“Usa ka Trabaho nga Maayong Pagkabuhat!”

KANAY mabasa nga pangunang-ulohan sa St. Helena News. Gibuhat kini pag-usab sa mga Saksi ni Jehova. Natukod nila ang ikaduhang Kingdom Hall sa gamayng isla sa St. Helena, kapig 1,600 ka kilometros kasadpan sa Aprika. Ang tinukod nahimutang sa usa ka bungtod sa usa ka dapit nga gitawag Half Tree Hollow, nga may matahom kaayong talan-awon sa Dagat Atlantiko.

Ang inspektor sa tinukod ug ang hepe sa mga bombero midayeg sa mga Saksi. “Nahimo ninyo ang butang nga kahibulongan,” matud sa usa ka retiradong gobernador. “Kini usa ka modelo!” midugang ang inspektor sa elektrisidad.

Ang adlaw sa dedikasyon gieskedyul sa Sabado, Enero 9, 1993. Pinaagi sa mga anunsiyo sa radyo, ang tibuok isla nga may mga 6,000 ka tawo gidapit nga motambong. Apan ang gamay bang grupo sa lokal nga mga Saksi, mga 150 ka membro, makaarang sa paghuman sa proyekto sumala sa panahon? Si Sarel Hart, usa ka nagapanawng magtatan-aw nga taga-Habagatang Aprika, misaysay: “Ang among mga kasingkasing nahupong sa kabalaka sa dihang sa hapon sa ikawalong adlaw, ang agianan ug sakyanan nagkinahanglan pag daghang kargada sa igtatambak aron kana mapatag.” Sa unsang paagi sila makakuhag mga trak, kasangkapan, ug igong pangtambak sa pagpatag sa yuta niadtong ulahing oras? Si Hart mipadayon: “Ang hilom nga mga pag-ampo gidungog ni Jehova. Ang kontratista nga nagsuplay sa igtatambak miingon ngadto sa mga igsoon: ‘Kamo mihangyo ug lima ka kargada. Ako nasayod nga kamo nagkinahanglag labaw pa. Mihunong na ako sa pag-ihap​—kargahi lang ang mga trak hangtod nga inyong mabatonan ang igo.’ Kadto maoy alas 4:00 s.h. sa dihang usa ka operetor ug front-end loader miagi sa iyang pagpauli. Usa sa mga Saksi ang mipahunong kaniya ug mipatin-aw sa among kahimtang. ‘Bayri lang ang akong obertaym,’ matud niya, ug iyang gidala ang iyang makina ngadto sa agianan ug sakyanan ug gipatag ang yuta sa madali sumala sa pagbubo sa mga trak niana. Sulod sa tulo ka oras ang atubang nga agianan sa Kingdom Hall nahimong hapsay pagkapatag nga agianan ug sakyanan.

Sa sunod adlaw ang katibuk-ang gidaghanon nga 328​—kapig 5 porsiento sa mga molupyo sa isla​—mitambong sa pakigpulong sa dedikasyon. Nalakip sa mamiminaw mao ang sekretaryo sa gobyerno ug usa sa mga magtatambag sa gobyerno, ug ang Anglikanong obispo nagpadala usab ug mensahe nga nanghinaot sa ilang kaayohan.

[Mapa sa panid 31]

(Alang sa aktuwal nga pagkahan-ay, tan-awa ang publikasyon)

Africa

St. Helena

[Hulagway sa panid 31]

Bag-ong Kingdom Hall