Gikan sa Among mga Magbabasa

Tibuok Yutang Tanaman Magpasalamat gayod ako kaninyo sa matahom nga seryeng “Tibuok Yutang Tanaman​—Damgo o Umaabot nga Kamatuoran?” (Abril 8, 1997) Oo, ang mga tanaman ug mga bulok makaapekto sa atong panglawas ug makapalipay kanato. Nagustohan ko ang bahin nga nag-ulohag “Ang Dalan Balik sa Paraiso.” Pagkamakapadasig gayod niadtong pipila ka pulong​—samag pagdapit nga nag-ingon, “Kini mao ang dalan.” Pagkamakapahimuot gayod unya sa pagtrabaho gikan sa pagsubang ngadto sa pagsalop sa adlaw nga motabang sa pagbag-o sa yuta sa pagkahimong paraiso! Sanglit gikalipayan ko ang pagdibuho, pagguhit, ug ang inantigong mga buluhaton, gikahimut-an ko usab ang tanang kahimoan sa arte diha sa mga magasin.

V. R., Australia

Buot kong dayegon kamo gumikan sa mga artikulo. Nalingaw gayod ako niini. Hapit na akong mag-80 anyos ug buot gihapon nakong magkurikuri sa akong nataran. Dili man tingali makaangkon sa unang ganti ang akong mga bulak ug mga utanon, apan malingaw akong moadto sa gawas ug pag-atiman niini. Sukad mabasa ang mga artikulo, mas nasabtan nakog maayo kon nganong ang mga tawo gustong motrabaho diha sa mga tanaman.

R. R., Tinipong Bansa

Luwason ang Kaminyoon? Sa dihang akong nabasa ang artikulong “Maluwas ba ang Kaminyoon Human sa Pagluib?” (Abril 8, 1997), gisabot nakong si Jehova nagpadalag sulat ngari kanako. Tukma niining gipahayag kon unsay akong naagian ug kon unsay akong gibati. Maluibon ang akong bana, apan tim-os siyang naghinulsol. Ingon sa gihisgotan sa artikulo, gibati kong maorag gibagyo. Gipasaylo ko siya, apan usahay naulaw ko sa akong gibati. Ang artikulo nagtabang kanako sa pagsabot nga ang akong mga reaksiyon maoy bug-os normal ug husto. Gipanalanginan pag-ayo ni Jehova ang among mga paningkamot, ug ang among kaminyoon naluwas.

L. P., Pransiya

Bisan tuod dili na maluwas ang akong kaminyoon, kining artikuloha maoy tinuod nga panalangin sanglit kini naghubit pag-ayo kon unsay akong gibati. Ikalangkit ko ang tanang panghitabo diha sa artikulo. Nasayod usab ako sa uban nga nakabaton usab ug kaayohan gikan niana. Daghan ang nalisdan sa pagsabot kon unsay bation sa ingon niining kahimtanga, busa dakog tabang kining artikuloha, nga naghatag kanilag panabot.

M. C., Irlandia

Siyam na ka tuig nga ako naminyo sa usa ka di-magtutuo nga nagmaluibong kapikas. Apan sa dihang akong gibasa ang mga parapo ilalom sa sub-ulohang “Maluwas pa ba ang Kaminyoon?” mas gibati ko ang kahayahay. Gustong ipadayon sa akong bana ang among kaminyoon apan magpadayon usab ang relasyon sa laing babaye. Busa, nalipay ako sa pagtapos niini. Karon kinahanglang magsugod na usab ako ug mahimong usa ka nag-inusarang inahan.

M. S. B., Trinidad

Salamat sa matahom ug tukbilonong artikulo. Ekselente ang tambag nga magamit sa pagtino kon ang panag-uliay magmalamposon. Kanunay nakong gihunahuna nga kon magluib ang akong bana, dili ko gayod siya mapasaylo. Karon akong naamgohan nga dili kanunayng ingon niana ang hustong tubag. Makauulaw nga kini dayag nga nagkadakong suliran, apan salamat sa Kasulatanhong panabot kon unsaon namo pagtabang ang among kaugalingon. Ang akong pagsalig kang Jehova nakatabang kanako latas sa hilabihang depresyon ug nagtabang kanako sa pagbatog kaisog sa pagpasaylo, sanglit ang akong bana tim-os nga mahinulsolon (hangtod karon).

S. N., Tinipong Bansa

Bungol Nagadayeg Kang Jehova Samtang nagbasa sa artikulong “Ang Bungol Nagadayeg Kang Jehova” (Abril 8, 1997), mihunong ako aron sa pagtan-aw sa hulagway sa tanang nanambong. Pagkamakapalig-on sa pagtuo kadto nga makita ang daghang igsoong lalaki ug babaye nga naggamit sa senyas nga pinulongan sa pagdayeg kang Jehova! Kadaghan ako makahilak, samtang ginapabilhan ko pag-ayo ang ilang kasibot, determinasyon, ug dedikasyon. Salamat sa maong mga artikulo.

R. H., Tinipong Bansa