Marso

Ang mga igsoon ni Jepte sa amahan nasina ug nagdumot kaniya, busa ila siyang gipapahawa ug gihikawan sa iyang panulondon ingong panganay. (Maghu. 11:1-3) Bisan pa niana, siya mitabang kanila sa dihang sila mihangyo sa iyang tabang. (Maghu. 11:4-11) Ang pakigbugno aron labanan ang ngalan ni Jehova mas importante alang kang Jepte kay sa bisan unsang personal nga mga kabingkilan. Determinado siyang magmaunongon kang Jehova, ug miresulta kini sa iyang kaayohan ug nianang sa uban. (Heb. 11:32, 33) Unsay atong makat-onan sa ehemplo ni Jepte? Tingali may mga igsoong nakapasakit kanato o dili maayog pagtratar kanato. Kon mao, dili gayod nato tugotan ang kahiubos nga mopugong nato sa pagtambong sa tigom o pag-alagad kang Jehova ug sa pagpakig-uban sa mga igsoon. Agig pagsundog kang Jepte, atong tugotan ang mga sukdanan sa Diyos sa pagtabang kanato nga mabuntog ang malisod nga mga kahimtang ug mahimong maayong ehemplo sa uban.​—Roma 12:20, 21; Col. 3:13. w16.04 1:7, 9, 10

Kita kinahanglang molahutay, dili lang sulod sa usa ka yugto sa panahon, kondili hangtod sa kataposan. Sa pag-ilustrar: Handurawa nga hapit nang malunod ang usa ka barko. Aron maluwas, ang mga pasahero kinahanglang molangoy hangtod makaabot sa baybay. Ang usa nga mohunong paglangoy pipila ka metros gikan sa baybay sama rag dangatan sa usa nga mas unang mihunong paglangoy. Sa susama, kinahanglan kitang molahutay hangtod makaabot kita sa bag-ong kalibotan. Ang atong kinabuhi nagdepende sa atong paglahutay. Angay natong huptan ang tinamdan ni Pablo, kinsa kaduha miingon: “Kami wala moangka.” (2 Cor. 4:16) Makasalig gayod kita nga si Jehova motabang kanato sa paglahutay hangtod sa kataposan. Ang atong baroganan susama nianang kang Pablo ingon sa gipahayag sa Roma 8:37-39: “Kita bug-os nga nagmadaogon pinaagi kaniya nga nahigugma kanato. Kay kombinsido ako nga dili ang kamatayon ni kinabuhi ni mga manulonda ni mga kagamhanan ni mga butang nga ania karon ni mga butang nga moabot ni mga gahom ni gihabogon ni giladmon ni bisan unsang ubang linalang ang makabulag kanato gikan sa gugma sa Diyos nga anaa kang Kristo Jesus nga atong Ginoo.” w16.04 2:17, 18

Pangayo kang Jehova ug kaalam sa pag-ila ug pag-atubang sa mga situwasyon nga mahimong makapakompromiso nimo sa imong neyutralidad. Kon napriso ka o kaha gisilotan sa laing paagi tungod sa imong pagbarog dapig sa matuod nga pagsimba, pag-ampo alang sa kusog aron maisogon nimong madepensahan ang imong pagtuo ug maantos ang bisan unsang paglutos nga moabot. (Buh. 4:27-31) Si Jehova makapalig-on kanimo pinaagi sa iyang Pulong. Palandonga ang mga teksto nga makatabang nimo sa paghupot sa imong neyutralidad ilalom sa pagsulay. Memoryaha na kana karon, aron kana makapalig-on nimo bisag wala kay Bibliya nianang panahona. Ang Pulong sa Diyos makapalig-on sa imong paglaom sa umaabot nga mga panalangin sa Gingharian. Hinungdanon kini nga paglaom aron makalahutay kita sa paglutos. (Roma 8:25) Pagpilig mga teksto nga naghubit sa mga panalangin nga ilabinang gilaoman nimo nga matagamtam, ug handurawa ang imong kaugalingon nga nagtagamtam na sa maong mga panalangin sa Paraiso. w16.04 4:14, 15

Ang klero sa Kakristiyanohan wala magsangyaw sa Gingharian sa Diyos. Kon mosulti man sila bahin sa Gingharian, daghan ang moingon nga kana maoy pagbati o kahimtang sa kasingkasing sa usa ka Kristohanon. (Luc. 17:21) Wala nila tabangi ang mga tawo sa pagsabot nga ang Gingharian sa Diyos maoy langitnong gobyerno nga si Jesu-Kristo ang Magmamando, nga kini ang sulbad sa tanang problema sa katawhan, ug nga sa dili madugay wagtangon niini ang tanang pagkadaotan gikan sa yuta. (Pin. 19:11-21) Hinunoa, mas gusto nilang hinumdoman si Jesus panahon sa Pasko ug sa Easter. Morag wala sila masayod kon unsay buhaton ni Jesus ingong bag-ong Magmamando sa yuta. Wala usab nila masabti kon unsay angayng motibo sa pagsangyaw. Kini dili aron mangolektag kuwarta ug magtukod ug dagkong simbahan. Ang pulong sa Diyos dili angayng inegosyo. (2 Cor. 2:17) Kadtong nagsangyaw sa mensahe dili angayng mangitag personal nga ganansiya sa buluhaton nga ilang gihimo.​—Buh. 20:33-35. w16.05 2:7, 8

Ibutang ta nga gusto nimong sundogon ang usa ka estilo sa sinina nga lagmit makatugaw sa pipila diha sa kongregasyon. Pero wala kay nahibaloang espesipikong balaod sa Bibliya nga nagdili niana. Unsay panghunahuna ni Jehova labot niini? Si apostol Pablo naghatag niining inspiradong tambag: “Ang mga babaye magdayandayan sa ilang kaugalingon sa mahapsay nga sinina, uban ang pagkamakasaranganon ug maayong panghunahuna, dili pinaagi sa mga estilo sa pagsalapid sa buhok ug sa bulawan o sa mga perlas o sa mahalon kaayong sapot, kondili sa paagi nga nahiangay sa mga babaye nga nagpaila nga masimbahon sa Diyos. (1 Tim. 2:9, 10) Kining tambaga mapadapat usab sa Kristohanong mga lalaki. Ingong debotadong mga alagad ni Jehova, kita naghunahuna dili lang sa atong kaugalingong kagustohan kondili sa epekto sa atong sininaan ug pamostura ngadto sa uban. Ang pagkamakasaranganon ug gugma magpalihok kanato sa pagkonsiderar sa opinyon sa mga isigkamagtutuo aron dili sila matugaw o mapandol pa gani.​—1 Cor. 10:23; Filip. 3:17. w16.05 3:14

Dihang mirebelde si Adan sa iyang Magbubuhat, dili na siya anak sa Diyos. Bisan pa niana, usa ka ‘bagang panganod’ sa mga kaliwat ni Adan ang mipili sa pagdapig sa pagkasoberano sa Diyos. (Heb. 12:1) Pinaagi sa mapainubsanong pagpasakop sa ilang Maglalalang, ilang gipakita nga siya, dili si Satanas, ang gusto nilang mahimong Amahan ug Magkukulon. (Juan 8:44) Ang ilang pagkamaunongon sa Diyos magpahinumdom nato sa teksto niining adlawa. Karon, ang tanang nagasimba kang Jehova sa espiritu ug kamatuoran naningkamot usab nga mahimong mapainubsanon ug mapinasakopon. Giisip nilang kadungganan ang pagtawag kang Jehova ingong Amahan ug ang pagpasakop kaniya ingong ilang Magkukulon. Ikaw ba samag humok nga yutang kulonon diha sa kamot sa Diyos, nga andam magpaumol aron mahimong sudlanan nga bililhon sa iyang mga mata? Giila ba sab nimo nga padayon pang ginaumol sa Diyos ang imong mga igsoon sa pagtuo? w16.06 1:2, 3

Karon, duol na ang bag-ong kalibotan, ug ang atong pagtuo ginasulayan. Busa maayong susihon nato ang kalidad sa atong pagtuo. Pananglitan, puwede natong susihon ang atong panglantaw bahin sa giingon ni Jesus sa Mateo 6:33. Pangutan-a ang kaugalingon: ‘Ang ako bang mga prayoridad ug desisyon nagpakita nga nagtuo gyod ko sa giingon ni Jesus? Ibaylo ba nako ang pagtambong ug tigom o pagsangyaw aron mas makakuwarta? Unsay akong himoon kon magkagrabe ang presyur sa akong trabaho? Magpaumol ba ko sa kalibotan ug tingali mobiya pa gani sa kamatuoran?’ Tagda ang laing pananglitan. Hunahunaa ang usa ka alagad ni Jehova nga dili kanunayng mosunod sa mga sukdanan sa Bibliya, tingali maylabot sa daotang panagkauban, pagpalagpot, o kalingawan. Pangutan-a ang kaugalingon, ‘Ingon ba sab ko niana?’ Kon mamatikdan nato nga nagsugod nag ka tig-a ang atong kasingkasing, kinahanglang susihon dayon nato ang atong pagtuo! Magmatinud-anon sa imong kaugalingon, ug gamita kanunay ang Pulong sa Diyos sa pagtul-id sa imong hunahuna. w16.06 2:8, 9

Ang matinumanong mga alagad ni Jehova sa yuta, ang iyang mga Saksi, naglangkob sa usa ka organisasyon nga talagsaon gayod. Tinuod, gilangkoban kini sa mga tawong dili hingpit ug may mga kasaypanan. Bisan pa niana, ang balaang espiritu sa Diyos naggiya sa iyang tibuok yutang kongregasyon aron kini mouswag. Dihang nagsugod ang kataposang mga adlaw niadtong 1914, diyutay pa lang ang mga alagad sa Diyos dinhi sa yuta. Pero gipanalanginan ni Jehova ang ilang buluhatong pagsangyaw. Sa misunod nga mga dekada, minilyon ang nakakat-on sa kamatuoran sa Bibliya ug nahimong mga Saksi ni Jehova. Sa pagkatinuod, gitagna na ni Jehova kining talagsaong pag-uswag dihang siya misulti sa mga pulong sa teksto karong adlawa ug midugang: “Ako, si Jehova, magpadali niini sa kaugalingong panahon niini.” Kini nga tagna natuman gayod niining kataposang mga adlaw. Gani, daghang nasod ang mas diyutayg populasyon kay sa gidaghanon sa katawhan sa Diyos. w16.06 4:1, 2

Segurado si Jesus nga kon gitagan-ag pagkaon sa iyang langitnong Amahan ang mga langgam, tagan-an sab niya ang mga tawo sa ilang panginahanglan. (1 Ped. 5:6, 7) Dili ta niya hungitag pagkaon, apan mahimong panalanginan niya ang atong paningkamot sa pagpananom o sa pagpangitag kuwarta aron makapalit ug pagkaon. Kon magkalisodlisod ta, mahimong palihokon niya ang uban nga ipaambit kon unsay ilang nabatonan. Bisag wala hisgoti ni Jesus nga tagan-ag puy-anan ang mga langgam, si Jehova naghatag kanilag kinaiyanhong katakos, abilidad, ug materyales sa paghimog salag. Tabangan sab ta ni Jehova nga makabaton ug haom nga puy-anan alang sa atong pamilya. Dihang gisulti ni Jesus ang mga pulong sa teksto karong adlawa, way duhaduha nga siya naghunahuna nga hapit na niyang ihalad ang iyang kinabuhi alang sa katawhan. (Itandi ang Lucas 12:6, 7.) Si Jesus wala mamatay para sa mga langgam, apan namatay siya alang kanato aron mabuhi ta sa walay kataposan.​—Mat. 20:28. w16.07 1:11-13

Sa unsang paagi napanunod sa mga tawo ang sala ug kamatayon nga naghampak natong tanan? Ang Bibliya nag-ingon: “[Tungod] sa paglapas sa usa ka tawo [si Adan] ang kamatayon nagmando ingong hari” sa iyang mga kaliwat. (Roma 5:12, 14, 17) Pero ikalipay kay makapili ta nga dili na mandoan o gamhan sa sala. Pinaagi sa pagpasundayag ug pagtuo sa halad lukat ni Kristo, kita nagpailalom sa pagmando sa dili-takos nga kalulot ni Jehova. (Roma 5:20, 21) Bisag makasasala pa ta, duna tay mahimo aron dili ta magamhan sa sala. Kon madaog ta sa sala, mangayo tag pasaylo kang Jehova. Busa, kita mailalom sa pagmando sa dili-takos nga kalulot. Unsay resulta? Si Pablo miingon: “Ang dili-takos nga kalulot sa Diyos . . . nagtudlo kanato sa pagsalikway sa pagkadili-diyosnon ug sa kalibotanong mga tinguha ug sa pagkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.”​—Tito 2:11, 12. w16.07 3:5, 6

Ang unang kaminyoon nadaot kay giabusohan ni Adan ug Eva ang ilang kagawasan sa pagpili pinaagi sa pagsupak kang Jehova. “Ang orihinal nga halas,” si Satanas nga Yawa, naglimbong kang Eva pinaagi sa pagpatuo kaniya nga ang pagkaon sa bunga “sa kahoy sa kahibalo sa maayo ug sa daotan” maghatag ug espesyal nga kahibalo nga makatabang niya sa paghukom kon unsay maayo ug daotan. Wala niya tahora ang pagkaulo sa iyang bana kay wala niya kini konsultaha. Ug imbes sugton ang Diyos, gidawat ni Adan ang bunga nga gihatag ni Eva. (Pin. 12:9; Gen. 2:9, 16, 17; 3:1-6) Dihang gipangutana sila sa Diyos, gibasol ni Adan ang iyang asawa. Unya, gibasol ni Eva ang halas sa paglimbong kaniya. (Gen. 3:12, 13) Pagkahuyang nga pangatarongan! Tungod kay gisupak sa unang magtiayon si Jehova, sila giisip ingong mga rebelde. Usa gayod kini ka pasidaan kanato! Aron molampos ang kaminyoon, ang matag usa kinahanglang mopas-an sa iyang responsabilidad ug motuman kang Jehova. w16.08 1:1, 4, 5

Ang mga pagdahom nga dili realistiko lagmit maoy hinungdan sa problema sa magtiayon. Kon dili matuman ang gipangandoy sa usa nga malipayong kaminyoon, siya tingali mobating dili tagbaw ug gilimbongan, ug maglagot pa gani. Mahimong mopatunghag problema ang kalainan sa emosyon ug pagpadako sa matag usa, o ang dili pagsinabtanay maylabot sa kuwarta, mga ugangan ug bayaw, ug pagpadako sa mga anak. Apan, ikalipay nga kadaghanan sa Kristohanong magtiayon nakasulbad sa ilang mga problema kay nagpagiya sila sa Diyos. Ang mga magtiayon nga may seryosong mga problema angayng magpatambag sa mga ansiyano. Kining eksperyensiyadong mga brader makatabang sa mga magtiayon sa pagpadapat sa tambag sa Pulong sa Diyos. Sa pagsulbad sa mga problema sa kaminyoon, kinahanglan sab tang moampo alang sa espiritu ug tabang ni Jehova sa pagpadapat sa mga prinsipyo sa Bibliya ug pagpasundayag sa bunga sa espiritu.​—Gal. 5:22, 23. w16.08 2:11-13

Mubo lang ang panahon sa ministeryo ni Jesus. Bisan pa niana, migahin siyag panahon sa pag-ugmad sa interes sa mga tawo labot sa maayong balita. Pananglitan, nagtudlo si Jesus sa panon gamit ang usa ka sakayan ingong plataporma. Nianang higayona, milagroso niyang gitabangan si Pedro nga makakuhag dakong duot sa isda ug gisulti niya ang mga pulong sa teksto niining adlawa. Unsay resulta sa gisulti ug gibuhat ni Jesus? “Gibiyaan [ni Pedro ug sa iyang mga kauban] ang tanan ug misunod [kang Jesus].” (Luc. 5:1-11) Si Nicodemo, nga membro sa Sanhedrin, nainteres sa gitudlo ni Jesus. Gusto niyang makakat-og dugang pero nahadlok siya kon unsay isulti sa mga tawo kon makig-estorya siya kang Jesus sa publiko. Nagpasibo si Jesus ug migahig panahon; nakig-estorya siya kang Nicodemo panahon sa kagabhion diin walay tawong makakita. (Juan 3:1, 2) Migahig panahon ang Anak sa Diyos aron palig-onon ang pagtuo sa uban. Sa susama, kinahanglang maningkamot usab kita sa pagbalikduaw ug pagdumalag pagtuon sa Bibliya sa mga interesado sa ilang kombenyenteng oras. w16.08 4:10, 11

Ang atong pagkamakasaranganon naglakip sa paghimog mapainubsanong pagsusi sa kaugalingon pinasukad sa kaputli ug pagkabalaan ni Jehova, kay bug-os kitang nagdepende kaniya alang sa kinamaayohang giya. Kini naglakip usab sa pagpakitag pagtahod sa pagbati ug opinyon sa uban. Busa, kita ‘makalakaw nga makasaranganon uban sa Diyos’ pinaagi sa pagkinabuhi uyon sa iyang taas nga sukdanan ug sa pagpakitag pagtahod sa konsensiya sa uban. Ang atong sininaan kinahanglang magpakita nga kita mga magsisimba ni Jehova. Angayng makita sa mga igsoon ug sa uban nga kita haom nga nagrepresentar sa atong matarong nga Diyos. Siya may taas nga sukdanan, ug kalipay nato ang pagsunod niana. Angayng komendahan ang mga igsoon kansang maayong pamostura ug panggawi nakadani sa sinserong mga tawo ngadto sa nagaluwas ug kinabuhing mensahe, ug naghimaya ug nakapalipay kang Jehova. w16.09 3:18-20

Determinado kaayo si Jacob, ug iyang gipamatud-an nga dili siya moatras sa maong hagit! (Gen. 32:24-26) Ug gipanalanginan gyod siya sa iyang paglahutay. Gihatag kaniya ang haom nga ngalang Israel, (nga nagkahulogang “Nakigtigi [Nakigbisog] sa Diyos” o “Ang Diyos Nakigtigi”). Naangkon ni Jacob ang ganti nga gitinguha usab nato​—ang pag-uyon ug panalangin ni Jehova. Ang pinalanggang asawa ni Jacob nga si Raquel naghinamhinam nga makita kon unsaon pagpanalangin ang kaliwat ni Jacob. Pero si Raquel walay anak. Sa iyang adlaw, makapaguol kaayo ang maong kahimtang. Sa unsang paagi si Raquel nakapadayon sa pagpakigbisog bisan pa sa mga kahimtang nga makapahigawad ug dili niya mausab? Wala siya mawad-ig paglaom. Hinunoa, padayon siyang nakigbisog pinaagi sa makanunayong pag-ampo. Gidungog ni Jehova ang kinasingkasing nga pangamuyo ni Raquel, ug sa ulahi gipanalanginan siyag mga anak.​—Gen. 30:8, 20-24. w16.09 2:6, 7

Hinungdanon gayod nga itudlo ninyo sa inyong mga anak ang kabililhon sa mga prinsipyo sa Bibliya. (Sal. 1:1-3) Dunay daghang paagi sa pagbuhat niana. Pananglitan, puwede ninyong ipaimadyin sa inyong mga anak nga mopuyo sila sa usa ka layo nga isla ug mopili silag mga tawo nga ikauban didto. Dayon pangutan-a sila, “Unsang mga hiyas ang kinahanglang mabatonan sa matag usa aron sila magkasinabot ug magmalinawon?” Mahimong hisgotan sab ninyo ang maalamong tambag sa Galacia 5:19-23. Nianang paagiha, matudloan ninyo silag duha ka importanteng leksiyon. Una, ang pagsunod sa mga sukdanan sa Diyos moresultag tinuod nga kalinaw ug panaghiusa. Ikaduha, pinaagi sa pagtudlo kanato karon, giandam ta ni Jehova sa kinabuhi sa bag-ong kalibotan. (Isa. 54:13; Juan 17:3) Ikapasiugda ninyo ang maong mga punto pinaagi sa pagpilig mga eksperyensiya gikan sa atong mga publikasyon. Magamit ninyo ang serye sa Bantayanang Torre nga “Ang Bibliya Makabag-o sa Kinabuhi.” w16.09 5:13, 14

Bisag puliki tingali kaayo ta, kinahanglan gihapon tang mogahin ug panahon para sa personal nga pagtuon ug pamilyahanong pagsimba. (Efe. 5:15) Apan ang atong tumong dili lang ang pagkobreg pipila ka panid o pag-andam ug mga komento para sa tigom. Kinahanglang seguroon nato nga matandog ang atong kasingkasing sa Pulong sa Diyos ug mapalig-on ang atong pagtuo. Kinahanglang balanse ta. Dihang magtuon, angay natong hunahunaon dili lang ang espirituwal nga panginahanglan sa uban kondili ang atoa usab. (Filip. 1:9, 10) Angay natong hinumdoman nga dihang kita mangandam sa pagsangyaw, tigom, o pakigpulong, dili sa tanang higayon nga mapadapat sa atong kaugalingon ang atong gitun-an. Sa pag-ilustrar: Bisag tilawan sa kosinero ang mga potahe sa dili pa kini idalit, dili to igo aron magpabilin siyang himsog. Kinahanglang magluto siyag sustansiyadong pagkaon para sa iyang kaugalingon. Sa susama, angay sab natong tagan-an ang atong kasingkasing ug espirituwal nga pagkaon nga makatagbaw sa atong panginahanglan. w16.10 2:10, 11

Makita ang kahulogan sa pagtuo diha sa Hebreohanon 11:1. Ang pagtuo nagpasiugda sa duha ka butang nga dili makita: (1) “Mga butang nga gilaoman”​—mahimong maglakip kini sa mga saad sa Diyos sa umaabot, sama sa pagtapos sa tanang pagkadaotan ug sa bag-ong kalibotan. (2) “Mga katinuoran bisan tuod wala makita.” Niining kontekstoha, ang Gregong pulong nga gihubad ug “dayag nga pagpasundayag” nagtumong sa makapakombinsir nga ebidensiya sa dili makita nga katinuoran, sama sa paglungtad ni Jehova nga Diyos, Jesu-Kristo, mga manulonda, ug sa mga buluhaton sa langitnong Gingharian. Unsaon nato pagpamatuod nga buhi ang atong paglaom ug nagtuo kita sa mga butang nga dili makita nga gihisgotan sa Pulong sa Diyos? Pinaagi sa atong mga pulong ug buhat​—nga kon wala kana dili bug-os ang atong pagtuo. w16.10 4:6

Si Jehova ug Jesus nagpabili pag-ayo sa tanan natong gihimo sa pagsuportar sa buluhaton sa Gingharian, bisag limitado lang ang atong mahimo ug maamot tungod sa atong kahimtang. (Luc. 21:1-4; 2 Cor. 8:12) Pananglitan, ang pipila sa atong minahal nga edarang mga igsoon naningkamot pag-ayo aron regular nga makatambong ug makapakigbahin sa pagsangyaw. Dili ba angay nato silang dayegon ug dasigon? Oo, pahimusli ang kahigayonan sa pagdasig sa uban. Kon makakita tag kahigayonan sa paghatag ug komendasyon, ihatag dayon nato kana. Tagda ang nahitabo dihang si Pablo ug Bernabe didto sa Antioquia sa Pisidia. Ang tigdumalang mga opisyal sa sinagoga miingon kanila: “Mga katawhan, mga igsoon, kon kamo aduna may pulong sa pagdasig alang sa katawhan, isulti kini.” Si Pablo misanong pinaagig makapadasig nga pakigpulong. (Buh. 13:13-16, 42-44) Kon may kahigayonan ta sa pagsultig makapadasig nga mga pulong, isulti dayon nato kana. Kon batasanon nato ang pagdasig sa uban, lagmit dasigon sab ta nila.​—Luc. 6:38. w16.11 1:3, 15, 16

Pribilehiyo gayod nga mahimong bahin sa organisasyon ni Jehova! Kay nahibalo na ta sa mga kinahanglanon ug sukdanan sa Diyos, responsabilidad nato ang pagbuhat sa matarong ug pagdapig sa iyang pagmando. Samtang nagkagrabe ang pagkadaotan niining kalibotana, angay natong ‘dumtan ang daotan,’ sama sa panglantaw ni Jehova. (Sal. 97:10) Dili ta mosundog sa mga dili diyosnon ug moingon: “Ang maayo maoy daotan ug ang daotan maoy maayo.” (Isa. 5:20) Kay gusto natong pahimut-an ang Diyos, naningkamot tang magpabiling hinlo sa pisikal, moral, ug espirituwal. (1 Cor. 6:9-11) Kita nahigugma ug nagsalig kang Jehova, ug kita nagmaunongon kaniya pinaagi sa pagkinabuhi uyon sa iyang mga sukdanan nga nahisulat sa iyang bililhong Basahon. Ug atong gisunod ang maong mga sukdanan diha sa balay, kongregasyon, trabahoan, eskuylahan, ug bisag asa. w16.11 3:13

Tininuod ang pag-alagad sa mga Estudyante sa Bibliya. Pero gikan niadtong mga tuig 1914 hangtod 1919, wala kaayo masabti sa mga igsoon ang bahin sa pagpasakop sa gobyerno. Maong ingong grupo, sila dili kanunayng neyutral kon bahin sa gubat. Pananglitan, dihang gideklarar sa presidente sa United States ang Mayo 30, 1918 ingong adlaw sa pag-ampo alang sa kalinaw, ang The Watch Tower nag-awhag sa mga Estudyante sa Bibliya nga moapil sa maong selebrasyon. Ang pipila mihatag ug pinansiyal nga suporta sa gubat, ug ang uban nagsundalo pa gani nga nagdalag armas. Pero, sayop ang paghinapos nga nabihag sa Dakong Babilonya ang mga Estudyante sa Bibliya tungod kay nagkinahanglan silag pagtul-id ug pagdisiplina. Sa laing bahin, nasabtan nila ang ilang obligasyon sa pagbulag gikan sa bakak nga relihiyon, ug sila halos nahigawas na gikan nianang tibuok kalibotang imperyo panahon sa Gubat sa Kalibotan I.​—Luc. 12:47, 48. w16.11 5:9

Tingali makapangutana ka kon nganong gipasiugda ni Pablo sa mga dinihogan ang kapeligrohan sa pagkinabuhi nga “nahiuyon sa unod.” Ug ang susama bang kapeligrohan karon mahimong hulga usab sa mga Kristohanon, kinsa gidawat sa Diyos ingong iyang mga higala ug giisip nga matarong? Ikasubo, si bisan kinsa nga Kristohanon posibleng magsugod sa paglakaw nga nahiuyon sa makasasalang unod. Pananglitan, si Pablo misulat nga may pipila ka igsoon sa Roma nga nahimong ulipon “sa ilang kaugalingong mga tiyan [o, gana],” nga lagmit nagpasabot sa gana sa sekso o gana sa pagkaon, ilimnon, o ubang butang. Ang pipila kanila ‘nagdaldal sa mga inosente.’ (Roma 16:17, 18; Filip. 3:18, 19; Jud. 4, 8, 12) Hinumdomi usab, dihay panahon nga may usa ka Kristohanon sa Corinto nga “nagkuha sa asawa sa iyang amahan.” (1 Cor. 5:1) Nan, masabtan nato kon nganong gigamit sa Diyos si Pablo sa pagpasidaan sa mga Kristohanon batok sa “paghunahuna sa unod.” (Roma 8:5, 6) Kana nga pasidaan mapadapat usab karon. w16.12 2:5, 8, 9

Ang maayong komunikasyon, ang pagsulti sa imong gibati ngadto sa usa ka kasaligang higala, makatabang nimo sa pagsagubang sa kabalaka. Ang kapikas, suod nga higala, o ansiyano mahimong makatabang nimo nga mas masabtan ang imong kahimtang. Ang prangka ug matinud-anong komunikasyon dakog ikatabang nimo nga masabtan ug masagubang ang imong gikabalak-an. Ang Bibliya nag-ingon: “Mapakyas ang mga plano kon walay kompidensiyal nga panagsultihanay, apan diha sa panon sa mga magtatambag adunay kalamposan.” (Prov. 15:22) Si Jehova motabang usab sa mga Kristohanon sa pagsagubang sa kabalaka pinaagi sa senemanang mga tigom. Didto makauban nimo ang mga isigkamagtutuo nga nahingawa kanimo ug gustong modasig sa usag usa. (Heb. 10:24, 25) Ang maong “pagdinasigay” motabang nimo sa pagpalig-on sa imong espirituwalidad ug sa pagsagubang sa bisan unsang kabalaka.​—Roma 1:12. w16.12 3:17, 18

Kon kita nag-antos sa sakit o ubang problema nga wala tay mahimo, kinahanglang itugyan nato ang atong kabalaka kang Jehova, nga mosalig nga siya nagmahal kanato. (1 Ped. 5:6, 7) Kinahanglang buhaton sab nato ang atong maarangan aron makabenepisyo sa mga tigom ug sa ubang espirituwal nga mga tagana. (Heb. 10:24, 25) Komosta kadtong mga ginikanan nga dunay rebelyosong mga anak? Dili mapugos sa tigulang na nga si Samuel ang iyang mga anak nga lalaki sa pagpabiling maunongon sa matarong nga mga sukdanan nga iyang gitudlo kanila. (1 Sam. 8:1-3) Kinahanglan niya kadtong isalig kang Jehova. Bisan pa niana, si Samuel makahupot sa iyang integridad ug makapalipay gihapon sa iyang langitnong Amahan, si Jehova. (Prov. 27:11) Karon, daghang Kristohanong ginikanan ang dunay susamang situwasyon. Sila masaligon nga si Jehova andam nga modawat pag-usab niadtong mga makasasala nga maghinulsol. (Luc. 15:20) Sa samang panahon, ang maong mga ginikanan naningkamot pag-ayo nga magmaunongon kang Jehova, nga naglaom nga ang ilang panig-ingnan magpalihok sa ilang mga anak nga mobalik. w17.01 1:15, 16

Ang tawong mapainubsanon sagad matawag sab nga makasaranganon. Siya dunay hustong panglantaw sa iyang mga katakos ug kalamposan, moangkon sa iyang sayop, ug modawat ug mga sugyot ug bag-ong mga ideya. Makapalipay pag-ayo kang Jehova ang mga mapainubsanon. Sa Bibliya, ang pagkamakasaranganon nagtumong sab sa pagbaton ug hustong panglantaw sa kaugalingon ug sa pag-ila sa atong mga limitasyon. Sa orihinal nga Gregong pinulongan, ang maong termino nagpasiugda kon sa unsang paagi ang maong panglantaw makaapektar sa atong pakiglabot sa uban. Sa unsa tingaling mga kahimtang nga kita maghunahuna o mogawi nga dili makasaranganon? Tagda ang pipila ka timailhan. Tingali gihatagan nato ug sobrang importansiya ang atong kaugalingon o ang atong mga pribilehiyo. (Roma 12:16) Basin gusto natong hatagan tag espesyal nga pagtagad. (1 Tim. 2:9, 10) O kaha iinsistir nato ang atong opinyon tungod lang sa atong posisyon, mga koneksiyon, o personal nga panghunahuna nga dili na nato mamatikdan nga nahimo na tang mapangahason.​—1 Cor. 4:6. w17.01 3:6-8

Karon, ang buluhaton sa katawhan ni Jehova nagkadako ug nag-anam ka komplikado. Dihang sugdan ang bag-ong mga proyekto, bag-o sab ang mga pamaagi​—sagad naglangkit sa paggamit ug modernong teknolohiya. Ang pipila ka tigulang malisdan tingali sa pagsunod sa kanunayng nagauswag nga teknolohiya. (Luc. 5:39) Bisag dili pirmeng ingon niana ang kahimtang, ang mga bata-bata pa mas kusgan ug abtik kay sa mga tigulang. Busa, mahigugmaon ug praktikal gayod nga bansayon sa mga tigulang ang mga bata-bata pa sa pag-abaga ug dugang responsibilidad. (Sal. 71:18) Kadtong dunay mga katungdanan malisdan tingali sa pagdelegar sa buluhaton ngadto sa mga bata-bata pa. Ang pipila mahadlok nga mawala nila ang pribilehiyo nga ilang gimahal o ang uban dili gusto nga ipiyal sa mga bata-bata pa ang buluhaton kay basig dili kini magkadimao. Ang pipila mangatarongan nga wala silay panahon sa pagbansay sa uban. Sa laing bahin, ang mga bata-bata pa kinahanglang magmapailobon kon dili sila mahatagag dugang buluhaton. w17.01 5:3, 4

Si Jesus nahimong hingpit nga tawo, sama kang Adan sa sinugdan. (Juan 1:14) Pero dili sama kang Adan, si Jesus nagkinabuhi sumala sa sukdanan ni Jehova alang sa hingpit nga tawo. Bisag grabeng gisulayan, si Jesus wala gyod makasala o mosupak sa bisan unsang balaod sa Diyos. Ingong hingpit nga tawo, maluwas ni Jesus ang katawhan gikan sa sala ug kamatayon pinaagi sa paghatag sa iyang kinabuhi alang kanila. Siya ang katumbas sa kon unsa untay gidahom kang Adan​—usa ka hingpit nga tawo, bug-os maunongon ug matinumanon sa Diyos. (1 Tim. 2:6) Si Jesus nahimong halad lukat nga nagpaposible aron mabuhi sa walay kataposan ang “daghan”​—mga lalaki, babaye, ug kabataan. (Mat. 20:28) Oo, ang lukat mao ang yawi nga nagbukas sa kahigayonan aron matuman ang orihinal nga katuyoan sa Diyos. (2 Cor. 1:19, 20) Ang lukat naghatag ug kahigayonan sa tanang matinumanong tawo nga mabuhi sa walay kataposan. w17.02 1:15, 16

Ibutang ta nga naa ka sa tungatunga sa usa ka taas ug ngiob nga tunel. Tingali maghunahuna ka kon makita pa ba nimo pag-usab ang kahayag. Sa susama, may mga higayon tingali nga malumsan ka sa mga problema. Bisan si Jesus tingali mibatig sama niana. Siya ‘gisupak sa mga makasasala,’ gibiaybiay, ug gipatay pa gani diha sa “estaka sa pagsakit.” Seguradong mao kadto ang kinalisdang yugto sa iyang kinabuhi dinhi sa yuta! (Heb. 12:3) Pero naantos ni Jesus kadtong tanan. Iyang gihunahuna ang mga ganti sa iyang paglahutay, ilabina ang ikatampo niya sa pagbalaan sa ngalan sa Diyos ug pagbindikar sa pagkasoberano ni Jehova. Ang kangitngit sa mga pagsulay ni Jesus temporaryo lang, apan ang kahayag sa iyang langitnong ganti maoy dumalayon. Karon, ang mga pagsulay nga imong giatubang masakit tingali ug makapahugno pa gani. Apan hinumdomi nga temporaryo lang ang kasakitan nga imong masinati diha sa dalan padulong sa kinabuhing dayon. w16.04 2:10

Sa kalibotan karon, daghan ang dili na makonsensiya sa ilang mga sala, ug sila naghunahuna nga wala nila kinahanglana ang lukat. Wala sila makasabot kon unsa ang sala, kon unsay epekto niana, ug kon unsay buhaton aron mahigawas gikan sa pagkaulipon sa sala. Nahupayan ang sinserong mga tawo sa pagkahibalo nga tungod sa dakong gugma ug dili-takos nga kalulot ni Jehova, iyang gipadala ang iyang Anak dinhi sa yuta aron lukaton ta gikan sa sala ug kamatayon. (1 Juan 4:9, 10) Ang halad lukat ni Kristo mao ang kinadak-ang pamatuod sa gugma sa Diyos kanato ug nagpakita sa kadagaya sa Iyang dili-takos nga kalulot. Makapahupay gayod ang pagkahibalo nga kon magpasundayag tag pagtuo sa giulang dugo ni Jesus, mapasaylo ang atong mga sala ug makabaton tag hinlong konsensiya! (Heb. 9:14) Maayong balita gyod kana nga angayng isulti sa uban! w16.07 4:6, 7

Bug-os nga mapasaylo ang atong mga sala kon magpakita tag pagtuo sa lukat. Ang Pulong sa Diyos nagpasalig kanato nga ang atong mga sala mahimong “mapapas.” (Buh. 3:19-21) Pinasukad sa lukat, gisagop ni Jehova ang iyang dinihogan sa espiritung mga alagad ingong mga anak. (Roma 8:15-17) Kon bahin kanato nga sakop sa “ubang mga karnero,” sama rag nagbuhat na si Jehova ug sertipiko sa pagsagop nga gisulatan sa atong ngalan. Human kita mahingpit ug makalabang sa kataposang pagsulay, si Jehova malipay sa pagpirma sa sertipiko, ingnon ta, ug pagsagop kanato ingong iyang pinalanggang yutan-ong mga anak. (Roma 8:20, 21; Pin. 20:7-9) Ang gugma ni Jehova sa iyang bililhong mga anak walay kataposan. Ang mga benepisyo sa lukat magpabilin hangtod sa hangtod. Dili gayod mawala ang bili niini nga gasa. Walay tawo o gahom ang makakuha niini kanato. w17.02 2:15, 16

Dihang gikabig kita ni Jehova aron mahimong iyang higala, seguradong nasayod siya kon unsang mga kahuyangan ang lisod natong buntogon. Ug nahibalo siya nga kita makasala usahay. Bisan pa niana, wala kini makapugong kang Jehova sa pagpakighigala kanato. Tungod sa gugma, ang Diyos naghatag kanato ug usa ka bililhong gasa​—ang halad lukat sa iyang pinalanggang Anak. (Juan 3:16) Kon pinasukad niining bililhong tagana, kita mahinulsolong mangayog pasaylo kang Jehova dihang kita masayop, makasalig ta nga lig-on gihapon ang atong panaghigala kaniya bisag dili ta hingpit.​—1 Tim. 1:15. w16.05 4:6, 7