Pebrero

Unsang “buluhaton” ang kinahanglang taposon sa pagkamalahutayon? Kini makatabang nato nga “mahimong bug-os ug maayo sa tanang bahin, nga dili makulangan sa bisan unsa.” (Sant. 1:4) Ang mga pagsulay sagad magpadayag sa atong mga kahuyangan, mga bahin sa atong personalidad nga kinahanglang pauswagon. Apan kon molahutay ta sa maong mga kalisdanan, ang atong Kristohanong personalidad mahimong mas bug-os, o maayo. Pananglitan, kita tingali mahimong mas mapailobon, mapabilhon, ug mabination. Tungod kay taposon sa pagkamalahutayon ang hinungdanong buluhaton niini sa pag-umol kanato ingong mga Kristohanon, ayawg ikompromiso ang mga prinsipyo sa Kasulatan aron lang taposon ang mga pagsulay nga imong maatubang. Pananglitan, komosta kon nakigbisog ka sa mahugawng mga hunahuna? Imbes magpadala sa tentasyon, mainampoong isalikway ang maong mga tinguha. Sa ingon, mapalig-on nimo ang pagpugong sa kaugalingon. Gisupak ka ba sa dili magtutuong membro sa pamilya? Imbes magpadala sa pagpit-os, magmadeterminado nga ipadayon ang tibuok kasingkasing nga pagsimba. Hinumdomi: Aron uyonan sa Diyos, kinahanglan tang molahutay.​—Roma 5:3-5; Sant. 1:12. w16.04 2:15, 16

Nahibalo kita nga ang sobrang pagpasigarbo sa atong tribo, kultura, o nasod kasumpaki sa panglantaw ni Jehova sa tawhanong pagmando ug sa pamilya. Siyempre, dili gusto sa Diyos nga isalikway nato ang atong kultura. Sa pagkatinuod, gilalang kita ni Jehova nga lahi sa usag usa, ug kita nalipay ug nakadayeg sa pagkadaiya sa tawhanong pamilya. Bisan pa niana, angay natong hinumdoman nga sa panglantaw sa Diyos, ang tanang tawo managsama ra. (Roma 10:12) Ang sobrang pagpasigarbo sa atong nasod maoy gamot sa nasyonalismo ug mahimong unang tikang nga motultol sa pagkompromiso. Ang mga Kristohanon mahimong maapektohan niana nga garbo, kay bisan ang pipila sa unang siglo nagpihig sa ilang mga igsoon tungod sa nasyonalidad niini. (Buh. 6:1) Unsaon nato pagkahibalo nga nagsugod na paggamot kanato ang sayop nga matang sa garbo? Ibutang ta nga ang usa ka igsoon gikan sa laing nasod mihatag ug sugyot. Isalikway ba dayon nimo nâ, nga maghunahuna, ‘Mas maayo ang among paagi dinhi’? Imbes himoon kana, angay natong ipadapat ang inspiradong tambag nga makita sa teksto karong adlawa. w16.04 4:12, 13

Gisangyaw ni Jesus ang “maayong balita sa gingharian,” ug mao sab nay iyang gidahom nga himoon sa iyang mga tinun-an. Unsang grupo sa katawhan ang nagsangyaw sa maong mensahe sa “tanang kanasoran”? (Mat. 28:19) Dayag kaayo ang tubag​—ang mga Saksi ni Jehova lang. Usa ka Saksi ang giingnan sa usa ka misyonaryong pari nga nakapuyo siya sa lainlaing nasod ug iyang gipangutana ang mga Saksi sa maong mga nasod kon unsang mensahe ang ilang ginasangyaw. Unsay ilang gitubag kaniya? Ang pari miingon: “Hungog kaayo silang tanan kay usa ray ilang tubag: ‘Ang maayong balita sa Gingharian.’” Apan, ang maong mga Saksi dili “hungog” kondili nagkahiusa sila, nga maoy angayng ipakita sa matuod nga mga Kristohanon. (1 Cor. 1:10) Ang Gingharian sa Diyos mao usab ang pangunang mensahe sa magasing Ang Bantayanang Torre Nagapahayag sa Gingharian ni Jehova. Kining magasina mabatonan diha sa 254 ka pinulongan, ug halos 59 ka milyong kopya sa matag gula ang ginaimprenta, nga naghimo niana nga labing kaylap napanagtag nga magasin sa kalibotan. w16.05 2:6

Ingong mga magmamantala sa Gingharian, tingali gusto natong magregular payunir. Aron mahimo kini, mohimo kitag mga lakang sa pagpasimple sa atong kinabuhi. Pero dili gihapon ta segurado kon magmalipayon ba gyod ta kon diyutay ra kitag materyal nga mga butang. Siyempre, walay sugo sa Bibliya nga magpayunir ta; makapadayon gihapon kita sa pag-alagad kang Jehova ingong matinumanong mga magmamantala. Pero gipasaligan kita ni Jesus nga kadtong mohimog mga sakripisyo alang sa Gingharian makadawat ug dagayang panalangin. (Luc. 18:29, 30) Dugang pa, ang Kasulatan nagpakita nga malipay si Jehova kon kita mohimog “kinabubut-ong mga halad” sa pagdayeg kaniya ug malipayong mobuhat sa atong maarangan sa pagpalambo sa matuod nga pagsimba. (Sal. 119:108) Gikan niini nga mga teksto, uban sa pag-ampo alang sa giya, dili ba nato masabtan ang panghunahuna ni Jehova? Ang pagpamalandong niini mahimong makatabang nato sa paghimog desisyon nga praktikal alang kanato ug panalanginan sa atong langitnong Amahan. w16.05 3:13

Kita usab nakasinati sa mga problema nga gihisgotan diha sa mga publikasyon para sa mga batan-on. Kitang tanan angayng modepensa sa atong pagtuo, magkontrolar sa atong emosyon, magsalikway sa makadaot nga impluwensiya, ug maglikay sa dili maayong panagkauban ug kalingawan. Kini ug ang uban pang topiko gihisgotan diha sa mga publikasyon para sa mga tin-edyer. Angay bang ikaulaw sa gulanggulang nang mga Kristohanon ang pagbasag mga publikasyon nga para sa mga batan-on? Dili gayod! Bisag kini gidisenyo sa paagi nga makadani sa mga batan-on, ang mga impormasyon niini gibase sa way paglubad nga mga prinsipyo sa Kasulatan, ug kitang tanan makabenepisyo niining espirituwal nga mga tagana. Gawas sa pagtabang sa mga batan-on sa pag-atubang sa ilang mga problema, ang atong mga publikasyon nagtabang nila nga mouswag sa espirituwal ug masuod kang Jehova. Ang gulanggulang nga mga Kristohanon makabenepisyo usab niana.​—Eccl. 12:13. w16.05 5:15, 16

“Si Jehova nga atong Diyos maoy usa lamang ka Jehova.” Puwersado kaayo kana nga pamulong! Ang maong pahinumdom nagpalig-on sa mga Israelinhon sa pag-atubang sa mga problema dihang sila misulod sa Yutang Saad sa pagpanag-iya niini. Kon atong pamalandongon ang maong mga pulong, kita mapalig-on sa pag-atubang sa umaabot nga dakong kasakitan ug makatampo ta sa panaghiusa sa Paraiso. Hinaot nga magpadayon kita sa paghatag ug bug-os nga debosyon kang Jehova pinaagi sa tibuok kalag nga paghigugma ug pag-alagad kaniya ug sa pagpaningkamot nga mahuptan ang panaghiusa sa Kristohanong kongregasyon. Kon padayon nato kanang buhaton, seguradong makita nato nga matuman ang giingon ni Jesus bahin niadtong iyang pagahukman ingong mga karnero: “Umari, kamong gipanalanginan sa akong Amahan, panunda ninyo ang gingharian nga giandam alang kaninyo sukad pa sa pagkatukod sa kalibotan.”​—Mat. 25:34. w16.06 3:2, 20

Tungod sa garbo, mahimong depensahan nato ang atong gibuhat, maong lisod na tang umolon. Nasakitan ka na ba tungod sa gisulti o gibuhat sa usa ka igsoon o tungod kay nawad-an kag pribilehiyo? Kon oo, unsay imong reaksiyon? Natandog ba ang imong garbo? O mas importante ba kanimo nga makigdait sa igsoon ug magmaunongon kang Jehova? (Sal. 119:165; Col. 3:13) Kon ang usa magbatasan sa pagpakasala, tingali magtago pa gani niana, malisdan siya sa pagdawat sa tambag sa Diyos. Mas sayon na kaniya ang pagpakasala. (Eccl. 8:11) Usa ka brader nga kaniadto nagbatasan sa pagtan-awg pornograpiya miangkon, “Nahimo kong hinawayon sa mga ansiyano.” Ang iyang pagtan-awg pornograpiya nakadaot sa iyang espirituwalidad. Ngadtongadto, nahibaloan sa uban ang iyang binuhatan, ug siya gitabangan sa mga ansiyano. Siyempre, kitang tanan dili hingpit. Pero, kon mahimo na tang hinawayon o depensahan na nato ang sayop nga panggawi imbes mangayog pasaylo ug tabang sa Diyos, tingali nagsugod nag katig-a ang atong kasingkasing. w16.06 2:5, 6

Ang mamiminaw ni Jesus nabalaka sa mga butang nga dili unta nila angayng kabalak-an. Gipatin-aw ni Jesus kon nganong angay nilang hunongon kana. Ang dili angayng pagkabalaka, bisan bahin sa mga butang nga ilang gikinahanglan, makapabahin sa ilang hunahuna ug makabalda kanila, nga makalimtan na ang espirituwal nga mga butang. Naghunahuna gyod si Jesus sa iyang mga tinun-an kay gipasidan-an niya sila bahin niini nga kapeligrohan sa upat pa ka higayon diha sa iyang Wali sa Bukid. (Mat. 6:27, 28, 31, 34) Si Jesus nahibalo kon unsay gikinahanglan sa mga tawo matag adlaw. Gawas pa niana, nahibalo siya sa lisod nga mga kahimtang nga atubangon sa iyang mga sumusunod nga magkinabuhi sa “kataposang mga adlaw,” nga gihulagway ingong “makuyaw nga mga panahong lisod sagubangon.” (2 Tim. 3:1) Kini nga mga kahimtang maglakip sa kawalay-trabaho, kamahal sa palaliton, kakulang sa pagkaon, ug grabeng kakabos nga masinati sa daghan. Apan, nahibalo sab si Jesus nga ‘ang kinabuhi labaw pa kay sa pagkaon ug ang lawas kay sa besti.’ w16.07 1:8, 9

Kon bug-os natong masunod ang tanang kinahanglanon ni Jehova, angayan tang modawat sa iyang kalulot, o pagkamaayo. Pero, dili nato kana mahimo. Busa, ang maalamong hari nga si Solomon misulat: “Walay tawong matarong sa yuta nga nagpadayon sa pagbuhat sa maayo ug dili makasala.” (Eccl. 7:20) Si apostol Pablo miingon: “Ang tanan nakasala ug wala makaabot sa himaya sa Diyos,” ug “ang suhol nga ginabayad sa sala mao ang kamatayon.” (Roma 3:23; 6:23a) Kana ang angay kanato. Hinunoa, si Jehova nagpahayag sa iyang gugma sa makasasalang katawhan pinaagi sa dili matupngang buhat sa dili-takos nga kalulot. Ang iyang kinadak-ang gasa, “ang iyang bugtong nga Anak,” iyang gipadala sa yuta aron mamatay alang kanato. (Juan 3:16) Busa si Pablo misulat bahin kang Jesus nga siya karon “gipurongpurongan ug himaya ug dungog tungod sa pag-antos sa kamatayon, aron nga pinaagi sa dili-takos nga kalulot sa Diyos makatilaw siya ug kamatayon alang sa matag tawo.” (Heb. 2:9) Oo, “ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.”​—Roma 6:23b. w16.07 3:3, 4

Bahin na sa kinabuhi ang kaminyoon. Ang paghisgot sa sinugdan ug katuyoan sa kaminyoon makatabang nato sa pagbatog hustong panglantaw niini nga relasyon ug sa pagtagamtam sa mga panalangin niini. Human lalanga sa Diyos ang unang tawo nga si Adan, gisugo siya sa pagngalan sa tanang hayop. Pero, “alang sa tawo walay nakaplagan nga katabang ingon nga iyang katimbang.” Busa, gipahinanok sa Diyos si Adan, gikuha ang usa niya ka gusok, gihimo kining babaye, ug gidala kang Adan. (Gen. 2:20-24) Busa, ang Diyos maoy nagmugna sa kaminyoon. Sumala ni Jesus, si Jehova miingon: “[Ang] lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod.” (Mat. 19:4, 5) Ang pagkuha sa Diyos ug gusok gikan kang Adan aron himoong babaye lagmit nakapaamgo sa unang magtiayon sa kasuod sa ilang relasyon. Walay kahikayan para sa diborsiyo o pagbatog kapin sa usa ka kapikas. w16.08 1:1, 2

Si Jesus sagad makig-estorya sa uban bahin sa Gingharian. Pananglitan, nindot ug epektibo ang pagpakig-estorya ni Jesus sa usa ka babaye sa atabay ni Jacob duol sa siyudad sa Sikar. (Juan 4:5-30) Nakig-estorya usab siya kang Mateo Levi, usa ka maniningil ug buhis. Gidawat ni Mateo ang imbitasyon ni Jesus nga mahimong sumusunod. Panahon sa kombira sa balay ni Mateo, nadungog niini ug sa uban pa ang taastaas nga pagpakig-estorya ni Jesus sa mga tawo. (Mat. 9:9; Luc. 5:27-39) Sa laing higayon, si Jesus mahigalaong nakig-estorya kang Natanael, kinsa negatibog panglantaw sa mga taga-Nasaret. Hinunoa, nausab ang panglantaw ni Natanael. Midesisyon siya nga mokat-og dugang bahin sa gitudlo ni Jesus nga taga-Nasaret. (Juan 1:46-51) Busa duna tay maayong rason nga bansayon ang bag-ohang mga magmamantala sa pagpakig-estorya sa mga tawo sa mahigalaon ug kalmadong paagi. Kadtong atong gitabangan niining paagiha seguradong malipay dihang ilang makita ang sinserong mga tawo nga mosanong sa personal nga interes ug mabinationg mga pulong. w16.08 4:7-9

Kon dili masulbad ang seryosong mga problema, ang usa ka kapikas o ang magtiayon lagmit maghunahunang magbulag o magdiborsiyo. Ang panagbulag dili angayng yanoyanohon. Bisag ang panagbulag mao tingaliy solusyon sa seryosong mga problema, sagad mopatungha kinig dugang problema. Human sublia ni Jesus ang giingon sa Diyos nga ang lalaki mobiya sa iyang amahan ug inahan ug moipon sa iyang asawa, siya miingon: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mat. 19:3-6; Gen. 2:24) Nagpasabot usab kini nga bisan ang bana o asawa wala tugoti sa ‘pagbungkag kon unsay gihiusa sa Diyos.’ Gusto ni Jehova nga ang magtiayon mag-uban sa tibuok nilang kinabuhi. (1 Cor. 7:39) Ang paghinumdom nga kitang tanan manubag sa Diyos magpalihok sa mga magtiayon sa pagpaningkamot nga sulbaron dayon ang mga problema aron dili kini modako. w16.08 2:10, 11

Ang atong mga kaaway mahimong moatake kanato sa panahon nga wala nato damha ug dihang luya ta, busa kinahanglan tang magmaalerto. Ang awhag nga dili ‘magpadaog sa daotan’ nagpakita nga mahimo natong mapildi ang daotan. Posible kana kon padayon natong suklan ang daotan. Apan, mahimong mapildi ta ni Satanas, sa iyang daotang kalibotan, ug sa atong mga kahuyangan kon kita dili magmabinantayon ug mohunong sa pagpakigbisog. Busa, ayaw gayod pagpapildi kang Satanas! (1 Ped. 5:9) Aron magmadaogon, kinahanglang dili nato kalimtan kon nganong nakigbisog ta. Ug aron mabatonan ang pag-uyon ug panalangin sa Diyos, angay natong hinumdoman ang pasalig sa Hebreohanon 11:6: “[Si bisan kinsa] nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.” Ang Gregong pulong nga gihubad ug “matinuorong nagapangita” nagpasabot ug pagpaningkamot pag-ayo.​—Buh. 15:17. w16.09 2:4, 5

Ang Pulong sa Diyos naghatag ug praktikal nga giya nga makatabang nato sa pagpilig sinina nga makahimaya sa Diyos. Bisan pa niana, makapili ta kon unsay atong isul-ob. Lainlain tag gusto ug ikaarang sa pagpalit. Pero ang atong sinina kinahanglang hapsay, hinlo, desente, haom sa okasyon, ug dalawaton sa atong lugar. Tinuod, dili kanunayng sayon ang paghimog desisyon nga nagpakitag maayong panghukom ug pagkamakasaranganon, ug nagkonsiderar sa tanan nga angayng tagdon. Daghang tindahan ang namaligyag uso nga sinina, busa nagkinahanglag panahon ug paningkamot ang pagpangitag desenteng sayal, bestida, ug blawos o amerkana ug pantalon nga dili fitting kaayo. Pero, seguradong mamatikdan ug pabilhan sa atong mga igsoon ang atong paningkamot sa pagpangitag nindot ug haom nga sinina. Ug bisag kinahanglan tang magsakripisyo, mobati gyod tag katagbawan dihang mahimaya nato ang atong mahigugmaong langitnong Amahan pinaagi sa atong sininaan. w16.09 3:15, 16

Ang mga bata hilig mag-imadyin. Busa mga ginikanan, paggamit kanunay ug mga ilustrasyon dihang magtudlo kanila. Ang epektibong mga ilustrasyon makapalig-on sa pagsalig sa bata sa katukma sa Bibliya. Pananglitan, tagda ang teksto karong adlawa. Unsaon nimo pagpakita nga inspirado kining tekstoha? Siyempre, puwede ra nimong isulti nga tinuod ang maong impormasyon. Pero, mahimo sab nimong palihokon ang imahinasyon sa bata. Sultii siya nga si Job nabuhi sa panahon nga wala pay teleskopyo ug spaceship. Ipailustrar kaniya kon nganong malisdan ang pipila sa pagtuo nga ang dako kaayong butang, sama sa yuta, naglutaw sa kawanangan. Mahimong gamiton niya ang bola o bato sa pag-ilustrar sa punto nga ang usa ka bug-at nga butang kinahanglang dunay patongan. Pinaagi nianang ilustrasyona, makat-onan sa imong anak nga dugay nang gipasulat ni Jehova sa Bibliya ang tinuod nga mga impormasyon bisag wala pa kana madiskobrehi sa mga tawo.​—Neh. 9:6. w16.09 5:9, 12

Ang pagtuo naglangkit ug labaw pa kay sa pagkahibalo sa katuyoan sa Diyos. Kini maoy kusganong puwersa nga magpalihok sa usa sa pagkinabuhi uyon sa kabubut-on sa Diyos. Ang pagbatog pagtuo sa paagi sa Diyos sa pagluwas sa katawhan magpalihok sa usa ka magtutuo sa pagpaambit sa maayong balita. Ang atong paglaom nga matagamtam ang walay kataposang kinabuhi sa bag-ong kalibotan nagdepende sa atong pagbatog pagtuo ug pagpalig-on kanunay niana. Mahimong ipakasama nato kana sa usa ka tanom. Kinahanglan nato kining bisbisan aron kini motambok ug motubo. Dili sama sa artipisyal nga tanom, ang buhi nga tanom padayong mag-usab-usab. Kini mahimong malawos tungod sa kakulag tubig o motubo kon dunay igong suplay sa tubig. Kon panagsa ra ning bisbisan, ang tambok nga tanom sa ngadtongadto mamatay. Mao man usab ang atong pagtuo. Kini malawos ug mamatay, ingnon ta, kon pasagdan. (Luc. 22:32; Heb. 3:12) Pero kon ato kining atimanon, ang atong pagtuo magpabiling buhi ug padayong ‘motubo,’ ug kita “mahimsog sa pagtuo.”​—2 Tes. 1:3; Tito 2:2. w16.10 4:4, 5

Dihang si Daniel ug ang iyang mga kauban nabihag, gusto sa mga Babilonyanhon nga sagopon nila ang kultura sa Babilonya pinaagi sa pagtudlo nila sa “pinulongan sa mga Caldeanhon.” Dugang pa, ang opisyal sa palasyo nga gitugyanan sa pagbansay kanila naghatag nilag Babilonyanhong ngalan. (Dan. 1:3-7) Ang ngalan nga gihatag kang Daniel konektado kang Bel, ang pangunang diyos sa Babilonya. Gusto ni Haring Nabucodonosor nga patuohon si Daniel nga mas gamhanan ang diyos sa Babilonya kay sa Diyos ni Daniel nga si Jehova. (Dan. 4:8) Bisag gidalitan si Daniel sa lamiang pagkaon sa hari, “gihukom [niya] sa iyang kasingkasing” nga dili niya “hugawan ang iyang kaugalingon.” (Dan. 1:8) Tungod kay kanunay siyang nagtuon sa “[sagradong] mga basahon” diha sa iyang kaugalingong pinulongan, nagpabilin siyang himsog sa espirituwal samtang nagpuyo sa langyawng nasod. (Dan. 9:2) Busa, mga 70 ka tuig sukad nga miabot siya sa Babilonya, ilado gihapon siya sa iyang Hebreohanong ngalan.​—Dan. 5:13. w16.10 2:7, 8

Si Jesus nagtudlo sa ‘matinumanong ulipon’ aron mahimong bugtong galamiton sa pagtaganag espirituwal nga pagkaon. (Mat. 24:45-47) Sukad sa 1919, ang hinimayang si Jesu-Kristo naggamit sa maong ulipon sa pagtabang sa iyang mga sumusunod nga masabtan ang Basahon sa Diyos ug tumanon ang mga instruksiyon niana. Pinaagi sa pagsunod sa mga instruksiyon sa Bibliya, atong gipalambo ang kahinlo, kalinaw, ug panaghiusa sa kongregasyon. Maayong pangutan-on nato ang kaugalingon, ‘Maunongon ba ko sa galamiton nga gigamit ni Jesus karon?’ Ang sinulat nga Pulong ni Jehova nagtudlo kanato mahitungod sa langitnong bahin sa iyang organisasyon. Pananglitan, si propetang Ezequiel nakadawat ug panan-awon diin ang langitnong bahin sa organisasyon sa Diyos girepresentahan sa langitnong karo. (Ezeq. 1:4-28) Ingon nga si Kristo ug ang balaang mga manulonda hapit nang maglaglag sa daotang kalibotan, ang karo ni Jehova paspas nga nagdagan aron sa pagbindikar sa iyang pagkasoberano ug pagbalaan sa iyang balaang ngalan! w16.11 3:9, 10

Sama sa unang mga sumusunod ni Jesus, magtigom ta aron makakat-on ug madasig. (1 Cor. 14:31) Bisan ang eksperyensiyadong mga alagad sa Diyos nagkinahanglag pagdasig. Tagda si Josue. Siya matinumanong nag-alagad sulod sa daghang katuigan. Pero si Jehova nagsugo kang Moises nga dasigon si Josue: “Itudlo si Josue ug dasiga siya ug palig-ona siya, tungod kay siya ang motabok nga magauna niining katawhan ug siya ang magpahinabo nga mapanunod nila ang yuta nga imong makita.” (Deut. 3:27, 28) Hapit nang pas-anon ni Josue ang bug-at nga responsabilidad sa pagpanguna sa Israel aron panag-iyahon ang Yutang Saad. Iyang maatubang ang mga kapakyasan, ug mapildi siya sa gubat labing menos kausa. (Jos. 7:1-9) Mao diay nga kinahanglang dasigon ug palig-onon si Josue! Busa, dasigon sab nato ang mga ansiyano, apil ang mga tigdumala sa sirkito, kinsa nagkugi sa pag-atiman sa panon sa Diyos.​—1 Tes. 5:12, 13. w16.11 1:12, 13

Nasabtan sa mga Estudyante sa Bibliya nga dili igo ang pagpahibalo lang sa ilang mga paryente, suod nga mga higala, ug membro sa simbahan bahin sa ilang baroganan maylabot sa bakak nga relihiyon. Ang tibuok kalibotan kinahanglang mahibalo kon unsa gayod ang Dakong Babilonya​—usa ka relihiyosong pampam! Busa, sukad sa Disyembre 1917 hangtod sa sayong bahin sa 1918, libolibo ka Estudyante sa Bibliya ang madasigong nanagtag ug 10,000,000 ka kopya sa tract nga may artikulong “Pagkapukan sa Babilonya”​—usa ka bug-at nga paghukom sa Kakristiyanohan. Sama sa atong mahunahunaan, puwerteng sukoa sa mga lider sa relihiyon; pero ang mga Estudyante sa Bibliya nagpadayon gihapon niining importanteng buluhaton. Determinado silang sundon ang “Diyos ingong magmamando inay ang mga tawo.” (Buh. 5:29) Unsay atong ikahinapos? Imbes naulipon sa Dakong Babilonya panahon sa gubat, kining Kristohanong mga lalaki ug babaye sa pagkatinuod anam-anam nga nahigawas sa Babilonya ug nagtabang sa uban sa pagbuhat niana. w16.11 5:2, 4

Ang pipila lagmit maghunahuna nga kini maoy pagtandi tali niadtong wala sa kamatuoran ug niadtong anaa sa kamatuoran, tali niadtong dili Kristohanon ug niadtong mga Kristohanon. Hinunoa, si Pablo nagsulat niadtong “anaa sa Roma ingong mga hinigugma sa Diyos, nga gitawag aron mahimong mga balaan.” (Roma 1:7) Busa, gitandi ni Pablo ang mga Kristohanon nga nagalakaw sumala sa unod ug ang mga Kristohanon nga nagalakaw sumala sa espiritu. Iyang gilangkit ang pagkinabuhi nga ‘nahiuyon sa unod’ ug “ang makasasalang mga pangibog” nga kaniadto “naglihok diha sa [ilang] mga sangkap.” (Roma 7:5) Busa, dihang naghisgot siya niadtong “nagtumong sa ilang mga hunahuna diha sa mga butang sa unod,” si Pablo nagtumong sa mga tawo nga gigamhan o nakapokus sa ilang mga tinguha ug kiling ingong dili hingpit nga mga tawo. Sa panguna, kini sila mao kadtong nagtuman sa ilang mga pangandoy, pagbati, ug pangibog, kini man may kalabotan sa sekso o dili. w16.12 2:5, 7

Usahay mabalaka ang usa tungod sa iyang mga nabuhat o kasaypanan kaniadto. Dihay mga higayon nga si Haring David mibati nga ‘milapaw sa iyang ulo ang iyang kasaypanan.’ Siya miangkon: “Mitiyabaw ako tungod sa pag-agulo sa akong kasingkasing.” (Sal. 38:3, 4, 8, 18) Sa maong kahimtang, unsay maalamong buhaton ni David? Unsay iyang gibuhat? Siya misalig sa kaluoy ug pagpasaylo ni Jehova. (Sal. 32:2, 3, 5) Usahay, mabalaka ka bahin sa presenteng kahimtang. Pananglitan, dihang gisulat ni David ang Salmo 55, nahadlok siyang patyon. (Sal. 55:2-5) Bisan pa niana, wala niya tugoti nga mohuyang ang iyang pagsalig kang Jehova tungod sa kabalaka. Kanunayng giampo ni David ang iyang mga problema, apan nahibalo sab siya nga hinungdanon ang paghimog praktikal nga mga paagi sa pagsulbad sa problema. (2 Sam. 15:30-34) Duna tay makat-onan kang David. Imbes magpadaog sa kabalaka, himoa ang imong maarangan sa pagsulbad sa problema ug dayon masaligong itugyan kang Jehova ang tanan. w16.12 3:14, 15

Gidawat ni David ang pagtul-id nga gikan sa representante ni Jehova, ang propetang si Natan. Siya miampo usab kang Jehova, nga misugid sa iyang mga sala ug mipahayag sa iyang sinserong tinguha nga maangkon pag-usab ang pag-uyon ni Jehova. (Sal. 51:1-17) Imbes sobrang maluya tungod sa iyang nahimo, si David nakakat-on sa iyang sayop. Oo, wala na niya usba ang maong seryosong mga sala. Katuigan sa ulahi, siya namatay nga matinumanon, ug ang iyang rekord sa paghupot ug integridad dili mapapas sa panumdoman ni Jehova. (Heb. 11:32-34) Unsay atong makat-onan sa panig-ingnan ni David? Kon kita makahimog seryosong sala, kinahanglan tang sinserong maghinulsol ug mangayog pasaylo kang Jehova. Kinahanglan natong isugid ang atong mga sala kaniya. (1 Juan 1:9) Angay usab kitang moduol sa mga ansiyano, kinsa makatabang nato sa espirituwal. (Sant. 5:14-16) Pinaagi sa pagsunod sa mga kahikayan ni Jehova, gipakita natong misalig ta sa iyang saad nga pasayloon ta. Human niana, kinahanglang dili na nato buhaton pag-usab ang atong mga sayop. Mopadayon sab ta sa pag-alagad kang Jehova ug molaom sa umaabot.​—Heb. 12:12, 13. w17.01 1:13, 14

Unsa ang “mapangahasong mga buhat”? Sumala sa kahulogan, ang tawong mapangahason magdalidali o magbuotbuot sa pagbuhat sa mga butang nga wala siyay katungod. Usahay mahimo tang mapangahason tungod sa napanunod nga sala. Pero sama sa nahitabo kang Haring Saul, kon maanad ta sa paghimo niini, sa madugay o sa madali mawad-an ta sa pag-uyon sa Diyos. Ang Salmo 119:21 nag-ingon bahin kang Jehova: “Ikaw nagbadlong sa . . . mga mapangahason.” Ngano? Ang mapangahasong mga buhat mas grabe kay sa dili tinuyong mga sayop. Una, kon dili ta makasaranganon, dili nato mapasidunggan si Jehova ingong atong Diyos ug Magmamando. Ikaduha, kon mobuhat ta sa mga butang nga wala tay katungod, lagmit moresulta kinig panag-away. (Prov. 13:10) Ug ikatulo, sa dihang makita sa uban nga kita nagmapangahason, tingali mapakaulawan ta. (Luc. 14:8, 9) Dili gyod maayog resulta ang pagkamapangahason. Sama sa gipakita sa Kasulatan, maayo gyod nga magmakasaranganon. w17.01 3:4, 5

Kay dili na hingpit, dili na masundog ni Adan ang mga hiyas sa Diyos sa hingpit nga paagi. Dili lang ang iyang maayong kaugmaon ang giwala, gipasa pa niya sa iyang mga anak ang pagkadili-hingpit, sala, ug kamatayon. (Roma 5:12) Gikuhaan niyag kahigayonan ang iyang mga kaliwat nga mabuhi sa walay kataposan. Dugang pa, dili na makapatunghag hingpit nga anak si Adan ug Eva, ingon man ang ilang mga anak. Human mapatalikod si Adan ug Eva gikan sa Diyos, si Satanas nga Yawa nagpadayon sa pagpahisalaag sa mga tawo hangtod karon. (Juan 8:44) Hinunoa, gihigugma gihapon sa Diyos ang katawhan. Bisan pa sa pagrebelde ni Adan ug Eva, gusto ni Jehova nga masuod ang katawhan kaniya. Dili niya gusto nga naay mamatay. (2 Ped. 3:9) Busa, human dayon sa rebelyon, ang Diyos mihimog mga kahikayan aron makapakigsuod pag-usab ang katawhan kaniya. Gihimo niya kana sa paagi nga dili maglapas sa iyang matarong nga mga sukdanan.​—Juan 3:16. w17.02 1:12-14

Kon sundogon nato ang Diyos nga lantawon ang maayong mga hiyas sa uban, mouswag ang atong pagpabili sa atong papel diha sa pag-alagad kang Jehova. Imbes kanunayng magtinguhag atensiyon o modiktar sa uban, kinahanglan tang mangayo ug modawat ug mga sugyot sa uban. Malipay sab ta dihang makadawat ug mga pribilehiyo ang uban. Ug atong dayegon si Jehova samtang makita nato nga iyang gipanalanginan ang “tibuok kapunongan sa [atong] mga igsoon dinhi sa kalibotan.” (1 Ped. 5:9) Makaugmad sab ta sa maayong panghukom kon makasaranganon natong lantawon ang mga butang sumala sa panglantaw ni Jehova. Pinaagi sa regular nga pagtuon, pag-ampo, ug pagpadapat sa atong nakat-onan, anam-anam natong mapalig-on ang atong konsensiya. (1 Tim. 1:5) Makat-onan nato nga unahon ang kaayohan sa uban. Kon buhaton nato ang atong bahin, si Jehova nagsaad nga siya ‘magtapos sa atong pagbansay,’ nga magtabang nato nga maugmad ang pagkamakasaranganon ug ubang diyosnong hiyas.​—1 Ped. 5:10. w17.01 4:17, 18

Ang atong mga igsoon sa pagtuo takos gayod sa pasidungog ug pagtahod. Tinuod kini ilabina ang mga ansiyano kinsa nanguna sa panon. Pasidunggan nato kini nga mga igsoon bisag unsay ilang nasyonalidad, edukasyon, kahimtang sa katilingban, o pagkabutang. Ang Bibliya nagtawag kanilang “gasa [nga] mga lalaki,” ug sila may hinungdanong papel sa kahikayan sa Diyos​—ang pag-atiman sa iyang katawhan. (Efe. 4:8) Hunahunaa ang mga ansiyano, tigdumala sa sirkito, membro sa Komite sa Sangang Buhatan, ug membro sa Nagamandong Lawas. Ang atong mga igsoon sa unang siglo nagtahod gayod niadtong gitudlo nga manguna kanila, ug mao sab kanay atong gibuhat karon. Dili nato idolohon ang iladong mga representante sa organisasyon o trataron nga daw mga anghel. Bisan pa niana, atong gitahod ug gipasidunggan ang maong mga igsoon tungod sa ilang paghago ug pagkamapainubsanon.​—2 Cor. 1:24; Pin. 19:10. w17.03 1:13

Lahi gayod si Jesus kang Herodes Agripa I, kinsa nahimong hari sa Judea! Sa usa ka okasyon diin ang mga kaaway ni Herodes gustong makigdait kaniya, siya nagsul-ob ug “harianong besti.” Ang mga tawo nga nakadayeg pag-ayo kaniya naninggit: “Tingog sa usa ka diyos, ug dili sa tawo!” Dayag nga mibukad ang atay ni Herodes sa maong pagdayeg. Pero “dihadiha gihampak siya sa manulonda ni Jehova, tungod kay wala niya ihatag ang himaya ngadto sa Diyos, ug gikaon siya sa mga ulod ug nabugtoan sa gininhawa.” (Buh. 12:21-23) Seguradong walay makataronganong tawo nga tua didto ang moingon nga si Herodes gipili ni Jehova ingong lider. Sa laing bahin, si Jesus naghatag ug lig-ong pamatuod nga siya pinili sa Diyos, ug kanunay niyang gipasidunggan si Jehova ingong Supremong Lider sa iyang katawhan. Dili kabubut-on ni Jehova nga si Jesus mahimong lider sulod lang sa pipila ka tuig. “Ang tanang awtoridad gihatag na kanako sa langit ug sa yuta,” siya miingon human sa iyang pagkabanhaw. “Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.”​—Mat. 28:18-20. w17.02 3:20, 21