Gikan sa Among mga Magbabasa
Kamingaw Salamat sa seryeng “Kamingaw—Kon Unsay Imong Mahimo Niini.” (Septiyembre 22, 1993) Mihilak ako gikan sa unang panid ngadto sa kataposang panid. Kana nakapahimo kanakong mosusi pag-ayo sa mga pagbati nga akong nabatonan di pa dugay. Ako karon nakaamgo nga dili lang kay ako ray mibatig kamingaw. Nanghinaot lang ako nga madawat ko ang inyong tambag ug ipadapat kana sa akong kinabuhi.
S. G., Tinipong Bansa
Natandog kaayo ako niadtong mga artikuloha. Gitambalan ako tungod sa hilabihang pagkamagul-anon ug nakaplagan ang kamingaw nga maoy akong labing dakong kaaway. Ang usa ka magul-anong tawo makigbisog adlaw adlaw aron sa pagpakigbugno niining hilom nga tigpatay. Ang mga artikulong sama niini maoy tuboran sa paglaom.
G. P., Tinipong Bansa
Ako 21 anyos ug nag-alagad ingong ministeryal nga alagad sa usa ka kongregasyon sa mga Saksi ni Jehova. Nakaalagad usab ako ingong payunir (bug-os-panahong magwawali). Apan kanunay akong nakigbugno sa kamingaw. Ang inyong mga artikulo maoy tubag sa akong mga pag-ampo. Ang mga ansiano sa akong kongregasyon mahigugmaon kaayo ug matinabangon, apan karon nakita nako kon unsaon pagpaarang-arang ang akong kaugalingon. Nakahimo akog daghang kausaban sa tinamdan ug sa mga kalihokan.
R. P., Tinipong Bansa
Di pa dugay gihasol ako sa kamingaw. Nalisdan ako sa pagsulti kaninyo kon unsa ako ka desperado. Apan makahanduraw ba kamo sa akong katingala sa dihang nakadawat sa Septiyembre 22, 1993, nga Pagmata!? Daw naamang ako! Nagpasalamat ako kang Jehova ug gibasa kana sa labing dali. Salamat nianang maayong-pagkasulat nga serye uban nianang maalamong tambag.
C. F., Inglaterra
Laing Matang sa mga Estorya sa Gugma Natingala ako sa dihang nakita ko ang balita sa “Pagpaniid sa Kalibotan” nga “Laing Matang sa Estorya sa Gugma.” (Oktubre 22, 1993) Sa wala pa ako magsugod pagtuon sa Bibliya, nagsulat ako niining laing matang sa mga estorya bahin sa homoseksuwal nga gugma. Sa dihang nabasa ko ang artikulo, kusganong gipunting kanako nga ako sa gihapon naghunahuna bahin niadtong mga estoryaha, usahay nagbalay ug mga bag-ong estorya sa akong handurawan. Tungod kay inyong nahisgotan kining ulohana, sa kataposan nakahunong ako sa paghunahuna bahin sa mga butang nga sama niini.
S. S., Hapon
Relihiyosong Paglutos Walay laing estorya sa kinabuhi nga labawng nakatandog kanako kay sa usa nga nag-ulohang “Oh, Jehova, Hupting Maunongon ang Akong Dalagita!” (Septiyembre 22, 1993) Kana nagpalig-on diha sa akong hunahuna ug kasingkasing nga bisan unsa pay akong masinati aron mahuptan ang akong integridad kang Jehova, siya kanunayng motabang kanako.
C. D., Tinipong Bansa
Imposible nga dili matandog niining estoryaha sa kinabuhi. Ang among batang babaye nga si Esther naghunahuna nga ang artikulo maoy kahibulongan! Hinaot si Jehova motabang sa among mga anak nga maingon ka lig-on diha sa pagtuo!
A. C., Pransiya
Salamat sa artikulong “Nagmadaogon Bisan pa sa Kamatayon.” (Mayo 8, 1993) Napahimuslan namo diri ang relihiyosong kagawasan. Apan ako nag-ampo nga ako makasunod sa panig-ingnan niining mga igsoona ug maghupot sa akong integridad kon bahin na sa ubang matang sa kalisdanan.
S. M., Brazil
Nag-apresyar sa Dibuho Sa nakita nako ang hulagway sa bag-ong kalibotan sa Diyos diha sa hapin sa Oktubre 22, 1993, nga Pagmata!, nalipay kaayo ako. Nagsige ako ug tutok sa hulagway, nga nag-ampo nga ako makapuyo didto. Gitan-aw ko kana pag-usab duha ka adlaw sa ulahi, ug kana adunay samang epekto. Salamat sa maong maanindot nga pagdasig.
S. H., Tinipong Bansa
Wala ako masayod kon kinsa ang inyong mga tigdibuho, apan ang ilang mga dibuho tinuod nga madanihon! Ang pipila sa labing matahom nga mga dibuho nga akong nakita anaa sa inyong mga libro ug mga publikasyon. Ako mismo usa ka tigdibuho, ug ako makaapresyar sa ekselente kaayong dibuho.
D. W., Tinipong Bansa