Unsa ka Dako ang Interes sa mga Batan-on sa Relihiyon?

SINULAT SA KORESPONSAL SA PAGMATA! SA PRANSIYA

ALANG sa 750,000 ka batan-ong mamiminaw, kini maoy usa ka gabii sa hilabihang kalipay. Ilang giwarawara ang mga bandera, nag-awit, ug namakpak. Ang mga kidlap sa laser ug mga kuwitis makita sa kahanginan, ug ang mga musikero nagpasibot sa panon. Ang atmospera susamag usa ka “dakong baylehan.” Sa kataposan, dinuyogan sa mga singgit sa pagdayeg, ang tawo nga ilang gipaabot misaka sa entablado.

Usa ba kini ka pasiuna sa tibuok kalibotang paglibot sa usa ka banda sa musikang rock? Dili. Kadto maoy usa ka dakong relihiyosong miting sa Paris panahon sa Catholic World Youth Days, ug ang tawo walay lain kondili si Papa Juan Paulo II!

Alang sa pipila, ang interes sa mga batan-on sa relihiyosong mga pista nga sama niini morag talagsaon. Apan karon ang palaumagian sa balita naghisgot bahin sa usa ka pagmata sa tinuohan taliwala sa mga batan-on.

Panggawas nga mga Panagway

Kon tan-awon, ang relihiyon mora tingalig nagalambo. Mga 68 porsiyento sa mga batan-ong taga-Uropa ang nag-ingon nga sila sakop sa usa ka relihiyon, ug sa Irlandia kining numeroha milabaw sa 90 porsiyento. Sa Armenia, usa ka kanhing republika sa Sobyet diin daghan sa usa ka panahon ang nag-isip sa relihiyon ingong usa ka handomanan gikan sa milabayng panahon, usa ka pari miingon bahin sa kanhing gibiyaang mga simbahan nga karon puno na: “Natingala ako sa kamadanihon sa relihiyon alang sa mga batan-on.”

Sa daghang nasod ang palaumagian sa balita kaylap nga nagpublikar sa kalangkitan sa mga batan-on sa mga kulto ug karismatik nga mga pundok. Ang relihiyosong mga pista, sama sa usa nga gihisgotan sa sinugdan, maoy popular. Apan, unsay mahitabo sa dihang atong tugkaron kini?

Bug-os nga Pagsusi

Ang bug-os nga pagsusi nagpadayag nga sa 1967, 81 porsiyento sa Pranses nga mga batan-on ang nagtuo sa Diyos, apan sa 1997, ang porsiyento wala makaabot ug katunga. Sa Uropa sa katibuk-an, 28 porsiyento lamang sa mga batan-on ang nagtuo sa Diyos ingong persona. Nan, dili ikahibulong nga 12 porsiyento lamang sa mga batan-on sa Uropa ang kanunayng nag-ampo. Sa unsang paagi kini gibanaag diha sa paagi nga gilantaw sa mga batan-on ang relihiyon?

Sa Denmark 90 porsiyento sa mga batan-on nag-ingon nga sila sakop sa nasodnong iglesya. Tres porsiyento lamang ang naghubit sa ilang kaugalingon nga nagatuman nga mga membro. Sa 1997 ang usa ka surbi sa La Croix, usa ka Katolikong mantalaan sa Pransiya, nagpakita nga 70 porsiyento sa mga batan-ong Pranses miangkon nga ang relihiyon wala gayoy impluwensiya sa ilang mga kinabuhi. Tres kuwarto kanila naghatag ug labawng importansiya sa personal nga kasinatian kay sa pagtulon-an sa usa ka relihiyon. Ang susama matuod sa kadaghanang ubang mga nasod sa Uropa.

Nganong ang mga batan-on mitalikod sa mga iglesya? Alang sa kadaghanan kanila, ang pangunang mga relihiyon wala magdasig ug pagsalig. Pananglitan, sa Pransiya ang kadaghanan sa mga batan-on naghunahuna nga ang relihiyon maoy nakapabahin sa kalibotan. Dugang pa, ordinaryo ang pagkakaplag ug mga batan-on nga mibati sama sa gibati sa 15-anyos nga si Judith, nga usa ka Katolikong taga-Espanya. Siya miingon: “Supak ako sa giingon sa iglesya bahin sa moralidad.” Sa susama, ang 20-anyos nga si Joseph, nga taga-Taiwan, nag-isip sa relihiyon nga “gipasikad pag-ayo sa tradisyon.” Apan kon ang kadaghanang batan-on supak sa mga pagtulon-an sa ilang kaugalingong relihiyon, unsay ilang gituohan?

Pagpili ug Relihiyon Sumala sa Gusto

Ang mga batan-on karon kasagarang mopili ug relihiyosong mga tinuohan sama sa pagpili nila ug mga potahe diha sa menu. Gitawag kana sa usa ka magasin nga relihiyosong “pagpili sumala sa gusto.” Usa ka Katolikong magasin nagtawag niana ingong “relihiyosong window-shopping.” Ang mga ideya nga nahimong kinaraan na sa pagkakaron maoy kasagaran. Busa, sa Uropa mga 33 porsiyento sa mga batan-on nagtuo sa mga anting-anting, 40 porsiyento nagtuo nga ang mga mananagna makatag-an sa umaabot, ug 27 porsiyento nagtuo nga ang mga bituon nag-impluwensiya sa mga kinabuhi sa mga tawo. Ang mga ideya sama sa reinkarnasyon sa pagkakaron maoy bahin sa mga tinuohan sa daghang batan-on sa Uropa.

Nagkadaiya ang relihiyosong mga pagtulon-an nga ang mga batan-on makapili ug mga ideya nga mohaom sa ilang mga gusto. Diyutay ra ang nagtuo nga usa lamang ka relihiyon ang nakabaton sa kamatuoran. Sanglit ang mga batan-on mopili sumala sa ilang kabubut-on, ang kalainan tali sa ilang relihiyosong mga tinuohan nag-anam ka hanap. Busa, ang mga sosyologo naghisgot karon bahin sa “nagausbaw nga pagpapha” o “katibuk-ang pagkakankan” sa naestablisar nga mga kredo. Niining maong espirituwal nga palibot, unsay reaksiyon sa naandang mga relihiyon?

Pagpangita sa Relihiyon ug mga Batan-on

Nakaplagan sa mga relihiyon nga usa ka hagit ang pagdani sa mga batan-on. Usa ka Pranses nga pari nangutana sa mga panon nga mitambong sa Catholic World Youth Days nga pista sa Paris: “Diin gikan kining mga batan-ona? Walay batan-on sa akong mga simbahan. Wala gayod nako sila makita.” Sa tinguha niini nga madani ug mahuptan ang pagtagad sa mga batan-on, ang Iglesya Katolika nag-usab sa paagi sa pagpresentar sa mensahe niini ug nag-usab sa hunahuna sa publiko bahin niini.

“Ang iglesya nag-usab sa estilo niini!” mipahayag ang Pranses nga mantalaan nga Le Figaro. Alang sa ika-12ng World Youth Days nga pista sa Paris, ang iglesya naggamit ug mga ahensiya nga mas sinati sa pag-organisar ug mga konsiyertong rock nga maoy modumala sa pasundayag. Kapin sa 300 ka pasundayag ang gipakita aron sa paglingaw sa mga batan-on nga nagduaw gikan sa kapin sa 100 ka nasod, ug ang mga sapot sa inilang tigdisenyo gituyo pagtahi alang sa mga klero.

Kay wala makasabot sa mga batan-on karong adlawa ug mibati sa panginahanglan sa pagpasibo, daghang relihiyon ang nahimong mga tinuohan nga mosagop sa bisan unsa. Nagbanaag niining maong polisa, si Michel Dubost, ang klerigo nga nag-organisar sa World Youth Days nga pista sa Paris, miingon: “Siyempre, buot nakong ang tanang nabunyagan magmatinumanon kang Kristo. Apan bisag wala sila magmatinumanon, dawaton sila sa iglesya.”

Pagpangita sa mga Batan-on ug mga Tubag

Nagpasiugda nga ang pagpangita sa mga batan-on ug mga tubag tinuoray gayod, usa ka mantalaan naghubit sa pagtambong sa mga batan-on sa relihiyosong pista sa Paris ingong “pangaliyupo alang sa pagtuo, inay kay kapahayagan sa pagtuo.” Gitubag ba ang maong pangaliyupo sa Iglesya Katolika?

Kon dili nimo tagdon ang panggawas nga panagway o mosusi sa gitawag sa usa ka Katolikong mantalaan nga “pagmatamata” sa dagkong relihiyosong mga pista, unsay mahibilin? Ang Pranses nga mantalaang Le Monde mikomento bahin sa “kakulang sa tinuod nga kahulogan” sa kailadman.

Bisan tuod hinungdanon ang maanindot nga dagway sa potahe, ang pagkaon kinahanglang sustansiyado. Ang mga pangutana sa mga batan-on bahin sa kahulogan sa kinabuhi nagkinahanglan ug makapasustansiya-sa-espirituwal nga mga tubag. Ang madanihon apan dili makahuloganong mga tubag nga gidalit sa mga batan-on wala magtagbaw kanila.

Sanglit walay praktikal nga kahinungdanon, ang mao bang relihiyosong mga okasyon dunay dumalayong epekto diha sa mga batan-on karong adlawa? Ang Pranses nga sosyologo nga si Danièle Hervieu-Léger miingon: “Kining talagsaong mga okasyon diyutay rag purohan nga makaugmad ug malungtarong mga epekto diha sa katilingban.” Nan, asa makaplagi sa mga batan-on ang makapatagbawng mga tubag sa ilang mga pangutana?

Makapatagbawng mga Tubag

Sa 1997 ang Pranses nga mantalaang Le Point nagpatik ug usa ka artikulo bahin sa mga kalisdanan nga giatubang sa mga batan-on. Dugang pa sa mga pangutana bahin sa kahulogan sa kinabuhi nga kasagarang gipatungha sa kadaghanang batan-on, ang mga batan-on kinahanglan usab nga mosagubang sa krimen ug kapintasan. Posible ba nga mabuntog kini? Ang artikulo sa magasin misaysay: “Sa edad nga 30 anyos, si David misugod sa pagkabalaka sa epekto sa alkoholikong ilimnon, droga, ug kapintasan sa iyang lawas. Ang mga Saksi ni Jehova mituktok sa iyang pultahan uban sa tubag sa iyang mga paglaom nga magmahinlo sa moral. Siya nagtuon. Siya nakabig. Gibayran niya ang iyang mga utang sa sugal ug giulian kadtong tanan nga wala gani masayod nga gitikasan niya sila sa sugal nga poker. Dili na siya manigarilyo, moinom, o makig-away.”

Bahin sa ubang mga batan-on nga nagtuon sa Bibliya uban sa mga Saksi ni Jehova, ang artikulo nagpadayon: “Nakaplagan nila ang tanang tubag sa tanan nilang mga pangutana.” Usa ka batan-ong Saksi yanong mipahayag niana: “Ang Bibliya nagasulti sa kamatuoran sulod na sa duha ka libo ka tuig, busa nganong moadto pa ko sa lain alang sa giya?”

Ang Pulong sa Diyos dunay mensahe alang sa mga batan-on. Ang praktikal nga tambag niini motabang kanila sa pagsagubang sa mga suliran karong adlawa ug maghatag kanila ug lig-ong pasikaranan sa pagtuo sa usa ka umaabot nga pakigdait ug panag-igsoonay. Sa kanunayng nag-usab-usab nga kalibotan, ang paglaom nga gitagana sa Bibliya maoy “angkla alang sa kalag, nga seguro ug lig-on,” nga nagtaganag kalig-on ug kahupayan. (Hebreohanon 6:19) Gatosan ka libong batan-on ang nakakaplag ug tinuod nga kahulogan sa ilang mga kinabuhi pinaagi sa personal nga pagtuon sa Bibliya uban sa mga Saksi ni Jehova. Ilang nakita mismo kon sa unsang paagi ang Bibliya nagpatungha ug mga kausaban nga dili taphaw lamang. Pinaagi sa pagdawat sa mga tubag sa Bibliya, ang mga batan-on nakakaplag nga ang ilang pagpangita sa tinuod nga tinuohan gigantihan.

[Hulagway sa panid 12]

Relihiyosong pista nakadani sa linibong batan-on sa Paris

[Hulagway sa panid 13]

World Youth Days sa Paris—usa ka tinuod nga pagmata sa tinuohan?