Gikan sa Among mga Magbabasa

Kataposan sa Kakabos Salamat kaayo sa Hunyo 8, 1998, nga serye sa Pagmata! nga “Haduol na ang Kataposan sa Kakabos.” Gilantaw gayod niini ang mga butang sa hustong paagi ug nagpaamgo kanako sa ako mismong bagulbolang tinamdan. Wala akoy trabaho ug may diyutayng sobrang salapi. Gihunahuna ko nga ako anaa sa kakabos. Dili gayod! Gipakita niini nga artikulo nga adunay uban nga anaa sa mas lisod pa nga mga kahimtang kay kanako. Angay na akong magpasalamat sa kon unsa nay akong nabatonan—pagkaon, sapot, maayong panglawas ug, labing hinungdanon, si Jehova. Gilantaw ko gayod sa unahan ang kataposan sa kakabos. Ang akong determinasyon mao ang padayong pagpangita sa Gingharian ni Jehova ug sa paghunong sa pagbagulbol.

C. W., New Zealand

Selibasiya Sulod sa pipila ka tuig ako magbabasa na sa inyong mga magasin. Moprotesta ako sa inyong mapihigong pagtaho bahin sa mga doktrina sa Iglesya Katolika diha sa artikulong “Ang Hunahuna sa Bibliya: Ang Selibasiya Kinahanglanon ba Alang sa Kristohanong mga Ministro?” (Hunyo 8, 1998) Walay “gipatuman nga selibasiya” sa Iglesya Katolika! Aduna lamay kinabubut-on nga gipiling selibasiya nga maoy usa ka kinahanglanon alang sa tinong propesyon. Si bisan kinsa nga moingon nga siya gipugos ngadto sa selibasiya namakak.

R. G., Alemanya

Kami nagtuo nga adunay hinungdanong pagkalahi tali sa praseng gipatuman nga selibasiya ug ang ideya nga ang mga tawo gipugos ngadto sa selibasiya. Pananglitan, kon ang usa ka korporasyon naghimog kalagdaan sa pamesti ug modawat lamang niadtong kinsa mouyon sa pagsunod niana apan papahawaon kadtong kinsa molapas niana, nan ikaingon nga ang korporasyon adunay “gipatuman” nga kalagdaan sa pamesti. Sa susamang diwa, makataronganon ang pag-ingon nga adunay “gipatuman nga selibasiya” diha sa Katolikong pagkapari. Hinunoa, ang among artikulo sa panguna nagpunting sa kawalay-Kasulatanhong pasikaranan sa paghimo sa selibasiya nga usa ka kinahanglanon alang sa Kristohanong mga ministro. (1 Timoteo 3:2) Inay kay sawayon kadtong kinsa mipili sa pagpabiling dili minyo ingong usa ka dalan sa kinabuhi, ang artikulo nag-ingon nga kini “napamatud-ang usa ka magantihon ug makatagbaw sa espirituwal nga dalan sa kinabuhi alang sa pipila.”—ED.

Ang Akong Pagpili Tali sa Duha ka Amahan Nakat-onan nako ang kamatuoran sa Pulong sa Diyos gikan sa usa ka higala sa eskuylahan sa dihang ako 14 anyos. Ang akong mga ginikanan, ilabina ang akong amahan, misupak sa akong pagtuon. Maayo na lang, wala gayod niya tinud-a ang iyang hulga sa pagpalayas kanako sa balay. Milahutay ako ug nabawtismohan lima ka tuig ang milabay. Sama sa igsoong lalaki sa artikulo (Hunyo 8, 1998), naglaom ako nga usa ka adlaw ang akong mga ginikanan moambit sa akong paglaom sa pagpuyo sa matarong bag-ong kalibotan ni Jehova.

W. S. L., Brazil

Milugmaw ang mga luha sa akong mga mata sa dihang akong nabasa ang artikulo. Ang akong amahan maoy usa ka determinadong magsusupak sa akong tinuohan. Bisan tuod makaestoryahanay kami sa usag usa usahay, sa dihang mahisgotan ang ulohang Bibliya o mga Saksi ni Jehova, nahadlok ako nga mosilaob ang iyang kasuko. Makadaghang higayon nga gidagmalan niya ako sa pisikal. Apan ang artikulo naghatag kanakog mainitong pagdasig sa pagbarog nga malig-on, bisan atubangan sa maong pagpit-os.

I. H., Alemanya

Ang artikulo nakatandog ug lalom kanako. Sanglit ako nagdako sa usa ka pamilya nga nabahin sa relihiyon, akong masabtan ang emosyonal nga pag-antos sa batan-ong lalaki nga gipugos sa pagbuhat nianang usa ka malisod nga pagpili.

A. M., Italya

“Fibromyalgia” Salamat kaayo sa artikulong “Pagsabot ug Pag-antos sa ‘Fibromyalgia.’” (Hunyo 8, 1998) Nag-antos ako gumikan sa fibromyalgia sulod na sa unom ka tuig. Ang artikulo maoy mabug-oson ug tukma. Usab, ang kasulatan diha sa kahon midasig kanako ug dako.

N. M., Tinipong Bansa

Ang artikulo nakaaghat ug hilabihang pagsanong. Naglaom kami sa pagpatik ug dugang mga komento sa umaabot nga gula.—ED.