Gikan sa Among mga Magbabasa
Ebolusyon Batok Paglalang Ang seryeng “Sa Unsang Paagi Kita Mitungha Dinhi? Pinaagi ba sa Aksidente o Gidisenyo?” (Mayo 8, 1997) gipresentar nga tin-aw, yano, ug may hingpit nga pangatarongan. Nahinam ako sa pagkakita sa mga pahina sa siyentipikanhong pamatuod sa paglalang. Ang mga ilustrasyon makapakombinsir. Sa partikular ako nalingaw sa pagbasag usab mahitungod sa selula ug sa tanang bahin niini. Ang pagpamalandong sa kalihokan sa mitochondrion ug mga Golgi body maoy butang nga wala nako mahimo sukad ako mitungha, ug ako bug-os nga nalingaw niana.
J. S., Tinipong Bansa
Ingong usa ka estudyante nga nag-espesyalisar sa biolohiya ug usa ka tibuok kinabuhing agnostiko, ako buot magpasalamat kaninyo sa mga artikulo. Bisan kon ang mga artikulo nasudlan sa pipila ka sobrang pagpayano . . . , bisan pa niana kini nagpunting sa tinuod nga problema sa bag-ong teoriya sa ebolusyon: ang kaylap nga paghunahuna sa siyentipikanhong komunidad sa pagkalabaw sa ebolusyon pinaagi sa natural selection, bisan pa sa daghang kal-ang diha sa ebidensiya. Ang siyensiya kinahanglan nga padayong magpailalom sa pagsulay sa mga maduhaduhaon aron kini hustong tawgon nga siyensiya. Sa pagpunting sa mga depekto sa Neo-Darwin nga teoriya, dili lamang kay nagpresentar kamo ug usa ka katarongan sa pagtuo kang Jehova kondili nagbuhat usab ug usa ka serbisyo sa umaabot sa siyentipikanhong imbestigasyon. Salamat.
A. S., Tinipong Bansa
Paglalin Ako gayong gipabilhan ang artikulong “Hunahunaa ang Risgo sa Paglalin!” (Mayo 8, 1997) Akong naagoman ang kadaghanan sa inyong gisulat. Sa paglalin gikan sa Aprika ngadto sa Uropa, kanunay kong naatubang ang masakit nga pakigharongay nga naglangkit sa rasa, pinulongan, pamanit ug, labaw sa tanan, pagpihigpihig. Ang popular nga media naghatag sa mga tawo ug tinuis nga larawan sa mga Aprikano ug ubang mga langyaw sa kinatibuk-an.
P. A., Alemanya
Kalingawan Salamat sa artikulong “Unsay Nahitabo sa Kalingawan?” (Mayo 22, 1997) Ako 12 anyos, ug panahon sa mga piyesta opisyal sa eskuylahan, ako magsigeg tan-aw ug TV. Ang artikulo mitabang kanako sa pagsabot nga adunay ubang makalingaw nga mga butang nga akong mabuhat.
J. L., Inglaterra
Pagsangyaw sa Aprikanhong mga Banika Gusto kong magpasalamat kaninyo sa artikulong “Ang Gigukod sa Usa ka Manok Samtang Nag-ulan . . .” (Mayo 22, 1997) Ako nakadayeg sa dedikasyon ug kamalahutayon sa atong kaigsoonan sa Nigeria. Bisan pag kinahanglan nilang atubangon ang mga halas, mga buaya, ug mga alimatok, ang ilang gugma sa katawhan maoy nag-aghat kanila nga magpadayon. Sa sunod panahong ako magsangyaw ug maigangan o kapoyon, akong hunahunaon ang atong minahal nga mga igsoon sa Nigeria.
S. S., Tinipong Bansa
Seksuwalidad—Nagakausab nga mga Tinamdan Buot kong ipahayag ang akong tim-os nga pagpasalamat sa seryeng “Seksuwalidad—Kon Unsay Kahulogan sa Nagakausab nga mga Tinamdan.” (Hunyo 8, 1997) Usa kana ka dakong tiglig-on sa akong pagtuo. Dili pa dugay giingnan ako [usa ka babaye] sa usa ka lalaki sa kasilinganan nga ako ‘inutil sa pisikal’ tungod kay ako 19 anyos na ug ulay pa gihapon. Malipayon ako nga nakaarang sa pagsulti kaniya nga ako himsog sa pisikal ug espirituwal sa mga mata ni Jehova.
W. M. C. C., Zimbabwe
Ang inyong reperensiya sa panid 10 bahin sa “mahilayong mga gene” maoy sayop. Ingong usa ka estudyante sa biolohikal nga mga siyensiya, sultihan ko kamo nga ang “mahilayong mga gene” nagtumong sa mga gene diha sa chromosome nga naglihok sulod sa chromosome o mopahiluna sa usa ka bag-ong chromosome. Dili kini makaapektar sa panggawi.
L. P., Canada
Ang pahayag nga wala kita buhata sa Diyos nga may “mahilayong mga gene” sa pagkamatuod gikutlo sa usa ka pakigpulong nga gihimo sa Anglikanong obispo sa Edinburgh, Scotland, usa ka bahin niana gikutlo sa panid 4 sa maong isyu sa “Pagmata!” Ang obispo miingon nga ‘ang Diyos . . . naghatag kanato ug mahilayong mga gene’—tataw nga usa ka pagsulay sa pagpakamatarong sa imoral nga panggawi. Ang among artikulo nagyagyag sa pagkabinuang sa maong mga pangangkon.—ED.