Sa Dihang Moabot ang Bag-ong Kalibotan

ANG bag-ong kalibotan sa Diyos moabot sa dihang kining presenteng kalibotan mahanaw. Apan tingali ikaw mangutana, ‘Makatuo ba gayod kita nga kining kalibotana matapos?’ Buweno, palandonga, may kalibotan ba sukad nga natapos?

Oo, sumala sa dayag nga ebidensiya, may panahong ang usa ka kalibotan kaniadto natapos. “Ang kalibotan niadtong panahona [adlaw ni Noe] nalaglag sa dihang kini gilunopan sa tubig,” nag-ingon ang Bibliya. Ang Diyos “wala magpugong sa pagsilot sa karaang kalibotan, apan naghupot kang Noe, usa ka magwawali sa pagkamatarong, nga luwas kauban sa pito pa sa dihang iyang gipalunopan ang kalibotan sa dili diyosnong katawhan.”​—2 Pedro 2:5; 3:6.

Matikdi nga kadto maoy “usa ka kalibotan sa dili diyosnong katawhan,” o usa ka daotang sistema sa mga butang, ang nahanaw. Dili ang planetang Yuta, ang daghag bituon nga kalangitan, o ang tawhanong pamilya ang natapos. Sa dihang midaghan ang nakalabang-buhi sa Lunop, ang laing kalibotan (atong kalibotan karon) mitungha. Unsay mahitabo niini?

Tapos moingon nga nalaglag ang kalibotan sa mga adlaw ni Noe, ang Bibliya nagpadayon: “Pinaagi sa mao ra usab nga pulong ang mga langit ug ang yuta nga karon nagalungtad gikatagana alang sa kalayo.” (2 Pedro 3:7) Ang kalayo nagpasabot sa kalaglagan alang sa kalibotan. Sa pagkatinuod, “ang kalibotan [ang usa nga naglungtad karon] mahanaw.” (1 Juan 2:17) Apan kanus-a?

Buot masayod ang mga apostoles ni Jesus, busa sila nangutana: “Tug-ani kami, kanus-a mahitabo kining mga butanga? ug unsa man ang ilhanan sa imong pag-anhi, ug ang kataposan sa kalibotan?” (Mateo 24:3, King James Version) Sa pagtubag si Jesus mihatag ug ilhanan nga makaarang sa mga tawong buhi sa panahon sa katumanan niini nga mahibalo nga ang usa ka kalibotan sa dili madugay matapos; usa ka bag-ong kalibotan ang mopuli niana. Unsa kana nga ilhanan?

Ang Ilhanan

Ang ilhanan adunay daghang bahin, oo, daghang hitabo ang gitagna. Aron matuman ang ilhanan, kining tanan kinahanglang mahitabo diha sa usa ka talagsaong paagi sa samang panahon, sulod sa usa ka kaliwatan. (Mateo 24:34) Unsa kining mga hitaboa?

Ang pipila nga ginganlan ni Jesus mao: “Ang nasod managgubat batok sa laing nasod, ug ang gingharian batok sa laing gingharian; ug aduna unyay dagkong mga linog, ug sa nagkalainlaing dapit mga kamatay ug kakulangan sa pagkaon.” “Unya kamo itugyan sa mga tawo sa kasakitan ug ipapatay kamo, ug pagadumtan kamo sa tanang kanasoran tungod sa akong ngalan. . . . Kay mosanay man ang pagkadaotan mobugnaw ang gugma sa kadaghanan.”​—Lucas 21:10, 11; Mateo 24:7-9, 12.

Si apostol Pablo mihatag ug laing mga kahimtang nga magtimaan “sa kataposang mga adlaw” niining kalibotana. Siya misulat: “Sa kataposang mga adlaw moabot ang kritikal nga mga panahon nga malisod sagubangon. Kay ang mga tawo mahigugmaon sa ilang kaugalingon, mahigugmaon sa salapi, . . . masukihon sa mga ginikanan, dili-mapasalamaton, dili-maunongon, walay gugma nga kinaiya, . . . gahig-ulo, tigpaburot, mga mahigugmaon sa kalingawan inay mga mahigugmaon sa Diyos, nga may dagway sa pagkadiyosnon apan nagapanghimakak sa gahom niini.”​—2 Timoteo 3:1-5.

Sa pagkatinuod, ikaw nakakita ug nakadungog na bahin sa tanan niining mga butanga​—internasyonal nga mga panag-away nga nalabwan ang kanhing mga gubat, dagkong mga linog, kaylap nga mga kamatay ug kakulangan sa pagkaon, pagdumot ug paglutos sa mga sumusunod ni Kristo, pagsanay sa pagkadaotan, ug kritikal nga mga panahon nga wala pa hilabwi ang gidak-on. Gawas pa niining mga butanga, ang Bibliya nagtagna nga “pagalaglagon [sa Diyos] kadtong nagalaglag sa yuta.” (Pinadayag 11:18) Ug ang mga tawo nagalaglag sa yuta karon mismo!

Sa miaging Nobyembre, ang mga mantalaan may mga ulohan nga sama niini: “Nagpasidaan ang Iladong mga Siyentipiko Bahin sa Kalaglagan sa Yuta.” Si Dr. Henry Kendall, usa ka pinasidunggan sa Nobel ug tsirman sa Katipunan sa Nabalakang mga Siyentipiko, miingon: “Kini nga pasidaan dili paghingapin, ug dili kini panghadlok.” Usa ka artikulo sa mantalaan mitaho: “Ang talaan sa 1,575 ka siyentipiko nga naghimo niini nga pasidaan maoy iladong mga siyentipiko sa kalibotan.” Ang ilang pasidaan sa bug-os nga kalaglagan sa atong yuta dili angayng isalikway!

Walay duhaduha mahitungod niana. Ang ilhanan sa tanang bahin niini nagakatuman na, lakip ang pangunang tagna ni Jesus: “Kining maayong balita sa gingharian igawali ngadto sa tanang ginapuy-ang yuta sa pagpamatuod sa tanang kanasoran; ug unya moabot ang kataposan,” oo, ang kataposan niining kalibotana. (Mateo 24:14) Kini moabot, si Jesus miingon, sa dihang ang maayong balita sa Gingharian sa Diyos masangyaw na sa tibuok nga yuta. Ug ang maong pagsangyaw ginahimo na karon sa gitagnang gilapdon pinaagi sa mga Saksi ni Jehova!

Kon Unsay Imong Kinahanglang Buhaton

Busa, ang tanang ebidensiya nagapunting sa kamatuoran nga ang bag-ong kalibotan sa Diyos haduol na kaayo. Apan, kon buot ka nga makalabang-buhi sa kataposan niining kalibotana ug aron makatagamtam sa kinabuhi diha sa bag-ong kalibotan, kinahanglan nga aduna kay buhaton. Human miingon nga “ang kalibotan mahanaw,” ang Bibliya nagpakita kon unsay gikinahanglan kanimo, nga nag-ingon: “Siya nga nagabuhat sa kabubut-on sa Diyos magpabilin sa walay kataposan.”​—1 Juan 2:17.

Busa kinahanglang mahibalo ka sa kabubut-on sa Diyos ug magabuhat niini. Ang mga Saksi ni Jehova malipay sa pagtabang kanimo sa pagbuhat niini. Unya ikaw makalabang-buhi sa kataposan niining kalibotana sa pagtagamtam sa mga panalangin sa bag-ong kalibotan sa Diyos sa walay kataposan.

[Picture Credit Line sa panid 10]

Letrato sa NASA

[Hulagway sa panid 10]

Usa ka panahon sa dakong kasamok ang dihadiha nga mahitabo una pa sa bag-ong kalibotan