Usa ka Modelo nga Angayng Sundogon

SINULAT SA KORESPONSAL SA PAGMATA! SA CHILE

Si Giacomo Castelli adunay apartment sa Antofagasta, usa ka siyudad sa amihanang Chile nga may duolan sa 170,000 ang pumoluyo. Gikan sa iyang balkonahe sa miaging Hunyo, nakamatikod siya ug usa ka grupo sa mga tawo diha sa usa ka lokal nga parke. “Ang kahibulongan mao ang pagkakita sa mga tin-edyer nga nangatawa ug duyog nga naglingawlingaw kauban sa ilang mga ginikanan,” siya misulat sa usa ka sulat ngadto sa mantalaang El Mercurio. Aron mapamatud-an kadtong talagsaong talan-awon, nanaog siya ug miadto sa parke.

“Nasinati nako ang laing kahibulong,” miingon kining mausisahong magsusulat. “Sa dihang ang pipila ka pamilya nahuman na ug paniudto, ang matag usa sa ilang mga membro misugod sa pagpamunit sa kon unsay nahulog nga wala tuyoa diha sa kabalilihan ug gisulod kana sa ilang tagsatagsa ka bag nga basurahan. . . .

“Buot kong masayran kon kinsa kining talagsaong mga tawo,” mipadayon ang magsusulat. “Miduol ako sa usa ka matahom nga dalagita nga ang katahom sarang modaog sa usa ka bangga sa kaanyag, ug siya mapahiyomong miingon kanako: ‘Kami mga Saksi ni Jehova, ug kami may asembliya diha sa Regional Stadium.’” Panahon sa tingpaniudto, ang mga grupo gikan sa sirkitong asembliya nga gitambongan sa kapin sa 3,000 ka tawo nangadto sa parke aron maniudto.

“Ako maoy usa ka Apostolikong Romano Katoliko,” miingon ang magsusulat. “Ako matinumanong nagtambong sa balaang Misa ug gani mihimog biyahe sa peregrino ngadto sa Lourdes, sa Pransiya, katuigan kanhi.

“Bisan pa niana, tungod sa maayong Kristohanong pagmatuto kanako, ako sa kamatinud-anon mangutana sa akong kaugalingon: Unsay ilang nabatonan nga wala nato mabatoning mga Katoliko, ang relihiyon sa mayoriya sa Chile? Nganong kining mga tin-edyer daw komportable kaayo uban sa ilang mga ginikanan samtang ang akong tulo ka anak nga mga babaye molikay kanako sa dihang isugyot lang gani nako ang ideya nga magduyog paglingawlingaw?

“Nganong ang atong Katolikong mga anak mapintas; nganong sila mosinggit ug modula sa ‘Power Rangers’ samtang nanuntok sa ubang kabataan, . . . samtang kining mga bataa makigdaiton, malipayon, ug mahunahunaon sa ekolohiya? Nganong kitang mga Katoliko dili magkahiusa diha sa mga asembliya nga dili malangkit sa makapungot nga komersiyalismo nga naglungtad sa atong labing balaang relihiyosong mga dapit, sama sa mga halarang La Tirana, Andacollo, ug uban pa?”

Ang magsusulat, si G. Castelli, nagtapos sa iyang sulat ngadto sa mantalaan pinaagi sa pangutana: “Kadtong kinsa kanato nga nag-isip sa atong kaugalingon nga mga Katoliko ug mga Kristohanon posible bang mahimong sama kanila? Hinaot ang Diyos ug ang Birhen motabang kanato sa pagbuhat niana.”