Unsang Matanga sa Kalibotan ang Imong Gusto?

KON ikaw may gahom, magbuhat ka ba ug usa ka bag-ong kalibotan, usa ka kalibotan nga libre sa tanang suliran nga nagasakit sa katawhan karong adlawa? Kon mao, dili ba makataronganon ang pagdahom nga ang atong mahigugmaong Maglalalang, si Jehova nga Diyos, kinsa may gahom, magbuhat ug usa ka bag-ong kalibotan sa pagkamatarong?

Ang Bibliya nag-ingon: “Si Jehova maayo sa tanan, ug ang iyang mga kaluoy anaa ibabaw sa iyang tanang buhat. Imong ginabuklad ang imong kamot ug nagatagbaw sa tinguha sa tanang buhing butang.” (Salmo 145:9, 16) Unsa ang pipila sa imong mga tinguha? Unsang matanga sa kalibotan ang imong gipangandoy?

Diha sa ilang librong A Sane and Happy Life: A Family Guide, si Abraham ug Rose Franzblau misulat: “Kon surbihon nato ang populasyon sa kalibotan ug pangutan-on ang mga tawo kon unsang matanga sa kalibotan ang buot natong tanan nga pagapuy-an, lagmit gayod nga kitang tanan mouyon diha sa pipila ka pangunang mga kinahanglanon.”

Atong susihon ang mga kinahanglanon nga gilista niini nga mga doktor ug tan-awon nato kon kini sama ba sa mga butang nga imong gusto. Samtang kini atong himoon, atong tan-awon usab kon ang atong mahigugmaong Maglalalang misaad sa pagtagana mismo niining mga butanga.

Ang Unang Kinahanglanon

Gilista pag-una sa mga doktor ang “usa ka kalibotan nga walay gubat.” Human mag-antos sa daghang makalilisang nga mga gubat, daghan ang nangandoy ug usa ka kalibotan diin ang katawhan dili na gayod mag-awayay ug magpinatyanay sa usag usa. Ang ilang paglaom gipahayag diha sa usa ka sinulat nga gisilsil sa pader sa Plasa sa Hiniusang Kanasoran sa Siyudad sa New York, nga mabasa: ILANG HIMOON ANG ILANG MGA ESPADA NGA MGA PUNTA SA DARO. UG ANG ILANG MGA BANGKAW HIMOON NGA MGA GALAB: USA KA NASOD DILI NA MOBAKYAW SA ESPADA BATOK SA USA KA NASOD. NI MAKAKAT-ON PA SILA SA GUBAT.

Nasayod ka ba nga kanang mga pulonga maoy bahin sa saad nga gihimo ni Jehova nga Diyos? Ang mga pulong narekord sa Balaang Bibliya diha sa Isaias kapitulo 2, bersikulo 4, sa King James Version. Pinaagi sa pagbasa usab sa Salmo 46:8, 9, imong makita nga maoy katuyoan sa Diyos ang paglaglag sa tanang hinagiban ug sa “pagpahunong sa mga gubat sa kinatumyang bahin sa yuta.” Diha sa malinawon, walay-gubat nga kalibotan nga himoon sa Diyos, kining makapalipay nga tagna sa Bibliya mamatuman: “Sila sa pagkatinuod manglingkod, ang matag usa ilalom sa iyang parras ug ilalom sa iyang kahoy nga igos, ug walay magahadlok kanila.”​—Miqueas 4:4.

Dili mo ba ilista ang “usa ka kalibotan nga walay gubat” ingong pangunang kinahanglanon alang sa matang sa kalibotan nga imong gusto? Ug hunahunaa lamang, ang atong Dakong Maglalalang misaad niana!

Usa ka Kalibotan sa Kadagaya

Unsay imong ikaduhang kinahanglanon? Sama ba kini sa sunod nga gihatag, “usa ka kalibotan nga walay kagutom, diin ang gutom ug kawalad-on mahanaw sa walay kataposan”? Dili ba kahibulongan unya kon wala na gayoy batang gutomon? Seguradong buot ka gayod nga mabuhi diha sa usa ka kalibotan sa kadagaya. Apan kinsa ang makapasalig niini?

Tagda ang gisaad sa Diyos: “Ang yuta mismo mohatag sa ani niini.” “Aduna unyay daghang trigo sa yuta.” (Salmo 67:6; 72:16) Oo, sa bag-ong kalibotan sa Diyos, abunda ang lamiang pagkaon. Ang Bibliya nagapasalig kanato nga si Jehova “magahimo gayod alang sa tanang katawhan . . . ug usa ka kombira sa matambok nga mga pagkaon, usa ka kombira sa bino nga pinalugdang, sa mga pagkaong matambok nga puno sa utok.”​—Isaias 25:6.

Samtang ang kalibotan nga walay kagutom saylo na sa katakos sa tawo sa pagtagana, kini dili saylo sa gahom sa Diyos nga ipatungha. Ang iyang Anak, si Jesu-Kristo, nagpasundayag nga ang pagtagana ug pagkaon alang sa tanan dili suliran ubos sa Gingharian sa Diyos. Sa dihang siya dinhi pa sa yuta, gipakaon ni Jesus ang libolibo pinaagi sa milagrosong pagpadaghan sa pila ka buok tinapay ug pila ka buok isda.​—Mateo 14:14-21; 15:32-38.

Usa ka Kalibotan nga Walay Sakit

Dili ka makakita ug tawong masakiton bisan asa diha sa matang sa kalibotan nga gusto natong tanan. Busa ang ikatulong kinahanglanon dili makapahibulong. “Kini maoy usa ka kalibotan nga walay sakit,” misulat ang mga doktor, “usa ka kalibotan diin ang tanan adunay higayon sa pagtubo nga may mahimsog nga panglawas ug sa pagkinabuhi sa tibuok nilang kinabuhi nga libre sa mga sakit nga mapugngan ug mamaayo.”

Hunahunaa ang kahupayan kon walay bisag usa ang sip-onon o takboyan sa bisan unsang ubang sakit! Ang mga tawo dili makawagtang sa sakit, apan si Jehova nga Diyos makawagtang. Ug iyang gisaad nga sa iyang bag-ong kalibotan “walay molupyo ang moingon: ‘Ako may sakit.’” Hinunoa, “sa maong panahon ang mga mata sa buta mangabuka, ug ang mga igdulongog sa mga bungol makadungog. Nianang panahona ang tawong bakol molukso sama sa lagsaw, ug ang dila sa amang magaawit.” (Isaias 33:24; 35:5, 6) Oo, ang Diyos “magapahid sa tanang luha gikan sa ilang mga mata, ug ang kamatayon mawala na, wala na unyay pagbalata, ni paghilak ni kasakit pa.”​—Pinadayag 21:4.

Sa dinhi pa si Jesu-Kristo sa yuta, iyang gipakita kon unsay atong madahom diha sa usa ka dakong gilapdon sa bag-ong kalibotan sa Diyos. Iyang gipasig-uli ang panan-aw sa buta, gibuksan ang dalunggan sa bungol, gipaluagan ang dila sa amang, gipalakaw ang mga bakol, ug gipasig-uli pa gani ang kinabuhi sa patay.​—Mateo 15:30, 31; Lucas 7:21, 22.

Makapatagbaw nga Buluhaton ug Hustisya Alang sa Tanan

Walay duhaduha, ang makapatagbaw nga buluhaton ug hustisya alang sa tanan maglungtad diha sa kalibotan nga ikaw ug halos ang tanan nagapangandoy. Busa ang mga doktor misulat: “Ikaupat, kini maoy usa ka kalibotan nga adunay trabaho niadtong buot nga manginabuhi sa pagtagana sa ilang kaugalingon ug sa ilang mga pamilya.” Ug sila midugang: “Ikalima, kini maoy usa ka kalibotan diin pagatagamtamon sa tanang tawo ang kagawasan ilalom sa balaod, nga adunay hustisya alang sa tanan.”

Ang pagmando sa tawo wala gayod makatagana niining mga kinahanglanona alang sa malipayong pagkinabuhi. Apan itagana kana sa bag-ong kalibotan sa Diyos. Ang Bibliya nagsaad mahitungod sa mapuslanong buluhaton nga pagabuhaton sa mga tawo nianang panahona: “Sila magatukod ug mga balay ug magapuyo niini; ug sila magatanom ug kaparrasan ug magakaon sa ilang bunga. . . . Ang akong mga pinili magapahimulos pag-ayo sa mga buhat sa ilang mga kamot. Sila dili magabuhat nga walay kapuslanan.”​—Isaias 65:21-23.

Unsay ikasulti bahin sa kagawasan ug hustisya alang sa tanan? Bisag unsa pa ka tim-os ang paningkamot sa tawhanong mga magmamando, sila napakyas sa pagtagana niini alang sa tanan. Ang inhustisya ug pagdaogdaog nagpadayon sa paghari sa tibuok yuta. Busa ang mga tawo dili gayod makatagana niini nga panginahanglan. Apan kana ikatagana sa Labing Gamhanang Diyos. Ang iyang tinudlong Magmamando mao ang gibanhaw nga si Jesu-Kristo, ug bahin kaniya si Jehova miingon: “Ang akong pinili, nga kaniya ang akong kalag nagakalipay! . . . Siya magadala ug hustisya sa mga nasod.”​—Isaias 42:1; Mateo 12:18.

Oo, ang Bibliya nagsaad nga ubos sa Gingharian sa Diyos “ang kalalangan mismo mahigawas usab gikan sa pagkaulipon sa kadunotan ug makabaton sa mahimayaong kagawasan sa mga anak sa Diyos.” (Roma 8:21) Pagkamalipayon nga bag-ong kalibotan kini unya sa dihang adunay kagawasan ug hustisya alang sa tanan!

Kahigayonan ug Paglingawlingaw

Tinong sa matang sa kalibotan nga gusto nimo, tagamtamon sa tanang lungsoranon ang samang kahigayonan bisag unsa pay imong rasa o nasyonalidad. Busa, dili ikatingala nga ang ikaunom nga pangunang kinahanglanon nga gilista sa mga doktor mao: “Kini maoy usa ka kalibotan diin ang matag tawo adunay higayon sa pagpausbaw sa iyang mga katakos ug mga kinaadman sa bug-os, ug pagagantihan sa iyang mga paningkamot, nga walay pagpihig.”

Ang mga tawo wala gayod makatukod ug kalibotan diin nagatagamtam ang tanang tawo ug timbang nga pagtagad. Ang pagpihig ug bisan ang paglutos diha sa dili iladong mga minoriya nagapadayon. Apan, ang Hari sa bag-ong kalibotan sa Diyos, si Jesu-Kristo, mosundog sa panig-ingnan ni Jehova, ang iyang Amahan, nga “walay pinalabi ni modawat ug hiphip.” (Deuteronomio 10:17; Roma 2:11) Ang mopahinabo sa umaabot nga bag-ong kalibotan nga kahibulongan kaayo mao nga dili lamang ang tanang tawo pagatudloan sa pagsundog sa pagkadili-mapihigon ni Jehova nga Diyos kondili sila magapasundayag niana.​—Isaias 54:13.

Sagad ang mga kinabuhi sa mga tawo gideboto sa walay-puas nga paghago nga may diyutay o walay kahupayan. Busa ikaw tinong mouyon sa mosunod nga pangunang kinahanglanon, nga mao: “Ikapito, kini maoy usa ka kalibotan diin ang tanang tawo adunay igong paglingawlingaw aron matagamtam ang mga butang nga giisip nila ingong maayong mga butang sa kinabuhi.”

Nahibalo sa panginahanglan sa tawo sa mga panahon sa pahulay ug paglingawlingaw, si Jehova nga Diyos diha sa iyang karaang Kasugoan mitagana ug usa ka adlaw sa semana nga igpapahulay. (Exodo 20:8-11) Busa, kita makaseguro nga diha sa iyang bag-ong kalibotan, pagatinoon sa Diyos nga ang atong panginahanglan sa paglingawlingaw ug maayong mga matang sa kalingawan matagana.

Ang Matang sa mga Molupyo

Ang kataposang kinahanglanon nga gihatag sa mga doktor naghubit sa mga hiyas nga nabatonan niadtong mopuyo “sa matang sa kalibotan nga buot natong tanan nga pagapuy-an.” Susiha kon giisip mo ba usab nga hinungdanon ang mga hiyas nga ilang gilista. “Ikawalo, kini maoy usa ka kalibotan nga gihatagag dakong bili ang mga hiyas nga nagapalahi sa tawo gikan sa mas ubos nga mga matang sa kinabuhi, sama sa kinaadman ug pagkamapaagihon, dungog ug integridad, gugma ug pagkamaunongon, pagtahod sa kaugalingon ug pagkadili-mahakogon, ug kabalaka alang sa iyang mga isigkatawo.”

Dili ka ba malipay nga mabuhi diha sa usa ka kalibotan diin ang tanan nagpasundayag ug maayong mga hiyas sa integridad, gugma, pagkamaunongon, pagkadili-mahakogon ug kabalaka alang sa mga isigkatawo? Tinong mao kining matanga sa kalibotan ang buot nimo! Wala gayoy tawhanong mga magmamando ang makatagana niini. Si Jehova nga Diyos lamang. Ug buhaton niya kana tungod kay ang iyang bag-ong kalibotan dili kay dili-realistiko, dili-matuman nga pangandoy.​—Salmo 85:10, 11.

Kanus-a Kini Moabot?

Sumala sa giingon sa nag-unang artikulo, usa ka suod nga kauban ni Jesu-Kristo misulat: “Adunay bag-ong mga langit ug usa ka bag-ong yuta nga atong ginapaabot sumala sa saad [sa Diyos], ug niini magapuyo ang pagkamatarong.” (2 Pedro 3:13) Ang panahon alang sa katumanan niini nga saad mahitabo, sama sa giingon ni Jesus, “sa paglalang-pag-usab, sa dihang ang Anak sa tawo molingkod diha sa iyang mahimayaong trono.”​—Mateo 19:28.

Sa sinugdan gisugo sa Diyos si Adan ug Eva, ang unang tawhanong paris, sa pagpasangkad sa Paraiso nga tanaman nga Iyang gibutangan kanila. Buot niya nga sila manganak ug uban kanila himoon ang tibuok nga yuta nga usa ka matahom nga tanaman sa Eden. (Genesis 1:26-28; 2:7-9, 15) Bisag wala matuman ni Adan ug Eva kini nga katuyoan, ipasig-uli unya ang yutan-ong Paraiso diha sa paglalang-pag-usab, uban ni Kristo nga magmando sa Gingharian. Sa kataposan, ang Edenikong mga kahimtang ipakaylap sa tibuok yuta. Busa pagatumanon sa atong mahigugmaong Maglalalang ang iyang orihinal nga katuyoan sa usa ka malinawon, matarong nga kalibotan. Apan kanus-a kini moabot?

Sama ka ba ug panghunahuna sa kadaghanan kinsa moingon, ‘Aw, kini moabot sa ulahi apan dili sa atong panahon.’ Apan, giunsa man nimo pagkasayod? Ang ato bang panahon sa walay sama nga kagubot sa kalibotan maoy usa ka ilhanan nga ang bag-ong kalibotan sa Diyos haduol na? Unsaon nato sa pagkasayod?

[Hulagway sa panid 7]

Diha sa bag-ong kalibotan, aduna unyay pakigdait, hingpit nga panglawas, ug kauswagan

[Credit Line]

Mga nating leyon: Sa maayong kabubut-on sa Hartebeespoortdam Snake and Animal Park

[Hulagway sa panid 8]

Diha sa bag-ong kalibotan, tagamtamon sa mga tawo ang mabungahong buluhaton

[Hulagway sa panid 9]

Diha sa bag-ong kalibotan, aduna unyay panahon alang sa mga kalihokan sa paglingawlingaw