Abril

Atong responsabilidad nga isulti sa atong isigkatawo nga puwede silang mahimong higala sa atong Maglalalang. Sa wala pa magpasundayag ug pagtuo ang mga tawo sa halad ni Jesus, giisip sila sa Diyos ingong mga kaaway. Si apostol Juan misulat: “Siya nga magpasundayag ug pagtuo sa Anak adunay kinabuhing walay kataposan; siya nga dili mosugot sa Anak dili makakita sa kinabuhi, apan ang kapungot sa Diyos magpabilin diha kaniya.” (Juan 3:36) Ikalipay nga naposible ang kapasig-ulian tungod sa halad ni Kristo. (2 Cor. 5:18-20) Kita nagtudlo sa katawhan bahin sa kamatuoran, nga nagtabang kanila nga mahimong higala ni Jehova. Importante kini nga bahin sa atong buluhatong pagsangyaw. w16.07 4:8-10

Gihisgotan ni Jesus ang pagbalaan sa ngalan sa Diyos ingong unang hangyo diha sa iyang modelong pag-ampo. Kay balaan man si Jehova, ang tanan niyang prinsipyo ug balaod maoy balaan. Bisan pa niini, sa tanaman sa Eden, malimbongong gikuwestiyon ni Satanas ang katungod sa Diyos sa paghatag ug sukdanan alang sa mga tawo. Pinaagi sa pagsultig bakak bahin kang Jehova, gibutangbutangan ni Satanas ang balaang ngalan sa Diyos. (Gen. 3:1-5) Sa laing bahin, si Jesus nahigugma gayod sa ngalan ni Jehova. (Juan 17:25, 26) Nakaamot si Jesus sa pagbalaan sa ngalan sa Diyos. (Sal. 40:8-10) Pinaagi sa iyang hingpit nga pagkinabuhi sa yuta, gipamatud-an ni Jesus nga makataronganon ug matarong ang pagtakda ni Jehova ug sukdanan para sa iyang intelihenteng mga linalang. Pinaagi sa pagpabiling maunongon ngadto sa iyang langitnong Amahan hangtod sa kamatayon, gipamatud-an ni Jesus nga posible alang sa hingpit nga tawo nga magmatinumanon sa bug-os sa matarong nga sukdanan sa Diyos. w17.02 2:2-4

Si Jesu-Kristo mao “ang Kordero sa Diyos nga magakuha sa sala sa kalibotan.” (Juan 1:29) Ang Bibliya nag-ingon nga labaw gayod siya sa tanang tawo nga hari o nahimong hari. Kini nagpatin-aw: “Siya [ang] Hari sa mga nagmando ingong mga hari ug Ginoo sa mga nagmando ingong mga ginoo, nga mao lamang ang nagbaton sa pagkawalay-kamatayon, nga nagpuyo sa kahayag nga dili-maduol, nga kaniya walay tawo nga nakakita o makakita.” (1 Tim. 6:14-16) Takos gayod siyang pasidunggan kay walay laing hari nga kinabubut-ong namatay ingong lukat alang sa atong mga sala. Dili ka ba matukmod sa pagduyog sa libolibo ka langitnong linalang sa pagpahayag: “Ang Kordero nga gipatay takos sa pagdawat sa gahom ug mga bahandi ug kaalam ug kusog ug dungog ug himaya ug pagdayeg.” (Pin. 5:12) Kinahanglan gayong pasidunggan si Jehova ug si Kristo. Atong mabatonan ang kinabuhing walay kataposan kon buhaton nato kana.​—Sal. 2:11, 12; Juan 5:23. w17.03 1:3, 4

Kay nasabtan pag-ayo ni Jepte ang kasaysayan sa Israel, nahibalo siya kon unsay husto ug sayop sa panglantaw ni Jehova. (Maghu. 11:12-27) Ang mga prinsipyo sa Diyos nga anaa sa Moisesnong Balaod nag-umol sa hunahuna ug kasingkasing ni Jepte. Nahibalo siya nga si Jehova dili gayod mouyon kon ang usa maghambin ug kayugot. Hinunoa, gisugo Niya ang iyang katawhan nga higugmaon ang usag usa. Ang Balaod nagtudlo usab nga dili angayng balewalaon sa usa ang panginahanglan sa uban, bisan niadtong “nagdumot” kaniya. (Ex. 23:5; Lev. 19:17, 18) Ang ehemplo niadtong naghupot ug pagtuo sama kang Jose, kinsa nagpakitag kaluoy sa iyang mga igsoon bisag “sila nagsugod sa pagdumot kaniya,” lagmit nakaimpluwensiya sa panghunahuna ni Jepte. (Gen. 37:4; 45:4, 5) Ang pagpamalandong sa maong mga ehemplo lagmit nakatabang kang Jepte sa pagbuhat kon unsay makapahimuot kang Jehova. Seguradong nasakitan siya sa gihimo sa iyang mga igsoon, pero wala siya mohunong sa pag-alagad kang Jehova ug sa Iyang katawhan.​—Maghu. 11:1-3. w16.04 1:8, 9

Gipabilhan gayod sa katawhan ni Jehova ang mga panagkatigom. Wala madugay human matukod ang Kristohanong kongregasyon, ang mga sumusunod ni Jesus nagtigom dayon aron sa pagsimba kang Jehova. Lagmit sama kanila, gusto sab nimong regular nga motambong sa tigom. Bisan pa niana, ang tanang Kristohanon nag-atubang ug mga babag. Tungod sa sekular nga trabaho, puliking eskedyul, o kakapoy gumikan sa atong adlaw-adlawng rutina, malisdan tingali kita sa pagtambong sa mga tigom. Ang pagpabili sa atong mga tigom magpalihok kanato sa pagbuntog niini nga mga babag ug sa pagtambong nga makanunayon sa mga tigom. Tinuod, ang pipila sa atong mga igsoon dili makatambong nga regular sa atong mga tigom tungod sa mga kahimtang nga dili nila makontrolar, sama sa grabeng sakit. Ang mga ansiyano puwedeng mohimog mga kahikayan, sama sa telephone hook-up o pagrekord sa mga tigom, aron makabenepisyo ang maong mga igsoon sa espirituwal nga mga programa. w16.04 3:3

Ang ehemplo sa matinumanong mga alagad ni Jehova makahatag kanato sa kaalam ug kusog nga gikinahanglan aron makalahutay. Pananglitan, si Sadrak, Mesak, ug Abednego midumili sa pagsimba sa larawan nga nagrepresentar sa nasod sa Babilonya. (Dan. 3:16-18) Ang pagbasa bahin sa ilang determinasyon nakahatag sa mga Saksi karon ug kaisog sa pagdumili sa pagsimba sa bandera sa ilang nasod. Dugang pa, si Jesus wala gayod mag-apil-apil sa mga panagbangi sa politika ug sa katilingban. Kay nahibalo siya sa epekto sa iyang ehemplo nganha sa uban, gidasig niya ang iyang mga tinun-an nga “magmaisogon.” Ang mga igsoon sa inyong kongregasyon makatabang nimo sa pagpabiling neyutral. Ang mga membro sa kongregasyon makadasig kanimo kon nahibalo sila sa mga hagit nga imong giatubang. Hangyoa sila nga iampo ka nila. Siyempre, kon buot nato nga tabangan ug iampo kita sa atong mga igsoon, angay sab natong buhaton kana kanila.​—Mat. 7:12. w16.04 4:16, 18

Komosta ang mga Saksi ni Jehova maylabot sa pagpangolektag kuwarta? Ang ilang buluhaton gisuportahan sa boluntaryong mga donasyon. (2 Cor. 9:7) Walay pagpangolektag kuwarta diha sa ilang mga Kingdom Hall o mga kombensiyon. Bisan pa niana, sa tuig 2015 lamang, ang mga Saksi ni Jehova migugol ug 1.93 ka bilyong oras sa pagsangyaw sa maayong balita ug sa pagdumalag siyam ka milyong libreng pagtuon sa Bibliya kada bulan. Talagsaon kini kay gawas nga wala sila suweldohi, malipay silang mogasto sa ilang kaugalingong kuwarta sa paghimo niini nga buluhaton. Dihang naghisgot bahin sa buluhaton sa mga Saksi ni Jehova, usa ka tigdukiduki miingon: “Ang pangunang tumong mao ang pagsangyaw ug pagpanudlo. . . . Walay klero, busa namenosan ang galastohan.” Nan, unsa may atong motibo sa paghimo niining buluhatona? Sa simpleng pagkasulti, kinabubut-on nato kining gihimo tungod sa atong gugma kang Jehova ug sa isigkatawo. Kining kinabubut-ong tinamdan maoy katumanan sa tagna nga atong makita sa teksto karong adlawa. w16.05 2:9

Ang pagkahibalo niini angayng magpalihok kanato sa paglikay sa mga kalingawan nga makahaling sa dili putling mga hunahuna ug kiling. Ang mga Kristohanon nga may pagsabot dili kinahanglang mangutana kon dalawaton ba ang usa ka basahon, pelikula, o dula nga nagpasiugda sa mga butang nga gidumtan ni Jehova. Tin-awng gihisgotan sa Bibliya kon unsay iyang panglantaw nianang mga butanga. Puwede tang mohimog lainlaing desisyon maylabot sa usa ka butang ug sa gihapon makapahimuot kang Jehova. Apan kon bahin sa importanteng mga desisyon, usahay mas maayo nga mangayog tambag sa mga ansiyano o sa ubang eksperyensiyadong mga Kristohanon. (Tito 2:3-5; Sant. 5:13-15) Siyempre, dili nato angayng hangyoon ang uban sa pagdesisyon para nato. Kinahanglang bansayon ug gamiton sa mga Kristohanon ang ilang gahom sa pagsabot. (Heb. 5:14) Kitang tanan kinahanglang molihok nga kaharmonya sa inspiradong mga pulong ni Pablo: “Ang matag usa magpas-an sa iyang kaugalingong luwan.”​—Gal. 6:5. w16.05 3:15, 16

Dihang susihon ni Jehova ang mga tawo, dili siya magtan-aw sa panggawas nga panagway. Hinunoa, iyang susihon ang kasingkasing, ang pangsulod nga pagkatawo. (1 Sam. 16:7b) Gipakita kini sa Diyos dihang iyang gitukod ang Kristohanong kongregasyon. Iyang gikabig ngadto kaniya ug sa iyang Anak ang daghang indibiduwal nga sa panglantaw sa tawo dili kaayo bililhon. (Juan 6:44) Usa kanila mao ang Pariseo nga si Saulo. Pero “ang tig-usisa sa mga kasingkasing” wala mag-isip kang Saulo ingong way pulos nga yutang kulonon. (Prov. 17:3) Hinunoa, nakita sa Diyos nga puwede siyang umolon ingong maayong sudlanan​—usa ka “piniling sudlanan” nga maghatag ug pamatuod “ngadto sa tanang kanasoran maingon man sa mga hari ug sa mga anak sa Israel.” (Buh. 9:15) Ang uban nga giisip sa Diyos ingong potensiyal nga mga sudlanan “alang sa gamit nga dungganon” naglakip sa kanhing mga palahubog, imoral, ug kawatan. (Roma 9:21; 1 Cor. 6:9-11) Samtang nakabaton silag tukmang kahibalo sa Pulong sa Diyos, milig-on ang ilang pagtuo ug ilang gitugotan si Jehova sa pag-umol kanila. w16.06 1:4

Ang mga tagana sa Diyos aron makapabilin tang sama sa humok nga kulonon naglakip sa iyang Pulong, kongregasyon, ug sa ministeryo. Maingon nga ang tubig makapahumok sa kulonon, ang adlaw-adlawng pagbasa sa Bibliya ug pagpamalandong makatabang aron dali tang umolon ni Jehova. Si Jehova nagsugo sa mga hari sa Israel sa pagsulat alang sa ilang kaugalingon ug kopya sa Balaod sa Diyos ug sa pagbasa niini adlaw-adlaw. (Deut. 17:18, 19) Ang mga apostoles nahibalo nga ang pagbasa sa Kasulatan ug pagpamalandong niana hinungdanon sa ilang ministeryo. Sila makadaghang nagkutlo ug naghisgot sa Hebreohanong Kasulatan ug nagdasig sa ilang gisangyawan sa pagbasa ug pagpamalandong usab niana. (Buh. 17:11) Karon, nakita sab nato ang kaimportante sa pagbasa ug pagpamalandong sa Pulong sa Diyos adlaw-adlaw. (1 Tim. 4:15) Kana makatabang aron makapabilin tang mapainubsanon ug daling umolon ni Jehova. w16.06 2:10

Kini ilabinang hinungdanon niining milabayng katuigan dihang ang mga nasod grabeng naggubatay. Pananglitan, sa Gubat sa Kalibotan II lamang, mga 55 ka milyong tawo ang nangamatay. Apan ang mga Saksi ni Jehova wala moapil nianang tibuok yutang pagpamatay. (Miq. 4:1, 3) Nakatabang kini kanila sa pagpabiling “hinlo gikan sa dugo sa tanang tawo.” (Buh. 20:26) Ang katawhan sa Diyos nagpadayon sa pag-uswag bisan niining kalibotan nga gikontrolar sa kaaway, si Satanas. Ang Bibliya nag-ingon nga siya “ang diyos niini nga sistema sa mga butang.” (2 Cor. 4:4) Iyang gimaniobra ang politikal nga sistema niining kalibotana, sama sa iyang gihimo sa media. Pero dili niya mapahunong ang pagsangyaw sa maayong balita. Hinunoa, kay nahibalo si Satanas nga mubo na lang ang iyang panahon, siya naningkamot sa pagpatalikod sa mga tawo sa matuod nga pagsimba, ug siya naggamit ug lainlaing paagi sa paghimo niana.​—Pin. 12:12. w16.06 4:3, 4

Gipahinumdoman kita ni Jesus sa kalalangan ni Jehova. Daghan kitag makat-onan sa “mga lirio sa kapatagan.” Tingali naghunahuna si Jesus sa samag lirio nga mga bulak sama sa gladyola, hasinto, iris, ug tulip​—nagkadaiya ang ilang katahom. Sila dili kinahanglang magkalinyas ug magtahi o maghablon ug besti. Bisan pa niana, nindot kaayo silang tan-awon! Aw, “bisan si Solomon sa tanan niyang himaya wala masul-obig ingon sa usa niini”! Hunahunaa ang buot ipasabot ni Jesus sa iyang giingon: “Kon ang Diyos sa ingon nagbesti sa mga tanom sa kapatagan . . . , dili ba kamo labaw pa nga iyang pagabestihan, kamo nga diyutay ug pagtuo?” (Mat. 6:29, 30) Buhaton gayod kana sa Diyos! Apan ang mga tinun-an ni Jesus kulag pagtuo. (Mat. 8:26; 14:31; 16:8; 17:20) Nagkinahanglan silag lig-ong pagtuo ug pagsalig kang Jehova. Komosta sa atong bahin? Unsa ka lig-on ang atong pagtuo sa tinguha ug katakos ni Jehova sa pagtagana sa atong panginahanglan? w16.07 1:15, 16

Bisag unsa man ang atong mga pagsulay, si Jehova magtabang kanato sa pagsagubang niana. (1 Ped. 1:6) Magpakita kanunay ang Diyos ug kalulot, o pagkamaayo, matag panahon nga duna tay pagsulay. Si Jehova nagpakitag pagkamaayo sa lainlaing paagi ug kini miresultag daghang panalangin. Ang usa niana mao ang pagpasaylo sa atong mga sala. Tungod sa dili-takos nga kalulot ni Jehova, mapasaylo ang atong mga sala kon kita maghinulsol ug padayong suklan ang atong makasasalang mga tinguha. (1 Juan 1:8, 9) Tungod sa kaluoy sa Diyos, kita mapalihok sa pagpasalamat ug paghimaya kaniya. Si Pablo misulat: “[Si Jehova] nagpagawas kanato gikan sa awtoridad sa kangitngit ug nagbalhin kanato ngadto sa gingharian sa Anak nga iyang gihigugma, nga pinaagi kaniya atong nabatonan ang kagawasan pinaagi sa lukat, ang kapasayloan sa atong mga sala.” (Col. 1:13, 14) Ang pagpasaylo sa atong mga sala miresultag dugang mga panalangin. w16.07 3:7-9

Bisan pa sa gibuhat ni Satanas sa Eden, si Jehova naghatag ug paglaom sa katawhan diha sa unang tagna sa Bibliya. May ipadala ang Diyos aron “magsamad,” o magdugmok, sa Yawa ug magpaposible nga ang masinugtanong katawhan makatagamtam sa kahimtang nga giwala sa unang magtiayon​—ang pagkinabuhi sa yuta sa walay kataposan nga maoy orihinal nga katuyoan ni Jehova. (Juan 3:16) Ang pagrebelde ni Adan ug Eva dakog epekto sa ilang kaminyoon ug sa tanang kaminyoon nga misunod. Pananglitan, si Eva ug ang iyang kaliwat nga mga babaye mag-antos sa kasakit sa pagmabdos ug sa pagpanganak. Ang mga babaye mangandoy sa ilang bana, apan ang mga lalaki magdominar sa ilang asawa ug mag-abuso pa gani kanila, sama sa atong makita sa daghang kaminyoon karon. (Gen. 3:16) Ang Bibliya nagsugo nga ipakita sa mga bana ang ilang pagkaulo sa mahigugmaong paagi. Ug ang mga asawa angayng magpasakop sa pagkaulo sa ilang bana. (Efe. 5:33) Pinaagig kooperasyon sa diyosnong magtiayon, ang mga situwasyon nga mahimong hinungdan sa away mamenosan o malikayan. w16.08 1:6, 7

Sa pipila ka kahimtang, ang kapikas sa usa ka Kristohanon wala pa mag-alagad kang Jehova. Sa maong kahimtang, ang Bibliya naghatag ug maayong mga rason kon nganong dili sila angayng magbulag. (1 Cor. 7:12-14) Naamgohan man o wala sa dili magtutuong kapikas, siya ‘gibalaan’ kay alagad sa Diyos ang iyang kapikas. Ang ilang mga bata giisip nga “balaan” ug busa nailalom kini sa proteksiyon sa Diyos. Halos tanang kongregasyon sa mga Saksi ni Jehova ang may Kristohanong mga kapikas nga nakatabang sa ilang kapikas nga “maluwas” o mahimong alagad ni Jehova. Si apostol Pedro nagtambag sa Kristohanong mga asawa nga magpasakop sa ilang bana, “aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.”​—1 Ped. 3:1-4. w16.08 2:14, 15

Ang mga asoy sa Bibliya nagpasiugda sa atong pribilehiyo sa pagpakitag “inigsoong pagbati” ug sa pag-alagad sa usag usa. (Luc. 22:24-27) Gihatag sa Anak sa Diyos ang tanan, lakip ang iyang kinabuhi, sa pagtabang sa uban. (Mat. 20:28) Si Dorcas “daghag maayong mga buhat ug mga gasa sa kaluoy.” (Buh. 9:36, 39) Si Maria, usa ka sister sa Roma, ‘naghago’ para sa mga igsoon sa kongregasyon. (Roma 16:6) Sa unsang paagi nato matabangan ang mga bag-ohan nga masabtan ang kahinungdanon sa pagtabang sa mga igsoon? Mahimong paubanon sa hamtong nga mga Saksi ang mga bag-ohan sa pagbisita sa mga masakiton ug edaran. Kon haom, puwedeng iuban usab sa mga ginikanan ang ilang mga anak. Mahimong patabangon sa mga ansiyano ang mga batan-on o bag-ohan sa pagtaganag pagkaon sa mga edaran ug pagmentinar sa ilang balay. Niining paagiha, makat-onan sa mga batan-on ug bag-ohan ang pagpakitag maayong binuhatan sa uban ug masabtan nila nga ang tanan sa kongregasyon angayng mobati nga gihigugma.​—Roma 12:10. w16.08 4:13, 14

Ang usa ka batan-ong sister sa France miingon: “Ang mga titser sa among eskuylahan nakurat nga may mga estudyante nga motuo gihapog Bibliya.” Ingong usa ka batan-ong alagad ni Jehova o nagtuon pa bahin Kaniya, napresyur ka ba nga mouyon sa popular nga mga pagtulon-an, sama sa ebolusyon, imbes motuo sa Maglalalang? Kon mao, duna kay mahimo aron molig-on ug magpabiling lig-on ang imong pagtuo. Usa niana mao ang paggamit sa imong hinatag sa Diyos nga katakos sa panghunahuna, nga maoy “magabantay kanimo.” Kana manalipod kanimo batok sa mga pilosopiya nga makapahuyang sa imong pagtuo. (Prov. 2:10-12) Ang lig-ong pagtuo gibase sa tukmang kahibalo bahin sa Diyos. (1 Tim. 2:4) Busa dihang magtuon ka sa Pulong sa Diyos ug sa atong mga publikasyon, ayaw kana dalidaliag basa. Gamita ang katakos sa panghunahuna aron imong ‘masabtan ang diwa’ niana. w16.09 4:1-3

Bisag duna tay mapait nga kagahapon o ang atong kahimtang karon daw wala nay paglaom, kinahanglan nga padayon tang makigbisog ug molahutay. Makasalig ta nga kon buhaton nato kana, panalanginan ta ni Jehova. (Gen. 39:21-23) Hunahunaa ang usa ka lisod nga kahimtang nga imong giatubang. Tingali tungod kana sa inhustisya, diskriminasyon, o pagbiaybiay. O kaha gipasanginlan ka sa sala nga wala nimo buhata, tingali tungod sa kasina. Imbes mosurender, hinumdomi kon nganong si Jacob, Raquel, ug Jose nakapadayon sa pag-alagad kang Jehova nga malipayon. Sila gipalig-on ug gipanalanginan sa Diyos kay sila padayong nagpabili pag-ayo sa espirituwal nga mga butang. Padayon silang nakigbisog ug milihok sumala sa ilang mga pag-ampo. Karon, hapit nang matapos kining daotang sistema sa mga butang; busa, importanteng palig-onon nato pag-ayo ang atong paglaom sa umaabot. Andam ka bang manglimbasog aron mabatonan ang pag-uyon ni Jehova? w16.09 2:8, 9

Ingong ginikanan, hinungdanon kaayo ang inyong panig-ingnan sa pagtuo. Makita sa inyong mga anak ang inyong ginabuhat, ug maayo nag epekto kanila. Busa mga ginikanan, padayon sa pagpalig-on sa inyong pagtuo. Ipakita sa inyong mga anak kon unsa ka tinuod si Jehova para ninyo. Dihang ang usa ka magtiayon sa Bermuda may mga problema, mag-ampo sila uban sa ilang mga anak nga mangayog giya kang Jehova, ug dasigon nila ang ilang mga anak nga mag-ampo usab nga silasila ra. “Sultian pod namo ang among kamagulangang anak nga babaye, ‘Salig lang kang Jehova, magmaaktibo sa buluhaton sa Gingharian, ug ayaw kaayog kabalaka.’ Dihang makita niya ang resulta, maamgohan niya nga gitabangan mi ni Jehova. Tungod niana, milig-on ang iyang pagsalig sa Diyos ug sa Bibliya. Siyempre, kinahanglang palig-onon usab sa mga anak ang ilang pagtuo. Ingong mga ginikanan, kamo igo lang magtanom ug magbisibis. Ang Diyos lamang ang makapatubo niana. (1 Cor. 3:6) Busa pangayoa ang iyang espiritu pinaagi sa pag-ampo, ug paningkamot sa pagtudlo sa inyong bililhong mga anak, kay sa pagbuhat niana, panalanginan mo ni Jehova.​—Efe. 6:4. w16.09 5:16-18

Human mag-alagad sa langyawng teritoryo sa kapig tulo ka tuig, si Serge ug ang iyang asawang si Muriel nakamatikod nga dili na kaayo malipayon sa teokratikanhong mga kalihokan ang ilang 17 anyos nga anak nga lalaki. “Dihang naamgohan namo nga nakababag kana sa espirituwal nga pag-uswag sa among anak,” matod ni Serge, “nakadesisyon ming mobalik sa among kanhing kongregasyon.” Unsa tingaliy mga rason kon nganong ang mga ginikanan makadesisyon nga mobalik? Una, angay nilang susihon kon duna ba silay igong panahon ug kusog sa pagtisok sa gugma kang Jehova diha sa ilang mga anak ug sa samang higayon sa pagtudlo kanila ug langyawng pinulongan. Ikaduha, mamatikdan tingali nila nga ang ilang mga anak wala na kaayoy gana sa espirituwal nga mga kalihokan o sa langyawng teritoryo nga ilang gialagaran. Niana nga mga kahimtang, mahimong makadesisyon ang mga ginikanan nga mobalik sa kongregasyon nga naggamit sa pinulongan nga masabtan pag-ayo sa ilang mga anak hangtod nga molig-on na ang espirituwalidad niini.​—Deut. 6:5-7. w16.10 2:14, 15

Walay duhaduha nga ang mga silingan ni Noe nangutana kon nganong nagtukod siyag arka. Si Noe ba nagpakahilom lang o miingon nga dili sila angayng manggilabot? Wala gayod! Ang iyang pagtuo nagpalihok niya sa pagsangyaw nga maisogon ug sa pagpasidaan sa mga tawo sa nagsingabot nga paghukom. Lagmit gisubli ni Noe sa mga tawo ang gisulti ni Jehova kaniya: “Ang kataposan sa tanang unod miabot sa akong atubangan, tungod kay ang yuta napuno sa kapintasan gumikan kanila . . . ako magdala ug lunop sa mga tubig diha sa yuta aron laglagon ang tanang unod nga niana ang puwersa sa kinabuhi aktibo gikan sa silong sa langit. Ang tanan nga anaa sa yuta mabugtoan sa gininhawa.” Dugang pa, seguradong gisaysay ni Noe sa mga tawo ang bugtong paagi nga maluwas, nga gisubli ang sugo sa Diyos: “Ikaw kinahanglang mosulod sa arka.” Sa ingon, gipasundayag ni Noe ang iyang pagtuo pinaagi sa pagkahimong “magwawali sa pagkamatarong.”​—Gen. 6:13, 17, 18; 2 Ped. 2:5. w16.10 4:7

Mapakita sa Kristohanong mga ginikanan ang ilang pagkamaunongon kang Jehova pinaagi sa pagbansay sa ilang mga anak sumala sa iyang Pulong. Dili sila magpaimpluwensiya sa lokal nga mga kultura bahin sa pagpadakog anak. Dili dalawaton ang espiritu sa kalibotan diha sa Kristohanong panimalay. (Efe. 2:2) Ang Saksi nga amahan dili angayng maghunahuna, ‘Aw, sa among nasod ang mga babaye ang magtudlo sa mga anak.’ Klaro ang giingon sa Bibliya bahin niini: “Mga amahan, . . . magpadayon sa pagmatuto [sa inyong mga anak] sa disiplina ug sa pagdumala-sa-kaisipan [instruksiyon; giya] ni Jehova.” (Efe. 6:4) Gusto sa diyosnong mga amahan ug inahan nga ang ilang anak mahisama kang Samuel, kay si Jehova nag-uban kaniya samtang siya nagdako. (1 Sam. 3:19) Maalamon bang mohimog dagkong desisyon bahin sa pamilya ug trabaho nga dili una konsultahon ang Bibliya? Siyempre dili! Gikinahanglan nato ang tabang sa atong langitnong Amahan kay dili ta makagiya sa atong kaugalingong mga lakang. w16.11 3:14, 15

Ang kalalangan nagpamatuod nga ang Diyos mao ang Tig-organisar nga walay sama. “Si Jehova pinaagi sa kaalam nagtukod sa yuta,” nag-ingon ang Bibliya. “Siya lig-ong nagpahimutang sa kalangitan pinaagi sa katakos sa pag-ila.” (Prov. 3:19) Ang atong nahibal-an maoy “kadaplinan lamang sa . . . dalan [sa Diyos],” ug “hunghong ra ang atong nadungog bahin kaniya.” (Job 26:14) Bisan pa niana, ang atong gamayng nahibal-an bahin sa mga planeta, bituon, ug galaksiya magpalihok nato sa pag-ila nga kining mga butang sa kawanangan organisado kaayo. Ang mga galaksiya dunay milyonmilyong bituon​—ang tanan hapsay nga naglihok. Gani, ang mga planeta sa atong solar system nagsubay sa mga orbit libot sa adlaw nga daw nagsunod sa balaod sa trapiko! Way duhaduha nga ang makapahinganghang kahapsay sa uniberso motabang nato nga makita nga si Jehova, kinsa hanas kaayong “nagbuhat sa kalangitan” ug sa yuta, takos sa atong pagdayeg, pagkamaunongon, ug pagsimba.​—Sal. 136:1, 5-9. w16.11 2:3

Ang Malaquias 3:1-3 naghisgot sa panahon​—gikan sa 1914 hangtod sa sayong bahin sa 1919​—dihang ang dinihogang “mga anak ni Levi” pagahinloan. Nianang panahona, si Jehova nga Diyos, ang “matuod nga Ginoo,” uban kang Jesu-Kristo, “ang mensahero sa pakigsaad,” miabot sa espirituwal nga templo sa pagsusi niadtong nag-alagad didto. Human madisiplina, ang nahinloang katawhan ni Jehova andam na sa pagdawat ug dugang nga asaynment sa pag-alagad. Pagka-1919, gitudlo “ang matinumanon ug maalamong ulipon” sa pagtaganag espirituwal nga pagkaon sa panimalay sa pagtuo. (Mat. 24:45) Ang katawhan sa Diyos nahigawas na sa Dakong Babilonya. Sukad niadto, tungod sa dili takos nga kalulot ni Jehova, ang iyang katawhan padayong nag-uswag sa kahibalo bahin sa kabubut-on sa Diyos ug sa gugma alang sa ilang langitnong Amahan. Mapasalamaton gayod sila sa iyang panalangin! w16.11 5:14

Nahigugma ta kang Jehova “kay siya unang nahigugma kanato.” (1 Juan 4:19) Ingong usa ka pasundayag sa pagmahal ni Jehova, siya mihimog unang tikang sa pagpanalangin sa iyang maunongong mga alagad. Samtang modako ang atong gugma sa Diyos, mas molig-on ang atong pagtuo nga siya naglungtad ug seguradong magganti niadtong iyang gihigugma. (Heb. 11:6) Ang pagkahimong tigganti maoy importanteng bahin sa personalidad ni Jehova ug sa iyang ginabuhat. Dili bug-os ang atong pagtuo kon dili ta kombinsido nga ang Diyos magganti niadtong matinuorong nagapangita kaniya, kay “ang pagtuo mao ang masaligan nga pagpaabot sa mga butang nga gilaoman.” (Heb. 11:1) Oo, ang pagtuo nagpasabot ug pagkakombinsido nga matuman ang gisaad sa Diyos nga mga panalangin. Ingon sa gipakita sa teksto karong adlawa, giawhag ta niya sa pagpaningkamot nga maangkon ang iyang panalangin. Atong gipakita ang dakong pagpabili ug pagpasalamat kon dawaton nato ang gitanyag ni Jehova. w16.12 4:1-3

Human mag-alagad sa Diyos sa daghang katuigan, ang usa ka Kristohanon posibleng magsugod sa paghunahuna bahin sa mga butang sa unod. Wala kana magtumong sa usa ka Kristohanon nga matag karon ug unya maghunahuna bahin sa pagkaon, trabaho, kalingawan, o kon minyo, bisan sa seksuwal nga relasyon. Kana normal na sa kinabuhi sa usa ka alagad sa Diyos. Si Jesus nalipay sa pagkaon, ug iyang gipakaon ang uban. Nakita niya nga kinahanglan ang paglingawlingaw. Ug si Pablo misulat nga ang seksuwal nga relasyon maoy usa ka hinungdanong bahin sa kaminyoon. Ang Gregong pulong nga gigamit ni Pablo nagpasabot “sa pagpokus sa hunahuna ug kasingkasing diha sa usa ka butang, sa paggamit sa katakos sa pagplano pag-ayo, nga nagpasiugda sa kinaiya o panglantaw sa usa.” Kadtong nagkinabuhi nga nahiuyon sa unod nagtugot nga ang ilang kinabuhi kontrolahon sa ilang pagkamakasasala. Ang usa ka eskolar miingon bahin nianang pulonga sa Roma 8:5: “Sila naghunahuna​—interesado kaayo, kanunayng naghisgot, nakigbahin ug nagkalipay—​sa mga butang nga nalangkit sa unod.” w16.12 2:5, 9, 10

Bisag kinsa puwedeng mahimong mapangahason kon temporaryo siyang magpadaog sa tinguha sa unod. Daghan ang nahimong mapangahason tungod sa ambisyon, kasina, ug grabeng kasuko. Ang mga karakter sa Bibliya sama ni Absalom, Uzzias, ug Nabucodonosor nagpadaog sa mga buhat sa unod ug gipaubos ni Jehova tungod sa ilang pagkamapangahason. (2 Sam. 15:1-6; 18:9-17; 2 Cron. 26:16-21; Dan. 5:18-21) Pero, duna pay laing mga rason kon nganong ang uban nahimong mapangahason. Pananglitan, tagda ang mosunod nga mga rekord sa Bibliya: Genesis 20:2-7 ug Mateo 26:31-35. Gipalihok ba sa makasasalang mga tinguha ang daw mapangahasong mga buhat ni Abimelek ug Pedro? O wala lang sila mahibalo sa tanang detalye, o kaha wala sila magmabinantayon? Kay dili ta makabasag kasingkasing, maalamon ug mahigugmaon nga dili nato hukman ang motibo sa uban. w17.01 3:9, 10

Sama sa kabos nga babayeng balo, daghan sa atong isigkamagtutuo karon ang misalig nga kon unahon nila ang pagpangita sa Gingharian, si Jehova magtagana gayod sa ilang gikinahanglan. (Mat. 6:33) Tagda ang brader nga si Malcolm. Sa daghang dekada nga siya ug ang iyang asawa nag-alagad kang Jehova, sila nakasinatig makapalipay ug makapaguol nga mga hitabo. “Usahay, ang kinabuhi dili matag-an, walay kasegurohan, ug lisod pa ganing sagubangon,” siya miingon. “Pero panalanginan ni Jehova ang nagasalig kaniya.” Unsay gitambag ni Malcolm? “Iampo nga magmabungahon ug magmaaktibo ka sa pag-alagad kang Jehova kutob sa imong maarangan. Pagpokus sa kon unsay imong mahimo, dili sa kon unsay dili nimo mahimo.” Samtang kining sistemaha sa mga butang “mosamot pa kangil-ad,” kita makasinatig magkagrabeng kalisod. (2 Tim. 3:1, 13) Busa, hinungdanon kaayo nga dili nato tugotang maluya ta tungod sa mga problema. Hinuon, kinahanglan nga bug-os tang mosalig kang Jehova ug himoon ang atong maarangan sa pagbuhat ug maayo. w17.01 1:17-19

Kay nabalaka siya nga walay “balay,” o templo, nga gipahinungod kang Jehova, gusto ni David nga magtukod ug balay alang Kaniya. Apan, lahi ang gisulti ni Jehova sama sa gihisgotan sa teksto karong adlawa. Bisag mahigugmaong gipasaligan ni Jehova si David nga padayon siyang panalanginan, si Jehova miingon nga ang iyang anak nga si Solomon maoy motukod sa templo. Unsay reaksiyon ni David? (1 Cron. 17:1-4, 8, 11, 12; 29:1) Wala mangluod si David nga dili siya ang mapasidunggan sa pagtukod sa templo. Gani, ang tinukod nailhan ingong templo ni Solomon, dili kang David. Bisan tingalig nahigawad si David nga dili matuman ang iyang pangandoy, bug-os niyang gisuportahan ang maong proyekto. Nag-organisar dayon siyag mga grupo sa mga trabahador ug nagtigom ug puthaw, tumbaga, plata, bulawan, ug mga kahoy nga sedro. Dugang pa, gidasig niya si Solomon: “Karon, anak ko, hinaot si Jehova magauban kanimo, ug ikaw magmalamposon gayod ug magtukod sa balay ni Jehova.”​—1 Cron. 22:11, 14-16. w17.01 5:6, 7

Bisag mag-atubang ug pagsulay, buhaton nato ang tanan sa pagkinabuhi subay sa matarong nga mga prinsipyo ug balaod sa Diyos. Pinaagi sa matarong nga mga buhat, gipasidlak nato ang atong kahayag ug sa ingon naghimaya sa ngalan ni Jehova. (Mat. 5:14-16) Ingong balaang katawhan, atong gipamatud-an sa atong pagkinabuhi nga maayo ang mga balaod ni Jehova ug bakak ang mga akusasyon ni Satanas. Kay dili hingpit, kitang tanan masayop. Kon mahitabo kana, kinasingkasing tang maghinulsol ug mobiya sa mga binuhatan nga magpasipala kang Jehova. Pinasukad sa halad ni Kristo, pasayloon ni Jehova ang mga sala niadtong nagpakitag pagtuo. Dawaton niya ingong iyang mga magsisimba kadtong nagdedikar sa ilang kaugalingon kaniya. Gipahayag ni Jehova nga matarong ang dinihogang mga Kristohanon ingong iyang mga anak. Gipahayag sab niya nga matarong ang “ubang mga karnero” ingong iyang mga higala. (Juan 10:16; Roma 5:1, 2; Sant. 2:21-25) Busa bisag karon, ang lukat nagpaposible nga kita makabaton ug matarong nga baroganan atubangan sa atong Amahan ug makaamot sa pagbalaan sa iyang ngalan. w17.02 2:5, 6