Gikan sa Among mga Magbabasa
Pagkatulog Salamat sa artikulong “Kon Nganong ang Imong Lawas Nanginahanglan ug Katulog.” (Hunyo 8, 1995) Kinahanglang moingon ako nga kini naglamdag kanako. Ingong usa ka medikal nga estudyante, nawad-an ako ug daghang bililhong oras sa pagkatulog sa paningkamot nga makaapas sa akong tun-anan. Giantos nako ang pipila sa mga epekto nga gihisgotan sa artikulo. Maningkamot ako sa pag-ugmad ug mas maayong batasan sa pagkatulog.
L. H., Trinidad
Mga Apohan Mitulo ang akong mga luha sa kalipay sa dihang nabasa nako ang seryeng “Gipabilhan Mo ba ang mga Apohan?” (Hulyo 8, 1995) Nalisdan akong makiglabot sa akong mga ugangan, busa ang inyong artikulo miabot sa tukmang panahon. Nakapaamgo kini kanako nga wala ko sila tagda uban sa hustong pagtahod nga angay kanila. Nagpadayon ako sa paghimo sa gikinahanglang mga kausaban, ug kaming tanan mas malipayon.
A. T., Canada
Sa dihang kinahanglan namong ibutang ang akong amahan sa usa ka nursing home, kami mihukom nga duawon siya katulo sa usa ka semana. Among gituman ang maong saad sulod na sa duha ka tuig. Ang ginagmayng inadlaw-adlawng balita gikan sa balay hinungdanon kaayo alang kaniya! Nagkinahanglan ug hugot nga desisyon sa pagpadayon niini, apan ang mga apo maingon man ang mga apohan makabenepisyo.
P. L., Tinipong Bansa
Ingong Katoliko, ako nakadayeg sa kamatuoran nga ang mga artikulo wala magtunong sa pagtagad sa kredo o relihiyon apan dili mapihigon. Kamo maisogong naghisgot sa panginahanglan nga wala gayod tagda.
A. B., Costa Rica
Trahedya sa Pamilya Nabasa nako uban sa mga luha ang artikulong “Salamat nga Giuli Mo Ako sa Balay, Ma.” (Hulyo 8, 1995) Ako usab namatyan sa akong bana gumikan sa usa ka aksidente niadtong 1982. Ako daw napiangan—nga may unom ka anak ug usa ka inahan nga atimanonon. Ang pagbasa sa artikulo maoy samag pagbasa sa akong kaugalingong sugilanon. Si Jehova naghatag kanato sa kaisog nga mopadayon.
C. R., Tinipong Bansa
Kining maong sugilanon nakatandog gayod sa akong kasingkasing. Ako 16 anyos, ug kanunay akong nahibulong kon sa unsang paagi ako makasagubang kon motungha ang maong mga suliran. Ang kasinatian ni Todd nakatabang kanako sa pag-apresyar nga si Jehova kanunayng anaa alang kanato basta mosalig kita kaniya.
N. F., Dominica
Ang sugilanon maayo kaayong pagkaasoy nga kahilakon ako. Ang mga pagsulay sa pamilyang Boddy naghimo sa akong ginagmayng mga kahigawad nga dili gayod hinungdanon. Bisan tuod ang among mga kahimtang managlahi, ang pagkakita kon sa unsang paagi si Jehova nagpalig-on kanila nakatabang kanako nga maningkamot nga magpadayon.
V. S., Pilipinas
Ang akong bana sa 33 na ka tuig, usa ka matinumanong Saksi nga nag-alagad ingong ansiano sulod sa daghang katuigan, nasakit sa sakit nga Pick—usa ka dugay, makapasubo nga balatian nga inanayng magpaantos pag-ayo sa biktima ug sa iyang pamilya. Nakadayeg kaayo ako sa kalig-on ni Gng. Boddy bisan pa sa pagkamatay sa iyang bana, maingon man sa iyang katuigan sa walay-paghunahuna-sa-kaugalingon, debotadong pag-atiman sa iyang anak lalaki. Hinaot nga si Jehova magapanalangin kaniya ug sa iyang mga anak lalaki.
E. N., Tinipong Bansa
Bahong Gininhawa Kinahanglang pasalamatan ko kamo tungod sa inyong tugob sa impormasyong artikulo nga “Unsay Imong Mahimo Bahin sa Bahong Gininhawa?” (Hulyo 8, 1995) Mao kanay akong suliran kanhi! Tinuod nga ang pagkabaho ug gininhawa makapaguol kanimo. Miduaw na ako sa dentista sa duha ka higayon, apan nagpabilin gihapon ang baho. Akong gipadapat ang mga sugyot diha sa artikulo, ug kini sila malamposon. Palihog padayon sa pagtabang sa katawhan sa tibuok yuta.
R. O. I., Nigeria
Costa Rica Ang artikulong “Costa Rica—Gamayng Nasod, Dagaya sa Nagkadaiyang Kalalangan” (Hulyo 8, 1995) miabot pipila ka adlaw una pa sa akong biyahe; gidala nako kadto ingong reperensiya. Sa pagkatinuod usa kana ka nasod nga tugob sa kahibulongan ug kulbahinam nga kalalangan! Bisan diin kami miadto, ang mga tawo mipahiyom ug miwarawara kanamo. Handurawa lamang ang bag-ong kalibotan sa dihang ang tanan bisan asa mahimong ingon ka mahigalaon!
T. N., Tinipong Bansa