Gikan sa Anam-anam nga Kamatayon Ngadto sa Usa ka Malipayong Kinabuhi

SUMALA SA GIASOY NI DIAMÁNTI DATSERIS

‘Gitagalan na ang akong kinabuhi.’ Kini maoy sige nakong gihunahuna samtang naghigda sa katre sa ospital ug hinayng nagtulo ang mga yunit sa dugo ngadto sa akong kaugatan. Sulod sa kapin ug 20 ka tuig, gisultihan ako nga mao lamang kini ang bugtong paagi nga ako makapabiling buhi​—kon matawag man ugaling kini nga pagkinabuhi.

WALA madugay human sa akong pagkatawo sa 1969 sa Ierápetra, sa isla sa Creta sa Gresya, nadawat sa akong mga ginikanan ang daotang balita. Ang mga doktor nag-ingon nga ang ilang batang babaye dunay beta-thalassemia, o Cooley’s anemia. Ang beta-thalassemia maoy usa ka grabeng sakit sa dugo nga mapanunod, nga kasagarang mag-apektar sa mga tawong may kagikan nga Grego, Italyano, taga-Tungang Sidlakan, taga-Habagatang Asia, o Aprikano.

Sumala sa gisaysay sa mga doktor ngadto sa akong mga ginikanan, kon ang usa ka tawo may ingon niini nga sakit, ang pulang mga selula sa lawas dili makagama ug igong hemoglobin, ang protina nga mohatod ug oksiheno ngadto sa mga selula. Tungod niini, kulang ang oksiheno nga madawat sa akong mga selula. Ang pulang mga selula magpabilin diha sa akong kaugatan sa mubo lamang nga panahon tungod kay daoton ug kuhaon kini sa akong atay ug lapay. Wagtangon niini nga mga organo ang abnormal o dili na mapuslan nga pulang mga selula.

Ang akong mga ginikanan giingnan nga ang bugtong nailhan nga tambal sa thalassemia mao ang regular nga pagpaabono ug dugo ug ang pagkuha sa natigom nga iron. Apan, gipatin-aw sa mga doktor nga ang pagtambal pinaagig pagpaabono ug dugo magpahinabo usab sa pagkatigom sa iron diha sa kasingkasing ug atay, ug kini makamatay. Ang pagpaabono ug dugo​—pagtambal nga magsanta sa kamatayon sa mga pasyente sa ilang unang napulo ka tuig sa kinabuhi​—kasagarang may dakong bahin sa pagkahilo tungod sa iron nga makamatay gayod sa ulahi. Ang mga pasyenteng may thalassemia nga kanunayng abonohan ug dugo, sama nako, kasagarang mamatay sa sakit sa kasingkasing sa dili pa mo-30 anyos.

Kinabuhi nga Gitagalan

Sukad sa akong linghod kaayong panuigon, kanunay akong nag-ungaw sa kamatayon. Walay mga pulong nga makahubit kon unsa ka lisod ang pagkinabuhi nga may ingon niana ka alaot nga palaaboton. Wala koy mga plano sa umaabot ug walay mga pangandoy nga magkinabuhi ingong usa ka normal nga hamtong. Akong gibati nga ang akong thalassemia morag usa ka time bomb nga naghulat nga mobuto.

Ang kabalaka sa akong mga ginikanan alang sa akong panglawas naghimo kanila nga mapanagan-on kaayo. Gipadako ako nga may taas kaayong listahan kon unsay dili buhaton ug uban pang mga lagda: “Ayawg dagan!” “Ayaw pasobrahi ang imong pagbati!” “Pag-amping!”

Ang akong kahimtang naghimo sa akong Grego Ortodoksong inahan nga hilabihan ka relihiyosa. Siya kinasingkasing nga nangayog tabang sa relihiyosong mga imahen. Aron moarang-arang ang akong kahimtang, iya akong dad-on sa lagyong mga monasteryo nga gidungog sa pagtambal pinaagig pagtuo ug hatagan ako ug lainlaing mga panagang ug mga anting-anting. Daghang salapi ang gigasto alang sa maong mga paagi​—apan sa walay kapuslanan.

Ako nagtuo ug nahigugma sa Diyos, bisan pag wala ko mahibalo kon unsaon siya pagsimba. Sa dihang mawad-an ug paglaom, ako maghilak nga mag-ampo: “Diyos ko, kon tinuod kang naglungtad ug nahigugma kanako, tabangi intawon ko.”

Desperado nga Nangita ug Kahupayan

Samtang nagtubo ako, ang akong panglawas kusog nga nagkadaot, ang dakong hinungdan mao ang sobrang iron diha sa akong dugo. Ingong bahin sa pagtambal kanako, naggamit akog usa ka himan nga magpaus-os sa iron sa dugo. Matag gabii kinahanglan kong motusok ug dagom sa panit sa akong tiyan aron ipaagos ang iron chelator pasulod sa akong lawas sa tibuok gabii. Matag gabii akong agwantahon kining masakit nga rituwal. Kasagaran, panahon niadtong walay-tulog nga mga gabii, gusto na nakong mamatay. Akong gibati nga wala tagda sa Diyos ang akong mga pakiluoy sa tabang.

Sa edad nga 16, nagsugod ako sa pagpakig-uban sa usa ka grupo sa mga batan-on nga nalinga sa heavy metal nga musika. Tungod kay desperado nga nangita ug kahupayan, akong nakaplagan nga ang musika nga naghimaya sa kabangis, walay-kokaluoy nga kapintasan, ug Satanismo naghatag ug usa ka sukod sa kagawasan. Kon buot sabton, sanglit naglungtad ang daotan bisan diin diha sa akong palibot, ako miuyon sa ideya nga gikontrolar ang uniberso sa usa ka daotan nga dako ug gahom. Apan wala madugay ang mga resulta sa droga ug Satanismo nahimong dayag. Ang akong mga kauban kanunayng gigukod sa mga polis.

Ang akong way-hunong nga pagpaabono ug dugo nagpahinabog mga marka sa akong lawas nga dili daling mawala. Tungod sa sobrang iron nangitom ang panit ubos sa akong mga mata ug midalag ang akong panit. Ang akong hitsura wala mapaarang-arang sa akong pamesti​—ang itom nga mga sinina ug panit nga dyaket, nga gidayandayanan ug mga hobnail ug mga kalabera, nga nagpaila sa mga tawong akong gibarkada. Maayo na lang, wala gayod ko mogamit ug droga.

Samtang nagpadayon ako sa pagpaminaw sa heavy metal nga musika nga nagpasiugda sa kamatayon, droga, demonyo, espiritismo, ug dugo, akong gibati nga nabitik ako ni Satanas. Magul-anon ako magabii ug kanunayng maghilak. Dinhi niining masulub-ong panahon sa akong kinabuhi nga nagsugod pagsidlak ang usa ka bidlisiw sa paglaom.

Hinungdanong Kausaban sa Akong Kinabuhi

Usa ka adlaw niana, sa nag-edad akog 20 anyos, gihatagan ako sa usa ka higala ug libro nga iyang nakuha gikan sa mga Saksi ni Jehova. Kini may ulohang Ang Bibliya​—Pulong sa Diyos o sa Tawo?a Dili gayod siya interesado sa libro, apan sa dihang akong gibasabasa kini, nakadayeg ako. Tin-awng gipakita niini nga ang mga prinsipyo sa Bibliya makapauswag sa kinabuhi sa tawo. Nakadayeg usab ako sa pagkasayod bahin sa paglutos sa unang mga Kristohanon ug sa ilang pagkaandam sa paghatag sa ilang kinabuhi alang sa ilang mga tinuohan. Sa dihang nahuman na nako pagbasa ang libro, buot nakong ipaambit kining mga butanga sa uban. Mao kadtong higayona nga akong nahimamat si Manolis, usa ka lalaki nga nahibalo bahin ni Jehova ug sa mensahe sa Bibliya tungod kay pipila sa iyang mga paryente maoy mga Saksi ni Jehova. Gidala ko niya sa lokal nga tigomanan sa mga Saksi ni Jehova, ug sa ting-init sa 1990, nagsugod ako sa pagtuon sa Bibliya uban nila.

Pinaagi sa akong pagtuon sa Bibliya, akong nasayran nga ang atong Maglalalang nagtagad gayod kanato ug dili siya ang may tulubagon sa sakit ug pag-antos nga nag-apektar sa daghan kanato. (1 Pedro 5:7) Akong nasayran nga si Satanas mao ang hinungdan sa paglungtad sa sala ug kamatayon niining kalibotana ug sa dili madugay hanawon ni Jehova ang mga buhat ni Satanas pinaagi sa pagwagtang niining karaang sistema ug pulihan kini sa usa ka hingpit nga bag-ong kalibotan. (Hebreohanon 2:14) Ilalom sa paraisong mga kahimtang, ang mahinadlokon-sa-Diyos nga mga tawo igapasig-uli sa tawhanong kahingpitan. Dayon, wala nay moingong, “Ako masakiton.”​—Isaias 33:24.

Sa samang higayon, akong nasayran nga ang Bibliya nagsugo kanato nga ‘mag-ayad sa dugo.’ (Buhat 15:​20, 29; Genesis 9:4) Tungod kay ang akong tanlag nagsugod na nga maumol ug mabansay sa hataas nga mga sukdanan ug mga prinsipyo sa Bibliya, napalihok ako sa paghimog personal nga desisyon mahitungod sa pagpaabono ug dugo. Ako nakahukom nga dili na magpaabono ug dugo.

Sa kapin sa 20 ka tuig, gipatuo ako nga ang bugtong paagi nga ako padayong mabuhi mao ang regular nga pagpaabono ug dugo. Ako bang ipahinabo ang akong kaugalingong kamatayon pinaagi sa pagtuman sa sugo sa Bibliya? Unsay hunahunaon sa akong mga ginikanan sa akong pagdumili sa dugo? Pugson kaha ako sa akong mga doktor ug sa ubang medikal nga kawani?

Paghimog Seryosong mga Desisyon

Pinaagi sa kinasingkasing nga pag-ampo akong gitugyan ang tanan nakong mga kabalaka ngadto kang Jehova. (Salmo 55:22) Nakahukom usab ako sa paggamit ug ubang medikal nga mga pamaagi. Human ang hilabihang pagtuon, akong nahibaloan nga ang gipili pag-ayong mga pagkaon nga tugob sa iron ug mga bitamina puwede nakong ipuli sa pagpaabono ug dugo. Labaw sa tanan, determinado ako sa pagtuman sa balaod sa Diyos sumala sa gipahayag diha sa Bibliya.

Siyempre, nabalisa pag-ayo ang akong mga ginikanan. Sukad sa akong pagkamasuso gihimo nila ang tanan aron ako mabuhi, ug karon ako nagdumili sa pagpaabono ug dugo! Apan, sa ulahi miingon sila nga ilang tahoron ang akong personal nga desisyon niining butanga.

Gipatin-aw dayon nako ang akong relihiyosong baroganan ngadto sa medikal nga kawani sa ospital, nga nagpahibalo usab kanila nga makugihon nakong sundon ang mga metodo nga kapuli sa pagpaabono ug dugo. Ang mga doktor nagpanuko sa pagsugot sa akong gusto.

Sa giabonohan pa ug dugo kaniadto, nakapakighigala ako sa ubang mga batan-on nga may thalassemia. Natingala sila karon sa akong baroganan bahin sa dugo. Usa kanila makantalitahon nga nagsulti kanako nga sa dili madugay ako “yayongan sa upat ka tawo”​—usa ka Gregong ekspresyon nga nagpasabot nga ako mamatay. Ikasubo, apil siya sa lima ka pasyente nga namatay sa ulahi tungod kay naabonohan ug nahugawang dugo!

Sukad sa Agosto 1991, wala na ako maabonohi ug dugo. Sukwahi sa tanang gitagna, ako buhi ug medyo arang-arang. Pinaagi sa pagkaong tugob sa mga bitamina ug iron, akong namentinar ang igoigong kahimsog, bisan pa sa panalagsang mga komplikasyon ug permanenteng mga limitasyon tungod sa akong thalassemia.

Apan, ang kinamaayohan sa tanan mao nga ang akong kinabuhi dunay katuyoan, usa ka kinabuhi nga napalambo tungod sa suod nga relasyon uban sa akong Maglalalang, si Jehova nga Diyos. Sa Hulyo 1992, akong gisimbolohan ang akong pagpahinungod kang Jehova pinaagi sa bawtismo sa tubig. Si Manolis, kadtong pinangga nga higala nga maoy hinungdan nga akong nabatonan ang bililhong pagpaluyo sa Kristohanong kongregasyon sa mga Saksi ni Jehova, nabawtismohan nianang adlawa usab. Mga 18 ka bulan sa ulahi, kami naminyo. Sa ulahi, ako nalipay sa pagkakita sa akong inahan ug igsoong babaye nga nahimong bawtismadong mga alagad ni Jehova. Ang opinyon sa akong amahan bahin sa mga Saksi ni Jehova nausab, ug siya motambong sa mga tigom sa kongregasyon matag karon ug unya.

Akong nakat-onan nga bisan tuod ang kamatayon maoy usa ka kaaway, dili kini kaaway nga angayng kahadlokan. (Salmo 23:4) Mabuhi man kita o mamatay, kini maoy alang kang Jehova. Ang atong kinabuhi anaa sa iyang mga kamot. (Roma 14:8) Kanunay akong mapasalamaton kaniya tungod sa pagluwas kanako gikan sa kinabuhi nga ang bugtong gipaabot mao ang anam-anam nga kamatayon. Sa pagkatinuod, siya nagtultol kanako ngadto sa paglaom sa kinabuhing walay kataposan!​—Pinadayag 21:​1-4.

[Footnote]

[Hulagway sa panid 21]

Ako desperado nga nangitag kahupayan

[Hulagway sa panid 22]

Uban sa akong bana, si Manolis