Mga Pag-ampo Alang sa Kalinaw sa Tunga sa mga Panumdoman sa Gubat
NIADTONG Nobyembre 1994, gidapit ni Papa Juan Paulo II ang daghag-denominasyong panagkatigom sa Vatican. Ang mga pag-ampo alang sa kalinaw sa kalibotan maoy tema sa okasyon. “Bisan unsa pay mga kasungian sa nangagi ug bisan hangtod karon,” matod sa papa sa iyang pangbukas nga pakigpulong, “buluhaton ug obligasyon natong tanan nga mapadayag pag maayo ang relasyon tali sa relihiyon ug kalinaw.”
Sa kasukwahi, dili maayog dungog niining bahina ang mga relihiyon niining kalibotana. Si William Vendley, sekretaryo-heneral sa komperensiya, miangkon nga “ang mga relihiyon nalangkit pag-ayo sa mga gubat sa lainlaing bahin sa kalibotan.” Palandonga ang mga pagpamatay sa Rwanda, usa ka nasod nga sa dakong bahin Romano Katoliko.
Niadtong Mayo 1994, giangkon ni Papa Juan Paulo II nga ang trahedya sa Rwanda maoy “usa ka tinuod ug matuod nga pagpuo sa kaliwat nga niini, ikasubo, bisan ang mga Katoliko responsable.” Ang pag-apil-apil ba sa Katoliko nakaapektar sa pagtuo sa mga tawo sa simbahan? “Ang mga pagpamatay nakatarog sa pagtuo sa daghang tawo,” matod ni André Bouillot, usa ka taga-Belgium nga Heswita. Ug may maayo kini nga katarongan.
Sumala sa taho sa Reuters nga gipatik sa Herald sa Miami, “ang mga pari, mga pastor ug mga madre maoy apil sa 40,000 ka binilanggong mga Hutu nga naghulat ug husay tungod sa mga buhat sa pagpuo sa kaliwat.” Ang The New York Times nagtaho: “Daghang taga-Rwanda miingon nga ang ilang mga obispo ug mga arsobispo wala magkondenar sa mga pagpatay nga mas madali o mas kusganon ug nga sila suod kaayo sa Kagamhanan ni Habyarimana, nga mitabang sa pagbansay sa mga grupo nga mamumuno. Labing menos usa ka pari ang gidakop sa bag-ong Kagamhanan nga dominado sa Tutsi nga gisumbong nga nakigkonsabo sa mga pagpamatay.” Dili ikatingala, “ang bag-ong Kagamhanan,” midugang ang Times, “miingon nga dili nila gusto nga ang Katolikong Simbahan mahimong gamhanan sama sa nangagi, ug ang mga sundalo nanghasi ug namahad pa sa pagdakop sa mga pari nga sobra ka prangka ug independente.”
Unsay paglantaw ni Jehova nga Diyos sa mga pag-ampo alang sa kalinaw nga gitanyag sa sad-an-sa-dugo nga mga relihiyonista? Ang Isaias 1:15 nagtubag: “Sa diha nga bayawon ninyo ang inyong mga kamot, tagoon ko ang akong mga mata gikan kaninyo. Bisag maghimo kamo ug daghang pag-ampo, ako dili mamati; ang inyong mga kamot nangapuno sa dugo.”
Kasamtangan, ang matuod nga mga alagad ni Jehova nagpabiling “dili bahin sa kalibotan” ug sa mga gubat niini. Sa panahon sa mga pagpamatay sa Rwanda, ang mga Saksi ni Jehova sa matag tribo mihimo sa ilang mga balay nga dalangpanan alang sa mga Saksi nga nameligro sa ubang tribo, sa ingon nanalipod kanila nga nagpameligro sa ilang kaugalingong mga kinabuhi. Ang “dakong panon” sa mga Saksi, sa tibuok kalibotan gikan sa matag etnikong kagikan, nag-ampo alang sa ug nagpaluyo sa Gingharian sa Diyos ingong bugtong paglaom alang sa matuod nga kalinaw ug kasegurohan.—Juan 17:14; Pinadayag 7:9; Mateo 6:9, 10; 24:14.
[Picture Credit Line sa panid 24]
Luc Delahaye/Sipa Press