“Dako Kaayog Natabang Diha sa Siyensiya sa Medisina”
TINAMPO SA MAGSUSULAT SA PAGMATA! SA MEXICO
Ang mga Saksi ni Jehova gibantog sa tibuok kalibotan nga dili magpaabono ug dugo. Gisaway sa uban ang ilang gipasukad sa Bibliya nga baroganan. Apan, sumala sa gitaho diha sa kaylap kaayong pagkaapod-apod nga mantalaang Reforma, sa Mexico City, si Dr. Ángel Herrera, pangulong siruhano diha sa National Institute of Oncology, miingon: “Dili ignorante ang mga Saksi. Dili usab sila mga panatiko. . . . [Sila] dako kaayog natabang diha sa siyensiya sa medisina tungod kay silay nagpahunahuna sa mga doktor sa paghimog mga pamaagi aron mamenosan ang dugo nga mausik dihang mag-opera.”
Sa miaging 15 ka tuig, si Dr. Herrera nagporma ug grupo sa mga tig-anestesya ug mga siruhano nga moopera nga dili mag-abono ug dugo. Si Dr. Isidro Martínez, nga usa ka tig-anestesya sa maong grupo, miingon: “Kon husto ang paagi sa paggamit ug anestesya, wala kaayoy dugo nga mausik panahon sa pag-opera. Busa kita makatabang gayod sa mga Saksi ni Jehova, nga sa samang higayon nagtahod sa ilang relihiyosong baroganan.”
Dunay kapin sa 30 ka kapilian sa pag-abonog dugo, nag-ingon ang Reforma sa Oktubre 2006. Kini naglakip sa pagsunog sa mga sapa-sapa sa dugo, pagdapat ug gasa nga dunay mga kemikal diha sa mga organo aron mohunong ang pagdugo, ug sa paggamit ug mga pluwido nga magpadaghan sa dugo.a
Si Dr. Moisés Calderón, pangulong siruhano sa La Raza General Hospital sa Mexico City, kanunayng mag-opera nga dili moabonog dugo. Siya miingon diha sa Reforma: “Peligroso ang pag-abonog dugo. Peligro nga ang dugo nga iabono sa pasyente dunay mga virus, bakterya, o mga parasito. Dugang pa, mahimong maalerdyik ang pasyente, nga makadaot sa iyang sistema sa pagpangihi ug sa respiratoryo.” Tungod niini nga mga kapeligrohan, si Dr. Calderón miingon: “Among lantawon ang tanang pasyente ingong mga Saksi ni Jehova dihang mag-opera kami. Himoon gayod namo kutob sa maarangan nga walay dugo nga mausik, mogamit usab kami ug makina nga mosuyop sa dugo nga mobugwak inigdisdis ug ibalik kini diha sa pasyente, ug mogamit kami ug mga medisina aron dili kaayo daghang dugo ang moagas dihang mag-opera.”
Gikutlo sa mantalaan ang Buhat 15:28, 29, nga usa ka importanteng teksto nga gibasehan sa mga Saksi ni Jehova sa ilang baroganan. Niini nga teksto ang mga apostoles nagsugo: “Ang balaang espiritu ug kami nagkauyon nga dili magsangon ug dugang pang palas-anon kaninyo, gawas niining kinahanglanong mga butang, nga padayong magaayad sa mga butang nga gihalad ngadto sa mga idolo ug gikan sa dugo ug gikan sa mga butang nga naluok ug gikan sa pakighilawas.”
Ang Hospital Information Desk sa sangang buhatan sa mga Saksi ni Jehova sa Mexico nagtaho nga dunay 75 ka Hospital Liaison Committee nianang nasora nga may 950 ka boluntaryo kinsa makigkita sa mga doktor sa paghatag ug impormasyon kanila bahin sa mga kapuling tambal. Mga 2,000 ka doktor sa Mexico malipayng motambal sa mga Saksi ni Jehova bisag walay dugo nga gamiton. Mapasalamaton kaayo ang mga Saksi sa kooperasyon niining mga doktora, nga sa ingon mas nahanas pa sa pagtambal sa mga pasyenteng dili Saksi.
[Footnote]
a Ang Pagmata! wala magrekomendar ug bisan unsang matang sa pagtambal nga kapuli sa dugo, kay personal nga desisyon kini.
[Hulagway sa panid 30]
Dr. Ángel Herrera
[Hulagway sa panid 30]
Dr. Isidro Martínez
[Hulagway sa panid 30]
Dr. Moisés Calderón