Pagpangidnap—Aduna Bay Solusyon?

ANG mga pagpangidnap nakaabot sa punto nga dili na maantos sa tibuok nasod, ug ang tibuok nga katilingban kinahanglang makig-away batok niining maong daotan,” mipatugbaw ang primer ministro sa Chechnya sa dihang nagsaad nga wagtangon ang hampak sa iyang republika sa Rusya nga naapektahan sa pagpangidnap.

Wagtangon ang mga pagpangidnap? Dalayegon ang tumong, apan ang pangutana mao, Sa unsang paagi?

Mga Paningkamot nga Ginahimo

Ang mga awtoridad sa Colombia nagtudlo ug 2,000 ka sekreta, 24 ka piskal, ug bisan usa ka linaing batok-pagkidnap nga koordinetor aron lamang masumpo ang mga pagpangidnap. Sa Rio de Janeiro, Brazil, usa ka publikong pagmartsa nga nagprotesta sa daghang pagpangidnap sa siyudad giapilan ug mga 100,000 ka magmamartsa. Sa Brazil ug Colombia, ang paramilitaryong mga grupo mibalos pag-atake pinaagi sa pagkidnap sa mga paryente sa mga kidnaper. Ug ang ubang mga Pilipino migamit sa vigilante nga hustisya—ilang gipamatay ang mga kidnaper!

Ang mga awtoridad sa Guatemala nagpahamtang sa silot nga kamatayon alang sa mga kidnaper, ug ang presidente nagpalihok sa kasundalohan aron sa pagpahunong sa epidemya sa pagpangidnap. Sa Italya ang kagamhanan migamit ug kusganong mga lakang sa pagpugong sa mga pagpangidnap, pinaagi sa paghimong ilegal sa mga pagbayad sa lukat ug pagkuha sa kuwarta ug propiedad aron masanta ang mga paryente sa pagbayad. Ang Italyanong mga opisyales nagpasigarbo nga kining mga lakanga nakaamot sa pag-us-os sa mga pagpangidnap. Ugaling, ang mga kritiko nag-ingon nga tungod niini, ang mga pamilya naningkamot sa pagsulbad sa mga kaso sa tago ug nga kini nagpakunhod sa opisyal nga gidaghanon sa mga pagpangidnap. Ang mga eksperto sa pribadong seguridad nagbanabana nga ang gidaghanon sa mga pagpangidnap sa Italya sa pagkatinuod midoble sukad sa katuigan sa 1980.

Daghang Sugyot—Diyutayng Solusyon

Alang sa daghang pamilya sa mga biktima sa pagkidnap, usa lamang ka solusyon ang daw may purohang molampos—ang pagbayad ug lukat alang sa ilang mga hinigugma dihadiha dayon kon posible. Apan ang mga eksperto nagpasidaan nga kon taas ang lukat ug nabayran ra dayon, ang mga kidnaper basin mag-isip sa pamilya nga sayon nga biktimahon ug mobalik sa ikaduhang higayon. O basin mangayo silag ikaduhang lukat una buhian ang biktima.

Ang ubang pamilya nakabayad ug dagkong lukat apan nakaplagan nga ang biktima patay na diay. Busa ang mga eksperto nag-ingong ang usa dili gayod angayng mobayad ug lukat o makignegosasyon sa dili pa makuha ang pamatuod nga buhi ang biktima. Ang pamatuod mahimong pinaagi sa tubag sa usa ka pangutana nga ang biktima lamang ang makatubag. Ang ubang pamilya mangayog hulagway sa biktima nga naggunit sa usa ka bag-ong mantalaan.

Komosta ang bahin sa mga panlimbasog sa pagluwas? Kini sagad nga naglangkit ug dakong kapeligrohan. “Setentay-nuwebe porsiyento sa tanang binihag ang namatay panahon sa mga paningkamot sa pagluwas didto sa Latin Amerika,” matod ni Brian Jenkins, usa ka eksperto sa mga kaso sa pagpangidnap. Apan, usahay ang mga paningkamot sa pagluwas malamposon.

Dili ikatingala, daghang solusyon ang nagsentro sa pagtagad diha sa pagsanta sa pangidnap. Dili lamang mga awtoridad sa kagamhanan ang nalangkit sa mga paningkamot sa pagsanta sa mga pagpangidnap. Ang mga mantalaan nagtudlo sa mga tawo kon unsaon paglikay nga makidnap, kon unsaon pag-ambak gikan sa nagdagan nga sakyanan, ug kon unsaon paglupig sa mga kidnaper sa pangisip. Ang mga sentro sa martial arts nagtanyag ug mga kurso bahin sa pagdepensa batok sa pagpangidnap. Ang mga kompaniya namaligyag gigming kaayong mga transmitter nga nagbilig $15,000, nga puwedeng ibutang diha sa mga ngipon sa mga bata aron makatabang sa mga polis sa pagpangita sa mga bata kon sila kidnapon. Alang niadtong makaarang sa pagpalit niana, ang mga tiggamag sakyanan naghimog “dili-makidnap” nga mga sakyanan nga may bugahanan ug tear gas, gagmayng mga bentana para sa pusil, mga bentana nga dili madutlag bala, dili malaslas nga mga ligid, ug mga bugahanan ug lasaw nga aseite.

Ang pipila ka adunahan nag-isip sa mga badigard ingong solusyon. Ugaling, kon mahitungod sa kahimtang sa Mexico, ang eksperto sa seguridad nga si Francisco Gomez Lerma nag-ingon: ‘Ang mga badigard dili mapuslanon tungod kay sila makadanig atensiyon ug basin kakunsabo sa mga kidnaper.’

Ang suliran sa pagpangidnap komplikado kaayo ug ang mga gamot niini lalom kaayo nga ang maarangang himoon sa mga tawo aron sa pagwagtang niini mopatim-awng kulang. Nan, wala bay tinuod nga solusyon?

Usa ka Solusyon nga Mabatonan

Kining magasina balikbalik nga nagpunting sa bugtong tinuod nga solusyon sa tanang suliran nga giatubang sa mga tawo. Kana nga solusyon mao ang usa nga gipunting sa Anak sa Diyos, si Jesu-Kristo, sa dihang iyang gitudloan ang iyang mga sumusunod sa pag-ampo: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.”—Mateo 6:10.

Tin-aw, kita nanginahanglan ug matarong nga kagamhanan sa kalibotan aron sa pagdumala sa mga kalihokan sa nagkadaiya kaayong mga tawo sa yuta—oo, ang Gingharian sa Diyos nga gihisgotan ni Jesus. Sanglit ang mga tawo wala makatukod ug ingon niana nga kagamhanan, kita maalamong molantaw ngadto sa atong Maglalalang, si Jehova nga Diyos. Ang iyang Pulong, ang Bibliya, nag-ingon nga siya nagtuyo sa pagbuhat niining butanga mismo.—Salmo 83:18.

Si manalagnang Daniel nagrekord sa katuyoan ni Jehova, nga nagsulat: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. . . . Kini magadugmok ug magatapos niining tanang gingharian, ug kini mobarog hangtod sa panahong walay tino.” (Daniel 2:44) Ang Bibliya naghubit kon sa unsang paagi kining kagamhanan sa Diyos maghimog mauswagong mga lakang sa pagwagtang sa tanang kriminal nga kalihokan, lakip sa pagpangidnap.

Hustong Edukasyon Hinungdanon

Walay duhaduha ikaw mouyon nga ang pagsilsil ug maayong hugpong sa mga sukdanan diha sa mga tawo hinungdanon aron sa pagsulbad sa suliran sa pagpangidnap. Tagda, pananglitan, ang epekto diha sa tawhanong katilingban kon ang tanan mamati niining tambaga sa Bibliya: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa mga butang nga anaa karon.” (Hebreohanon 13:5) “Ayaw kamo pagpakautangan kang bisan kinsa ug usa ka butang, gawas sa paghigugma sa usag usa.”—Roma 13:8.

Ikaw makakuhag ideya kon mahisama sa unsa unya ang kinabuhi pinaagi sa paghatag ug pagtagad sa edukasyonal nga programa nga ginahimo sa mga Saksi ni Jehova diha sa kapin sa 230 ka nasod sa tibuok yuta. Kining programaha adunay maayong epekto sa daghang tawo nga kanhi dalo o peligrosong mga kriminal. Usa ka kanhing kidnaper miingon: “Sa ngadtongadto, akong naamgohan nga aron mapahimut-an ang Diyos kinahanglang akong hukason ang akong daang personalidad ug isul-ob ang bag-o—usa nga maaghop ug kaamgid nianang iyaha ni Kristo Jesus.”

Ugaling, bisan ang usa ka maayong edukasyonal nga programa dili magausab sa tanang kriminal, tingali dili bisan sa kadaghanan. Unsay mahitabo niadtong modumili sa pagbag-o?

Pagwagtang sa mga Mamumuhat ug Daotan

Ang mga tawong motuyo sa pagbuhat ug daotan dili tugotan nga mahimong mga sakop sa Gingharian sa Diyos. Ang Bibliya nag-ingon: “Wala ba kamo mahibalo nga ang mga tawong dili-matarong dili makapanunod sa gingharian sa Diyos? Ayaw pagpahisalaag. Walay mga makihilawason, . . . ni mga tawong dalo, . . . ni mga mangingilkil nga makapanunod sa gingharian sa Diyos.” (1 Corinto 6:9, 10) “Ang mga matul-id mao ang magapuyo sa yuta . . . Kon mahitungod sa mga daotan, sila pagaputlon gikan sa yuta.”—Proverbio 2:21, 22.

Sumala sa Balaod sa Diyos sa karaang kapanahonan, ang di-mahinulsolong kidnaper pagapatyon. (Deuteronomio 24:7) Ang dalo nga mga tawo, sama sa mga kidnaper, walay gayoy luna diha sa Gingharian sa Diyos. Ang mga kriminal karon mahimong makaikyas sa tawhanong hustisya, apan dili sila makaikyas sa hustisya sa Diyos. Si bisan kinsang mamumuhat ug daotan kinahanglang mag-usab sa ilang mga dalan aron sila makapuyo ubos sa matarong nga pagmando sa Gingharian ni Jehova.

Dayag, kon magpabilin ang mga kahimtang nga nagpalambo sa kriminal nga kalihokan, magpabilin usab ang krimen. Apan, ang Gingharian sa Diyos dili magtugot niana, tungod kay ang Bibliya nagsaad: “Ang gingharian mismo . . . magadugmok ug magatapos niining tanang gingharian,” lakip sa tanang tawo nga nagbuhat ug daotan. Kini nga tagna sa Bibliya nagpadayon pinaagi sa pag-ingon nga ang Gingharian sa Diyos magabarog hangtod sa panahong walay tino. (Daniel 2:44) Handurawa lamang ang mga kausaban nga mahitabo unya!

Usa ka Bag-ong Kalibotan sa Pagkamatarong

Tagda ang laing tagna sa Bibliya. Kini nindot nga naghubit sa umaabot pinaagi niining mga pulonga: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. Kay ang mga adlaw sa akong katawhan mahisama sa mga adlaw sa usa ka kahoy; ug gamiton sa bug-os sa akong mga pinili ang buhat sa ilang kaugalingong mga kamot.”—Isaias 65:21, 22.

Ang Gingharian sa Diyos magausab sa tibuok planeta. Ang tanang buhi makapahimulos sa kinabuhi sa bug-os, nga mag-ugmad sa ilang kinaiyanhong mga katakos pinaagi sa pagpakigbahin sa makapatagbawng buluhaton ug maayong lulinghayaw. Mausab na unya ang mga kahimtang sa tibuok kalibotan mao nga wala na gayoy maghunahuna sa pagkidnap sa iyang silingan. Ang pagbati sa kasegurohan mahimo nang bug-os. (Miqueas 4:4) Busa, himoon sa Gingharian sa Diyos ang pagpangidnap gikan sa usa ka presenteng-adlaw nga suliran sa tibuok kalibotan ngadto sa usa ka anib sa kasaysayan nga dili na gayod pagahinumdoman ni bisan kinsa.—Isaias 65:17.

[Hulagway sa panid 10]

“Walay usa nga magpakurog kanila.”—Miqueas 4:4