OSCE—Unsa Kini? Molampos ba Kini?

Sinulat sa koresponsal sa Pagmata! sa Portugal

HUMAN sa Gubat sa Kalibotan II, ang pakigbugno sa gahom mitungha tali sa demokratikanhon kapitalistang mga nasod sa Kasadpan ug sa bloke sa Komunistang Sobyet sa Sidlakan. Ang matag bloke nagmugna ug kaugalingon niining organisasyon sa kasegurohan: ang North Atlantic Treaty Organization (NATO) sa Kasadpan ug ang Warsaw Pact sa Sidlakan.

Sa 1975 mikalma pag-ayo ang Cold War nga 35 ka estado, lakip na ang Tinipong Bansa ug Rusya, mipirma sa nailhan nga Helsinki Agreement. Ang Conference on Security and Cooperation in Europe (CSCE) natukod. Kadto maoy katigoman nga giapilan sa daghang nasod sa panaghisgot ug panagsabot tali sa duha ka bloke.

Sa Komperensiya sa Budapest niadtong 1994, ang CSCE nag-ilis sa ngalan niini ngadto sa Organization for Security and Cooperation in Europe (OSCE). Karon, kini nalangkoban sa 54 ka sumasalmot nga mga Estado, lakip na ang Tinipong Bansa, Canada, ug ang tanang nasod sa kanhing Unyon Sobyet.

Ang Tumong Niini

Ang tumong sa membrong mga nasod sa OSCE mao ang pagtino sa kasegurohan sa Uropa maingon man ang pagdasig sa pagpatuman sa tawhanong mga katungod, disarmamento, demokratikanhong mga kagawasan ug ang pagdumala sa rehiyonal nga kagubot.

Ang komperensiya sa OSCE gihimo sa Lisbon, Portugal, niadtong Disyembre 2-3, 1996. Sa sinugdanan, ang pagtagad gipunting sa NATO, sanglit daghang membro sa NATO, lakip na ang Tinipong Bansa, uyon sa pagpadako sa NATO aron maglakip ug dugang mga nasod gikan sa Sentral ug Sidlakang Uropa. Apan inay paluyohan ang pagpadako sa NATO aron maglakip sa kanhing mga alyado sa bloke sa Sidlakan, ang Rusya ug ang pipila sa kanhing mga alyado niini sa bloke sa Sidlakan buot nga ang OSCE mahimong katigoman maylabot sa mga butang sa Uropanhong kasegurohan.

Ang primer ministro sa Rusya, si Viktor Chernomyrdin, miingon didto sa panagtigom: “Kami uyon sa pagpalig-on sa OSCE, nga mao ang bugtong dapit sa Uropa diin ang tanang Estado magkatinabangay. Mao kini ang labing maayong internasyonal nga dapit sa paghisgot sa kasegurohan ug depensa.”

Ang mahayag nga adlaw sa kahaponon maorag nakapatunghag atmospera sa positibong panglantaw sa katibuk-an sa pagtiklop sa komperensiya, bisan pa sa mga komento sa prensa bahin sa dili tin-aw nga mga resulta niini. Unsa may kalamposan o kapakyasan nga hayan mahimo sa OSCE, ang mga mahigugmaon sa pakigdait bisan diin makaseguro nga ang tinuod nga pakigdait ug kasegurohan sa dili madugay matuman sa tibuok yuta ilalom sa pagmando sa Gingharian sa Diyos.​—Salmo 72:1, 7, 8.

[Hulagway sa panid 31]

Ang Cultural Center sa Belém, sa Lisbon, Portugal, diin gihimo ang komperensiya