Mayo

Naamgohan ni Jepte nga gikinahanglan niya ang tabang sa Diyos aron mapahigawas ang Israel gikan sa mga Ammonhanon. Siya nanaad kang Jehova nga kon Iyang ihatag kaniya ang kadaogan, iyang itanyag kang Jehova ingong “halad-nga-sinunog” ang unang mogawas sa iyang balay pag-uli niya gikan sa panggubatan. (Maghu. 11:30, 31) Unsay nalangkit sa maong halad? Ang paghalad ug tawo dulumtanan kang Jehova. Busa, tin-aw nga walay plano si Jepte nga literal nga ihalad si bisan kinsa. (Deut. 18:9, 10) Ubos sa Moisesnong Balaod, ang halad nga sinunog tibuok nga ihatag kang Jehova, busa dayag nga gipasabot ni Jepte nga iyang ihalad ang maong tawo alang sa bug-os nga pag-alagad kang Jehova. Kini nga panaad nagkahulogan nga ang maong tawo mag-alagad sa tabernakulo sa tibuok niyang kinabuhi. Si Jehova namati kang Jepte ug naghatag kaniyag dakong kadaogan. (Maghu. 11:32) Dihang mipauli si Jepte gikan sa panggubatan, ang unang mitagbo niya mao ang iyang pinalanggang anak, ang iyang bugtong anak! Kini mao ang pagsulay. Motuman kaha siya sa iyang panaad? w16.04 1:11-13

Pipila ka tuig kanhi, kadaghanan sa mga kongregasyon naggamit sa librong Pakigsuod Kang Jehova diha sa Pagtuon sa Kongregasyon sa Bibliya. Dili ba ang maong pagtuon sa mga hiyas sa Diyos, ug ang kinasingkasing nga mga komento sa mga igsoon, nagpalig-on sa imong gugma alang sa imong langitnong Amahan? Mapauswag usab ang atong kahibalo sa Pulong sa Diyos pinaagi sa pagpaminaw pag-ayo sa mga pakigpulong, pasundayag, ug pagbasa sa Bibliya. Ang mga tigom magtudlo kanato kon unsaon pagpadapat ang mga prinsipyo sa Bibliya diha sa tanang bahin sa atong kinabuhi. (1 Tes. 4:9, 10) Pananglitan, ang Pagtuon sa Bantayanang Torre gipahaom sa panginahanglan sa katawhan sa Diyos. Ang pagtuon ba sa Bantayanang Torre nagpalihok kanimo sa pagsusi pag-usab sa imong mga tumong, pagpasaylo sa isigka-Kristohanon, o sa pagpauswag sa kalidad sa imong mga pag-ampo? Ang mga tigom sa tungatunga sa semana nagtudlo kanato kon unsaon pagsangyaw sa maayong balita ug pagtudlo sa mga prinsipyo sa Kasulatan sa epektibong paagi.​—Mat. 28:19, 20. w16.04 3:4, 5

Napamalandong na ba nimo ang kabingkilan nga narekord sa Bibliya? Tagda ang unang mga kapitulo sa Genesis. Gipatay ni Cain si Abel (Gen. 4:3-8); gipatay ni Lamek ang usa ka batan-ong lalaki nga mihampak kaniya (Gen. 4:23); nag-away ang mga magbalantay sa karnero ni Abraham (Abram) ug Lot (Gen. 13:5-7); gitamay ni Agar si Sara (Sarai), kinsa nasuko kang Abraham (Gen. 16:3-6); si Ismael nahimong batok sa matag usa ug ang kamot sa matag usa nahimong batok kaniya. (Gen. 16:12) Nganong gihisgotan sa Bibliya ang maong kabingkilan? Ang usa ka rason maoy aron tabangan ang dili hingpit nga mga tawo nga makakat-on kon nganong kinahanglan silang makigdait. Gipakita usab niini kon sa unsang paagi nato himoon kana. Makabenepisyo kita sa pagbasa sa mga asoy sa Bibliya bahin sa tinuod nga mga tawo nga nag-atubang ug tinuod nga mga problema. Makakat-on ta sa resulta sa ilang mga paningkamot ug busa mapadapat nato ang maong mga punto sa pipila ka situwasyon nga atong maatubang. Sa pagkatinuod, kining tanan motabang kanato sa paghunahuna kon unsay angay ug dili angayng buhaton sa susamang mga situwasyon. w16.05 1:1, 2

Unsang mga paagi ang gigamit ni Jesus ug sa iyang mga tinun-an sa pagsangyaw sa maayong balita? Sila nangadto sa mga dapit diin adunay mga tawo​—sa publikong mga dapit ug sa kabalayan. Ang buluhatong pagsangyaw naglakip sa pagpangita sa mga takos diha sa balaybalay. (Mat. 10:11; Luc. 8:1; Buh. 5:42; 20:20) Kining sistematikong paagi nagpakita nga wala kitay gipihig. Komosta ang mga Saksi ni Jehova niining bahina? Sila lang ang nagsangyaw nga si Jesus naghari na sukad sa 1914. Ingon sa gisugo ni Jesus, gihimo nilang prayoridad ang buluhatong pagsangyaw. Ang librong Pillars of Faith​—American Congregations and Their Partners miingon: “Alang sa mga Saksi ni Jehova . . . dili gyod nila kalimtan nga ang ilang pangunang buluhaton mao ang pagmantala sa espirituwal nga mensahe bahin sa umaabot nga kataposan sa kalibotan ug kon unsay gikinahanglan aron maluwas.” Ang mga Saksi ni Jehova nagpadayon sa pagsangyaw sa maong mensahe, nga naggamit ug mga paagi nga susama nianang kang Jesus ug sa iyang mga tinun-an. w16.05 2:10, 12

Dihang modesisyon kita sumala sa panghunahuna ni Jehova, kita mas masuod kaniya. (Sant. 4:8) Atong mabatonan ang iyang pag-uyon ug panalangin. Kini, sa baylo, makapalig-on sa atong pagtuo sa atong langitnong Amahan. Busa, magpagiya kita sa mga balaod ug prinsipyo sa Bibliya, kay nagpadayag kini sa panghunahuna sa Diyos bahin sa mga butang. Siyempre, kanunay kitang makakat-on ug bag-ong butang bahin kang Jehova. (Job 26:14) Apan bisan karon, kon kita maningkamot, atong mabatonan ang kaalam, kahibalo, ug pagsabot nga gikinahanglan sa paghimog maalamong mga desisyon. (Prov. 2:1-5) Ang mga ideya ug plano sa dili hingpit nga mga tawo mag-usab-usab, pero ang salmista haom nga nagpahinumdom kanato: “Ang laraw ni Jehova mobarog hangtod sa panahong walay tino; ang mga hunahuna sa iyang kasingkasing maoy hangtod sa sunodsunod nga mga kaliwatan.” (Sal. 33:11) Klaro, kita makahimog labing maayong personal nga mga desisyon kon ang atong hunahuna ug buhat kaharmonya sa panghunahuna sa atong labing maalamong Diyos, si Jehova. w16.05 3:17

Ang atong pagtuo sa katakos ni Jehova sa pagbasa sa kasingkasing ug sa pagkabig niadtong iyang gipili angayng magpugong kanato sa paghukom sa uban, diha sa atong teritoryo ug sa kongregasyon. (Juan 6:44) Ang pagdawat kang Jehova ingong atong Magkukulon makaapektar sa atong tinamdan sa mga isigkamagtutuo. (Isa. 64:8) Imo bang giisip ang mga igsoon sama sa pag-isip sa Diyos kanila​—dili ingong nahuman na pag-umol, kondili padayon pang ginaumol? Iyang makita ang pangsulod nga pagkatawo sa usa maingon man ang matang sa pagkatawo niini kon maumol na. Busa, si Jehova dunay positibong panglantaw sa mga tawo ug wala magpokus sa temporaryong mga kahuyangan. (Sal. 130:3) Masundog nato siya pinaagi sa pagbaton ug positibong panglantaw sa iyang mga alagad. Gani, kita makatabang sa buluhaton sa atong Magkukulon pinaagi sa pagpaluyo sa atong mga igsoon samtang sila naningkamot nga mouswag sa espirituwal. (1 Tes. 5:14, 15) Ingong “gasa nga mga lalaki,” ang mga ansiyano angayng magpakitag maayong ehemplo niining bahina.​—Efe. 4:8, 11-13. w16.06 1:4-6

Ang pagpaambit sa maayong balita sa uban makatabang nato nga maugmad ang pagkamapainubsanon ug ang lainlaing bahin sa bunga sa espiritu sa Diyos. (Gal. 5:22, 23) Dugang pa, samtang ginapakita nato ang samag Kristong personalidad, mahimong mas madanihon ang atong mensahe, nga makaapektar sa tinamdan sa pipila ka tagbalay. Pananglitan, duha ka Saksi sa Australia ang matinahorong namati sa usa ka tagbalay nga sakit manulti. Pero human niana, nagmahay ang tagbalay sa iyang gihimo ug misulat siya sa sangang buhatan. Usa ka bahin sa sulat nag-ingon: “Mangayo kog pasaylo niadtong duha ka mapailobon ug mapainubsanon kaayong mga tawo tungod sa akong pagkamapahitas-on. Binuang kaayo ang akong gihimo kay akong giabog ang nagsangyaw sa Pulong sa Diyos.” Mosulat kaha ang maong tagbalay kon nagpakita ang mga magmamantala ug bisan gamayng kasuko? Tingali dili. Oo, ang atong ministeryo makahatag gayod ug kaayohan kanato ug sa uban. w16.06 2:12, 13

Kitang tanan natawong dili hingpit. (Roma 5:12, 19) Busa may mga higayon nga kita masakitan sa gisulti o gibuhat sa usa ka igsoon. Masulayan niini ang atong gugma kang Jehova ug sa iyang katawhan. Unsay atong himoon sa maong mga kahimtang? Pananglitan, ang Hataas nga Saserdoteng si Eli may duha ka anak nga wala mosunod sa mga balaod ni Jehova. Atong mabasa: “Ang mga anak nga lalaki ni Eli maoy mga tawong walay-silbi; wala sila moila kang Jehova.” (1 Sam. 2:12) Bisag may pangunang papel ang ilang amahan sa pagpalambo sa matuod nga pagsimba, sila nakahimog seryosong mga sala. Nahibalo si Eli niini ug angay untang pahamtangan niya silag bug-at nga disiplina, pero wala niya kana himoa. Busa gisilotan sa Diyos ang panimalay ni Eli. (1 Sam. 3:10-14) Sa ulahi, ang iyang mga kaliwat wala tugoti nga mag-alagad ingong hataas nga saserdote. Kon nabuhi ka niadtong panahona, unsa kahay imong reaksiyon sa pagkonsentir ni Eli sa mga sala sa iyang mga anak? Mapandol ka ba ug dili na moalagad sa Diyos? w16.06 4:5, 6

Nganong nakaingon si Jesus niana? Gipatin-aw niya kana sa nag-unang bersikulo: “Ang inyong langitnong Amahan nahibalo nga gikinahanglan ninyo kining tanang butanga,” buot ipasabot, ang atong mga panginahanglan. Si Jehova nahibalo sa panginahanglan sa matag usa maylabot sa pagkaon, sinina, ug puy-anan, bisag wala pa nato kana masayri. (Filip. 4:19) Nahibalo siya kon unsa nga sinina nato ang sunod nga madaot. Nahibalo siya kon unsa nga pagkaon ang atong gikinahanglan ug unsay haom nga puy-anan alang kanato, depende sa gidak-on sa atong pamilya. Seguroon ni Jehova nga atong mabatonan ang atong panginahanglan. Oo, makasalig ta nga kon atong tumanon ang iyang gisugo​—ang pag-una sa espirituwal nga mga butang—​ihatag gayod ni Jehova ang tanan natong panginahanglan. Ang atong “diyosnong pagkamahinalaron” makatabang nga magmakontento ta sa pagkaon, besti, ug puy-anan.​—1 Tim. 6:6-8. w16.07 1:17, 18

Tungod sa maong pagpasig-uli, duna tay malinawong relasyon uban kang Jehova. Gikonektar kini ni Pablo sa dili-takos nga kalulot ni Jehova dihang iyang giingnan ang iyang kaubang mga dinihogan: “Karon nga kita gipahayag na nga matarong tungod sa pagtuo, tagamtamon nato ang pakigdait uban sa Diyos pinaagi sa atong Ginoong Jesu-Kristo, nga pinaagi kaniya usab kita makaduol pinaagi sa pagtuo niining dili-takos nga kalulot diin kita karon nagabarog.” (Roma 5:1, 2) Pagkadako nga panalangin! Natural sa mga tawo ang pagkadili-matarong. Pero, gitagna ni propetang Daniel nga sa panahon sa kataposan, “ang mga may hait nga salabotan,” nga mao ang mga dinihogan, ‘magpadangat sa daghan ngadto sa pagkamatarong.’ (Dan. 12:3) Pinaagi sa ilang pagsangyaw ug pagpanudlo, ilang gitabangan ang milyonmilyong “ubang mga karnero” aron mahimong matarong atubangan ni Jehova. (Juan 10:16) Pero, nahimo lang ning posible tungod sa dili-takos nga kalulot ni Jehova.​—Roma 3:23, 24. w16.07 3:10, 11

Kining dili natural nga panag-ipon sa nagmateryalisar nga mga manulonda ug sa mga babaye nagpatunghag mestiso ug bayolenteng mga anak nga gitawag ug Nepilim. Dugang pa, “ang pagkadaotan sa tawo dagaya diha sa yuta.” (Gen. 6:1-5) Si Jehova nagpahinabog Lunop sa adlaw ni Noe aron laglagon ang mga daotan. Niadtong panahona, ang mga tawo puliki kaayo sa ilang adlaw-adlawng kalihokan, apil na ang pagminyo, maong wala na nila tagda ang giingon ni “Noe, nga usa ka magwawali sa pagkamatarong,” bahin sa nagkaduol nga kalaglagan. (2 Ped. 2:5) Gikomparar ni Jesus ang kahimtang kaniadto sa atong makita karon. (Mat. 24:37-39) Karon, kadaghanan dili maminaw sa maayong balita sa Gingharian sa Diyos nga ginasangyaw sa tibuok yuta ingong pamatuod sa tanang kanasoran sa dili pa matapos kining daotang sistema. Busa, atong makat-onan nga bisan ang mga butang maylabot sa pamilya, sama sa kaminyoon ug pagpadako sa anak, kinahanglang dili makapawala sa atong pagbati nga duol na ang adlaw ni Jehova. w16.08 1:8, 9

Tungod kay kita nagkinabuhi sa hinapos nga bahin sa “kataposang mga adlaw,” kita nakasinatig “makuyaw nga mga panahong lisod sagubangon.” (2 Tim. 3:1-5) Bisan pa niana, ang pagpabiling lig-on sa espirituwal makatabang gayod aron masuklan ang negatibong mga impluwensiya sa kalibotan. Sa atong teksto karong adlawa, wala ipasabot ni Pablo nga talikdan sa mga magtiayon ang ilang responsabilidad. Apan tungod kay mubo na lang ang panahon, kinahanglang hatagan nilag prayoridad ang espirituwal nga mga butang. (Mat. 6:33) Bisag nagkinabuhi kita sa malisod nga panahon ug daghang kaminyoon ang nangabungkag, posible gihapong magmalipayon ug magmalamposon ang kaminyoon. Oo, kon ang Kristohanong mga magtiayon padayong makig-uban sa katawhan ni Jehova, magpadapat sa tambag sa Kasulatan, ug magpagiya sa balaang espiritu, ilang mapreserbar ang “gihiusa pagyugo sa Diyos.”​—Mar. 10:9. w16.08 2:17, 18

Gikinahanglan ang daghang magbalantay sa Kristohanong kongregasyon, ug kadtong moabaga nianang buluhatona sa umaabot nagkinahanglag padayong pagbansay. Giingnan ni Pablo si Timoteo: “Ang mga butang nga imong nadungog gikan kanako nga gipaluyohan sa daghang saksi, kining mga butanga ipiyal sa matinumanong mga tawo, nga, sa baylo, makabaton ug igong katakos sa pagpanudlo sa uban.” (2 Tim. 2:1, 2) Nakakat-on si Timoteo pinaagi sa pag-alagad uban sa edarang apostol. Dayon gipadapat ni Timoteo ang mga paagi ni Pablo diha sa iyang kaugalingong ministeryo ug sa ubang bahin sa iyang sagradong pag-alagad. (2 Tim. 3:10-12) Gustong maseguro ni Pablo nga mabansay pag-ayo si Timoteo, busa giuban niya kini. (Buh. 16:1-5) Masundog sa mga ansiyano si Pablo pinaagi sa pagpauban sa kuwalipikadong ministeryal nga mga alagad sa pag-shepherding kon nahiangay. Sa ingon, mahatagag kahigayonan sa mga ansiyano ang ministeryal nga maobserbahan ang pagpanudlo, pagtuo, pailob, ug gugma nga gikinahanglan ingong Kristohanong mga tigdumala. Kini nga paagi makadugang sa pagbansay sa umaabot nga mga magbalantay sa “panon sa Diyos.” w16.08 4:16, 17

Usahay, ang simbolikong paghuyhoy sa mga kamot gigamit sa paghubit sa usa nga nahigawad, nadismayar, o nawad-ag paglaom. (2 Cron. 15:7; Heb. 12:12) Sagad mosurender ang tawong nakasinati niana. Ikasubo, ang pagkinabuhi sa daotang kalibotan ni Satanas moresultag grabeng kalisdanan, nga makahatag ug kabalaka ug kabug-at. Sama kinig angkla nga makapugong sa pag-abante sa sakayan. (Prov. 12:25) Unsa kahay mga rason kon nganong mobati kag ingon niana? Aw, tingali naguol ka sa kamatayon sa usa ka minahal, nag-antos sa grabeng sakit, naglisod pagtagana sa panginahanglan sa imong pamilya, o nag-atubang ug pagsupak. Sa ngadtongadto, maluya ka o mawad-an pa ganig kalipay. Apan makaseguro ka nga ang Diyos andam motabang nimo.​—Isa. 41:10, 13. w16.09 1:2, 4

Usa sa gipakigbisogan sa daghan mao ang kaugalingong kahuyangan. Ang uban kinahanglang maningkamot aron mahuptan ang positibong tinamdan sa ministeryo. O sa imong bahin, kinahanglan ka tingaling molahutay bisan pa sa dili maayong panglawas o kamingaw. Dili sab nato kalimtan ang pagpakigbisog sa uban nga pasayloon ang usa nga nakapasakit o nakasala kanila. Bisag unsa na ta ka dugayng nag-alagad kang Jehova, kitang tanan kinahanglang makigbisog sa mga butang nga lagmit makababag sa atong pag-alagad sa Diyos, kinsa magaganti sa mga matinumanon. Kon namatikdan nimo nga nagpaingon ka na sa sayop nga direksiyon, pag-ampo alang sa balaang espiritu. Ang pag-ampo ug ang balaang espiritu makahatag nimog kusog sa pagsubay sa hustong dalan nga motultol sa mga panalangin ni Jehova. Lihok uyon sa imong mga pag-ampo. Paningkamoti ang pagbasa sa Bibliya kada adlaw, ug paggahig panahon para sa personal nga pagtuon ug regular nga Pamilyahanong Pagsimba.​—Sal. 119:32. w16.09 2:10, 11

May miingon na ba nimo nga motuo siya sa ebolusyon kay gibase kini sa siyensiya pero dili siya motuo sa Diyos kay dili Siya makita? Daghan ang naghunahunag ingon niana. Apan maayong hinumdoman nato kini: Nagtuo man ang usa sa Diyos o sa ebolusyon, nalangkit gihapon ang pagtuo. Sa unsang paagi? Walay usa kanato ang nakakita sa Diyos o nakasaksi sa iyang paglalang. (Juan 1:18) Ug walay tawo​—siyentipiko man o dili—​ang nakasaksi sa usa ka matang sa kinabuhi nga nausab ngadto sa laing matang sa kinabuhi. Pananglitan, walay nakakita nga ang usa ka reptilya (reptile) nag-usab-usab ug nahimong mananap nga sus-an (mammal). (Job 38:1, 4) Busa, angay natong susihon ang ebidensiya ug gamiton ang atong katakos sa panghunahuna aron makahimog hustong konklusyon. Sa paghisgot sa paglalang, si apostol Pablo misulat: “Ang . . . dili-makita nga mga hiyas [sa Diyos], nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, mao nga sila walay ikapangatarongan.”​—Roma 1:20. w16.09 4:4

Si Jehova mahigugmaong naghimog mga kahikayan alang sa mga langyaw sa Israel sama sa katungod nga manghagdaw. (Lev. 19:9, 10) Imbes sugoon ang mga Israelinhon nga tahoron ang mga langyaw, giawhag sila ni Jehova sa pagpakitag empatiya. (Ex. 23:9) Sila “nahibalo sa [kahimtang] sa langyaw nga pumoluyo.” Bisan sa wala pa sila maulipon, ang mga Hebreohanon lagmit gilikayan sa mga Ehiptohanon tungod sa ilang rasa o relihiyon. (Gen. 43:32; 46:34; Ex. 1:11-14) Pait kaayo ang kinabuhi sa mga Israelinhon ingong mga langyaw, busa gidahom ni Jehova nga trataron nila ang langyaw nga ‘sama sa lumad’ taliwala nila. (Lev. 19:33, 34) Walay duhaduha, si Jehova mabination usab sa mga langyaw nga motambong sa atong mga tigom. (Deut. 10:17-19; Mal. 3:5, 6) Kon atong hunahunaon ang mga kalisdanan nga ilang giatubang, sama sa diskriminasyon o pinulongan, mangita tag mga paagi sa pagpakita kanilag kaayo ug pagkamabination.​—1 Ped. 3:8. w16.10 1:3-5

Gipatin-aw sa sulat ni Santiago nga ang tinuod nga pagtuo nagkinahanglag binuhatan. “Ipakita kanako ang imong pagtuo nga bulag sa binuhatan,” misulat si Santiago, “ug akong ipakita kanimo ang akong pagtuo pinaagi sa akong binuhatan.” (Sant. 2:18) Gipakita sab niya ang kalainan tali sa basta pagtuo lang ug sa pagpasundayag ug pagtuo. Ang mga demonyo nagtuo nga naglungtad ang Diyos, apan wala silay tinuod nga pagtuo. Hinunoa, ilang gisupak pag-ayo ang katuyoan sa Diyos. (Sant. 2:19, 20) Sa kasukwahi, sa paghisgot sa laing ehemplo sa pagtuo kaniadto, si Santiago nangutana: “Dili ba si Abraham nga atong amahan gipahayag nga matarong pinaagi sa binuhatan human niya ihalad si Isaac nga iyang anak diha sa halaran? Nakita mo nga ang iyang pagtuo naglihok diay duyog sa iyang mga binuhatan ug pinaagi sa iyang mga binuhatan ang iyang pagtuo nahingpit.” (Sant. 2:21-23) Dayon, aron ipasiugda nga ang pagtuo kinahanglang ipakita pinaagi sa mga buhat, gidugang ni Santiago ang mga pulong sa teksto karong adlawa. w16.10 4:8

Ang siyensiya nagpadayag ug daghang impormasyon bahin sa uniberso ug sa Yuta, ug naghatag nig kaayohan sa lainlaing bahin sa atong kinabuhi. Apan daghang pangutana ang wala matubag sa siyensiya. Pananglitan, ang mga astronomo dili tukmang makapatin-aw kon sa unsang paagi ang uniberso milungtad o kon nganong ania ta sa Yuta. Dugang pa, ang katawhan sa katibuk-an dili makapatin-aw kon nganong gusto kaayo natong mabuhi hangtod sa hangtod. Nganong daghan kaayong importante apan wala matubag nga mga pangutana? Usa sa mga hinungdan mao nga daghang siyentipiko ug uban pa ang nagpasiugda sa panghunahuna nga walay Diyos ug nag-endorso sa teoriya sa ebolusyon. Apan sa iyang Basahon, gitubag ni Jehova ang mga pangutanang nakapabalaka sa mga tawo bisan diin. Kita nagdepende sa kasaligan ug dili mausab nga mga balaod sa kinaiyahan nga gimugna ni Jehova. Ang mga elektrisyan, tubero, inhenyero, piloto, ug tig-opera nagdepende niini nga mga balaod aron mahimo ang ilang trabaho. w16.11 2:4, 5

Daghan tag rason nga pasalamatan si Jehova! Utang nato niya ang atong kinabuhi​—kay kon wala siya, wala tay mahimo o dili ta maglungtad. Gihatagan ta niyag bililhong regalo, ang Bibliya. Malipayon nato ning giila ingong mensahe sa Diyos, sama sa pag-ila ug pagdawat sa mga Kristohanon sa Tesalonica niini, ingong pulong sa Diyos. (1 Tes. 2:13) Kay nabatonan nato ang Pulong sa Diyos, nasuod ta kang Jehova ug nasuod sab siya nato. (Sant. 4:8) Ang atong langitnong Amahan naghatag natog talagsaong pribilehiyo nga mahimong bahin sa iyang organisasyon. Gipabilhan gyod nato kana! Nindot kaayo ang pagpahayag sa salmista niana dihang siya miawit: “Pasalamati ninyo si Jehova, kay siya maayo: Kay ang iyang mahigugmaong-kalulot maoy hangtod sa panahong walay tino.” (Sal. 136:1) Sa Salmo 136, makitag 26 ka beses ang mga pulong “ang iyang mahigugmaong-kalulot maoy hangtod sa panahong walay tino.” Pinaagi sa pagkamaunongon kang Jehova ug sa iyang organisasyon, maeksperyensiyahan nato ang pagkatinuod nianang makapadasig nga mga pulong kay mabuhi ta sa walay kataposan! w16.11 3:18, 19

Kanang tekstoha kadaghang gigamit sa librong Unsay Tinuod nga Gitudlo sa Bibliya? Samtang gitun-an nimo ang imong mga anak o ang uban gamit kining libroha, lagmit basahon nimo ang Roma 5:12 dihang maghisgot bahin sa katuyoan sa Diyos alang sa yuta, sa lukat, ug sa kahimtang sa mga patay​—kapitulo 3, 5, ug 6. Apan unsa ka subsob nimong mahunahunaan ang Roma 5:12 maylabot sa imong baroganan atubangan ni Jehova, mga buhat, ug umaabot nga paglaom? Siyempre, angay natong dawaton ang kamatuoran nga kitang tanan makasasala. Bisan pa niana, gipasaligan ta nga ang Diyos nahinumdom nga kita abog, ug andam siyang magpakitag kaluoy kanato. (Sal. 103:13, 14) Giapil ni Jesus diha sa modelong pag-ampo ang hangyo ngadto sa Diyos: “Pasayloa kami sa among mga sala.” (Luc. 11:2-4) Busa, walay rason nga magsige tag hunahuna sa mga sayop nga gipasaylo na. Bisan pa niana, makabenepisyo kita sa pagpamalandong kon sa unsang paagi kita iyang pasayloon ug gipasaylo. w16.12 1:1-3

Haom alang sa mga Kristohanon sa Roma ang pagpamalandong kon unsa gayoy sentro sa ilang kinabuhi. Dili kaha nga ang ilang kinabuhi gidominar o nasentro sa “mga butang sa unod”? Ug haom sab nato kanang palandongon maylabot sa atong paagi sa pagkinabuhi. Unsa may labing hinungdanon kanato, ug unsa may pirme natong ginahisgotan? Unsa man gyoy ganahan natong buhaton? Naamgohan tingali sa pipila nga sila kanunayng naghunahuna bahin sa pagtilaw ug lainlaing matang sa bino, pagpanindot sa balay, pagpamalit ug bag-ong sinina, pagpamuhonan, pagplanog mga bakasyon, ug susama niana. Kanang mga butanga dili man daotan; kana tingali maoy normal nga mga bahin sa kinabuhi. Pananglitan, dihay higayon nga si Jesus naghimog bino, ug giawhag ni Pablo si Timoteo sa pag-inom ug “diyutayng bino.” (1 Tim. 5:23; Juan 2:3-11) Apan dakong bahin ba sa kinabuhi ni Jesus ug Pablo ang bino? Mao ba nay ilang hilig, ang kanunay nilang ginahisgotan? Dili. Komosta sa atong bahin? Unsay panguna natong gitinguha? w16.12 2:5, 10, 11

Ikakonektar nato kanang saara sa giingon ni Jesus bahin sa pagpangita pag-una sa Gingharian ug sa pagkamatarong sa Diyos. (Mat. 6:33) Dihay higayon nga si apostol Pedro nangutana kang Jesus: “Gibiyaan namo ang tanang butang ug nagsunod kanimo; unsa man gayod unya ang among makuha niana?” (Mat. 19:27) Imbes kasab-an si Pedro tungod sa maong pangutana, giingnan ni Jesus ang iyang mga tinun-an nga pagagantihan sila sa ilang mga sakripisyo. Ang matinumanong mga apostoles ug ang uban pa magmando uban niya sa langit. Pero bisag karon, duna nay ganti nga madawat. Si Jesus miingon: “Ang matag usa nga nagbiyag mga balay o mga igsoong lalaki o mga igsoong babaye o amahan o inahan o mga anak o mga yuta tungod sa akong ngalan magadawat ug pilo-pilo pa ug makapanunod sa kinabuhing walay kataposan.” (Mat. 19:29) Maangkon sa iyang mga tinun-an ang mga panalangin nga labaw pa sa ila tingaling isakripisyo. Dili ba ang espirituwal nga mga amahan, inahan, igsoon, ug anak mas bililhon pa kay sa bisan unsa nga atong gitalikdan o gibiyaan tungod sa Gingharian? w16.12 4:4, 5

Pagkanindot sa mga butang nga gilaoman sa matuod nga mga Kristohanon! Kitang tanan, dinihogan man o sakop sa “ubang mga karnero,” naglaom nga makita ang katumanan sa orihinal nga katuyoan ni Jehova ug ang pagbalaan sa iyang ngalan. (Juan 10:16; Mat. 6:9, 10) Kana mao ang labing importanteng mga butang nga atong gilaoman. Naghinamhinam usab kita sa gisaad nga ganti nga kinabuhing walay kataposan ingong sakop sa “bag-ong mga langit” o kaha sa “bag-ong yuta.” (2 Ped. 3:13) Sa pagkakaron, naglaom kita nga padayong mouswag sa espirituwal ang katawhan sa Diyos. Kadtong bahin sa kalibotan ni Satanas may gilaoman usab, pero tingali nagduhaduha sila kon matuman ba gyod kana. Pananglitan, milyonmilyong sugarol ang lagmit naglaom nga modaog sa loto, apan dili sila makaseguro kon mahitabo ba gyod kana. Sa laing bahin, ang tinuod nga pagtuo mao “ang masaligan nga pagpaabot” sa atong Kristohanong paglaom. w16.10 3:1, 2

Tungod sa iyang dili takos nga kalulot, si Jehova naghatag sa matag usa kanato ug mga katakos, kahanas, abilidad, o talento. Magamit nato kana sa paghimaya kaniya ug pagtabang sa uban. (Roma 12:4-8) Gipiyal kana ni Jehova kanato uban ang dungog, pagsalig, ug responsabilidad. Apan sa dagan sa panahon, puwedeng mausab ang atong dapit sa kahikayan sa Diyos. Konsideraha ang panig-ingnan ni Jesus. Sa sinugdan, siya ray kauban ni Jehova. (Prov. 8:22) Dayon, siya mitabang ug himo sa ubang manulonda, sa uniberso, ug sa mga tawo. (Col. 1:16) Sa ulahi, si Jesus gihatagag bag-ong asaynment dinhi sa yuta, una ingong walay mahimo nga bata ug dayon ingong hingkod nga tawo. (Filip. 2:7) Human sa paghalad sa iyang kinabuhi, si Jesus mibalik sa langit ingong espiritung linalang aron mahimong Hari sa Gingharian sa Diyos pagka-1914. (Heb. 2:9) Ug human sa Usa ka Libo ka Tuig nga Pagmando, ihatag ug balik ni Jesus ang Gingharian ngadto kang Jehova aron “ang Diyos mahimong tanang butang ngadto sa tanan.”​—1 Cor. 15:28. w17.01 3:11, 12

Dihang padesisyonon, usa ka babaye miingon sa iyang higala: “Ayaw kog pahunahunaa; sultii na lang ko kon unsay buhaton. Mas sayon nâ.” Gusto sa babaye nga sultian na lang siya kon unsay buhaton imbes gamiton ang bililhong gasa gikan sa iyang Maglalalang, ang kagawasan sa pagpili. Komosta sa imong bahin? Ganahan ka bang mohimog kaugalingong desisyon, o mas gusto nimo nga ang uban maoy modesisyon para nimo? Giunsa nimo pag-isip ang kagawasan sa pagpili? Dugay nang gidebatehan sa mga tawo kining butanga. Ang pipila moingon nga wala gyoy kagawasan sa pagpili​—nga ang tanan natong kalihokan gitakda nang daan sa Diyos. Ang uban mangatarongan nga ang tinuod nga kagawasan sa pagpili posible lang kon duna tay bug-os nga kagawasan. Apan, aron masabtan nato kini sa hustong paagi, kinahanglang konsultahon nato ang Pulong sa Diyos, ang Bibliya. Ngano? Kini nagpadayag nga si Jehova naglalang kanato uban ang kagawasan sa pagpili; sa ato pa, ang katakos ug kagawasan sa paghimog maalamong personal nga mga desisyon. w17.01 2:1, 2

Lagmit gibati ni David nga dili kuwalipikado si Solomon nga modumala nianang dakong proyekto. Kon buot hunahunaon, kinahanglan nga ang templo mahimong “labi gayod ka halangdon,” ug nianang panahona si Solomon “batan-on ug linghod pa.” Bisan pa niana, nahibalo si David nga tabangan ni Jehova si Solomon sa pagdumala sa maong buluhaton. Busa gihimo ni David ang tanan sa pagtabang kaniya, nga nag-andam ug daghan kaayong materyales. Sa susama, ang tigulang nga mga brader karon dili angayng maguol dihang kinahanglan na nilang ipasa ang ilang asaynment ngadto sa bata-batang mga brader. Hinunoa, mas makatabang sa buluhaton kon bansayon ang mga bata-bata pa sa pagdumala sa mga responsibilidad. Ang tinudlong mga brader angayng malipay dihang ang bata-batang mga brader nga ilang gibansay mahimong kuwalipikado sa pag-abaga sa buluhaton. w17.01 5:8, 9

Ingong Hari sa Gingharian sa Diyos, si Jesus magdugmok sa ulo sa halas ug magpapha sa tanang epekto sa rebelyon ni Satanas sa tibuok uniberso. Samtang dinhi sa yuta, gitabangan ni Jesus ang iyang mga tinun-an nga masabtan ang kaimportante sa Gingharian sa Diyos. Human dayon sa iyang bawtismo, gipahayag ni Jesus “ang maayong balita sa gingharian sa Diyos” bisag asa siya moadto. (Luc. 4:43) Sa kataposan niyang gipamulong sa iyang mga tinun-an una siya mobalik sa langit, gisugo sila ni Jesus sa pagpamatuod bahin kaniya “hangtod sa kinalay-ang dapit sa yuta.” (Buh. 1:6-8) Pinaagi sa pagsangyaw sa Gingharian, ang katawhan sa tibuok kalibotan makabatog kahigayonan nga makakat-on bahin sa lukat ug mahimong sakop sa Gingharian sa Diyos. Karon, ikapakita nato ang atong pagsuportar sa Gingharian pinaagi sa pagtabang sa mga igsoon ni Kristo sa yuta sa pagtuman sa sugo nga isangyaw ang maayong balita sa Gingharian sa tibuok kalibotan.​—Mat. 24:14; 25:40. w17.02 2:7, 8

Bisag may awtoridad ang nagamandong lawas sa unang kongregasyon, giila nila si Jesus ingong ilang Lider. Si apostol Pablo misulat, “Magatubo unta kita sa tanang butang pinaagi sa gugma ngadto kaniya nga mao ang ulo, si Kristo.” (Efe. 4:15) Imbes tawgon ang ilang kaugalingon sa ngalan sa usa ka prominenteng apostol, “ang mga tinun-an pinaagi sa pagtultol sa Diyos unang gitawag nga mga Kristohanon.” (Buh. 11:26) Tinuod, giila ni Pablo ang kahinungdanon sa ‘paghupot pag-ayo sa mga tradisyon’ o binase sa Kasulatan nga mga pagtulon-an nga gihatag sa mga apostoles ug sa ubang nagapanguna. Bisan pa niana, siya midugang: “Apan buot ko nga mahibalo kamo nga ang ulo sa matag lalaki [lakip ang matag membro sa nagamandong lawas] mao si Kristo; . . . sa baylo ang ulo ni Kristo mao ang Diyos.” (1 Cor. 11:2, 3) Oo, ilalom sa iyang Ulo, si Jehova nga Diyos, ang dili makita ug hinimayang si Kristo Jesus nanguna sa kongregasyon. w17.02 4:7

Ang pagpakitag pasidungog niadtong nahiangay niana makatabang nato nga dili maghunahuna sa kaugalingon lang. Dili sab ta mahimong mapahitas-on kon dunay mohatag natog pasidungog. Nahiusa sab ta sa organisasyon ni Jehova, nga naglikay sa paghatag sa mga tawo​—magtutuo man o dili—​ug sobra o dili angay nga pasidungog. Maalamon usab kini kay matabangan ta nga dili mapandol kon ang tawo nga atong gipakitaag pasidungog makabuhat ug dili maayo. Ang labing importanteng benepisyo sa paghatag ug nahiangayng pasidungog mao nga sa pagbuhat nato niana atong gipahimut-an ang Diyos. Gibuhat nato kon unsay iyang gisugo kanato ug sa ingon nagmatinumanon kita kaniya. Makahatag kanag tubag kang bisan kinsa nga magtamay kaniya. (Prov. 27:11) Kadaghanan sa mga tawo sa kalibotan dunay sayop nga panglantaw maylabot sa paghatag ug pasidungog. Mapasalamaton kaayo ta kay nahibalo kita kon sa unsang paagi maghatag ug pasidungog sumala sa paagi ni Jehova. w17.03 1:13, 20, 21

Sama sa iyang amahan nga si Asa, giawhag ni Jehosapat ang mga tawo sa pagpangita kang Jehova. Gibuhat niya kana pinaagi sa pag-organisar ug buluhatong pagpanudlo nga naggamit sa “basahon sa balaod ni Jehova.” (2 Cron. 17:7-10) Miadto pa gani siya sa teritoryo sa amihanang gingharian sa Israel, ngadto sa kabukiran sa Epraim, “aron iyang madalag balik sila kang Jehova.” (2 Cron. 19:4) Kitang tanan mahimong makig-ambit sa dakong buluhatong pagpanudlo nga gisugo ni Jehova karon. Imo bang tumong kada bulan nga itudlo ang Pulong sa Diyos ngadto sa uban, nga palihokon ang ilang kasingkasing sa pag-alagad sa Diyos? Pinaagi sa imong paningkamot ug sa tabang ni Jehova, mahimong makakaplag kag Bible study. Usa ba kana sa mga tumong nga imong giampo? Andam ka bang mobuhat niini, bisan tingalig maibanan ang imong libreng panahon? Ug maingon nga si Jehosapat miadto sa teritoryo sa Epraim aron tabangan ang mga tawo nga mahibalik sa matuod nga pagsimba, matabangan sab nato ang mga dili aktibo. w17.03 3:10, 11