Ang Akong Gugma sa Yuta Pagatagbawon sa Walay Kataposan

Sumala sa giasoy ni Dorothy Connelly

Sa gamay pa akong bata, gisultihan ako nga sa impiyerno ako moadto tungod kay usa ako ka Aborigine. Sa milabay ang mga tuig, sa 1936, nakadungog ako ug rekording sa usa ka pakigpulong sa Bibliya nga nagpalong sa kalayo sa impiyerno ug nagpasiga ug paglaom sa akong kasingkasing. Kana nga siga karon mas hayag pa sukad masukad. Sa dili ko pa ipatin-aw kon ngano, paasoya ako bahin sa akong kaugalingon.

NATAWO ako sa mga tuig 1911. Ikaingon ko nga “mga” tungod kay niadtong panahona ang mga Aborigine dili magtagad sa mga petsa ug sa mga sertipiko sa pagkatawo. Ang akong mga ginikanan maoy kugihan, mahinadlokon sa Diyos nga mga tawo. Kami nagpuyo sa gamayng lungsod sa Springsure, duol sa bukiron, matahom nga Carnarvon Range sa sentral Queensland, Australia.

Gimatuto ang akong amahan sa relihiyong Romano Katoliko sa puti nga pamilya. Bisan pa niana, gipasilsil sa akong mga ginikanang Aborigine kanako ang ilang lumad nga mga kostumbre ug gugma sa yuta. Mangayam kami ug mga kangaroo, emu, bao, ug mga bitin ug manakop ug mga isda ug mga batod (dagkong mga ulod sa alibangbang nga makaon). Apan dili gayod ako mokaon ug emu. Sa among pamilya, para nako lang gidili kini tungod kay kini mao ang akong personal nga simbolo. Sumala sa tradisyon sa Aborigine, o “Panahon sa Pagdamgo,” ang matag membro sa tribo adunay iyang kaugalingong simbolo, ug ang pagdili nianang butanga ipatuman sa pamilya ug tribo.

Bisan pag ang pagbaton ug simbolo nagagikan sa patuotuo, ang pagpatuman niini nga pagdili maoy usa ka pahinumdom sa pagkabalaan sa kinabuhi. Ang mga Aborigine dili mangayam alang sa kalingawan. Nahinumdom akong nangurog sa nagsilaob nga kasuko ni Papa sa dihang iya akong nasakpan nga nagputolputol ug buhing mga dulon sa gamay pa akong bata. “Daotan kana!” matod pa niya. “Wala ka ba mahibalo nga ang Diyos nagdumot sa kabangisan? Gusto ka ba nga buhaton kana diha kanimo?”

Daghan kaayo kami ug mga patuotuo. Pananglitan, kon adunay bangkiyod (usa ka gamitoyng langgam) nga magduladula duol sa among kampo, nagpasabot kini ug daotang balita; o kon adunay kuwago nga magbatog sa duol nga tuod panahon sa adlaw, kami nagtuo nga nagpasabot kini nga adunay mamatay. Ang pipila ka damgo gituohan usab ingong mga tilimad-on. Pananglitan, ang lapokong tubig diha sa usa ka damgo nagpasabot nga adunay nagsakit sa pamilya. Apan kon ang tubig nag-agos ug lapok, nan ginaingon nga adunay namatay. Tinuod, mga Katoliko kami, apan kini wala makakuha sa tanan namong mga patuotuo sa tribo.

Gigamit usab sa akong pamilya ang among Aboriginal nga pinulongan. Karon, hinunoa, usa kini sa daghang pinulongan nga hapit nang mawala. Bisan pa niana, gamiton usahay nako kini kon makigsulti sa uban bahin sa Bibliya. Apan, kasagaran Iningles ang akong gamiton o ang lokal nga pidgin.

Bililhong Unang Pagbansay

Sa mga diyes anyos pa ako, ang among pamilya nagpuyo sa usa ka estasyon sa baka, o ranso, nga mga 30 kilometros gikan sa Springsure. Matag adlaw mobaktas ako ug usa ka kilometro o kapin ngadto sa balay sa ranso aron sa pag-atender sa akong mga buluhaton sa balay. Usa ka billy (gamayng balde) sa gatas ug usa ka tinapay mao ang akong suweldo sa tibuok adlaw. Ang among pamilya nagpuyo sa payagpayag nga ginama gikan sa panit sa kahoy, ang naandang mga puy-anan sa mga Aborigine. Kon mag-ulan, mangatulog kami sa duol nga mga langob sa gabii. Gilantaw ba nako kining simpleng kinabuhi ingong kalisod? Wala. Mao na kini ang paagi sa kinabuhi sa mga Aborigine sa daghang siglo, ug among gidawat kini.

Sa pagkatinuod, nalipay ako nga nagdako ako nga dili haruhay ang kinabuhi, ug nga ako adunay mahigugmaong mga ginikanan nga nagadisiplina kanako, nag-awhag kanako sa pagkugi sa pagtrabaho, ug nagtudlo kanako sa pagpangitag pangabuhian gikan sa yuta. Sa 1934, wala magdugay nga mibalhin kami sa usa ka reserbasyon duol sa Woorabinda, Queensland, mibiya ako sa balay sa unang higayon ug miadto sa kasadpan sa pagtrabaho diha sa mga ranso sa baka ug karnero ingong katabang ug sinuholan. Tungod sa trabaho nakabalhin ako sa sidlakan, gawas lamang ug diyutay sa Rockhampton. Didto nako nahibalag ang akong anhing bana, si Martin Connelly, ang anak sa usa ka taga-Irlandia. Nagpakasal kami sa 1939.

Pagkakat-on sa Kamatuoran sa Bibliya

Dako kaayo ako ug pagtahod sa Bibliya. Sa bata pa ako, kaming mga bata tigomong tanan sa asawa sa tag-iya sa bakahan​—Aboriginal ug puti​—ug estoryahan kami ug mga sugilanon bahin kang Jesus. Kas-a, iyang gisaysay ang kahulogan sa pulong ni Jesus: ‘Ayaw pagdid-i ang gagmayng kabataan sa pagduol kanako.’ (Mateo 19:​14, King James Version) Sa unang higayon sukad nga gisultihan ako nga hinukman na ako sa impiyerno, ako nakakita ug tipik nga paglaom alang kanako.

Sa ulahi nakapamati ako ug girekord nga pakigpulong, nga gihisgotan sa sinugdan, bahin sa impiyerno nga dili init. Bisan pag nakapasugod kana kanako sa paghunahuna, wala na akoy nahibalag pang mga Saksi ni Jehova hangtod sa 1949. Nagpuyo kami niadtong higayona sa Emerald, mga 250 kilometros kasadpan sa Rockhampton. Ang among bisita, si R. Bennett Brickell,a naghisgot kanamo bahin sa Bibliya. Human niadto, ang among balay nahimong balay ni Ben matag panahong moabot siya sa among lugar. Kaming tanan, lakip kang Martin ug sa among upat ka anak, dako kaayo ug pagtahod kaniya. Walay interes si Martin sa mensahe sa Bibliya, hinuon sa tanang panahon maayo kaayo siya ug maabiabihon sa mga Saksi ug ilabina kang Ben.

Gihatagan ako ni Ben ug daghang giya sa pagtuon sa Bibliya, apan dihay usa ka dakong problema​—dili ako makabasa. Busa, mapailobong basahon ni Ben ang Bibliya ug binase-sa-Bibliya nga literatura ngadto sa kabataan ug kanako, magpatin-aw samtang siya nagabasa. Pagkadako kaayo niya ug kalainan gikan sa klero kinsa, human matapos ang relihiyosong mga seremonya, dili gayod mogahin bisan singko minutos sa pagtudlo kanamo kon unsaon pagbasa! Gipakita ni Ben kanamo gikan sa Bibliya nga si Satanas ug ang iyang mga demonyo mao ang mga awtor sa daghang patuotuo nga migapos sa katawhan, lakip sa akong kaugalingong katawhan. Pagkadako sa akong apresasyon sa mga pulong ni Jesus: “Ang kamatuoran magpagawas kaninyo”!​—Juan 8:32.

Nalipay kaayo ko sa pagkahibalo sa katuyoan sa Diyos nga makabaton ug yutan-ong paraiso kadtong magmasinugtanon kaniya. Labaw sa tanan, nangandoy ako sa pagkabanhaw sa mga patay; si Mama namatay sa 1939, ug si Papa sa 1951. Kanunay akong nagpaabot sa adlaw sa dihang makagakos ako kanila ug sa pagsugat kanila ug balik sa yuta nga ilang gimahal pag-ayo. Ug pagkadakong kalipay ang pagtudlo unya kanila bahin kang Jehova nga Diyos ug sa iyang Gingharian!

Usa ka Iliteret nga Magsasangyaw

Sa dihang midako ang akong kahibalo sa Bibliya, buot ko kining ipakig-ambit. Nakigsulti ako uban sa mga paryente ug mga higala, apan buot kong magpauswag sa akong pag-alagad. Busa sa dihang miabot sunod si Ben sa Emerald, giagda dayon nako ang mga bata, ug kaming tanan miuban kaniya sa pagsangyaw. Iyang gipasundayag ang simpleng mga presentasyon ug gitudloan ako sa pagsalig kang Jehova pinaagi sa pag-ampo. Ang akong presentasyon, admitihon ko, dili kaayo maayo, apan gikan gayod kadto sa akong kasingkasing.

Una, akong gisultihan ang tagbalay nga dili ako makabasa; ug ikaduha, dapiton nako sila sa pagbasa sa mga teksto sa Bibliya nga akong itudlo kanila. Akong gisag-ulo kining mga tekstoha. Makakita ako ug nangakurat nga mga panagway niining lungsod nga naglabi ang mga puti, apan talagsa ra nga magpakitag pagkawalay-batasan ang mga tawo. Sa kadugayan, nakakat-on ako sa pagbasa. Pagkadako ang natabang niini sa akong pagsalig ug sa akong espirituwalidad!

Ang Akong Unang Kombensiyon

Sa Marso 1951, sanglit nakapahinungod na sa akong kinabuhi kang Jehova, midangat ako sa sunod nga duha ka hinungdanong yugto sa akong kinabuhi: bawtismo sa tubig ug ang akong unang kombensiyon sa mga Saksi ni Jehova. Apan nagpasabot kana sa pagbiyahe ngadto sa dakong siyudad sa Sydney​—makahahadlok gayod nga hunahunaon alang sa usa ka dalaga nga taga-baryo. Labaw sa tanan, wala akoy kuwarta alang sa plete sa tren. Busa, unsay akong himoon?

Mihukom ako sa pagpanugal aron makakuwarta alang sa akong plete. ‘Himoon ko kini alang kang Jehova,’ nangatarongan ako, ‘busa seguradong tabangan niya akong makadaog.’ Sa kataposan sa pipila ka round sa baraha, akong gibati nga iya akong gitabangan, kay nakabaton ako ug igong salapi nga ikabayad sa idabuwelta nga plete.

Si Ben nahibalo sa akong mga plano sa pag-adto sa Sydney, busa sa sunod nga higayon nga siya miduaw, iya akong gipangutana kon duna ba akoy igong kuwarta. “Aw, oo!” ako mitubag. “Duna na akoy ikaplete sa tren pinaagi sa pagpanugal alang niana.” Buweno, namula siya samag tamates, ug nahibalo dayon ako nga may nasulti ako nga sayop. Busa agig dihadiha nga pagdepensa, ako midugang: “Unsay nahitabo nimo? Wala nako kana kawata!”

Sa dihang naulian si Ben, malulotong gipatin-aw niya kon nganong ang mga Kristohanon dili manugal ug midugang, nga mapasaligon: “Apan dili nimo kana sayop. Wala ako makasulti kanimo.”

Gipabati nga Gidawat

Kadtong upat ka adlawng kombensiyon, Marso 22-25, 1951, mao ang akong unang pagkakitag hilabihan kaayo ka daghang mga Saksi. Sanglit si Ben lamang ang akong nailhan ug sa pipila pang uban, wala ako makaseguro sa ilang pagresebi kanako. Busa inyong mahanduraw ang akong dakong kalipay nga ako mainitong gidawat sa akong umaabot nga espirituwal nga mga igsoong lalaki ug babaye, kinsa wala gayod magpakita kanako bisag gamay lang nga pagpihig. Haruhay ug relaks gayod ang akong panimati.

Kadtong kombensiyona klaro pa kaayo sa akong panumdoman, ilabina tungod kay usa ako sa 160 nga gibawtismohan sa Botany Bay. Dayag, usa ako sa unang Australianong mga Aborigine nga nahimong usa sa mga Saksi ni Jehova. Ang akong hulagway migula diha sa mantalaan sa Dominggo ug usab sa balita sa sine nga gipasundayag diha sa mga sinehan.

Ang Bugtong Saksi sa Lungsod

Usa ka bulan human nga mipauli ako gikan sa Sydney, ang among pamilya mibalhin sa Mount Isa, usa ka minahan nga lungsod sa amihanan-kasadpan sa Queensland. Sulod sa unom ka bulan kami nagpuyo sa kamalig ingong piyado sa dakong parsela nga yuta nga gawas lamang ug diyutay sa lungsod. Among gitukod ang bungbong sa among kamalig gikan sa kahoy nga among gipamutol sa duol nga kakahoyan. Naghimo kami ug atop gikan sa daang mga baril sa aspalto nga among gisilsil sa kilid ug gituy-od. Nadawat sa trabaho si Martin sa kompaniya sa tren, apan nadaot ang iyang panglawas tungod sa iyang sobrang pag-inom. Dayon, ako na lamang ang nanginabuhi alang sa among pamilya. Siya namatay sa 1971.

Sa sinugdan, ako lamang ang Saksi sa Mount Isa. Si Ben moduaw matag unom ka bulan o kapin pa, sanglit ang Mount Isa maoy bahin sa iyang dako kaayong teritoryo sa pagsangyaw. Kon maatol nga anaa siya sa lungsod panahon sa Memoryal sa kamatayon ni Jesu-Kristo​—usa ka espesyal kaayong okasyon alang kang Ben, sanglit ang iyang paglaom maoy sa langitnong kinabuhi​—saulogon niya kini uban sa among pamilya, usahay sa gawas ilalom sa usa ka kahoy.

Kasagaran dili magdugay si Ben, busa ang kabataan ug ako magsangyaw nga kamikami ra. Tinuod, kamikami lamang; apan gihatagan kami ug gahom sa espiritu ni Jehova, ug maingon man sa iyang mahigugmaong organisasyon. Gisagubang sa matinumanong nagapanawng mga magtatan-aw ug sa ilang mga asawa ang naglagiting nga kainit, mga langaw, abog, ug libaongon kaayong mga dalan aron sa pag-adto sa Mount Isa sa pagdasig kanamo, bisan tuod sa daghang tuig ang among grupo gamay kaayo. Lain pa, ang mga Saksi gikan sa bag-ong natukod nga kasikbit nga kongregasyon sa Darwin, nga kapin sa 1,200 ka kilometros ang gilay-on, moduaw panagsa.

Usa ka Kongregasyon Natukod

Sa Disyembre 1953 usa ka kongregasyon ang natukod sa Mount Isa. Si Ben ang natudlo nga magtatan-aw, ug ang akong anak nga babayeng si Ann ug ako mao lamang ang uban niadto nga nakigbahin sa ministeryo. Apan sa ngadtongadto mibalhin ang ubang mga Saksi sa lungsod. Ang among teritoryo usab nagsugod sa pagpamunga ug nagtubong ani sa mga tinun-an, lakip, sa ulahi, sa pipila ka mga tawong Aborigine.

Ang kongregasyon nagpadayon sa pagtubo, ug sa ulahi nadayag nga nagkinahanglan kami ug usa ka Kingdom Hall nga pagahimoan sa among mga tigom. Sa Mayo 1960, human sa daghang kuging pagtrabaho, natapos namo ang pagtukod sa among kaugalingong bag-ong tigomanan. Sulod sa sunod nga 15 ka tuig, duha ka beses kining gipadak-an. Apan sa tungatunga sa katuigang 1970, kami dihay 120 nga nakigbahin sa ministeryo sa publiko, ug ang tigomanan gamay na usab kaayo. Busa usa ka maanindot, makapalingkod-ug-250 nga Kingdom Hall ang gitukod, ug kini gipahinungod sa 1981. Tungod kay dako kini nga lugar, ang tinukod gigamit usab alang sa dagkong mga panagkatigom nga gitawag ug sirkitong mga asembliya.

Pag-uswag Taliwala sa mga Aborigine

Makapalipay kaayo kanako mao ang pagkatukod sa 1996 sa usa ka Aboriginal ug Islahanon nga grupo nga nakig-uban sa Kongregasyon sa Mount Isa. Ang mga Islahanon maoy mga Aborigine nga nagagikan sa mga isla duol sa pangunang yuta sa Australia. Ang pangunang tumong niining grupoha mao ang paghatag ug mas maayong pagpamatuod ngadto sa mga Aborigine, diin ang pipila dili kaayo relaks uban sa mga tawong puti.

Nagkatag libot sa Australia maoy duolan sa 20 pang ubang ingon niining mga grupoha sa mga Aborigine. Dugang pa, ang mga kongregasyon sa mga tawong Aborigine natukod sa Adelaide, Cairns, Ipswich, Perth, ug Townsville. Duolan sa 500 ka tawo​—lakip sa pipila sa akong kaugalingong pamilya​—nagatambongan niining mga grupoha ug mga kongregasyon. Halos 10 porsiyento sa mga magmamantalang Aborigine maoy mga payunir, o bug-os panahong mga ministro!

Nahimong diabetiko ako niadtong 1975, ug sa pagdagan sa mga tuig kining sakita, nga mitakboy diha sa daghan kaayong Aborigine, nakahatag ug dakong kapildihan sa panglawas ug kinabuhi. Ang pagbasa dugang nga nagakalisod. Bisan pa niana, si Jehova nagpadayon sa paglig-on kanako ug naghatag kanakog kalipay.

Mapasalamaton ako sa maisogong mga ministro nga nakaalagad kanako ug sa akong pamilya. Ang ilang malig-ong kadasig, ang ilang gugma, ug ang espirituwal nga mga bahandi nga ilang gidala diha sa mga bisikleta samtang ilang gitadlas ang abogon, mingawng mga dalan ug mga dalandalan sa kamingawan sa Queensland nagpaposible sa among pagkakat-on sa kamatuoran sa Bibliya. Karon ako masaligong naghulat sa panahon sa dihang ang akong gugma sa yuta pagatagbawon sa walay kataposan.

[Footnote]

[Mapa/Hulagway sa panid 15]

(Alang sa aktuwal nga pagkahan-ay, tan-awa ang publikasyon)

Perth

Darwin

Cairns

Townsville

Mount Isa

Rockhampton

Emerald

Springsure

Woorabinda

Ipswich

Sydney

Adelaide

Si Dorothy karon

[Hulagway sa panid 13]

Sesyon sa pagbansaybansay uban kang Ben sa tungatunga sa katuigang 1950