Pagpakigkontak sa Kalibotan sa mga Espiritu

SA SENTRO sa usa ka kasagarang lungsod sa Kasadpang Aprika nagtindog ang maanindot nga usa-ka-andanang tinukod, nga pinintalag puti ug berde. Sa lawak nga dawatanan, duha ka kalihim ang nagmakenilya. Daghang tawo ang nanglingkod sa mga bangko, naghulat sa pagpakigkita sa babaláwo, ang diwatahan.

Luyo sa lamesa sa duol nga opisina, tapad sa fax machine, naglingkod ang babaláwo mismo. Dako, ubanon ug ulo, siya nagsul-ob ug taas puting mga kapa​—mahalon, binordahan. “Diwatahan ang akong amahan,” siya miingon. “Natawo ako sa tradisyon. Nagdako ako niana. Sa nag-edad ako ug singko, sa dihang nangdiwata ang akong amahan, mouban ako kaniya. Nakakita ako kon giunsa niya kini paghimo, ug gisundog ko siya hangtod nga kini nahimong dakong bahin kanako.”

Gitudlo sa babaláwo ang dakong tablang displeyhanan nga naglatid sa komplikadong sistema sa pagdiwata nga gigamit sa iyang katawhan sa daghan na kaayong kaliwatan. Pinaagi sa paglabay ug 16 ka lusok sa bunga sa palma, usa kini ka sistema nga kaylap kaayo sa tibuok nga Kasadpang Aprika ug saylo pa. “Ang mga tawo moanhi kanako nga adunay tanang matang sa mga problema,” siya miingon. “Mga problema bahin sa mga babaye, pagkadili-manganak, pagkawalay-trabaho, pagkabuang, panglawas, ug uban pa. Depende sa mga resulta sa pagdiwata, sangpiton kaha ang mga kagikanan o ang langitnong mga persona [mga bathala]. Bisag hain niini, ang pipila ka matang sa halad kinahanglang himoon.”

Ang naandang relihiyosong mga buhat, lakip ang pagdiwata, lig-on kaayo sa dapit, apan maingon man usab ang mga iglesya sa Kakristiyanohan. Dili layo gikan sa mga opisina sa babaláwo mao ang pinintalag puti nga mga tinukod nga may mga karatula sa atubangan: King Solomon II Church, Cherubim and Seraphim, Celestial Church of Christ, Christ Apostolic Church, Christ Trumpeters Church. Kining maong mga iglesya nagkomboyahay sa usag usa ug usahay mosunod sa mga buhat sa tradisyonal nga relihiyon. Miingon ang babaláwo: “Di pa dugay nga naghinabi ako sa obispo. Siya mianhi dinhi. Human nga nahisgotan namo ang mga butang sa mga 30 minutos, siya miingon nga buot niya nga maglaraw kami ug usa ka matang sa panagsultihay diin ang mga Kristohanon ug mga tradisyonalista mag-usa aron magbayloay ug maghusayay sa mga dili-pagsinabtanay.”

Mga Pultahan Ngadto sa Kalibotan sa mga Espiritu

Ang maong mga dili-pagsinabtanay sagad nalangkit sa kailhanan niadtong nagpuyo sa kalibotan sa mga espiritu. Sa tibuok Aprika sa habagatan sa Sahara, kaylap ang pagtuo nga adunay duha ka matang sa pundok nga nagpuyo sa kalibotan sa mga espiritu. Ang unang pundok mao ang mga bathala, o mga diyos, nga wala gayod sukad mahimong mga tawo. Ang ikaduhang pundok gilangkoban sa mga kagikanan, o mga espiritu sa mga patay, kansang kaakohan mao ang pagtino nga makapabiling-buhi ug mouswag ang ilang mga pamilya sa yuta. Ang mga bathala ug mga kagikanan gituohan nga adunay gahom sa pagtabang o sa pagdaot niadtong anaa sa yuta. Busa, ang duha kinahanglang pakitaan ug hustong pagtahod ug pasidungog.

Ang samang mga pagtuo makita diha sa daghang bahin sa kalibotan. Nga nagagamit ug lainlaing paagi, ang mga tawo bisan diin nagduol sa mga puwersa nga labaw-sa-kinaiyanhon, nga nagpangitag kahibalo sa umaabot ug tabang ug giya sa adlaw-adlawng mga problema sa kinabuhi. Posible ba gayod nga mabatonan ang tabang gikan sa kalibotan sa mga espiritu? Si Jesu-Kristo, nga nagpuyo didto, nagpakita nga kini posible. Siya miingon: “Padayon sa pagpangayo, ug igahatag kini kaninyo; padayon sa pagpangita, ug kamo makakaplag; padayon sa pagpanuktok, ug pagabuksan kini kaninyo.” (Mateo 7:7) Apan aron madawat kanang maong tabang, kinahanglang mangutana kita sa hustong tawo, mangita sa hustong paagi, ug manuktok sa hustong pultahan. Kon kita manuktok sa sayop nga pultahan, basin ug ablihan kini sa usa nga mohatag kanato ug kadaot, dili kaayohan.

Busa, hinungdanong masayod kon kinsay nagpuyo sa kalibotan sa mga espiritu ug kon kinsa ang wala. Kinahanglang masayod usab kita sa kalainan tali niadtong motabang kanato ug niadtong modaot kanato. Sa kataposan, kinahanglang masayod kita kon unsay atong himoon aron makadawat sa tabang gikan niadtong anaa sa posisyon sa paghatag niana. Tukion sa sunod nga mga artikulo kining mga butanga.

[Picture Credit Line sa panid 3]

Letrato sa mga panid 3-4: The Star, Johannesburg, S.A.