Enero

Miabot ra gyod ang iyang gipaabot. Kay nalipay nga makita ang iyang amahan nga luwas nga nakapauli gikan sa panggubatan, ang batan-ong dalaga nagdali sa pagsugat kaniya ug miawit ug misayaw tungod sa dakong kadaogan sa iyang amahan. Apan imbes moduyog sa iyang anak, gigisi sa amahan ang iyang nagkadugo nga besti ug siya mituaw: ‘Intawon, anak ko! Gipaubos mo gayod ako.’ Dayon, iyang gisulti ang mga pulong nga makapausab sa kinabuhi sa iyang anak hangtod sa hangtod, nga makahugno sa mga pangandoy niini sa pagbatog normal nga kinabuhi. Pero sa way pagpanuko, ang dalaga nagdasig sa iyang amahan sa pagtuman sa panaad niini kang Jehova. Ang iyang mga pulong nagpadayag sa iyang lig-ong pagtuo. Siya misalig nga bisan unsay pangayoon ni Jehova, kana maoy alang sa iyang kaayohan. (Maghu. 11:34-37) Ang amahan mapasigarbohon kaayo kay siya nahibalo nga ang pagkaandam sa iyang anak nga mopaluyo sa iyang desisyon makapalipay kang Jehova. Si Jepte ug ang iyang anak bug-os nga misalig sa paagi ni Jehova sa pagbuhat sa mga butang, bisag dili kadto sayon. Kombinsido sila nga dili makawang ang ilang sakripisyo kay ilang mabatonan ang pag-uyon sa Diyos. w16.04 1:1, 2

Kon nasakitan ka sa gisulti sa usa ka higala o membro sa pamilya, gitakboyan ug grabeng sakit, o nagbangotan sa kamatayon sa usa ka minahal, mahupayan ka sa ehemplo ni Job. (Job 1:18, 19; 2:7, 9; 19:1-3) Bisag wala siya mahibalo sa tinubdan sa iyang mga kasakit, si Job wala mosurender. Ngano man? Tungod kay siya “mahadlokon sa Diyos.” (Job 1:1) Determinado si Job nga pahimut-an si Jehova sa maayo ug dili maayong mga kahimtang. Sa tabang sa Diyos, gipamalandong ni Job ang kahibulongang mga butang nga nahimo ni Jehova pinaagi sa Iyang balaang espiritu. Nahimong mas masaligon pa gani si Job nga taposon ni Jehova ang iyang mga pagsulay sa hustong panahon. (Job 42:1, 2) Ug mao gyod nay nahitabo. “Si Jehova nagbali sa binihag nga kahimtang ni Job . . . [ug] naghatag kang Job ug doble pa sa tanan niyang nabatonan sa miagi.” Si Job namatay nga “tigulang na ug tagbaw sa mga adlaw.”​—Job 42:10, 17. w16.04 2:11, 13

Kita magmabinantayon kon atong ilhong daan ang mga kapeligrohan, ug kita magpabiling inosente pinaagi sa dili pagkompromiso sa atong baroganan. Kinahanglan tang magmabinantayon dihang ang mga tawo maghisgot ug politikal nga mga isyu. Pananglitan, dihang makigsulti sa mga tawo bahin sa Gingharian, likayi ang pagdayeg o kaha pagsaway sa mga opinyon sa usa ka politikal nga partido o lider. Paningkamoti nga makakitag topiko nga pareho ninyong giuyonan sa tagbalay pinaagi sa pagpokus diha sa hinungdan sa problema imbes sa giduso nga politikal nga solusyon. Dayon, ipakita gikan sa Bibliya kon sa unsang paagi ang gobyerno sa Diyos bug-os nga magsulbad sa problema. Kon motungha ang kontrobersiyal nga mga isyu sama sa aborsiyon o pagminyo sa parehas ug sekso, depensahi ang mga sukdanan sa Diyos ug ipatin-aw kon sa unsang paagi nato kini gisunod. Panahon sa panaghisgot, magpabiling neyutral sa politikal nga bahin niini nga mga isyu. Dili ta mohatag ug opinyon kon unsang mga balaora ang angayng ipatuman, wagtangon, o ilisan, ug dili nato pugson ang uban sa pag-uyon kanato. w16.04 4:8, 9

Kinahanglan tang maghimog mga tinun-an, magbawtismo kanila, ug magtudlo kanila. Apan, unsa may unang buhaton? Si Jesus miingon: “Panglakaw kamo”! Maylabot niini nga sugo, usa ka eskolar sa Bibliya ang miingon: “Ang sugo nga ‘panglakaw kamo’ maoy para sa matag magtutuo,” kini man sa duol ra o sa halayong dapit. (Mat. 10:7; Luc. 10:3) Ang gitumong ba ni Jesus mao ang tagsatagsa ka paningkamot sa iyang mga sumusunod, o ang organisadong kampanya sa pagsangyaw sa maayong balita? Kay imposible man para sa usa ka tawo nga mosangyaw sa “tanang kanasoran,” kining buluhatona nagkinahanglag organisadong paningkamot sa daghan. Mao kanay gipasabot ni Jesus dihang gidapit niya ang iyang mga tinun-an nga mahimong “mangingisda ug mga tawo.” (Mat. 4:18-22) Ang paagi sa pagpangisda nga gitumong dinhi dili kanang sa usa lang ka mangingisda nga naggamit ug pasol ug paon, nga naglingkod ug naghulat nga ang isda mokubit sa paon. Hinunoa, kini naglangkit sa paggamit ug mga pukot​—hago kaayo nga trabaho nga usahay nagkinahanglag pagtinabangay sa daghang tawo.​—Luc. 5:1-11. w16.05 2:3, 4

Aron masinati kita sa panghunahuna ni Jehova, kinahanglang himoon natong prayoridad ang personal nga pagtuon. Dihang magbasa o magtuon sa Pulong sa Diyos, mahimong mangutana ta sa atong kaugalingon, ‘Unsay gipadayag niini bahin kang Jehova, sa iyang matarong nga dalan, ug sa iyang panghunahuna?’ Kinahanglang batonan nato ang tinamdan nga sama nianang kang salmistang David, kinsa miawit: “Ipaila kanako ang imong mga dalan, Oh Jehova; tudloi ako sa imong mga alagianan. Palakta ako diha sa imong kamatuoran ug tudloi ako, kay ikaw mao ang akong Diyos sa kaluwasan. Kanimo ako naglaom sa tibuok nga adlaw.” (Sal. 25:4, 5) Samtang mamalandong ka sa usa ka teksto sa Bibliya, mahimo nimong konsiderahon kining mga pangutanaha: ‘Unsaon nako kini pagpadapat? Asa nako ni mapadapat? Sa panimalay? Sa trabahoan? Sa eskuylahan? Sa ministeryo?’ Kon nahibalo na ta kon asa nato kini mapadapat, mahimong mas sayon ang pagsabot kon unsaon nato kini pagpadapat. w16.05 3:9, 11

Pinaagi sa paghatag niini nga kuwalipikasyon alang sa mga tigdumala, gipakita ni Jehova nga duna siyay taas nga sukdanan alang niadtong nagapanguna sa kongregasyon. (1 Tim. 3:2-7) Gidahom niya nga sila maghatag ug maayong ehemplo, kay sila manubag kaniya kon giunsa nila pag-atiman ang kongregasyon, “nga iyang gipalit pinaagi sa dugo sa iyang kaugalingong Anak.” (Buh. 20:28) Gusto ni Jehova nga kita mobating luwas ilalom sa pag-atiman sa tinudlong mga ansiyano. (Isa. 32:1, 2) Busa kining Kasulatanhong mga kuwalipikasyon para sa mga ansiyano nagpahinumdom nato kon unsa ka dako ang gugma ni Jehova kanato. Sa pagkatinuod, ang matag Kristohanon makakat-on sa mga kuwalipikasyon nga nasulat niining mga bersikuloha, kay kadaghanan niini naglakip sa mga butang nga gidahom ni Jehova sa tanang Kristohanon. Pananglitan, kitang tanan angayng magmakataronganon ug magbatog maayong panghunahuna. (Filip. 4:5; 1 Ped. 4:7) Samtang ginapamatud-an sa mga ansiyano nga sila “mga panig-ingnan alang sa panon,” kita makakat-on kanila ug ‘makasundog sa ilang pagtuo.’​—1 Ped. 5:3; Heb. 13:7. w16.05 5:8-10

Unsang makapatig-a sa kasingkasing nga mga batasan ang angay natong likayan? Naglakip kana sa sayop nga matang sa garbo, nabatasan nga pagpakasala, ug kakulang sa pagtuo. Kini makapahimo kanatong masinupakon ug rebelyoso. (Dan. 5:1, 20; Heb. 3:13, 18, 19) Kanay nahitabo kang Haring Uzzias sa Juda. (2 Cron. 26:3-5, 16-21) Sa sinugdan, gibuhat ni Uzzias “kon unsay matarong sa mga mata ni Jehova” ug siya “padayong nakiling sa pagpangita sa Diyos.” Pero dihang “nagmakusganon na siya, ang iyang kasingkasing nagmapahitas-on,” bisan pag gikan sa Diyos ang iyang kusog. Misulay pa gani siya sa pagsunog ug insenso sa templo​—pribilehiyo nga iya lamang sa mga saserdote nga kaliwat ni Aaron. Dayon, dihang gibadlong siya sa mga saserdote, ang mapahitas-ong si Uzzias nasuko pag-ayo! Unsay resulta? Siya nakaagom ug makauulawng pagkapukan ug namatay nga sanlahon. (Prov. 16:18) Kon dili nato likayan ang garbo, mahimong magsugod sab ta sa ‘paghunahuna ug labaw bahin sa atong kaugalingon kay sa angay nga hunahunaon,’ tingali moabot pa sa punto nga isalikway na nato ang tambag sa Bibliya.​—Roma 12:3; Prov. 29:1. w16.06 2:3, 4

Unsay imong pagbati sa mga isigka-Kristohanon nga lahig kultura? Wala ka tingali maanad sa ilang pinulongan, sininaan, batasan, ug pagkaon. Likayan ba nimo sila ug makig-uban lang ka niadtong parehas nimog kagikan? Komosta kon kadtong natudlo nga mga tigdumala sa inyong kongregasyon​—o sa inyong sirkito o sangang buhatan—​mas bata kanimo o lahig kultura o rasa? Tugotan ba nimo nga mabungkag ang panaghiusa sa katawhan ni Jehova tungod niana? Unsay makatabang nato nga malikayan ang maong mga problema? Si Pablo naghatag ug pipila ka praktikal nga sugyot sa mga Kristohanon sa Efeso, usa ka datong siyudad diin ang mga tawo lainlaig kagikan. (Efe. 4:1-3) Unang gihisgotan ni Pablo ang mga hiyas sama sa pagpaubos, kalumo, hataas nga pailob, ug gugma. Ikatandi kini sa mga haligi sa usa ka balay. w16.06 3:17, 18

Gusto ni Satanas nga maulipon ta sa Bahandi imbes kang Jehova. (Mat. 6:24) Kon kita maningkamot pag-ayo sa pagtigom ug materyal nga mga butang, mahimong haw-ang ang atong kinabuhi kay kaugalingon ray atong gihunahuna. Mas grabe pa, madaot ang atong espirituwalidad ug kita magmagul-anon ug mahigawad. (1 Tim. 6:9, 10; Pin. 3:17) Sama kini sa gihisgotan ni Jesus sa iyang ilustrasyon bahin sa magpupugas. Dihang ang mensahe sa Gingharian “napugas taliwala sa mga sampinit . . . , ang mga tinguha alang sa uban pang mga butang modaot ug motuok sa pulong, ug kini dili mamunga.” (Mar. 4:14, 18, 19) Samtang nagkaduol kita sa kataposan niining sistemaha sa mga butang, dili na panahon nga magtigom ug daghang materyal nga mga butang. Dili nato dahomon nga ang bisan unsang butang nga atong gipanag-iya, bisag unsa pa kini ka bililhon, maluwas uban nato sa dakong kasakitan.​—Prov. 11:4; Mat. 24:21, 22. w16.07 1:5, 6

Usa ka tag-iyag parasan ang miadto sa merkado sayo sa buntag aron mangitag mga tawo nga motrabaho sa iyang parasan. Ang mga tawong iyang nakita miuyon sa suhol nga iyang gitanyag ug misugod pagtrabaho. Pero ang tag-iya nagkinahanglan pag mga trabahador maong nagbalikbalik siya sa merkado aron mangitag dugang mga tawo, nga nagtanyag ug samang kantidad bisan niadtong hapon na motrabaho. Pagkagabii, iyang gipatawag ang tanang trabahador ug gisuholan ug parehas ra nga kantidad, nagtrabaho man ug daghang oras o usa ra ka oras. Dihang nahibaloan kini sa unang nangabot, mireklamo sila. Ang tag-iya miingon: “Dili ba miuyon ka man sa pagtrabaho sa kantidad nga usa ka denario? . . . Wala ba diay akoy katungod paggasto sa akong kuwarta sumala sa akong gusto? O nasina ba ikaw tungod kay ako manggihatagon?” (Mat. 20:1-15, Ang Biblia​—Bag-ong Hubad Nga Binisaya.) Ang ilustrasyon ni Jesus magpahinumdom kanato sa hiyas ni Jehova nga kanunayng hisgotan sa Bibliya​—ang iyang “dili-takos nga kalulot.”​—2 Cor. 6:1. w16.07 3:1, 2

Kay duol na kaayo ang kataposan, kinahanglang mas pangusgan pa nato ang pagsangyaw sa maayong balita sa Gingharian! (Mar. 13:10) Klaro nga ang maayong balita nagpasiugda sa dili-takos nga kalulot ni Jehova. Kinahanglan nato kining hinumdoman samtang magsangyaw. Dihang magsangyaw, atong tumong ang pagpasidungog kang Jehova. Mahimo nato ni pinaagi sa pagpasabot sa mga tawo nga ang mga saad sa bag-ong kalibotan usa gayod ka pagpahayag sa pagkamaayo ni Jehova. Sa atong pagsangyaw, ikapatin-aw nato nga pinaagi sa pagmando ni Kristo, maangkon sa katawhan ang tanang benepisyo nga ipahinabo tungod sa halad lukat ug sila anam-anam nga mahingpit. Ang Bibliya miingon: “Ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:21) Posible lang kini tungod sa talagsaong pagkamaayo ni Jehova. w16.07 4:17-19

Ang Bibliya wala maghatag ug espesipikong balaod kon unsang matanga sa parayganay ang angayng himoon sa bana ug asawa panahon sa pagpakigsekso, pero naghisgot kinig mga pasundayag sa pagmahal. (Awit 1:2; 2:6) Ang magtiayon angayng magpakitag konsiderasyon sa usag usa. Kon duna tay dakong gugma sa Diyos ug sa isigkatawo, dili nato tugotan si bisan kinsa o ang bisan unsa nga makabungkag sa kaminyoon. Ang pipila ka kaminyoon nadaot o nabungkag pa gani kay ang kapikas nagsigeg tan-awg pornograpiya. Kinahanglang likayan nato nga madani sa pornograpiya o mangitag bisan unsang seksuwal nga katagbawan gawas sa kaminyoon. Likayan usab nato bisan ang dili dayag nga pagbirigbirig ngadto sa dili nato kapikas. Kini dili mahigugmaon. Angay natong hinumdoman nga ang Diyos nahibalo sa tanan natong gihunahuna ug ginabuhat. Kini magpalig-on sa atong determinasyon nga pahimut-an siya ug magpabiling putli.​—Mat. 5:27, 28; Heb. 4:13. w16.08 2:7-9

Tungod nianang tukmang kahibalo, ang mga Kristohanon sa Colosas mahimong ‘makalakaw nga takos kang Jehova aron bug-os nga makapahimuot kaniya.’ Kini makatabang nila nga padayong “magapamunga sa tanang maayong buhat,” ilabina sa pagsangyaw sa maayong balita. (Col. 1:10) Aron epektibong makaalagad, ang usa ka magsisimba ni Jehova kinahanglang dunay rutina sa pagtuon sa Bibliya. Maayong tabangan nato ang atong ginatun-an sa Bibliya nga masabtan kana. Dugang pa, kita kinahanglang kombinsido sa kaimportante niini. Oo, kita kinahanglang dunay maayong rutina sa pagtuon sa Bibliya. Busa mahimong pangutan-on nimo ang kaugalingon, ‘Dihang ang tagbalay mohatag ug opinyon nga supak sa pagtulon-an sa Kasulatan o mosuknag lisod nga pangutana, makahatag ba kog binase sa Bibliyang tubag?’ Kon sultihan nato ang uban kon sa unsang paagi nakabenepisyo kita sa atong personal nga pagtuon, lagmit madasig nato sila nga magtuon pag-ayo sa Bibliya aron makabenepisyo usab niana. w16.08 4:3, 4

Hinungdanon nga suklan nato ang “lig-ong pagkatarok nga mga butang” sa kalibotan. Kini naglakip sa mga doktrina, pilosopiya, ug makadaot nga mga buhat, sama sa imoralidad, pagpanigarilyo, paghuboghubog, ug pag-abuso sa droga. Kinahanglan sab natong pakigbisogan ang atong mga kahuyangan ug kahigawad. (2 Cor. 10:3-6; Col. 3:5-9) Posible ba gayong mapildi ang maong gamhanang mga kaaway? Oo, pero dili kana sayon. Gamit ang pananglitan sa usa ka boksidor sa karaang panahon, si Pablo miingon bahin sa iyang kaugalingon: “Ang akong pagpanuntok dili ingon sa pagsuntok sa hangin.” (1 Cor. 9:26) Maingon nga ang boksidor makig-away sa iyang kontra, kinahanglan sab tang mosukol sa atong mga kaaway. Si Jehova nagbansay ug nagtabang kanato sa atong pagpakig-away. Nagtagana siyag makaluwas sa kinabuhi nga mga instruksiyon diha sa iyang Pulong. Nagtabang usab siya kanato pinaagi sa binase sa Bibliyang mga publikasyon, mga tigom, asembliya, ug kombensiyon. Gipadapat ba nimo ang imong nakat-onan? w16.09 2:2, 3

Oo, giuna ni Jesus ang pagtabang sa uban kay sa iyang gusto​—importanteng bahin kini sa iyang pagbuhat sa kabubut-on sa Diyos. Busa, likayan nato ang estilo sa sinina nga atong gusto pero makapugong sa mga tawo sa pagpamati sa atong mensahe. (Roma 15:2) Ang Kristohanong mga ginikanan may responsabilidad sa pagtudlo sa ilang mga anak sa pagpadapat sa mga prinsipyo sa Bibliya. Kini naglakip sa pagseguro nga sila ug ang ilang mga anak maningkamot sa pagpahimuot sa Diyos pinaagi sa makasaranganong sinina ug pamostura. (Prov. 22:6; 27:11) Matudloan sa mga ginikanan ang ilang mga anak nga motahod sa balaang Diyos nga ilang gisimba pinaagi sa pagpakitag maayong ehemplo ug paghatag ug mahigugmaon ug praktikal nga mga instruksiyon. Maalamon gayod nga tudloan sa mga ginikanan ang ilang mga anak kon asa mamili ug kon unsaon pagpilig haom nga sinina! Kini nagpasabot sa pagpili, dili lang kon unsay ilang gusto, kondili kon unsay makatabang nila sa pagtuman sa ilang pribilehiyo nga magrepresentar kang Jehova nga Diyos. w16.09 3:13, 14

Ingong magtutudlo, natandog ni Jesus ang kasingkasing sa iyang mga mamiminaw kay siya nahigugma kang Jehova, sa Pulong sa Diyos, ug sa mga tawo. (Luc. 24:32; Juan 7:46) Kon ang mga ginikanan duna niana nga gugma, matandog sab nila ang kasingkasing sa ilang mga anak. (Deut. 6:5-8; Luc. 6:45) Busa mga ginikanan, tun-i pag-ayo ang Bibliya ug ang atong mga publikasyon. Ugmara ang inyong interes maylabot sa kalalangan ug sa atong mga publikasyon nga naghisgot bahin niana. (Mat. 6:26, 28) Kon buhaton ninyo kana, mouswag ang inyong kahibalo, molalom ang inyong apresasyon kang Jehova, ug mas masangkapan mo sa pagtudlo sa inyong mga anak. Kon ang inyong kasingkasing puno sa kamatuoran, gusto ninyong hisgotan kana uban sa inyong pamilya. Buhata kini dili lang samtang mangandam alang sa mga tigom o panahon sa pamilyahanong pagsimba kondili sa bisan unsang panahon. Dugang pa, ang maong mga panaghisgot kinahanglang natural ug bahin na sa adlaw-adlaw nga panag-estoryahay. w16.09 5:6, 7

Kon dili nato masabtan ang Pulong sa Diyos sa langyawng pinulongan, kini lagmit magpameligro sa atong espirituwal nga kahimsog. Niadtong ikalimang siglo B.C.E., nabalaka si Nehemias dihang nahibaloan niya nga ang pipila ka anak sa mga Hudiyo nga namalik gikan sa Babilonya dili makasultig Hebreohanon. Kining mga bataa anam-anam nga nawad-an sa ilang ilhanan ingong mga alagad sa Diyos kay wala nila masabti sa bug-os ang kahulogan sa Pulong sa Diyos. (Neh. 8:2, 8) Namatikdan sa pipila ka ginikanan nga nag-alagad sa langyawng teritoryo nga anam-anam nga nawala ang interes sa ilang anak sa kamatuoran. Ngano? Kon magbasa ta diha sa langyawng pinulongan, ang atong kasingkasing lagmit dili kaayo matandog sama nianang magbasa ta diha sa atong pinulongan. Dugang pa, kon maglisod ta sa pagpakigkomunikar diha sa laing pinulongan, maluya ang atong hunahuna ug espirituwalidad. Busa, samtang maningkamot ta nga mahuptan ang atong tinguha sa pag-alagad kang Jehova diha sa langyawng teritoryo, angay sab natong ampingan ang atong espirituwal nga kahimsog.​—Mat. 4:4. w16.10 2:4-6

Ang Kristohanong pagtuo maoy bililhong hiyas. Dili tanang tawo ang nakabaton niana. (2 Tes. 3:2) Apan, si Jehova naghatag sa matag usa sa iyang mga magsisimba ug usa ka “sukod sa pagtuo.” (Roma 12:3; Gal. 5:22) Ang tanan nga nakabaton niana angayng magmapasalamaton. Si Jesu-Kristo miingon nga gikabig sa iyang langitnong Amahan ang mga tawo pinaagi sa Iyang Anak. (Juan 6:44, 65) Sa baylo, pinaagi sa pagbatog pagtuo kang Jesus ang usa mapasaylo sa iyang mga sala ug makabatog kahigayonan nga mahimong higala ni Jehova hangtod sa hangtod. (Roma 6:23) Unsa may atong nahimo aron hatagan kita nianang nindot nga panalangin? Ingong mga makasasala, kamatayon lang ang nahiangay kanato. (Sal. 103:10) Pero nakita ni Jehova nga posible tang mobuhat ug maayo. Tungod sa iyang dili takos nga kalulot, iyang gibuksan ang atong kasingkasing sa maayong balita. Busa misugod kita sa pagpasundayag ug pagtuo kang Jesus ug naglaom nga mabuhi sa walay kataposan.​—1 Juan 4:9, 10. w16.10 4:1, 2

Sa iyang mga sulat, si Pablo misultig maayong mga butang bahin sa iyang isigka-Kristohanon. Sa daghang katuigan, nakauban niya ang pipila kanila sa iyang mga panaw ug seguradong nahibalo siya sa ilang mga kahuyangan, pero naghisgot gihapon siyag maayong mga butang bahin kanila. Pananglitan, si Pablo nagtawag kang Timoteo nga iyang “hinigugma ug matinumanong anak diha sa Ginoo,” ang usa nga sinserong moatiman sa panginahanglan sa ubang Kristohanon. (1 Cor. 4:17; Filip. 2:19, 20) Ang apostol nagrekomendar kang Tito ngadto sa kongregasyon sa Corinto ingong “mag-aambit uban kanako ug isigkamagbubuhat alang sa inyong kaayohan.” (2 Cor. 8:23) Seguradong nadasig si Timoteo ug Tito sa panglantaw ni Pablo kanila! Si Pablo ug Bernabe nagpameligro sa ilang kinabuhi pinaagi sa pagbalik sa mga dapit diin sila gidagmalan. Pananglitan, bisan pag nakasinati silag grabeng paglutos didto sa Listra, namalik sila aron dasigon ang bag-ong mga tinun-an sa pagpabilin sa pagtuo. (Buh. 14:19-22) Sa Efeso, human si Pablo gisupak sa masuk-anong panon, iyang gidasig ang mga tinun-an didto.​—Buh. 20:1. w16.11 1:10, 11

Si Jehova naggiya ug nagpakaon sa yutan-ong bahin sa iyang organisasyon pinaagi sa “matinumanon ug maalamong ulipon” ubos sa pagpanguna ni Kristo, ang “ulo sa kongregasyon.” (Mat. 24:45-47; Efe. 5:23) Sama sa unang siglong nagamandong lawas, kini nga ulipon nagsunod ug nagpabili pag-ayo sa pulong, o mensahe sa Diyos. (1 Tes. 2:13) Ang Bibliya nagsugo kanato sa pagtambong nga regular sa mga tigom. (Heb. 10:24, 25) Kini nag-awhag nato nga magkahiusa sa pagtulon-an. Giingnan ta sa Pulong sa Diyos nga unahon sa atong kinabuhi ang Gingharian. (Mat. 6:33) Ang Kasulatan nagpasiugda usab sa atong obligasyon ug pribilehiyo sa pagsangyaw sa balay ug balay, sa publiko, ug sa impormal. (Mat. 28:19, 20; Buh. 5:42; 17:17; 20:20) Ang Basahon sa Diyos nagsugo sa mga ansiyano nga huptang hinlo ang iyang organisasyon. (1 Cor. 5:1-5, 13; 1 Tim. 5:19-21) Ug si Jehova nagsugo nga ang tanan diha sa iyang organisasyon kinahanglang hinlo sa pisikal ug espirituwal.​—2 Cor. 7:1. w16.11 3:7, 8

Sa mga tuig una pa ang Gubat sa Kalibotan I, naamgohan ni Charles Taze Russell ug sa iyang mga kauban nga ang mga relihiyon sa Kakristiyanohan wala magtudlo sa kamatuoran. Busa, nakadesisyon sila nga dili na makigbahin sa bakak nga relihiyon sumala sa ilang pagsabot niana. Gani, sukad pa niadtong Nobyembre 1879, ang Zion’s Watch Tower prangkang naghisgot sa ilang Kasulatanhong baroganan: “Ang matag relihiyon nga nangangkon nga putling ulay nga naminyo kang Kristo, apan sa pagkatinuod nahiusa ug gipaluyohan sa kalibotan (mananap), kinahanglan nga atong hukman sumala sa pagtawag niini sa kasulatan ingong bigaong relihiyon,” nga nagtumong sa Dakong Babilonya. (Pin. 17:1, 2) Ang mahinadlokon sa Diyos nga mga lalaki ug babaye nahibalo kon unsay angay nilang buhaton. Dili sila makadahom nga panalanginan sila sa Diyos kon padayon nilang suportahan ang bakak nga mga relihiyon. Tungod niini, daghang Estudyante sa Bibliya ang naghimog sulat nga mobiya na sila sa ilang relihiyon. w16.11 5:2, 3

May kalabotan sa tinuig nga paghandom sa kamatayon ni Jesus, nabasa ba nimo ang Roma 8:15-17? Lagmit imo kanang nabasa. Ang maong teksto nagpatin-aw kon sa unsang paagi nahibaloan sa mga Kristohanon nga sila gidihogan​—ang balaang espiritu nagpamatuod uban sa ilang espiritu. Ang dinihogang mga Kristohanon mao ang pangunang gitumong niana nga kapitulo. Ilang nadawat “ang espiritu” ingong mga “nagahulat sa pagsagop ingong mga anak, ang pagpagawas gikan sa [ilang unodnong] mga lawas.” (Roma 8:23) Oo, sila mahimong mga anak sa Diyos didto sa langit. Posible kana tungod kay sila nabawtismohan, ug gipadapat sa Diyos ang lukat ngadto kanila, gipasaylo ang ilang mga sala, ug gipahayag silang matarong ingong espirituwal nga mga anak. (Roma 3:23-26; 4:25; 8:30) Bisan pa niana, angay sab mainteres sa Roma kapitulo 8 kadtong dunay yutan-ong paglaom kay sa usa ka diwa giisip sila sa Diyos ingong matarong. Makabenepisyo usab sila sa tambag nga gihatag alang sa mga matarong. w16.12 2:1-3

Unsay gipasabot ni Jesus dihang siya miingon: “Ayaw gayod kamo kabalaka”? Dayag nga wala niya ipasabot nga ang usa ka alagad sa Diyos dili gayod makasinatig kabalaka. Hinunoa, gitabangan ni Jesus ang iyang mga tinun-an nga makaamgo nga ang dili angay, o sobra, nga kabalaka dili makasulbad sa mga problema. Duna gyoy mga problema matag adlaw, busa dili angayng dugangan sa mga Kristohanon ang ilang kabalaka pinaagi sa paghunahuna sa nangagi o sa umaabot nga mga problema. Tingali ang usa ka Kristohanon mabalaka bahin sa mga problema nga posibleng mahitabo sa umaabot. Apan, dili ka angayng mabalaka sa mga butang nga wala pa mahitabo. Ngano? Tungod kay sagad, dili ingon ka grabe sa atong gihunahuna ang tinuod nga mahitabo. Dugang pa, walay situwasyon nga dili makontrolar sa Diyos kang kinsa ikatugyan nimo ang tanan nimong kabalaka. Makaseguro ka nga gantihan sa Diyos ang mga matinumanon kaniya ug tabangan sila sa pagsagubang sa ilang kabalaka bahin sa nangagi, presenteng kahimtang, ug sa umaabot. w16.12 3:13, 16

Si Haring Saul nagsugod pagmando sa Israel ingong makasaranganon ug tinahod nga tawo. (1 Sam. 9:1, 2, 21; 10:20-24) Pero wala madugay human siya mahimong hari, siya nakahimog mapangahasong mga buhat. Dihang ang propeta sa Diyos nga si Samuel wala moabot sa Gilgal sa eksaktong oras, si Saul nawad-ag pailob. Ang mga Filistehanon nangandam na alang sa gubat, ug ang mga Israelinhon nangahadlok ug daghan kanila ang mibiya kang Saul. Siya lagmit naghunahuna, ‘Kinahanglan kong molihok dayon.’ Busa, gitanyag niya ang halad ngadto sa Diyos, bisan pag wala siyay katungod sa pagbuhat niana. Wala malipay si Jehova niana. (1 Sam. 13:5-9) Pag-abot ni Samuel sa Gilgal, iyang gibadlong si Saul. Imbes dawaton ang pagtul-id, si Saul mihimog mga pasumangil, iyang gibasol ang uban, ug gipakamenos ang iyang nabuhat. (1 Sam. 13:10-14) Didto nagsugod ang iyang sunodsunod nga mga buhat sa pagkamapangahason. Busa, gisalikway siya ni Jehova ingong hari. (1 Sam. 15:22, 23) Bisag maayo ang sinugdanan ni Saul, siya nakaagom ug mapait nga kataposan.​—1 Sam. 31:1-6. w17.01 3:1, 2

Sa katibuk-an, si David nagkinabuhi nga matinumanon. Bisan pa niana, may higayon nga nakahimo siyag seryosong sala. Siya nakapanapaw uban ni Bat-seba. (2 Sam. 11:1-21) Dili na mabag-o ni David ang nahitabo. Ug dili niya malikayan ang resulta sa iyang kasaypanan. Gani, antoson ni David ang pipila sa maong resulta sa tibuok niyang kinabuhi. (2 Sam. 12:10-12, 14) Busa, nagkinahanglan siyag pagtuo. Kinahanglan siyang mosalig nga sanglit sinsero ang iyang paghinulsol, si Jehova magpasaylo ug magtabang kaniya sa pagsagubang sa mga resulta sa iyang binuhatan. Kay dili hingpit, kitang tanan makasala. Ang pipila ka sayop mas seryoso kay sa uban. Sa pipila ka kahimtang, dili na nato mabag-o ang nahitabo. Tingali kinahanglan natong sagubangon ang mga resulta sa atong nahimo. (Gal. 6:7) Pero makasalig ta sa giingon sa Diyos, nga kon kita mahinulsolon, si Jehova motabang kanato panahon sa kalisdanan​—bisag kita pa ang hinungdan niana.​—Isa. 1:18, 19; Buh. 3:19. w17.01 1:10-12

Ang pagkamakasaranganon motabang sab nato sa paghimog maayong mga desisyon bisan pag dili nato bug-os mahibaloan o makontrolar ang mga resulta. Pananglitan, kon kita mosulod sa usa ka matang sa bug-os panahong pag-alagad, unsay mahitabo nato kon kita masakit? Unsa kaha kon magkinahanglag tabang ang atong edarang ginikanan? Unsaon nato pag-atiman ang atong kaugalingon kon tigulang na ta? Dili nato matubag kining tanang pangutana bisan pag kapila ta moampo o manukiduki. Ang atong pagsalig kang Jehova motabang nato nga ilhon ug dawaton usab ang atong mga limitasyon. Human sa pagpanukiduki, pagkonsulta sa uban, ug pag-ampo alang sa giya, kinahanglan tang molihok sumala sa paggiya sa espiritu sa Diyos. (Eccl. 11:4-6) Mahimong panalanginan ni Jehova ang atong mga desisyon, o tabangan ta niya nga mohimog bag-ong mga tumong.​—Prov. 16:3, 9. w17.01 4:14

Si Adan ug Eva kinahanglang modesisyon kon unsay buhaton. Sundon ba nila si Jehova, o maminaw sila sa halas? Sila midesisyon nga supakon ang Diyos. (Gen. 3:6-13) Tungod sa ilang pagrebelde kang Jehova, nawala ni Adan ug Eva ang ilang kahingpitan. Dugang pa, ang ilang pagrebelde nagpahimulag kanila kang Jehova kay “putli kaayo ang [iyang] mga mata aron motan-aw sa daotan.” Maong siya “dili makahimo sa pagtan-aw sa kasamok [o, pagkadaotan].” (Hab. 1:13) Kon iya kadtong gibalewala, mameligro ang tibuok kalalangan​—sa langit ug sa yuta. Labaw sa tanan, kon walay himoon ang Diyos bahin sa nahimong sala didto sa Eden, makuwestiyon ang iyang pagkakasaligan. Pero dili gyod usbon ni Jehova ang iyang mga sukdanan; dili gyod niya kini supakon. (Sal. 119:142) Busa, ang pagbaton ni Adan ug Eva ug kagawasan sa pagpili wala maghatag nilag katungod nga supakon ang balaod sa Diyos. Ingong resulta sa ilang pagrebelde kang Jehova, sila namatay ug mibalik sa abog nga ilang gigikanan.​—Gen. 3:19. w17.02 1:8, 10, 11

Sukad sa sinugdan sa iyang ministeryo, si Jesus nagpagiya sa Kasulatan. Bisan una siya mamatay, siya mikutlo sa mga tagna bahin sa Mesiyas. (Mat. 27:46; Luc. 23:46) Pero ang mga lider sa relihiyon niadtong panahona nagsalikway sa Pulong sa Diyos kon mosumpaki kini sa ilang tradisyon. Sa pagkutlo sa gisulti ni Jehova pinaagi kang Isaias, si Jesus miingon bahin nila: “Kining mga tawhana nagpasidungog kanako pinaagi sa ilang mga ngabil, apan ang ilang kasingkasing halayo kaayo kanako. Kawang lamang nga sila nagpadayon sa pagsimba kanako, tungod kay sila nagtudlo sa mga sugo sa mga tawo ingon nga mga doktrina.” (Mat. 15:7-9) Gitugotan ni Jesus nga ang Pulong sa Diyos maggiya dili lamang sa iyang mga buhat kondili sa iyang pagpanudlo usab. Dihang gikuwestiyon siya sa mga lider sa relihiyon, wala niya gamita ang iyang dakong kaalam o taas nga kasinatian. Hinunoa, iyang giila ang Kasulatan ingong kinalabwang awtoridad.​—Mat. 22:33-40. w17.02 3:18, 19

Ang mga Saksi ni Jehova kinabubut-ong nagpasidungog sa mga opisyales, sumala sa gidahom kanila ug sa naandan sa ilang nasod. Kita makigkooperar sa mga opisyales samtang nagbuhat sila sa ilang trabaho. Siyempre, ang atong pagpasidungog ug pagpaluyo kanila dunay makataronganon ug Kasulatanhong limitasyon. Dili ta mosunod kon ang ilang ipabuhat supak sa balaod sa Diyos o naglapas sa atong neyutralidad. (1 Ped. 2:13-16) Ang mga alagad ni Jehova kaniadto nagpakitag sumbanan sa ilang pagpakiglabot sa gobyerno ug sa mga opisyales. Dihang ang Imperyo sa Roma nagpahigayon ug census, si Jose ug Maria mibiyahe paingon sa Betlehem aron magparehistro, bisag hapit nang manganak si Maria. (Luc. 2:1-5) Sa ulahi, dihang gipasakaag sumbong si Pablo, siya matinahorong midepensa ug naghatag ug nahiangayng pasidungog kang Haring Herodes Agripa ug kang Festo, ang gobernador sa Romanhong probinsiya sa Judea.​—Buh. 25:1-12; 26:1-3. w17.03 1:9, 10

Dihang gisundog sa mga Israelinhon ang makasasalang buhat sa mga Canaanhon, wala na sila panalipdi ni Jehova. (Maghu. 2:1-3, 11-15; Sal. 106:40-43) Lagmit dili sayon para sa mga pamilya ang pagpabiling maunongon kang Jehova niadtong malisod nga mga panahon! Bisan pa niana, gipakita sa Bibliya nga dihay mga maunongon, sama kang Jepte, Elkana, Ana, ug Samuel, kinsa determinadong mabatonan ang pag-uyon sa Diyos. (1 Sam. 1:20-28; 2:26) Nagkinabuhi kita sa kalibotan diin ang mga tawo naghunahuna ug nagagawi nga susama sa mga Canaanhon​—sila mahiligon sa sekso ug kapintasan, ug materyalistiko. Si Jehova tin-awng nagpasidaan kanato, sama sa iyang gihimo sa mga Israelinhon, aron panalipdan kita sa maong mga impluwensiya. Duna kitay makat-onan sa kasaypanan sa mga Israelinhon. (1 Cor. 10:6-10) Kinahanglan tang maningkamot sa pagwagtang sa bisan unsang panghunahuna nga sama nianang sa mga Canaanhon. (Roma 12:2) Naningkamot ba ta sa pagbuhat niana? w16.04 1:4-6

Dihang mohimo tag importanteng desisyon, hinungdanon nga gamiton ang Bibliya ingong tuboran sa tambag ug mangayo sa giya ni Jehova. Si Jehova makahatag nato sa mga hiyas nga gikinahanglan aron makahimog desisyon nga kaharmonya sa iyang kabubut-on. Batasana ang pagpangutana: ‘Kini ba nga desisyon magpamatuod sa akong gugma kang Jehova? Kini ba makahatag ug kalipay ug kalinaw sa akong pamilya? Ug kini ba magpakita nga ako mapailobon ug maluloton?’ Si Jehova dili mamugos nato sa paghigugma ug pag-alagad niya. Nahiuyon sa kagawasan sa pagpili nga iyang gihatag nato, gitahod niya ang atong responsabilidad ug katungod sa ‘pagpili alang sa atong kaugalingon’ kon moalagad ba ta niya. (Jos. 24:15; Eccl. 5:4) Apan gidahom niya nga buhaton nato ang ubang desisyon nga atong gihimo base sa iyang giya. Kon kita may pagtuo sa paagi ni Jehova sa pagbuhat sa mga butang ug kon ipadapat nato ang mga prinsipyo nga iyang gitagana, kita makahimog maalamong mga desisyon ug makapamatuod nga kita dili mabalhinon sa tanan natong dalan.​—Sant. 1:5-8; 4:8. w17.03 2:17, 18