Pagpanamilit sa Gubat
ANG mga tawo bisan asa dugay nang nangandoy sa usa ka kalibotan nga walay gubat. Kini usa ka damgo nga wala gayod matuman. Sumala sa atong nasabtan sa miaging artikulo, daghan ang nagtuo nga ang tibuok-yutang pakigdait moabot lamang pinaagi sa tibuok-kalibotang kagamhanan, usa ka kagamhanan nga sa walay-pagpihig maghawas sa tanang katawhan sa yuta. Apan, kadaghanan nakaamgo nga ang tawhanong mga magmamando dili gayod kinabubut-ong mosurender sa ilang pagkasoberano ngadto sa usa ka kagamhanan nga maghawas sa tanan dinhi sa yuta. Nagpasabot ba kini nga imposible ang tibuok-kalibotang kagamhanan?
Morag ingon niana. Apan, ang tagna sa Bibliya nagpakita nga ang usa ka kagamhanan nga magmando sa tibuok yuta sa dili madugay magpahinabog pakigdait sa yuta. Kini dili mahitabo tungod sa pagsabotsabot sa tawo o pinaagi sa internasyonal nga mga kasabotan. Ang manalagnang si Daniel gidasig sa pagsulat: “Ang Diyos sa langit magatukod ug usa ka gingharian nga dili gayod malumpag.”—Daniel 2:44.
Mao gihapon kini nga Gingharian ang giingon ni Jesus sa iyang mga sumusunod nga iampo diha sa pag-ampo nga nahibaloan sa minilyon ingong Pag-ampo sa Ginoo, o ang Amahan Namo. Lagmit sinati ka nianang maong pag-ampo, nga makaplagan diha sa Bibliya sa Mateo 6:9, 10. Ang bahin niana naghangyo ug ingon niini sa Diyos: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” Ang Diyos magtubag nianang maong pag-ampo. Sa dili madugay kanang maong Gingharian ‘moanhi’ aron sa pagtuman sa kabubut-on sa Diyos alang sa yuta. Ang kabubut-on sa Diyos naglakip sa paghimo sa yuta nga usa ka paraiso sa pakigdait.
Usa ka Realistikanhong Panan-awon sa Tibuok-Yutang Pakigdait
Duna bay bisan unsang katarongan sa pagtuo nga ang Gingharian sa Diyos mas molampos kay sa tawhanong mga kagamhanan? Tagda ang walo ka puntos bahin sa Gingharian sa Diyos nga magseguro sa dumalayong pakigdait alang sa tanan diha sa dominyo niini.
1. Ang tinudlo-sa-Diyos nga lider niining maong Gingharian mao ang hinimayang Jesu-Kristo, ang “Prinsipe sa Pakigdait.” (Isaias 9:6) Samtang dinhi sa yuta, gipakita ni Jesus nga ang iyang mga alagad wala magbaton ug hinagiban alang sa pisikal nga pakiggubat. Siya miingon kang Pedro: “Ibalik ang imong espada sa nahimutangan niini, kay ang tanang mogamit sa espada mamatay pinaagi sa espada.”—Mateo 26:52.
2. Ang Gingharian sa pagkatinuod mahimong usa ka tibuok-kalibotang kagamhanan. Bahin sa awtoridad nga gihatag kang Jesus, si Daniel nagtagna: “Kaniya dihay gihatag nga pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.”—Daniel 7:14.
3. Ang Gingharian maghawas sa tanang mga katawhan. Si Jesus dunay kaubang mga magmamando nga “gikan sa matag tribo ug dila ug katawhan ug nasod,” ug sila “magamando ingong mga hari ibabaw sa yuta.”—Pinadayag 5:9, 10.
4. Ang Gingharian sa Diyos magtapos sa tanang tawhanong mga kagamhanan, nga nagsupak sa awtoridad niini. “Ang gingharian . . . magadugmok ug magatapos niining tanang [tawhanong] gingharian, ug kini mobarog hangtod sa panahong walay tino.”—Daniel 2:44.
5. Ang mga tawo sa yuta pagamandoan sa internasyonal nga balaod. Si Isaias nagtagna bahin nianang panahona, nga nag-ingon: “Gikan sa Zion ang balaod mogula, ug ang pulong ni Jehova gikan sa Jerusalem. Ug siya magahukom gayod taliwala sa mga nasod ug magatul-id sa mga butang labot sa daghang mga katawhan.”—Isaias 2:3, 4.
6. Ang mga sakop sa Gingharian makakat-on sa mga dalan sa pakigdait. Si Isaias nagpadayon: “Ug ilang pagasalsalon ang ilang mga espada ingong mga punta sa daro ug ang ilang mga bangkaw ingong mga galab. Ang nasod dili na mobakyaw sa espada batok sa laing nasod, ni sila makakat-on pa sa gubat.”—Isaias 2:4.
7. Ang mga mahigugmaon sa kapintasan pagapaphaon. “Ginausisa ni Jehova ang matarong ingon man ang daotan, ug si bisan kinsa nga nahigugma sa kapintasan ginadumtan gayod sa Iyang kalag. Siya magapaulan sa mga daotan ug mga bitik, kalayo ug asupre ug usa ka makapagba nga hangin, ingong bahin sa ilang kopa.”—Salmo 11:5, 6.
8. Pagawagtangon ang mga hinagiban. “Umari kamo, tan-awa ang mga kalihokan ni Jehova, kon giunsa niya paghimo ug makapahinganghang mga hitabo sa ibabaw sa yuta. Iyang gipahunong ang mga gubat hangtod sa kinatumyan sa yuta. Iyang gibali ang busogan ug giputolputol ang bangkaw; iyang gipangsunog sa kalayo ang mga karomata.”—Salmo 46:8, 9.
Pagtuo sa mga Saad sa Diyos —Ngano ug sa Unsang Paagi?
Ang Bibliya naghatag ug daghan pang detalye bahin sa Gingharian sa Diyos. Pananglitan, kini nagpakita kon kinsay moduyog kang Jesu-Kristo sa pagdumala sa mga kalihokan sa yuta. Kini nagtug-an pa kanato kon sa unsang paagi sila gipili ug kon unsang mga kuwalipikasyon ang kinahanglan nilang kab-oton. Ang Bibliya nagtug-an usab kon sa unsang paagi ang Gingharian magdumala sa mga kahinguhaan sa yuta aron sa pagpalambo sa kauswagan ug kalipay taliwala sa tanang katawhan sa yuta, nga magwagtang sa kasina ug kadalo nga subsob nga motultol sa panagbangi.
Ang mao bang mga tagna angayng tuohan? Si Jehova mismo nag-ingon: “Ang akong pulong nga mogula gikan sa akong baba . . . dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.” (Isaias 55:11) Kining maong pahayag labaw pa kay sa pasalig nga ang Diyos magtuman sa iyang mga saad. Si Jehova mao ang Labing Gamhanan, busa siya dunay gahom sa pagpatungha ug tibuok-yutang pakigdait. Walay molabaw sa iyang pagsabot; busa, duna siyay kaalam sa pagmentinar ug pakigdait. (Isaias 40:13, 14) Dugang pa, si Jehova mao gayod ang personipikasyon sa gugma, busa walay lain sa uniberso nga dunay mas dakong tinguha sa pagpahinabo ug tibuok-kalibotang pakigdait.—1 Juan 4:8.
Siyempre, nagkinahanglag pagtuo aron motuo sa mga saad sa Diyos. Ang pagtuo gipasukad sa kahibalo ug giugmad pinaagi sa pagtuon sa Pulong sa Diyos, ang Bibliya. (Filipos 1:9, 10) Samtang makakat-on kita bahin sa personalidad ug mga katuyoan sa Diyos, ang katinuoran sa Gingharian sa Diyos mahimong dayag. Oo, ang gubat pagawagtangon, dili pinaagi sa mga paningkamot sa mga tawo, kondili pinaagi sa mahimayaong tibuok-kalibotang kagamhanan nga gipaluyohan sa Diyos, ang Gingharian sa Diyos.
[Mga hulagway sa panid 8, 9]
Ilalom sa Gingharian sa Diyos, ang mga sakop makakat-on sa pakigdait, ug ang mga hinagiban pagapaphaon