka samtang ang mga kahoy ug mga tinukod nangaibot ug nangabali. Among nadiskobrehan sa ulahi nga ang makalilisang nga pag-agaak maoy tingog sa tag-as nga mga lansang sa among atop nga nangaibot. Ang lawting napalid, ug ang un-tersiya sa atop miuban. Ang gisangpotan mao nga, kaming 12, lakip sa akong baldadong inahan ug 90-anyos nga lola, nagpasilong sa sentro nga kuwarto nga walay mga bintana. Morag naseguro na namo nga kami mangamatay didto.”

Unsang leksiyon ang iyang nakat-onan gikan sa maong eksperyensiya? “Sa sunod higayon nga sila moawhag kanamo sa pagbakwet, mobakwet kami​—nga walay pulopangutana. Tagdon na namo ang mga pasidaan. Nakakat-on usab ako sa pag-ambit ug sa pagkinabuhi sa tinagidiyot. Ug nasayod ako nga OK lang ang mohilak, ang maguol, ug unya atubangon ang kamatuoran.”

Mga Reaksiyon sa Mantalaan

Bisan ang media nakamatikod sa maayong pagkaorganisar sa mga Saksi. Ang Savannah Evening Press nag-ulohan ug “Nakaplagan sa mga Saksi ni Jehova nga Dinawat Sila sa Habagatang Florida,” ug ang The Miami Herald nagpahayag: “Ang mga Saksi Nag-atiman sa Isigka-Saksi​—ug sa Uban.” Kana nag-ingon: “Walay mausa sa Homestead ang nagasira ug kusog sa mga pultahan sa mga Saksi ni Jehova nianang semanaha​—bisan pag sila may mga pultahan nga isirag kusog. Mga 3,000 ka boluntaryong Saksi gikan sa lainlaing dapit sa nasod ang mihugop sa dapit nga gihampak sa katalagman, una aron tabangan ang ilaha, unya aron tabangan ang uban. . . . Ang bisan unsang militaryong organisasyon tingali masina sa katakdo, disiplina ug kahanas sa mga Saksi.”

Ang mga Saksi naanad na sa pag-organisar ug sa pagdumala sa pagpakaon ug daghang tawo sa ilang mga asembliya ug mga kombensiyon. Dugang pa, sila nakaorganisar ug ginatos ka Regional Building Committee sa tibuok kalibotan aron sa pagtukod ug mga Kingdom Hall ug dagkong mga Assembly Hall. Mao nga, sila may nabansay nga mga tawo nga andam sa paglihok sa pipila ka oras nga pahibalo.

Hinuon, may lain pang hinungdan​—ang ilang tinamdan. Ang samang taho nagpadayon: “Walay mamandoon nga grupo. Walay pagbanggaay ug personalidad. Inay, ang mga trabahante morag malipayon ug matinabangon kaayo bisan pag unsa ka init, ka bulingit o ka kapoy.” Sa unsang paagi kana ikasaysay? Usa ka Saksi mitubag: “Tungod kini sa relasyon uban sa Diyos nga nakapalihok kanamo sa pagpasundayag sa among gugma alang sa uban.” Kana maoy usa ka butang nga dili malangkat ni Andrew, ang Kristohanong gugma sa mga Saksi.​—Juan 13:34, 35.

Usa ka makaiikag nga pagtandi ang morag nakat-onan sa mga Saksi gikan sa mga kahoy. Usa ka nakasaksi mipahayag niana niining paagiha: “Samtang naglibot ako, dili malikayan nga mamatikdan nako ang daghang dagkong kahoy nga nangalukat ug nangapukan sa yuta. Ngano man kaha? Tungod sa ilang gidak-on nasalo gayod nila ang kusog nga hangin, ug sila may makaylapon apan mabaw nga mga gamot. Sa laing bahin, kadaghanan sa niwang nga mga palma nagpabiling nagbarog. Sila monunot sa huyop sa hangin, ang pila nawad-an ug mga palwa, apan kadaghanan wala malukat sa yuta.”

Ang mga Saksi may pagtuong nakagamot ug lalom diha sa Pulong sa Diyos ug mapailin-ilinon sa ilang mga reaksiyon. Ang mga kabtangan ug mga balay dili maoy labing importante ug bililhong mga butang alang kanila. Sa labing menos sila buhi ug makapadayon sa pag-alagad kang Jehova bisan pa sa kalisdanan. Ang kinabuhi maoy usa ka butang nga wala kuhaa ni Andrew gikan kanila.

Sa Unsang Paagi Kana Gihimo?

Ang kompaniyang Anheuser Busch nagdonar ug usa ka trak nga ilimnong tubig. Sa pag-abot, ang drayber nangutana sa mga opisyales kon asa niya dad-a ang tubig. Siya giingnan nga ang organisado lamang mao ang mga Saksi. Sa pagkamatuod, sulod sa usa ka semana tapos sa paghapak ni Andrew, mga 70 ka de-kargang-treyler sa mga abiyo ang miabot sa Fort Lauderdale Assembly Hall sa mga Saksi ni Jehova.

Usa ka boluntaryo didto nagtaho: “Busa nakadawat kami ug usa ka trak nga ilimnong tubig. Dihadiha amo kanang giapil sa ubang mga pagkaon nga among ipadala ngadto sa sentro sa pagpang-apod-apod sa mga Kingdom Hall. Kadto gipahat sa nanginahanglang mga igsoon ug mga silingan diha sa dapit.” Usa ka kompaniya sa papel sa Washington State nagdonar ug 250,000 ka platong papel.

Sa sinugdan, ang mga awtoridad sa siyudad nagpadala sa dili-Saksing mga boluntaryo ngadto sa mga Kingdom Hall, nga nag-ingon, ‘Sila lamang ang naorganisar ug husto.’ Sa ulahi ang militar miabot ug nagtukod ug mga sentro sa hinabang alang sa pagkaon ug tubig ug mga siyudad sa tolda.

Ang orihinal nga sentro sa pag-apod-apod sa abiyo sa Saksi gitukod sa komite sa hinabang sa Fort Lauderdale Assembly Hall, nga mga 60 kilometros sa amihanan sa pangunang dapit sa katalagman duol sa Homestead. Aron maluagluag ang trabaho, ang pangunang sentro sa abiyo gitukod sa Plant City Assembly Hall duol sa Orlando, nga mga 400 kilometros amihanan-kasadpan sa dapit sa katalagman. Kadaghanan sa mga materyales sa hinabang gipaagi didto alang sa pagpinig ug pag-impake. Ang komite nag-order sa ilang panginahanglan gikan sa Plant City kada adlaw, ug dagkong mga de-kargang-treyler ang gigamit sa pagbiyaheg lima ka oras ngadto sa Fort Lauderdale.

Sa baylo kining estasyon sa abiyo nagsuplay ug pagkaon, mga materyales, tubig, mga generator, ug ubang mga kinahanglanon ngadto sa tulo ka Kingdom Hall nga gireper diha sa sentro sa dapit sa katalagman. Didto, ang takos nga mga Saksi nag-organisar ug mga trabahante alang sa pagpanukod ug pagpanghipos sa pagsusi sa ginatos ka mga balay nga nagkinahanglan ug pagtagad. Mga kusina ug mga linya sa pagpakaon gibuksan usab sa nataran sa Kingdom Hall, ug giabiabi ang tanan nga mangayog tabang. Ngani ang pila ka sundalo nagkalipay sa usa ka kan-anan ug sa ulahi nakit-an nga naghulog sa mga kahon sa kontribusyon.

Samtang ang mga lalaki puliki sa pag-ayo ug mga balay, ang pila ka mga babaye nag-andam ug pagkaon. Ang uban nagduaw sa mga tawo nga ilang makaplagan aron ipaambit kanila ang panghunahuna sa Bibliya mahitungod sa kinaiyanhong mga katalagman ug usab sa pagpanghatag ug mga kahon sa hinabang alang niadtong nanginahanglan. Usa niini mao si Teresa Pereda. Ang iyang balay nadaot, ug ang mga bintana sa iyang kotse nadugmok​—bisan pa ang iyang kotse puno sa mga kahon sa hinabang nga andam alang sa iyang mga silingan. Ang iyang bana, si Lazaro, puliki nga nagtrabaho sa usa sa mga Kingdom Hall.​—Ecclesiastes 9:11; Lucas 21:11, 25.

Alang sa daghang walay balay, ang kapiliang mga sak-anan mao ang mga balay sa mga Saksi nga wala matandog ni Andrew. Ang uban nagpuyo sa mga treyler nga gipahulam o gidonar alang nianang katuyoana. Ang pila mibalhin ngadto sa mga siyudad sa tolda nga gitukod sa militar. Ang uban nag-isip na lang sa ilang mga balay nga kapildihan ug miluon sa mga higala ug mga paryente sa ubang dapit sa nasod. Sila walay balay ni trabaho. Walay elektrisidad, walay tubig, walay igong tangke sa hugaw​—busa sila naghimog kinamaayohang lakang alang kanila.

Usa ka leksiyon nga nakat-onan gipahayag ug maayo sa usa ka Español-ug-sinultihan nga Saksi: “Kami mapasalamaton kaayo tungod sa leksiyon nga among nakat-onan mahitungod sa among tumong sa kinabuhi. Nahibalo ka, makatrabaho ka ug 15 o 20 ka tuig aron makatukod ug imong balay, nga motigom ug materyal nga mga butang, ug unya sa usa lamang ka oras, mahimo kanang mahanaw. Kini nakatabang kanamo sa pag-ila sa among espirituwal nga mga tumong, aron payanohon ang kinabuhi ug maghunahuna gayod mahitungod sa pag-alagad kang Jehova.”

Kana sama gayod sa gipahayag ni apostol Pablo: “Ang mga butang nga akong nabatonan, akong giisip nga kapildihan tungod kang Kristo. Tungod kay, bahin niana, sa pagkatinuod akong giisip nga kapildihan ang tanang butang tungod sa nagalabaw nga bili sa kahibalo ni Kristo Jesus nga akong Ginoo. Tungod kaniya akong gidawat ang kapildihan sa tanang butang ug akong giisip sila ingong basura, aron akong maangkon si Kristo.”​—Filipos 3:7, 8.

Ang kinaiyanhong mga katalagman maoy bahin sa kinabuhi sa presenteng kalibotan. Kon maminaw kita sa mga pasidaan sa mga awtoridad, kita sa labing menos makaluwas sa atong mga kinabuhi. Lagmit ang mga balay ug mga kabtangan mawala, apan ang relasyon sa Kristohanon uban sa “Diyos sa tanang kahupayan” kinahanglang mapalig-on. Bisan kon ang pila mamatay sa katalagman, si Jesus nagsaad ug pagkabanhaw alang kanila sa bag-ong kalibotan sa Diyos ibabaw sa napasig-uling yuta​—usa ka yuta nga dili na gayod makakita sa kalisdanan ug kamatayon nga ipahinabo sa kinaiyanhong mga katalagman.​—2 Corinto 1:3, 4; Isaias 11:9; Juan 5:28, 29; Pinadayag 21:3, 4.

[Footnote]

[Kahon sa panid 20]

Nahibulong Gayod

Usa ka grupo sa 11 ka puti nga mga Saksi mibiyahe gikan sa Tampa, Florida, aron moabag sa buluhatong hinabang. Sila mikuha ug mga suplay sa hinabang ug misugod sa pagreper sa atop sa usa ka itom nga Saksi. Sa dihang miabot ang dili-Saksing pag-umangkon, dili siya makatuo sa iyang nakita​—siya nahibulong gayod nga makakita sa usa ka grupo sa puti nga mga Saksi nga unang nakaabot kaniya ug nagreper sa balay sa iyang uyoan. Siya nakadayeg gayod nga mitabang gani siya sa pagpamanday.

Siya miingon nga sa sunod higayon nga moduaw ang mga Saksi sa iyang balay, siya mohangyo ug pagtuon sa Bibliya. Samtang siya nakigsulti sa grupo sa Tampa, dayag nga siya gikan nianang dapita. Sa walay langan usa ka ansiano sa grupo naghikay alang sa pagtuon sa Bibliya sa sunod semana! Sama sa giingon sa usa ka Saksi, kini nagpamatuod nga dili ka lamang manuktok sa mga pultahan aron makapamatuod​—makapanuktok ka usab sa mga atop!

[Mga hulagway sa panid 15]

Ang Urakang Andrew walay gipili, ug dili daghang tinukod ang nakasugakod

Ang maguyod nga balay sa magtiayong Kieffer​—ug kon unsay nabilin niana

[Mga hulagway sa panid 16]

Si Rebecca Pérez, iyang mga anak babaye, ug 11 pang uban nga naluwas niining gamayng luna

Ang militar nangilabot aron mapugngan ang pagpanglungkab (sa ibabaw sa tuo); gilungkab nga mga tindahan (sa tuo)

Ang urakan naglangkat sa mga atop, ug ang mga sakyanan gipanglabay

[Mga hulagway sa panid 17]

Ang hinabang giorganisar sa mga Kingdom Hall

Ang maguyod nga mga balay gilambod sa mga kahoy; ang mga dulaan sa bata gibiyaan ibabaw sa kutson; literatura sa Bibliya nalakip sa mga nakatag; ang mga Saksi, sama kang Teresa Pereda, naghatod ug mga suplay ngadto sa ilang mga silingan

Gidonar nga mga materyales sa pagpanukod. Nagpinig sa mga sapot

[Mga hulagway sa panid 18]

Ang mga boluntaryo gikan sa tibuok Tinipong Bansa mitabang sa buluhatong hinabang