Gikan sa Among mga Magbabasa

Operasyon sa Mata Nalipay akong nakabasa sa inyong artikulong “‘Radial Keratotomy’​—Unsa Kana?” (Septiyembre 22, 1994) Ingong refractive nga siruhano, nga naoperahan na ang akong kaugalingong mga mata nianang paagiha ug nga nakahimo na ug kapin sa 2,000 ka operasyon, ako nadani pag-ayo sa kalidad ug pagkahusto sa inyong artikulo. Ikasubo, ang impormasyon nga gihatag ngadto sa publiko sa dili-medikal nga media sagad dili tukma ug malimbongon. Akong gibati nga maayo kaayong pagkasaysay sa inyong artikulo ang mga bentaha ug mga disbentaha sa radial keratotomy.

R. F. B., Tinipong Bansa

Kamatayon Buot ko kamong sultihan nga giapresyar nako pag-ayo ang mga artikulo sa “Mga Batan-on Nangutana . . .” nga “Nganong Kinahanglang Mamatay pa si Papa?” (Agosto 22, 1994) ug “Sa Unsang Paagi Ako Maulian sa Kamatayon ni Papa?” (Septiyembre 8, 1994) Bisan tuod buhi pa ang akong mga ginikanan, di pa dugay naguol ako pag-ayo sa kamatayon sa duha ka minahal sa kinabuhi. Kining mga artikuloha nagdala kanako ug dakong kahupayan ug nagpakita kanako kon sa unsang paagi makasagubang sa maong katalagman.

T. H., Pransiya

Ang akong amahan namatay sa Kingdom Hall human magpakigpulong. Sukad niadto nakigbisog ako sa kaguol ug kapungot. Ako nangatarongan nga dili matarong nga si bisan kinsa nga gimahal pag-ayo ug debotado kang Jehova kalit lang nga mamatay. Sa pagbasa niining mga artikuloha, akong gibati nga si Jehova nagpakita ug kahangawa ug nagtagana ug tabang sa pag-alim sa akong kasubo.

S. A., Nigeria

Ang akong amahan namatay gumikan sa kanser, ug nalisdan ako pag-ayo sa pagsagubang niana. Makapahingangha nga kining artikuloha sama gayod sa akong kaugalingong pagbati. Ang nakapaguol kanako mao nga ang akong amahan dili makakita kon unsay nagakahitabo sa akong kinabuhi karon. Bag-o pa nakong gisugdan ang dugay na nakong gidamgo: usa ka karera ingong bug-os-panahong magwawali. Gusto gayod nakong makakita siya kanako nga naghimo niana. Ako malisdan usahay tungod kay wala makabaton sa iyang kahibulongang giya ug kaalam, apan dakong kahupayan ang pagkahibalo nga adunay uban pa nga nagpakita ug interes ug kahangawa.

C. T., Tinipong Bansa

Pagpaniid sa Kalibotan Buot kong pahalipayan kamo bahin sa mainampingong paagi sa pagpatik sa Pagmata! Ilabinang giapresyar nako ang bahin nga “Pagpaniid sa Kalibotan.” Bisan tuod kini mubong naghisgot sa lainlaing mga topiko, ang makatabang nga tambag niini, makapukaw sa interes nga mga ulohan, ug mga pagpaniid nakatabang kanako sa pag-usab sa daghan nakong mga batasan. Ang “Pagpaniid sa Kalibotan” makalingawng basahon.

T. C. C., Brazil

Heimlich nga Paagi Ako usa ka kuwalipikadong instruktor sa first-aid sulod sa 11 ka tuig ug buot nga mokomento bahin sa “Pagpaniid sa Kalibotan” bahin sa “Pagkanadunlan.” (Agosto 22, 1994) Inyong nahisgotan ang gitawag nga Heimlich nga paagi. Hinunoa, nasayran na kaayo nga ang usa ka pagsuntok sa solar plexus makapahunong sa pagginhawa. Ang Heimlich nga paagi sa ingon makapagrabe sa first-aid nga kahimtang.

G. B., Austria

Ang pipila ka Uropanhong medikal nga mga awtoridad nag-isip sa Heimlich nga paagi nga peligroso ug nagsugyot nga gamiton lamang kini kon napakyas ang ubang mga paagi. Ang mga doktor sa Tinipong Bansa, hinunoa, kasagarang mibati nga sa dihang kini buhaton sa hustong paagi, ang Heimlich nga paagi maoy labaw pa sa tanang ubang mga paagi sa pagtabang sa mga nadunlan. Ang riyesgo sa pag-antos ug kadaot sa sulod sa lawas giisip nga diyutay ra kon itandi sa riyesgo sa pagkamatay gumikan sa pagkanadunlan. Pananglitan, usa ka pagtuon sa T.B. miangkon nga upat lamang ka gastric perforation nga may kalabotan sa maong paagi ang narekord. Kon kanus-a ang mga doktor sa Uropa ug sa T.B. magkauyon niining butanga tan-awon pa nato sa umaabot.​—ED.