Hunyo

Si Jepte walay laing anak; ang iyang anak lamang ang bugtong paglaom aron magpadayon ang iyang kaliwatan, nga maoy magdala sa iyang ngalan ug makapanunod sa iyang kabtangan. (Maghu. 11:34) Bisan pa niana, sa Maghuhukom 11:35, si Jepte miingon: “Ako nakabungat na sa akong baba kang Jehova, ug dili ko na mabakwi.” Siya nagmatinumanon bisag naglakip kadtog dakong sakripisyo, busa siya giuyonan ug gipanalanginan sa Diyos. Ingon ba usab niana ang imong himoon? Dihang gipahinungod nato ang atong kinabuhi kang Jehova, kita nanaad nga atong buhaton ang iyang kabubut-on bisag unsay mahitabo. Nahibalo kita nga ang pagtuman niini naglakip ug sakripisyo. Apan, ilabinang masulayan ang atong pagkamatinumanon dihang sugoon kita sa paghimo sa mga butang nga tingali dili nato gusto. Dihang mohimo kita sa maong mga sakripisyo ug moalagad sa Diyos bisag dili kini sayon, atong gipamatud-an nga kita may pagtuo. Mas labaw gayod ang mga panalangin nga atong madawat kon itandi sa atong mga sakripisyo, bisag unsa pa kana ka lisod.​—Mal. 3:10. w16.04 1:11, 14, 15

Si Jesus nanguna sa Kristohanong kongregasyon pinaagi sa balaang espiritu. Gikinahanglan nato ang balaang espiritu aron kita makasukol sa tentasyon, magmaisogon ug magmaepektibo sa ministeryo, ug makahimog maayong mga desisyon. Dili ba angay natong pahimuslan ang tanang tagana​—lakip na ang mga tigom​—aron madawat ang balaang espiritu? Diha sa mga tigom, sagad hisgotan ang katumanan sa mga tagna sa Bibliya. Ingong resulta, gipalig-on nato ang atong pagsalig nga matuman gayod ang mga saad ni Jehova sa umaabot. Siyempre, dili lang kadtong may mga bahin sa plataporma ang makadasig nato. Ang mga igsoong nga nagkomento ug kinasingkasing nga nag-awit makapadasig usab kanato. (1 Cor. 14:26) Ug kon makig-estorya ta sa mga igsoon sa dili pa magsugod ang tigom ug inigkahuman niana, kita madasig gayod ug masuod kanila.​—1 Cor. 16:17, 18. w16.04 3:6, 7

Gihubit ni Jesus ang gilapdon sa buluhatong pagsangyaw pinaagi sa pag-ingon nga ang maayong balita igasangyaw “sa tibuok gipuy-ang yuta.” (Mat. 24:14) Kinahanglan nga maghimog mga tinun-an “sa katawhan sa tanang kanasoran.” Naglangkit kana ug tibuok yutang buluhaton. Aron masabtan kon giunsa pagtuman sa mga Saksi ni Jehova ang tagna ni Jesus maylabot sa gilapdon sa buluhatong pagsangyaw, tagdon nato ang pipila ka impormasyon. Dunay duolag 600,000 ka membro sa klero sa lainlaing denominasyon sa United States, diin may mga 1,200,000 ka Saksi ni Jehova. Sa tibuok kalibotan, ang Romano Katolikong Simbahan may kapig 400,000 ka pari. Karon hunahunaa kon unsa ka daghan ang mga Saksi nga nakigbahin sa binase sa Bibliya nga buluhatong pagsangyaw sa Gingharian. Sa tibuok kalibotan, mga walo ka milyon nga boluntaryong mga ministro ang nagsangyaw diha sa 240 ka nasod. Pagkatalagsaong buluhaton ang napalampos, ang tanan sa kadayeganan ug kahimayaan ni Jehova!​—Sal. 34:1; 51:15. w16.05 2:13, 14

Kaylap karon sa kalibotan ang espiritu sa pagkaindependente nga maoy hinungdan sa garbo, pagpaimportante sa kaugalingon, ug pag-indigay. Si bisan kinsa nga maimpluwensiyahan niini nga espiritu, sa diwa, miuyon sa giingon ni Satanas nga mas maayong unahon ang kaugalingong kaayohan bisag unsay epekto niana sa uban. (Gen. 3:1-5) Kanang hakog nga tinamdan moresulta sa panaglalis. Sa laing bahin, gitudloan ni Jesus ang mga tawo nga makigdait, bisan pag kana daw dili makahatag nila ug kaayohan. Sa iyang Wali sa Bukid, si Jesus mihatag ug maayong tambag kon unsaon paghusay ang dili pagsinabtanay o posibleng kabingkilan. Pananglitan, iyang giawhag ang iyang mga tinun-an nga magmalumo, makigdait, wagtangon ang mga hinungdan sa kasuko, husayon dayon ang kabingkilan, ug higugmaon ang ilang mga kaaway.​—Mat. 5:5, 9, 22, 25, 44. w16.05 1:4, 5

Daghan kanato ang mihimog dagkong kausaban una pa sa atong bawtismo aron mapahiuyon ang atong kinabuhi sa pangunang mga kinahanglanon sa Bibliya. Human sa bawtismo, atong nakita nga kinahanglan pa tang magpadayon sa paghimog gagmayng kausaban aron mas masundog nato pag-ayo ang Diyos ug ang Kristo. (Efe. 5:1, 2; 1 Ped. 2:21) Pananglitan, tingali namatikdan nato nga kita reklamador, mahadlok sa tawo, hilig manglibak, o may uban pang kahuyangan. Naobserbahan ba nimo nga ang paghimog kausaban niining bahina mas lisod diay kay sa imong gidahom? Hinumdomi, kita sa gihapon dili hingpit. (Col. 3:9, 10) Busa, dili gayod realistiko ang pagdahom nga human sa bawtismo​—o bisan human sa daghang katuigan diha sa kamatuoran—​dili na kita masayop, maluya, o makigbisog sa sayop nga mga motibo ug kiling. May mga kahuyangan nga tingali magpadayon sa daghang katuigan.​—Sant. 3:2. w16.05 4:3-5

Lagmit nakadungog na ka nga may miingon: ‘Ayha pa nako naapresyar pag-ayo ang disiplina sa akong ginikanan dihang naa na koy mga anak.’ Dihang mas daghan na tag kasinatian sa kinabuhi, mahimong isipon na nato ang disiplina sama sa panglantaw ni Jehova, ingong pamatuod sa gugma. (Heb. 12:5, 11) Oo, tungod sa gugma ni Jehova kanato ingong iyang mga anak, siya mapailobong nag-umol kanato. Gusto niya nga kita magmaalamon, magmalipayon, ug mahigugma usab kaniya. (Prov. 23:15) Dili niya gusto nga kita mag-antos ni mamatay ingong “mga anak sa kapungot,” nga maoy atong napanunod kang Adan. (Efe. 2:2, 3) Ingong “mga anak sa kapungot,” kita kaniadto may mga kinaiya nga dili makapahimuot sa Diyos, tingali mga kinaiya pa gani nga sama nianang sa bangis nga mga hayop! Pero tungod sa pag-umol ni Jehova, kita nausab ug mas nahisama nag mga karnero.​—Isa. 11:6-8; Col. 3:9, 10. w16.06 1:7, 8

Kadaghanan sa mga bata mapainubsanon ug gustong mokat-on. (Mat. 18:1-3) Busa ang maalamong mga ginikanan maningkamot sa pagtisok sa kamatuoran diha sa hunahuna ug kasingkasing sa ilang mga anak samtang bata pa. (2 Tim. 3:14, 15) Siyempre, aron molampos, kinahanglang itisok una sa mga ginikanan ang kamatuoran sa ilang kaugalingong kasingkasing ug ipadapat kana. Kon himoon kini sa mga ginikanan, dili lang madunggan sa mga anak ang kamatuoran kondili maeksperyensiyahan sab nila kini. Dugang pa, masabtan sa mga bata nga ang pagdisiplina kanila maoy pamatuod sa gugma sa ilang mga ginikanan ug ni Jehova. Kon kita usab magmapainubsanon ug kanunayng magpasakop kang Jehova, isipon niya kita nga bililhon kaayo sama kang propetang Daniel. (Dan. 10:11, 19) Dugang pa, si Jehova padayong mag-umol kanato pinaagi sa iyang Pulong, espiritu, ug organisasyon. w16.06 2:14, 17

Si David gihigugma ug giisip ni Jehova ingong tawong “gikahimut-an sa iyang kasingkasing.” (1 Sam. 13:13, 14) Pero sa ulahi, si David nakapanapaw uban kang Bat-seba, ug nagmabdos kini. Nahitabo kana dihang ang bana niini nga si Urias tua sa panggubatan. Dihang miuli kadiyot si Urias, nangitag paagi si David nga makigdulog kini kang Bat-seba aron mopatim-aw nga si Urias ang amahan sa bata. Wala sunda ni Urias ang gisugyot sa hari, busa gihikay ni David nga mamatay kini sa panggubatan. Giani ni David ang mapait nga sangpotanan sa iyang sala​—ang mga kalamidad nahitabo kaniya ug sa iyang panimalay. (2 Sam. 12:9-12) Apan si Jehova nagpakitag kaluoy kang David kinsa sa katibuk-an naglakaw atubangan kaniya “uban ang integridad sa kasingkasing.” (1 Hari 9:4) Kon nabuhi ka niadtong panahona, unsa kahay imong reaksiyon? Mapandol ka ba sa sala ni David? w16.06 4:7

Ingong mga Saksi ni Jehova, importante kanato ang pasidaan ni Jesus. Kita nahibalo nga nagkinabuhi na kita sa “panahon sa kataposan” ug diyutay na lang ang panahong nahibilin sa dili pa magsugod ang “dakong kasakitan”! (Dan. 12:4; Mat. 24:21) Atong nakita ang makapasubong mga gubat, pag-uswag sa imoralidad ug kalapasan, kalibog maylabot sa relihiyon, kakulang sa pagkaon, kamatay, ug mga linog sa lainlaing dapit sa kalibotan. Nahibalo kita nga ang talagsaong buluhatong pagsangyaw sa Gingharian ginahimo sa katawhan ni Jehova bisan asa. (Mat. 24:7, 11, 12, 14; Luc. 21:11) Mahinamon natong gihulat ang pag-abot ni Jesus ug ang pagtuman niya sa katuyoan sa Diyos. (Mar. 13:26, 27) Pero, bisag unsaon natog paningkamot, dili nato matino ang eksaktong tuig, labi na ang adlaw ug oras, sa pagsugod sa dakong kasakitan. w16.07 2:2-4

Tungod sa dili-takos nga kalulot ni Jehova, kita gitugotan nga makaduol sa iyang langitnong trono pinaagi sa pag-ampo. Siya naghatag kanato niini nga pribilehiyo pinaagi sa iyang Anak, nga “kaniya kita nakabaton niining kagawasan sa pagsulti ug pagduol uban ang pagsalig pinaagi sa atong pagtuo kaniya.” (Efe. 3:12) Usa gyod ka talagsaong kapahayagan sa dili-takos nga kalulot ni Jehova ang kagawasan nga makaduol kaniya pinaagi sa pag-ampo. Gidasig ta ni Pablo nga kanunayng moduol kang Jehova pinaagi sa pag-ampo, “aron makadawat kita ug kaluoy ug makakaplag ug dili-takos nga kalulot ingong tabang sa hustong panahon.” (Heb. 4:16b) Matag higayon nga kita makasinatig daghang pagsulay ug problema, mahimo tang motuaw kang Jehova alang sa kaluoy ug tabang. Bisag dili ta takos, iyang ginatubag ang atong mga pag-ampo, kasagaran pinaagi sa atong mga igsoon, “sa ingon kita magmaisogon ug makaingon: ‘Si Jehova ang akong magtatabang; dili ako mahadlok. Unsay arang mabuhat sa tawo kanako?’”​—Heb. 13:6. w16.07 3:12, 13

Bisag si Noe ug ang iyang tulo ka anak tag-usa rag asawa, ang pagbatog daghang asawa komon na panahon sa mga patriarka. Sa daghang kultura, ang seksuwal nga imoralidad nahimong paagi sa pagkinabuhi, ug gilakip pa gani sa relihiyosong mga rituwal. Dihang si Abram (Abraham) ug iyang asawang si Sarai (Sara), mituman sa Diyos ug mibalhin sa Canaan, kaylap na nianang dapita ang mga binuhatan nga nagpasipala sa kaminyoon. Busa nakahukom si Jehova nga laglagon ang Sodoma ug Gomora kay ang mga molupyo niini nagbuhat o nagtugot sa malaw-ayng seksuwal nga imoralidad. Si Abraham nanguna sa iyang pamilya sa maayong paagi, ug si Sara nagpakitag maayong ehemplo pinaagi sa pagpasakop sa pagkaulo sa iyang bana. (1 Ped. 3:3-5) Giseguro ni Abraham nga ang iyang anak, si Isaac, maminyog magsisimba ni Jehova. Mao sab nay gihimo ni Isaac kang Jacob​—kansang mga anak nga lalaki nahimong katigulangan sa 12 ka tribo sa Israel. w16.08 1:10

Ang maong tagna padayong nagakatuman niining kataposang mga adlaw. Gani, sa 2015 nga tuig sa pag-alagad, 8,220,105 ka magmamantala sa Gingharian ang aktibong nagsangyaw sa tibuok kalibotan! Ang kataposang bahin sa maong tagna dakog epekto sa matag Kristohanon kay ang atong langitnong Amahan nag-ingon: “Ako, si Jehova, magpadali niini sa kaugalingong panahon niini.” Samag mga pasahero sa sakyanan nga nagkakusog ang dagan, atong mamatikdan ang paspas nga pag-uswag sa buluhatong paghimog mga tinun-an. Miduyog ba ta sa maong pag-uswag? Gibuhat ba nato ang tanan ingong madasigong magsasangyaw sa Gingharian? Daghang igsoon ang nag-aplay ingong regular o oksilyare payunir. Ug dili ba makapalipay nga daghan ang misanong sa awhag nga mag-alagad diin mas dako ang panginahanglan o makigbahin sa ubang buluhaton sa organisasyon? Kita man brader o sister, kita “kanunayng puliki diha sa buluhaton sa Ginoo.”​—1 Cor. 15:58. w16.08 3:1, 2

Wala madugay human milagrosong mapagawas ang mga Israelinhon gikan sa pagkaulipon sa Ehipto, gisulong sila sa mga Amalekanhon. Ingong pagsunod sa giingon ni Moises, ang maisogong si Josue nanguna sa mga Israelinhon sa pagpakiggubat. Sa kasamtangan, giuban ni Moises si Aaron ug Hur sa usa ka bungtod sa duol diin makita nila ang panggubatan. Gisunod ni Moises ang estratehiya nga nakatabang nila nga modaog. Padayong giisa ni Moises ang iyang kamot ug ang sungkod sa matuod nga Diyos. Samtang gibuhat kadto ni Moises, gipalig-on ni Jehova ang kamot sa mga Israelinhon sa pagpakiggubat batok sa mga Amalekanhon. Apan, dihang ang mga kamot ni Moises nanghawoy ug misugod paghuyhoy, ang mga Amalekanhon midaog. Si Aaron ug Hur milihok dayon ug “nagkuhag bato ug nagbutang niini sa ilalom [ni Moises], ug siya milingkod niini; ug gisangga ni Aaron ug ni Hur ang iyang mga kamot, ang usa niining kilira ug ang lain nianang kilira, mao nga nagpirmi ang iyang mga kamot hangtod sa pagsalop sa adlaw.” Oo, pinaagi sa gamhanang kamot sa Diyos, ang mga Israelinhon nakadaog sa gubat.​—Ex. 17:8-13. w16.09 1:5-7

Masaligon si Pablo nga magmadaogon siya sa maong pakigbisog pinaagi sa makanunayong pag-ampo kang Jehova ug pagpakitag pagtuo sa halad lukat ni Jesus. Komosta sa atong bahin? Posible ba nga magmadaogon usab kita sa pagpakigbisog sa atong mga kahuyangan? Oo, pinaagi sa pagsundog kang Pablo, bug-os nga pagsalig kang Jehova ug dili sa atong kaugalingon, ug pagpakitag pagtuo sa lukat. May mga higayon nga tugotan sa Diyos nga ipakita nato kon unsa gyoy atong pagbati sa usa ka butang. Pananglitan, komosta kon kita (o ang usa ka membro sa pamilya) grabeng nasakit o nakasinatig inhustisya? Ikapakita nato ang atong bug-os nga pagsalig kang Jehova pinaagi sa pag-ampo nga hatagan kitag kusog aron magpabiling matinumanon, malipayon, ug balanse sa espirituwal. (Filip. 4:13) Ang eksperyensiya sa daghan, sa adlaw ni Pablo ug sa atoa, nagpamatuod nga ang pag-ampo makapalig-on ug makatabang kanato sa paglahutay. w16.09 2:14, 15

Dihang miuswag ang gidaghanon sa Kristohanong kongregasyon, mitungha ang usa ka kahimtang nga dayag nga naglangkit ug diskriminasyon. Ang nagsultig Grego nga mga Hudiyo nagreklamo nga ang ilang mga babayeng balo wala tratara nga makiangayon. Aron masulbad ang problema, ang mga apostoles nagtudlog pito ka lalaki sa pagseguro nga walay mapasagdan. Ang maong mga lalaki pulos Grego ang ngalan, nga lagmit nagpaila nga gusto sa mga apostoles nga mawala ang pagpihigpihig nga tingali naglungtad taliwala sa mga Kristohanon sa unang siglo. (Buh. 6:2-6) Naamgohan man nato o wala, kita naimpluwensiyahan pag-ayo sa atong kultura. (Roma 12:2) Dugang pa, lagmit makadungog ta sa mga silingan, kauban sa trabaho, o eskolmet nga magbugalbugal niadtong lahig kagikan, tribo, o kolor sa panit. Naapektohan ba sab ta niana nga panglantaw? Ug unsay atong reaksiyon kon dunay magbugalbugal kanato tungod sa atong nasyonalidad​—tingali pasobrahan paghubit ang usa ka bahin sa atong kultura? w16.10 1:7, 8

Ang ‘pagsabot’ nagkahulogan ug pag-ila sa usa ka butang nga lagmit dili dayon makita o maklaro. (Heb. 11:3) Busa, ang mga tawong may pagsabot mogamit sa ilang hunahuna, dili lang sa ilang mga mata ug dalunggan. Ang organisasyon ni Jehova nagtagana kanatog daghang maayong pagkadukiduki nga mga himan. Kini makatabang nato nga ‘makakita’ sa atong Maglalalang pinaagi sa atong mata sa pagtuo. (Heb. 11:27) Kini nga mga himan naglakip sa video nga The Wonders of Creation Reveal God’s Glory, mga brosyur nga Gilalang ba ang Kinabuhi? ug The Origin of Life​—Five Questions Worth Asking, ug sa librong Is There a Creator Who Cares About You? Diha sa Pagmata!, sagad hisgotan ang interbiyo sa mga siyentipiko ug sa uban nga nagpatin-aw kon nganong motuo na sila sa Diyos. Ang serye nga nag-ulohang “Gidisenyo ba Kini?” nagpasiugda sa mga pananglitan sa talagsaong mga disenyo nga atong makita sa kinaiyahan. Ang mga siyentipiko sagad naningkamot sa pagsundog nianang nindot nga mga disenyo. w16.09 4:4, 5

Ang matinumanong mga alagad nga gihisgotan sa Hebreohanon kapitulo 11 namatay sa wala pa buksi sa gisaad nga “binhi,” si Jesu-Kristo, ang kahigayonan nga mabuhi sa langit. (Gal. 3:16) Hinunoa, sila pagabanhawon ug makatagamtam ug hingpit nga kinabuhi sa paraisong yuta. (Sal. 37:11; Isa. 26:19; Os. 13:14) Ang Hebreohanon 11:13 nag-ingon bahin sa pipila nga nabuhi sa wala pa ang Kristohanong panahon: “Diha sa pagtuo kini silang tanan nangamatay, bisan ug wala sila makabaton sa katumanan sa mga saad, apan sila nakakita niini sa halayo ug nahinangop niini.” Usa kanila si Abraham. Tin-aw ba diha sa iyang hunahuna ang makapalipayng paglaom sa kinabuhi ilalom sa pagmando sa gisaad nga “binhi”? Si Jesus naghatag ug tin-awng tubag niana dihang giingnan niya ang iyang mga magsusupak: “Si Abraham nga inyong amahan nagmaya sa hilabihan sa paglaom nga makita ang akong adlaw, ug siya nakakita niini ug nagmaya.” (Juan 8:56) Tinuod usab kana kang Sara, Isaac, Jacob, ug sa daghan pa nga naglaom sa umaabot nga Gingharian, nga “ang magtutukod ug magbubuhat . . . mao ang Diyos.”​—Heb. 11:8-11. w16.10 3:4, 5

Angay gayod kitang magmapasalamaton nga gigamit ni Jehova ang iyang balaang espiritu sa pagpadayag sa kamatuoran ug sa pagtabang kanato sa pagpasundayag ug pagtuo sa maayong balita. (Luc. 10:21) Dili gyod ta angayng mohunong sa pagpasalamat kang Jehova tungod sa pagkabig niya kanato pinaagi sa iyang Anak, “ang Pangulong Ahente ug Maghihingpit sa atong pagtuo.” (Heb. 12:2) Aron ipakita ang atong apresasyon nianang dili takos nga kalulot, kinahanglang padayon natong lig-onon ang atong pagtuo pinaagi sa pag-ampo ug pagtuon sa Pulong sa Diyos. (1 Ped. 2:2) Kinahanglan nga padayon kitang magpasundayag ug pagtuo sa mga saad ni Jehova. Angay nato kining buhaton sa mga paagi nga makita sa uban. Pananglitan, magpadayon kita sa pagsangyaw sa Gingharian sa Diyos ug sa paghimog mga tinun-an. Padayon sab natong buhaton “ang maayo ngadto sa tanan, apan ilabina kanila nga atong kabanay sa pagtuo.” (Gal. 6:10) Ug maningkamot kita ‘sa paghukas sa daang pagkatawo uban ang mga buhat niini.’​—Col. 3:5, 8-10. w16.10 4:11, 12

Maayo gayong pagkaorganisar ang uniberso. Busa, angay natong dahomon nga gusto ni Jehova nga mahimong organisado ang iyang mga magsisimba. Gani, ang Diyos nagtagana kanato sa Bibliya ingong giya. Ang pagkinabuhi nga walay giya sa organisasyon sa Diyos ug sa iyang mga sukdanan moresulta sa kagul-anan. Ang karaang Israel maoy panig-ingnan sa pagkaorganisado. Pananglitan, ubos sa Moisesnong Balaod, dihay mga “babaye nga naghimog organisadong pag-alagad sa ganghaan sa tolda nga tagboanan.” (Ex. 38:8) Sa ulahi, giorganisar ni Haring David ang mga Levihanon ug mga saserdote ngadto sa mga dibisyon. (1 Cron. 23:1-6; 24:1-3) Ang Kristohanong kongregasyon sa unang siglo organisado, ug kini nakabenepisyo sa instruksiyon sa nagamandong lawas, nga sa sinugdan gilangkoban sa mga apostoles. (Buh. 6:1-6) Ang mga tambag ug instruksiyon gitagana usab pinaagi sa inspiradong mga sulat.​—1 Tim. 3:1-13; Tito 1:5-9. w16.11 2:3, 6, 8, 9

Niadtong 607 B.C.E., ang dakong panon sa kasundalohan sa Babilonya ubos sa pagmando ni Haring Nabucodonosor II misulong sa siyudad sa Jerusalem. Bahin sa grabeng pagpamatay, ang Bibliya nag-ingon: “[Si Nabucodonosor] mipatay sa ilang mga batan-ong lalaki pinaagi sa espada sa sulod sa balay sa ilang sangtuwaryo, [wala siya maluoy] sa mga batan-ong lalaki o ulay, tigulang o kangokango. . . . Iyang gisunog ang balay sa matuod nga Diyos ug gitumpag ang paril sa Jerusalem; ug ang tanang puloy-anang torre niini ilang gisunog sa kalayo ug usab ang tanang tilinguhaong mga butang niini, aron gun-obon.” (2 Cron. 36:17, 19) Dili na unta angayng matingala ang molupyo sa Jerusalem sa kalaglagan sa siyudad. Sulod sa katuigan, ang mga propeta sa Diyos nagpasidaan sa mga Hudiyo nga kon padayon nilang supakon ang Balaod sa Diyos, sila itugyan ngadto sa mga Babilonyanhon. Daghang Hudiyo ang mangamatay sa espada; ang dili mamatay mahimong binihag sa Babilonya sa tibuok nilang kinabuhi. w16.11 4:1, 2

Si Adan ang “usa ka tawo” nga pinaagi kaniya ang sala “misulod sa kalibotan.” Busa pinaagi “sa paglapas sa usa ka tawo ang kamatayon nagmando ingong hari.” Si Pablo midugang nga ang “kadagaya sa dili-takos nga kalulot [sa Diyos]” gipadayag “pinaagi sa usa ka persona, si Jesu-Kristo.” (Roma 5:12, 15, 17) Ug kanang dili takos nga kalulot nakahatag ug kaayohan sa tanang tawo. “Pinaagi sa pagkamasinugtanon sa usa ka persona [si Jesus] daghan ang mahimong matarong.” Sa pagkatinuod, ang dili takos nga kalulot sa Diyos motultol sa “kinabuhing walay kataposan pinaagi kang Jesu-Kristo.” (Roma 5:19, 21) Dili obligado si Jehova nga ipadala ang iyang Anak sa yuta aron mahimong lukat. Dugang pa, ang dili hingpit, makasasalang katawhan dili takos, o angayan, sa gibuhat sa Diyos ug ni Jesus sa pagtagana sa lukat nga pinaagi niana mapasaylo ang mga sala. Busa ang iyang pagpasaylo kanato ug pagtanyag sa paglaom nga mabuhi sa walay kataposan maoy usa gayod ka kalulot nga dili takos. Angay gayod natong pabilhan pag-ayo ang gasa sa Diyos nga dili takos nga kalulot ug tugotan kana nga mogiya sa atong kinabuhi sa adlaw-adlaw. w16.12 1:1, 6, 7

Importante ang pagsusi sa kaugalingon. Ngano? Si Pablo misulat: “Ang paghunahuna sa unod nagkahulogan ug kamatayon.” (Roma 8:6) Seryoso kana​—espirituwal nga kamatayon karon ug pisikal nga kamatayon sa umaabot. Bisan pa niana, wala ipasabot ni Pablo nga kon ang usa magsugod sa “paghunahuna sa unod” siya tinong mamatay. Posible ang pagbag-o. Hunahunaa ang imoral nga tawo sa Corinto kinsa nangagpas sa “unod” ug kinahanglang ipalagpot. Apan, mahimo siyang mausab ug nag-usab gyod siya. Wala na siya maglakaw sumala sa unod ug mibalik siya pagsubay sa tul-id nga dalan. (2 Cor. 2:6-8) Kon posible nianang tawhana ang pagbag-o, posible usab alang sa usa ka Kristohanon karon ang pagbag-o, ilabina kon wala pa siya makahimog susama ka bug-at sa gihimo sa tawo sa Corinto. Sa pagkatinuod, ang pasidaan ni Pablo bahin sa posibleng resulta sa usa kinsa ‘naghunahuna sa unod’ angayng magpalihok sa mga Kristohanon sa paghimog gikinahanglang mga kausaban! w16.12 2:5, 12, 13

Makapahupay gayod ang ‘pagtugyan sa atong palas-anon kang Jehova,’ kay nahibalo ta nga ‘siya magasapnay kanato’! Kombinsido ta nga ang Diyos “makabuhat ug labaw pa sa hilabihan kamadagayaon nga lapaw sa tanang butang nga atong gipangayo o gihunahuna.” (Efe. 3:20) Hunahunaa ra​—dili lang madagayaon o hilabihan kamadagayaon, kondili “labaw pa sa hilabihan kamadagayaon”! Aron madawat ang ganti, kita kinahanglang magpasundayag ug bug-os nga pagtuo kang Jehova ug magmatinumanon sa iyang mga sugo. Giingnan ni Moises ang nasod sa Israel: “Si Jehova sa walay pakyas magpanalangin kanimo sa yuta nga ihatag ni Jehova nga imong Diyos ingong panulondon sa pagpanag-iya niini, kon ikaw sa walay pakyas magpatalinghog lamang sa tingog ni Jehova nga imong Diyos nga magmatngon sa pagbuhat niining tibuok kasugoan nga akong gisugo kanimo niining adlawa. Kay si Jehova nga imong Diyos magpanalangin gayod kanimo ingon sa iyang gisaad kanimo.” (Deut. 15:4-6) Kombinsido ka ba nga panalanginan ka ni Jehova kon padayon kang mag-alagad kaniya nga matinumanon? Duna kay balidong rason nga magmakombinsido. w16.12 4:8, 9

May katarongan siya sa paghimo niana. Gituman ni Jehova ang iyang saad kasiglohan kanhi sa iyang higalang si Abraham. (Gen. 22:15-18) Dugang pa, kanunayng gamiton ni Jehova ang iyang kagawasan nga kaharmonya sa iyang mga hiyas nga gugma ug hustisya. Dayag kini sa iyang paagi sa pagdisiplina sa mga Israelinhon, kinsa balikbalik nga mibiya sa matuod nga pagsimba. Dihang sila kinasingkasing nga naghinulsol, si Jehova kinabubut-ong nagpakitag gugma ug kaluoy, nga nag-ingon: “Ayohon ko ang ilang pagkadili-matinumanon. Higugmaon ko sila sa kinabubut-on.” (Os. 14:4) Maayo gayong panig-ingnan si Jehova sa paggamit sa iyang kagawasan alang sa kaayohan sa uban! Dihang gisugdan ni Jehova ang paglalang, mahigugmaon niyang gihatagag kagawasan sa pagpili ang iyang intelihenteng mga linalang. Ang unang nakadawat niini nga gasa mao ang iyang panganayng Anak, “ang larawan sa dili-makita nga Diyos.” (Col. 1:15) Bisan sa wala pa siya moanhi sa yuta, si Jesus midesisyon nga magmaunongon sa iyang Amahan ug wala moduyog kang Satanas sa pagrebelde. w17.01 2:3, 4

Ang atong nag-usab-usab nga mga kahimtang makapauswag o makalimite sa kadako sa atong mahimo. Batan-on man o edaran, himsog o dili, mas nasayod si Jehova sa kinamaayohang paagi nga makaalagad ta kaniya. Wala magdahom si Jehova ug sobra gikan kanato, ug pabilhan niya pag-ayo ang atong maarangan. Si Jesus malipayon sa tanan niyang asaynment, ug mahimo sab tang malipayon sa atoa. (Prov. 8:30, 31) Ang makasaranganong tawo kontento sa iyang presenteng mga asaynment o responsabilidad sa kongregasyon. Dili siya mabalaka bahin sa pagbaton ug mga pribilehiyo sa umaabot o sa nakab-ot sa uban. Hinunoa, siya maningkamot nga magmalipayon sa iyang presenteng asaynment kay gilantaw niya kini ingong gikan kang Jehova. Sa samang higayon, tahoron niya ang papel o dapit nga gihatag ni Jehova sa uban. Ang pagkamakasaranganon makatabang nato nga magmalipayon sa paghatag sa uban sa nahiangayng pasidungog ug tabang.​—Roma 12:10. w17.01 3:13, 14

Karon, ang pipila ka bata-batang mga brader nag-atiman tingalig mga responsibilidad diin may tigulang nga mga brader ilalom sa ilang pagdumala. Bisag ang mga bata-bata pa ang nagdumala, makabenepisyo gihapon sila sa kaalam ug eksperyensiya sa mga tigulang dihang mohimog mga desisyon. Si Timoteo, usa ka bata-bata pa nga Kristohanon, nag-alagad uban kang apostol Pablo sulod sa daghang katuigan. Si Pablo misulat sa mga taga-Corinto: “Akong gipadala si Timoteo nganha kaninyo, sanglit siya akong hinigugma ug matinumanong anak diha sa Ginoo; ug iyang ibutang sa inyong hunahuna ang akong mga pamaagi labot kang Kristo Jesus.” (1 Cor. 4:17) Kining mga pulonga nagpakita nga nagtinabangay gayod si Pablo ug Timoteo. Si Pablo migahin ug panahon sa pagtudlo kang Timoteo sa iyang “mga pamaagi.” Nakakat-on gayod si Timoteo ug naangkon niya ang pagmahal ni Pablo, ug masaligon si Pablo nga atimanon ni Timoteo ang espirituwal nga panginahanglan sa mga taga-Corinto. Masundog usab sa mga ansiyano karon ang maong ehemplo samtang bansayon nila ang ubang brader sa pagpanguna sa kongregasyon. w17.01 5:13, 14

Gusto ni Jehova nga ang mga tawo mabuhi, dili mamatay. Ingong Tuboran sa kinabuhi, siya mahimong Amahan sa tanang pagabanhawon. (Sal. 36:9) Busa, haom kaayo nga gitudloan ta ni Jesus sa pag-ampo: “Amahan namo nga anaa sa mga langit.” (Mat. 6:9) Gihatagan ni Jehova si Jesus ug hinungdanong papel sa pagbanhaw sa mga patay. (Juan 6:40, 44) Sa Paraiso, tumanon ni Jesus ang iyang papel ingong “ang pagkabanhaw ug ang kinabuhi.” (Juan 11:25) Si Jehova mahinatagon dili lang sa pipila ka espesyal nga tawo, kay si Jesus miingon: “Si bisan kinsa nga magabuhat sa kabubut-on sa Diyos, kini siya maoy akong igsoong lalaki ug igsoong babaye ug inahan.” (Mar. 3:35) Kabubut-on sa Diyos nga mahimong iyang mga magsisimba ang dili maihap nga “dakong panon” gikan sa tanang nasod, tribo, ug pinulongan. Kadtong magpasundayag ug pagtuo sa lukat ni Kristo ug magbuhat sa kabubut-on sa Diyos mahimong malakip niadtong moingon: “Ang kaluwasan utang namo sa atong Diyos, nga naglingkod sa trono, ug sa Kordero.”​—Pin. 7:9, 10. w17.02 2:10, 11

Aron tabangan sila sa pagwali sa kamatuoran sa Bibliya sa lainlaing pinulongan, legal nga giestablisar niadtong 1884 ang Zion’s Watch Tower Tract Society, ug si Charles Taze Russell ang presidente niini. Usa siya ka maayong estudyante sa Bibliya, ug maisogon niyang giyagyag ang bakak nga mga doktrina sama sa Trinidad ug imortalidad sa kalag. Iyang nasabtan nga ang pagbalik ni Kristo dili makita ug “ang tinudlong mga panahon sa mga nasod” matapos sa 1914. (Luc. 21:24) Bug-os nga gigamit ni Brader Russell ang iyang panahon, kusog, ug kuwarta sa pagpaambit niini nga mga kamatuoran. Klaro nga nianang hinungdanong yugto, si Brader Russell gigamit ni Jehova ug ni Jesus. Si Brader Russell wala mangitag espesyal nga pagtagad gikan sa mga tawo. Niadtong 1896, siya misulat: “Dili namo gusto ang pasidungog, o pagdayeg, alang kanamo o sa among mga sinulat; dili sab namo gustong tawgong Reverend o Rabbi. Ni gusto namo nga si bisan kinsa tawgon sa among ngalan.” Sa ulahi siya miingon: “Dili kini buluhaton sa tawo.” w17.02 4:8, 9

Kitang tanan kinahanglang mopili ug mohimog desisyon. Dili tanan natong desisyon nagkahulogag kinabuhi ug kamatayon. Bisan pa niana, daghan sa atong mga desisyon, mga pagpili nga atong himoon, dunay dakong epekto kanato. Busa, kon maayo ang atong desisyon, kita magkinabuhing malinawon. Pero, kon sayop ang atong desisyon, ang atong kinabuhi punog kagubot, kontrobersiya, ug kahigawad. Unsay makatabang nato sa paghimog maalamong mga desisyon? Kinahanglang may pagtuo ta sa Diyos, nga bug-os mosalig sa iyang kaandam ug katakos sa pagtabang nato nga mahimong maalamon. Kinahanglang may pagtuo sab ta sa Pulong ni Jehova ug sa iyang mga pamaagi, nga mosalig sa iyang inspiradong tambag. (Sant. 1:5-8) Samtang kita masuod kaniya ug modako ang atong gugma sa iyang Pulong, makakat-on ta sa pagsalig sa iyang paghukom. Unya, mabatasan nato ang pagkonsulta sa Pulong sa Diyos sa dili pa modesisyon. w17.03 2:2, 3

Sama sa iyang amahang si Asa, gihuptan ni Jehosapat ang iyang debosyon sa Diyos bisan pag gihulga sa puwersadong kasundalohan sa kaaway. (2 Cron. 20:2-4) Tinuod, nahadlok si Jehosapat! Bisan pa niana, determinado siya nga ‘pangitaon si Jehova.’ Diha sa pag-ampo, mapainubsanon niyang giangkon nga ang iyang katawhan “walay gahom atubangan niining dakong panon sa katawhan” ug nga siya ug ang iyang katawhan wala masayod kon unsay buhaton. Siya bug-os nga misalig kang Jehova ug misulti sa teksto niining adlawa. Usahay kita, sama kang Jehosapat, dili tingali masayod kon unsay buhaton, mahadlok pa gani. (2 Cor. 4:8, 9) Apan hinumdomi nga giangkon ni Jehosapat diha sa iyang publikong pag-ampo nga siya ug ang iyang katawhan walay mahimo. (2 Cron. 20:5) Ang mga ulo sa pamilya makasundog kang Jehosapat pinaagi sa pagpangayo kang Jehova ug giya ug kalig-on sa pagsagubang sa ilang mga problema. Ayawg kaulaw nga madungog sa imong pamilya ang maong mga pangamuyo. Ilang mamatikdan ang imong pagsalig kang Jehova. Gitabangan sa Diyos si Jehosapat, ug motabang sab siya kanimo. w17.03 3:12, 13