Hulyo

Gisakripisyo sa anak ni Jepte ang iyang normal nga tinguha nga maminyo ug makabatog anak aron paluyohan ang matuod nga pagsimba. Unsaon nato pagsundog ang iyang masakripisyohong tinamdan? Linibo ka batan-ong brader ug sister ang kinabubut-ong midesisyon nga dili magminyo o manganak​—bisag niining panahona lang—​aron bug-os nga makaalagad kang Jehova. Ang mga edaran usab nagsakripisyo tingali sa ilang panahon nga para unta sa ilang mga anak ug apo aron makaboluntaryo sa mga proyekto sa pagpanukod o makaeskuyla sa School for Kingdom Evangelizers ug makaalagad diin gikinahanglan pag-ayo ang mga magmamantala sa Gingharian. Ang uban migugol ug dugang panahon aron makigbahin sa espesyal nga kampanya. Ang maong bug-os kasingkasing nga pag-alagad nakapalipay kang Jehova, kinsa dili gayod malimot sa ilang paghago ug sa gugma nga ilang gipakita alang kaniya. (Heb. 6:10-12) Makahimo ka ba usab ug dugang mga sakripisyo aron mas bug-os nga makaalagad kang Jehova? w16.04 1:16, 17

Gipakasama ni Jesus ang iyang kaugalingon sa usa ka magbalantay, ug ang iyang mga sumusunod sa panon sa mga karnero. Hunahunaa kini: Kon ang duha ka karnero atua sa bungtod, ang duha anaa sa walog, ug ang lain pang karnero nanibsib sa laing dapit, matawag bang panon kanang lima ka karnero? Kasagaran, ang usa ka panon sa mga karnero magkauban ubos sa pag-atiman sa magbalantay niini. Sa susama, dili kita makasunod sa atong Magbalantay kon ilain nato ang atong kaugalingon. Kinahanglan tang makig-uban sa mga isigka-Kristohanon diha sa tigom aron mahimo tang bahin sa “usa ka panon” ubos sa “usa ka magbalantay.” Sa dihang kita motambong ug tigom, kita nakatampo sa panaghiusa sa atong panag-igsoonay. (Sal. 133:1) Ang pipila sa atong mga isigkamagsisimba gisalikway sa ilang ginikanan ug mga igsoon. Pero, nagsaad si Jesus nga hatagan silag espirituwal nga pamilya nga mahigugma ug mag-atiman kanila. (Mar. 10:29, 30) Dihang regular kang motambong sa tigom, imong mapamatud-an nga ikaw usa ka amahan, inahan, o igsoon nianang minahal nato nga mga isigkamagtutuo! Dili ba nagdasig kana kanato sa pagbuhat sa atong maarangan sa pagtambong sa tanang tigom? w16.04 3:9, 10

Ang atong mga paningkamot sa pag-alagad sa Diyos​—pinaagi sa pag-ampo, pagtambong sa tigom, pagsangyaw, ug ubang bahin sa atong pagsimba​—makawang lang kon dili kita makigdait sa uban. Dili kita mahimong higala sa Diyos kon dili ta andam mopasaylo sa kasaypanan sa uban. (Luc. 11:4; Efe. 4:32) Ang matag Kristohanon kinahanglang maghunahuna pag-ayo ug magmatinud-anon sa kaugalingon kon siya ba mapinasayloon ug makigdaiton. Ikaw ba kinabubut-ong nagpasaylo sa imong mga isigkamagtutuo? Ganahan ka bang makig-uban nila? Gidahom ni Jehova nga ang iyang mga alagad magmapinasayloon. Kon giawhag ka sa imong konsensiya sa pagpauswag sa imong kaugalingon niining bahina, iampo kang Jehova nga tabangan ka sa paghimo niana. Dunggon ug tubagon sa atong langitnong Amahan ang maong mapainubsanong mga pag-ampo.​—1 Juan 5:14, 15. w16.05 1:6, 7

Unsay gidugayon niining gitagna nga buluhatong pagsangyaw? Si Jesus miingon nga kining tibuok kalibotang buluhaton magpadayon hangtod sa panahon sa kataposang mga adlaw, “ug unya moabot ang kataposan.” May lain pa bang relihiyon nga nagpadayon sa pagsangyaw sa maayong balita niining kataposang mga adlaw? Ang pipila nga atong masangyawan tingali moingon: “Anaa namo ang balaang espiritu, pero kamo ang naghimo sa buluhaton.” Apan dili ba ang atong paglahutay sa buluhaton nagpamatuod nga atong nabatonan ang espiritu sa Diyos? (Buh. 1:8; 1 Ped. 4:14) Matag karon ug unya, may pipila ka relihiyon nga misulay sa paghimo sa buluhaton sa mga Saksi ni Jehova, apan sagad napakyas sila. Ang uban makigbahin sa gitawag ug misyonaryong mga kalihokan sulod sa pipila ka panahon ug dayon mobalik ra sa ilang naandang buluhaton. Ang uban mosulay pa gani sa pagpamalaybalay, apan unsay ilang gisangyaw? Ang tubag sa maong pangutana nagpakita lang nga wala sila maghimo sa buluhaton nga gisugdan ni Kristo. w16.05 2:13, 16

Gikinahanglan ang padayong paningkamot aron kita ‘mapasibo’ ug makapakita sa “bag-ong pagkatawo.” Gipahinumdoman ni Pablo ang iyang mga isigkamagtutuo: ‘Hukasa ang daan nga pagkatawo nga nahiuyon sa kanhi ninyong paagi sa panggawi ug nadunot sumala sa malimbongong mga tinguha niini; ug magbag-o kamo diha sa puwersa nga nagpalihok sa inyong kaisipan, ug magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.’ (Efe. 4:22-24) Sa orihinal nga pinulongan, ang ekspresyong “magbag-o” nagpasabot nga ang pagsul-ob sa bag-ong pagkatawo maoy nagpadayong proseso. Makapadasig kini, kay kini nagpasalig kanato nga bisag unsa na ta ka dugayng nag-alagad kang Jehova, puwede gihapon natong padayong maugmad ug mapauswag ang Kristohanong mga hiyas nga naglangkob sa bag-ong pagkatawo. Oo, ang Bibliya padayong makabag-o sa atong kinabuhi. w16.05 4:8, 9

Ang kahimtang diin si Jehova nagaumol kanato karon giisip ingong espirituwal nga paraiso nga padayon pang ginapalambo. (Isa. 64:8) Kita mobating luwas ug may kasegurohan bisan pag nagpuyo ta niining daotang kalibotan. Atong nailhan si Jehova ug nasinati ang iyang amahanong gugma. (Sant. 4:8) Sa bag-ong kalibotan, bug-os na natong matagamtam ang mga panalangin sa espirituwal nga paraiso. Matagamtam usab nato ang kinabuhi sa literal nga paraiso ubos sa Gingharian sa Diyos. Nianang panahona, si Jehova padayong mag-umol ug magtudlo kanato sa sukod nga dili pa tingali nato bug-os nga mahanduraw karon. (Isa. 11:9) Dugang pa, himoon na sa Diyos nga hingpit ang atong hunahuna ug lawas, aron bug-os natong masabtan ug mabuhat ang iyang kabubut-on. Busa magmadeterminado kita nga padayong magpasakop kang Jehova, nga ipakita kaniya nga giisip nato ang iyang pag-umol ingong pamatuod sa iyang gugma kanato. w16.06 1:8, 9

Kanang mga pulonga maoy bahin sa kataposang pakigpulong ni Moises sa nasod sa Israel nga nagtigom sa kapatagan sa Moab sa tuig 1473 B.C.E. Ang nasod hapit nang motabok sa suba sa Jordan aron panag-iyahon ang Yutang Saad. (Deut. 6:1) Gusto ni Moises, ang ilang lider sulod sa milabayng 40 ka tuig, nga ang mga tawo magmaisogon sa pag-atubang sa umaabot nga mga kalisdanan. Kinahanglan silang mosalig sa ilang Diyos, si Jehova, ug magmatinumanon kaniya. Busa ang kataposang pamulong ni Moises nagdasig kanila sa pagbuhat niana. Human hisgoti ang Napulo ka Sugo ug ang ubang balaod nga gihatag ni Jehova, gisulti ni Moises kanang puwersadong pahayag nga makita sa Deuteronomio 6:4, 5. Ang mga Israelinhon ba nga nagtigom uban kang Moises wala mahibalo nga si Jehova nga ilang Diyos maoy “usa lamang ka Jehova”? Siyempre, nahibalo sila. Ang matinumanong mga Israelinhon nakaila ug nagsimba sa usa lamang ka Diyos​—ang Diyos sa ilang katigulangang si Abraham, Isaac, ug Jacob. w16.06 3:2, 3

Gisulti ni Jesus kanang mga pulonga samtang dinhi pa siya sa yuta. Apan si Kristo gihatagan nag awtoridad nga makiggubat sa kalibotan ni Satanas. (Pin. 19:11-16) Busa, makataronganon ang paghinapos nga nahibalo na si Jesus karon kon kanus-a mahitabo ang Armagedon. Pero, wala ta mahibalo niana. Busa, kinahanglan gayod kitang magmabinantayon hangtod moabot ang maong kasakitan. Hinunoa, nahibalo na daan si Jehova kon kanus-a kana mahitabo. Iya nang gitakda kon kanus-a moabot ang kataposan ug nagakaduol na ang dakong kasakitan. “Kini dili maulahi”! (Hab. 2:1-3) Nganong makaseguro kita niana? Ang mga tagna ni Jehova kanunayng natuman sa hustong panahon! Makaseguro usab kita nga tumanon ni Jehova ang iyang gisaad nga kaluwasan panahon sa dakong kasakitan. Busa kon gusto natong maluwas sa kalaglagan niining sistemaha, kinahanglan tang magmabinantayon. w16.07 2:4-6

Sa malisod nga kahimtang, gitalikdan si Jesus sa iyang mga apostoles. Una pa niana, si Pedro miingon nga bisag mobiya ang uban, dili gyod niya kana buhaton. (Mar. 14:27-31, 50) Apan dihang gidakop si Jesus, ang tanang apostoles​—apil na si Pedro—​mitalikod kaniya. Balikbalik pa ganing gilimod ni Pedro nga nakaila siya kang Jesus. (Mar. 14:53, 54, 66-72) Apan si Pedro nagbasol, ug padayon siyang gigamit ni Jehova. Kon usa ka sa mga tinun-an ni Jesus, ang gibuhat ba ni Pedro makaapektar sa imong pagkamaunongon kang Jehova? Karon, ilhon ba nimo nga mahimong hatagan ni Jehova ang nakasala ug higayon sa paghinulsol ug sa hustong panahon, iya rang tul-iron ang sayop? Usahay ang nakahimog seryosong mga sala dili modawat sa kaluoy ni Jehova ug dili maghinulsol. Sa maong mga situwasyon, mosalig ka ba nga sa hustong panahon, hukman ra ni Jehova ang maong mga makasasala, tingali palagpoton sa kongregasyon? w16.06 4:8, 9

Dihang magul-anon ang atong kasingkasing, usa sa dakong panalangin nga dala sa dili-takos nga kalulot mao ang kahupayan. (Sal. 51:17) Para sa gilutos nga mga Kristohanon sa Tesalonica, si Pablo misulat sa mga pulong sa teksto karong adlawa. Makapahupay gayod ang pagkahibalo nga giatiman ta ni Jehova tungod sa iyang pagkamaayo! Kay makasasala, kon sa atong kaugalingong paningkamot, wala gyod tay paglaom. (Sal. 49:7, 8) Pero gihatagan ta ni Jehova ug talagsaong paglaom. Si Jesus nagsaad sa iyang mga sumusunod: “Kini ang kabubut-on sa akong Amahan, nga ang matag usa nga makakita sa Anak ug magpasundayag ug pagtuo kaniya makabaton ug kinabuhing walay kataposan.” (Juan 6:40) Oo, ang paglaom nga mabuhi sa walay kataposan usa gayod ka gasa, nga kapahayagan sa dili-takos nga kalulot sa Diyos. Kay nakaapresyar niana, si Pablo miingon: “Ang dili-takos nga kalulot sa Diyos nga magdalag kaluwasan sa tanang matang sa tawo gipadayag na.”​—Tito 2:11. w16.07 3:14, 15

Karon, ang pagluib wala gihapon itugot taliwala sa katawhan ni Jehova. Apan, ibutang ta nga gitaban sa usa ka bawtismadong minyo nga lalaki o babaye ang kapikas sa lain ug gipakaslan kana human makakuhag diborsiyo. Kon siya dili mahinulsolon, siya palagpoton aron mahuptan ang kahinlo sa kongregasyon. (1 Cor. 5:11-13) Siya kinahanglang magpatunghag “mga bunga nga nahiangay sa paghinulsol” sa dili pa siya dawatog balik sa kongregasyon. (Luc. 3:8; 2 Cor. 2:5-10) Walay gitakda nga espesipikong gitas-on sa panahon una mapasig-uli ang maong tawo. Pero ang maong pagluib, nga panagsa rang mahitabo taliwala sa katawhan sa Diyos, dili angayng balewalaon. Tingali nagkinahanglag taastaas nga panahon​—usa ka tuig o kapin pa​—una mapamatud-an sa nakasala nga siya tinuod nga naghinulsol. Bisag siya mapasig-uli, siya mobarog gihapon “atubangan sa lingkoranan-sa-paghukom sa Diyos” aron pamatud-an nga tinuoray ang iyang paghinulsol.​—Roma 14:10-12. w16.08 1:12, 13

Ang Gregong pulong nga gihubad ug “magapangab-ot” nagkahulogan ug pagpaningkamot nga makab-ot ang usa ka butang. Sa paggamit sa maong pulong, gipasiugda ni Pablo nga gikinahanglan ang pagpaningkamot aron mouswag sa espirituwal. Hunahunaa ang usa ka brader nga namalandong sa iyang kaugmaon diha sa kongregasyon. Lagmit dili pa siya ministeryal nga alagad, pero iyang naamgohan nga kinahanglan niyang pauswagon ang iyang espirituwal nga mga katakos. Una, maningkamot siyang mokuwalipikar ingong ministeryal nga alagad. Ngadtongadto, naglaom siya nga mokuwalipikar ingong ansiyano. Sa maong mga kahimtang, maningkamot siya nga makab-ot ang mga kuwalipikasyon nga gikinahanglan sa pag-abaga ug dugang responsabilidad sa kongregasyon. Sa susama, ang mga brader ug sister nga gustong magpayunir, mag-Bethelite, o moboluntaryo sa pagpanukod ug mga Kingdom Hall naningkamot aron makab-ot ang ilang mga tumong. w16.08 3:3, 4

Hunahunaa ang gibati ni Nehemias dihang miadto siya sa Jerusalem. Ang siyudad halos walay depensa, ug ang iyang mga isigka-Hudiyo nahigawad pag-ayo. Tungod sa hulga gikan sa langyawng mga magsusupak, ang mga Hudiyo miundang sa pagtukod pag-usab sa mga paril sa Jerusalem. Gitugotan ba ni Nehemias nga mohuyhoy ang iyang mga kamot tungod sa kahigawad? Wala! Sama kang Moises, Asa, ug sa ubang matinumanong alagad ni Jehova, si Nehemias kanunay nang nagsalig sa Diyos. (Ex. 17:8-13; 2 Cron. 14:8-13) Niining higayona, miampo na usab siya kang Jehova. Bisag naghunahuna ang mga Hudiyo nga wala silay bawot, gitubag ni Jehova ang sinserong pag-ampo ni Nehemias alang sa tabang. Gigamit sa Diyos ang iyang “dakong gahom” ug “kusganong kamot” sa pagpalig-on sa nanghuyhoy nga kamot sa mga Hudiyo. (Neh. 2:17-20; 6:9) Kombinsido ka ba nga gigamit ni Jehova ang iyang “dakong gahom” ug “kusganong kamot” sa pagpalig-on sa iyang mga alagad karon? w16.09 1:9

“Daghan ang kaswal ra ug sinina, ilabina kay igang,” matod sa usa ka mantalaan sa Holland bahin sa miting sa mga lider sa relihiyon. “Dili ingon niana sa kombensiyon sa mga Saksi ni Jehova.” Oo, ang mga Saksi ni Jehova sagad dayegon tungod sa pagsul-ob ug “mahapsay nga sinina, uban ang pagkamakasaranganon ug maayong panghunahuna . . . sa paagi nga nahiangay [kanila] nga nagpaila nga masimbahon sa Diyos.” (1 Tim. 2:9, 10) Si apostol Pablo naghisgot bahin sa mga babaye, pero ang maong sukdanan mapadapat usab sa Kristohanong mga lalaki. Ang maayong sukdanan sa sininaan importante kanato ingong katawhan ni Jehova, ug importante sab kana sa Diyos nga atong ginasimba. (Gen. 3:21) Ang giingon sa Kasulatan bahin sa sinina ug pamostura nagpakita nga ang Soberano sa uniberso dunay maayong sukdanan maylabot sa besti alang sa iyang matuod nga mga magsisimba. Busa ang atong sinina ug pamostura angayng magdepende kon unsay dalawaton sa Soberanong Ginoong Jehova. w16.09 3:1, 2

Ang pipila ganahang magtuon bahin sa mga tagna sa Bibliya o sa pagkatukma niini maylabot sa kasaysayan, arkeolohiya, ug siyensiya. Ang usa sa mga tagna nga nindot tun-an mao ang Genesis 3:15. Kana nga bersikulo nagpaila sa pangunang tema sa Bibliya, nga mao ang pagbindikar sa pagkasoberano sa Diyos ug pagbalaan sa iyang ngalan pinaagi sa Gingharian. Gamit ang mahulagwayong mga pulong, gipakita niana nga bersikulo kon sa unsang paagi wagtangon ni Jehova ang tanang pag-antos nga nasinati sa mga tawo sukad sa Eden. Sa unsang paagi tingali nimo tun-an ang Genesis 3:15? Ang usa ka paagi mao ang paghimog time line. Mahimo nimong ilista ang mga teksto nga nagpakita kon sa unsang paagi ang Diyos anam-anam nga naghatag ug katin-awan bahin sa mga indibiduwal ug sa kahikayan nga gihisgotan niini nga bersikulo nga nagpamatuod nga matuman gyod ang maong tagna. Samtang imong makita nga nagkauyon ang maong mga teksto, makahinapos gyod ka nga ang mga manalagna ug magsusulat sa Bibliya “giagak sa balaang espiritu.” w16.09 4:8

Dihay higayon nga si apostol Pedro may pagpihig sa mga dili Hudiyo, pero anam-anam niyang nalangkat sa iyang kasingkasing ang maong negatibong panglantaw. (Buh. 10:28, 34, 35; Gal. 2:11-14) Sa susama, kon atong namatikdan nga duna tay pagpihig o mapasigarbohon ta sa atong rasa, angay natong lukahon kana gikan sa atong kasingkasing. (1 Ped. 1:22) Mahimo natong palandongon ang kamatuoran nga walay usa kanato ang takos sa kaluwasan; kitang tanan dili hingpit, bisag unsay atong nasyonalidad. (Roma 3:9, 10, 21-24) Busa nganong mobati man tang labaw sa uban? Angay natong huptan ang panglantaw nga susama nianang kang apostol Pablo, kinsa nagpahinumdom sa iyang mga isigkadinihogan nga sila “dili na mga estranyo ug mga langyaw nga pumoluyo, kondili . . . mga sakop sa panimalay sa Diyos.” (Efe. 2:19) Ang pagpaningkamot pag-ayo nga mabuntog ang atong pagpihig niadtong lahig kagikan makatabang gayod kanato sa pagsul-ob sa bag-ong pagkatawo.​—Col. 3:10, 11. w16.10 1:9

Aron magpabiling lig-on ang atong pagtuo, gitagana ni Jehova kanato ang iyang kompletong Pulong, ang Bibliya. Aron ‘magmalipayon’ ug “magmalamposon,” kinahanglang regular kitang magbasa sa Pulong sa Diyos, kada adlaw kon posible. (Sal. 1:1-3; Buh. 17:11) Busa, sama sa mga magsisimba ni Jehova sa wala pa ang Kristohanong panahon, kinahanglang padayon kitang mamalandong sa mga saad sa Diyos ug magmatinumanon sa iyang mga sugo. Gitagan-an usab kita ni Jehova ug dagayang espirituwal nga pagkaon pinaagi sa “matinumanon ug maalamong ulipon.” (Mat. 24:45) Busa, kon atong pabilhan ang atong nakat-onan gikan sa maong espirituwal nga mga tagana, mahisama kita sa karaang mga ehemplo sa pagtuo kinsa ‘masaligong nagpaabot’ sa Gingharian. (Heb. 11:1) Ang pag-ampo nakatabang usab sa katawhan ni Jehova kaniadto sa paghupot ug lig-ong pagtuo. Napalig-on ang ilang pagtuo dihang nasinati nila ang tubag sa ilang mga pag-ampo.​—Neh. 1:4, 11; Sal. 34:4, 15, 17; Dan. 9:19-21. w16.10 3:7, 8

Gipasiugda ni Jesus nga ang paghigugma sa Diyos mao ang labing importanteng hiyas dihang gitubag niya ang pangutana: “Unsa ang kinadak-ang sugo diha sa Balaod?” (Mat. 22:35-40) Tungod sa kaimportante sa pagtuo ug gugma, ang Kristohanong mga magsusulat sa Bibliya kadaghang naghisgot niini nga magkauban, sagad sa mao rang bersikulo. Giawhag ni Pablo ang iyang mga igsoon nga ‘isul-ob ang panagang sa dughan nga mao ang pagtuo ug gugma.’ (1 Tes. 5:8) Si Juan misulat: “Kini mao ang . . . sugo [sa Diyos], nga kita magbaton ug pagtuo sa ngalan sa iyang Anak nga si Jesu-Kristo ug maghigugmaay sa usag usa.” (1 Juan 3:23) Bisag hinungdanon ang pagtuo, ang mga bahin niini nga hiyas mahanaw ra dihang makita nato ang katumanan sa mga saad sa Diyos ug mahitabo ang atong gilaoman. Apan ang panginahanglan nga mouswag diha sa paghigugma sa Diyos ug sa atong isigkatawo dili gayod mahanaw. Busa, nakaingon si Pablo: “Hinunoa, karon nagpabilin ang pagtuo, paglaom, gugma, kining tulo; apan ang kinalabwan niini nila mao ang gugma.”​—1 Cor. 13:13. w16.10 4:15-17

Ang mga brader nga nagapanaw ingong representante sa nagamandong lawas nagpahibalo sa “mga sugo nga gidesisyonan sa mga apostoles ug mga ansiyano nga didto sa Jerusalem.” (Buh. 16:4) Dihang gisunod sa mga kongregasyon ang maong mga sugo, sila “padayong nalig-on diha sa pagtuo ug miuswag sa gidaghanon adlaw-adlaw.” Unsay angay natong buhaton dihang makadawat tag instruksiyon gikan sa organisasyon sa Diyos karon? Ang Basahon ni Jehova nag-awhag natong tanan nga magmasinugtanon ug magmapinasakopon. (Deut. 30:16; Heb. 13:7, 17) Walay dapit diha sa organisasyon sa Diyos ang pagkahinawayon o pagkarebelyoso, kay ang maong kinaiya makabungkag sa atong mahigugmaon, malinawon, ug nahiusang mga kongregasyon. Siyempre, walay maunongong Kristohanon ang gustong mosundog kang Diotrefes, kinsa dili matinahoron ug dili maunongon. (3 Juan 9, 10) Mahimong pangutan-on nato ang kaugalingon: ‘Gidasig ba nako ang mga igsoon nga magmaunongon kang Jehova? Gipadapat ug gisuportahan ba dayon nako ang instruksiyon nga gihatag sa mga brader nga nagapanguna?’ w16.11 2:10, 11

Halos normal lang ang kinabuhi niadtong Hudiyong mga binihag kinsa misunod sa kabubut-on sa Diyos. Gitugotan sila sa Babilonya nga dumalahon ang kadaghanan sa ilang mga kalihokan. Ang mga binihag may kagawasan usab nga mobiyahe bisag asa sa nasod. Ang Babilonya mao ang sentro sa negosyo sa karaang panahon, ug ang nakubkobang mga dokumento nagpakita nga daghang Hudiyo ang nakakat-on sa pagpamalit ug pagpamaligya, samtang ang uban nahimong hanas nga mga artesano. Ang pipila ka Hudiyo nangadato pa gani. Ang pagkabihag didto sa Babilonya lahi kaayo sa pagkaulipon didto sa Ehipto nga nasinati sa mga Israelinhon kasiglohan kanhi. (Ex. 2:23-25) Pero makasimba pa kaha pag-usab ang mga Israelinhon sa bug-os ug dalawatong paagi? Niadtong panahona, morag imposible kanang mahitabo. Dili gyod buhian sa Babilonya ang ilang mga binihag. Apan si Jehova nagsaad nga ang iyang katawhan makabatog kagawasan, ug nahitabo gayod kana. Ang saad sa Diyos dili gayod mapakyas.​—Isa. 55:11. w16.11 4:3, 5

Ang maong mga Kristohanon nagkinabuhi pa sa yuta, busa nganong ikaingon nga sila “namatay labot sa sala”? Gipadapat sa Diyos ang lukat ngadto kang Pablo ug sa ubang Kristohanon sa iyang adlaw. Busa, gipasaylo ni Jehova ang ilang mga sala, gidihogan silag balaang espiritu, ug gitawag sila nga iyang espirituwal nga mga anak. Dayon nabatonan nila ang langitnong paglaom. Kon sila magmatinumanon, sila mabuhi ug magmando uban kang Kristo sa langit. Apan miingon si Pablo nga sila “namatay labot sa sala” samtang buhi pa ug nag-alagad pa sa Diyos dinhi sa yuta. Gigamit niya ang ehemplo ni Jesus, kinsa namatay ingong tawo ug dayon gibanhaw ingong imortal nga espiritu didto sa langit. Ang kamatayon wala nay gahom ibabaw kang Jesus. Mao man usab ang dinihogang mga Kristohanon, kinsa mahimong mag-isip sa ilang kaugalingon ingong “patay labot sa sala apan buhi labot sa Diyos pinaagi kang Kristo Jesus.” (Roma 6:9, 11) Lahi na ang ilang paagi sa pagkinabuhi. Wala na sila magtuman sa mga diktar o panukmod sa ilang makasasalang tinguha. Sila namatay maylabot nianang kanhing paagi sa pagkinabuhi. w16.12 1:9, 10

Wala kini magpasabot nga ang Bibliya o ang gugma sa Diyos ug paglaom sa umaabot mao na lang gyoy pirmeng hunahunaon ug hisgotan sa usa. Atong hinumdoman nga si Pablo ug ang uban sa unang siglo nga nagpahimuot sa Diyos nagkinabuhi nga normal sa daghang bahin. Sila mikaon ug miinom. Daghan ang nagminyo, nagpamilya, ug nagtrabaho aron masuportahan ang ilang kaugalingon. (Mar. 6:3; 1 Tes. 2:9) Bisan pa niana, wala tugoti sa maong mga alagad sa Diyos nga ang normal nga kalihokan mahimong sentro sa ilang kinabuhi. Human ipakita nga si Pablo nagtrabaho ingong tighimog tolda, ang asoy nagpadayag kon asa nasentro ang iyang kinabuhi: Regular siyang nakigbahin sa buluhatong pagsangyaw ug pagpanudlo. (Buh. 18:2-4; 20:20, 21, 34, 35) Ug kadto nga mga buluhaton ang iyang girekomendar sa mga igsoon didto sa Roma. Oo, ang kinabuhi ni Pablo nasentro sa espirituwal nga mga tagana ug buluhaton. Kinahanglang sundogon siya sa taga-Roma, ug mao man usab kita.​—Roma 15:15, 16. w16.12 2:5, 15, 16

Makaseguro kita nga pabilhan ni Jehova ang tanan natong paningkamot sa pag-alagad kaniya. Siya makasabot kon kulang tag kompiyansa sa kaugalingon o magduhaduha sa atong mga katakos. Siya magmabination dihang malimitahan ang atong sagradong pag-alagad tungod sa kalisod sa pinansiyal, sakit, o depresyon. Ug makasalig ta nga pabilhan ni Jehova ang tanang paningkamot sa iyang mga alagad nga magmatinumanon kaniya. (Heb. 6:10, 11) Hinumdomi usab nga makaduol ta sa “Tigpatalinghog sa pag-ampo” ug makasalig nga paminawon ta niya. (Sal. 65:2) “Ang Amahan sa malumong mga kaluoy ug ang Diyos sa tanang paghupay” madagayaong maghatag kanatog emosyonal ug espirituwal nga tabang, lagmit pinaagi sa atong mga isigkamagsisimba. (2 Cor. 1:3) Matandog ang kasingkasing ni Jehova kon magmabination ta sa uban. (Mat. 6:3, 4) Ug siya nagsaad nga gantihan ta niya tungod sa atong gipakitang kaayo. w16.12 4:13, 14

Dihang dinhi si Jesus sa yuta, gigamit niya ang iyang kagawasan sa pagpili sa pagsukol sa mga tentasyon gikan sa pangunang Kaaway. (Mat. 4:10) Sa iyang kinasingkasing nga pag-ampo una sa iyang kamatayon, gisulti pag-usab ni Jesus ang iyang determinasyon nga buhaton ang kabubut-on sa Diyos. Siya miingon: “Amahan, kon buot mo, kuhaa kining kopa gikan kanako. Hinuon, matuman unta dili ang akong kabubut-on, kondili ang imoha.” (Luc. 22:42) Hinaot nga sundogon nato si Jesus ug gamiton ang atong kagawasan sa pagpili sa pagpasidungog kang Jehova ug pagbuhat sa iyang kabubut-on! Posible ba god nâ? Oo, masundog nato si Jesus, kay kita gibuhat usab sumala sa larawan ug dagway sa Diyos. (Gen. 1:26) Pero, duna tay mga limitasyon. Dili sama kang Jehova, wala tay bug-os nga kagawasan. Gipatin-aw sa Pulong sa Diyos nga ang atong kagawasan may mga kinutoban ug kinahanglan natong sundon ang mga limitasyon nga gibutang ni Jehova. Dugang pa, ang mga asawa kinahanglang magpasakop sa ilang bana ug ang mga anak sa ilang ginikanan.​—Efe. 5:22; 6:1. w17.01 2:4, 5

Nagkinabuhi kita sa makapalipayng panahon. Ang yutan-ong bahin sa organisasyon ni Jehova nagauswag sa daghang paagi. Tungod niini, gikinahanglan ang mga kausaban. Dihang maapektohan ta sa maong mga kausaban, hinaot nga magmapainubsanon ta, ug unahon ang intereses sa Gingharian, dili ang atoa. Ang pagbuhat niana makapahiusa kanato. Si Pablo misulat sa mga Kristohanon sa Roma: “Ingon nga kita sa usa ka lawas adunay daghang sangkap, apan ang mga sangkap dili tanan managsamag kagamitan, sa ingon kita, bisan tuod daghan, maoy usa ka lawas nga nahiusa kang Kristo.” (Roma 12:4, 5) Nan, bisag unsay atong kahimtang hinaot nga maningkamot kita sa pagpauswag sa intereses sa halangdong Gingharian ni Jehova. Mga tigulang, bansaya ang mga bata-bata pa. Mga bata-bata pang brader, dawata ang responsibilidad, magmakasaranganon, ug magmatinahoron sa mga tigulang. Ug kamong mga asawa, sundoga ang asawa ni Aquila nga si Priscila, kinsa matinumanong miuban ug misuportar kang Aquila bisag nausab ang ilang kahimtang.​—Buh. 18:2. w17.01 5:15, 16

Si Gideon maoy maayo kaayong ehemplo sa pagkamakasaranganon. Human niya dawata ang asaynment gikan kang Jehova, giseguro ni Gideon nga nasabtan niya pag-ayo kon unsay kinahanglang buhaton, ug nagpagiya siya kang Jehova. (Maghu. 6:36-40) Si Gideon lig-on ug maisogon. Bisan pa niana, siya milihok nga maampingon ug maalamon. (Maghu. 6:11, 27) Wala niya gamita ang iyang asaynment aron mahimong prominente. Hinunoa, dihang natapos ang iyang asaynment, siya mipauli. (Maghu. 8:22, 23, 29) Ang pagkamakasaranganon wala magpasabot nga dili na gyod ta mangab-ot o modawat ug dugang mga pribilehiyo sa pag-alagad. Ang Kasulatan nagdasig natong tanan nga mouswag sa espirituwal. (1 Tim. 4:13-15) Apan, nagpasabot ba kini nga kinahanglan gyong mausab ang atong asaynment? Wala. Sa tabang ni Jehova, mahimo tang mouswag sa espirituwal bisan unsa man ang atong presenteng asaynment. Makapadayon ta sa pag-ugmad sa mga katakos nga gihatag sa Diyos kanato ug sa pagpauswag sa maayong mga buhat. w17.01 3:15, 16

Si Jehova mihimog dakong sakripisyo aron itagana ang lukat. (1 Ped. 1:19) Para niya, bililhon kaayo ang katawhan maong andam niyang ihatag ang iyang bugtong Anak alang kanato. Sa diwa, si Jesus ang mipuli sa atong orihinal nga tawhanong amahan, si Adan. (1 Cor. 15:45) Sa pagbuhat niana, dili lang kinabuhi ang mapasig-uli ni Jesus; iya tang gihatagan ug kahigayonan nga mapasig-uli sa pamilya sa Diyos. Oo, pinaagi sa halad ni Jesus, puwedeng dawatog balik ni Jehova ang mga tawo sa iyang pamilya nga dili ikompromiso ang iyang pagkamatarong. Dili ba makapalipay ang paghunahuna sa panahon nga ang tanang matinumanong tawo mahimo nang hingpit? Mahiusa na ang langitnon ug yutan-ong bahin sa iyang pamilya. Sa bug-os nga diwa, kitang tanan mahimo nang mga anak sa Diyos. (Roma 8:21) Ang atong pagkamapasalamaton sa lukat angayng magpalihok kanato nga buhaton ang tanan aron ipahibalo sa uban nga puwede silang makabenepisyo sa maong bililhong gasa. w17.02 1:17, 19

Ang Hulyo 15, 2013 nga Bantayanang Torre nagpatin-aw nga “ang matinumanon ug maalamong ulipon” maoy usa ka gamayng grupo sa dinihogang mga brader nga naglangkob sa Nagamandong Lawas. Ang Nagamandong Lawas mohimog importanteng mga desisyon ingong grupo. Sa unsang paagi? Ang mga membro niini magmiting kada semana, nga makatabang nila nga mamentinar ang maayong komunikasyon ug panaghiusa. (Prov. 20:18) Walay membro sa Nagamandong Lawas ang giisip nga mas importante kay sa ubang membro, busa kada tuig, magpulipuli sila pagtsirman sa ilang miting. (1 Ped. 5:1) Ingon sab niana ang kahikayan sa unom ka komite sa Nagamandong Lawas. Ug ang matag membro sa maong lawas naglantaw sa ilang kaugalingon, dili ingong lider sa iyang mga igsoon, kondili ingong usa sa “mga sulugoon sa panimalay,” kinsa gipakaon sa matinumanong ulipon ug ubos sa pagdumala niini. Ang Nagamandong Lawas dili inspirado ni hingpit. Busa, posibleng masayop sila sa pagpatin-aw sa mga pagtulon-an sa Bibliya o sa ilang paggiya sa organisasyon. w17.02 4:10-12

Ang usa ka importanteng paagi nga ikapakita nato ang pagkamapasalamaton sa lukat mao ang pagdedikar sa atong kaugalingon kang Jehova pinasukad sa atong pagtuo sa lukat ug pagpabawtismo. Ang atong bawtismo nagpakita nga “kita iya ni Jehova.” (Roma 14:8) Kay ang tanang ginabuhat ni Jehova gipalihok sa gugma, iyang kabubut-on nga ang tanan niyang magsisimba magpakitag gugma ingong pangunang hiyas. (1 Juan 4:8-11) Atong gipamatud-an nga gusto natong mahimong “mga anak sa [atong] Amahan nga anaa sa mga langit” pinaagi sa paghigugma nato sa atong isigkatawo. (Mat. 5:43-48) Ang sugo nga higugmaon ang atong isigkatawo maoy ikaduha sa sugo nga higugmaon si Jehova. (Mat. 22:37-40) Ikapakita nato ang atong gugma sa isigkatawo pinaagi sa pagtuman sa sugo nga isangyaw ang maayong balita sa Gingharian sa Diyos. Dihang ipakita nato ang atong gugma sa isigkatawo, gibanaag nato ang himaya sa Diyos. Sa pagkatinuod, ang atong gugma sa Diyos “mahingpit dinhi kanato” kon atong sundon ang sugo sa paghigugma sa uban, ilabina sa atong mga igsoon.​—1 Juan 4:12, 20. w17.02 2:13, 14

Lagmit makaingon ka nga sayon ra ni nga desisyon kay kanunayng makaayo ang pag-alagad kang Jehova. Gani, walay makataronganong tawo ang angayng madani o malangkit kang Baal. Sa gihapon, ang mga Israelinhon ‘nagkiangkiang sa duha ka lainlaing hunahuna.’ Si Elias maalamong nag-awhag nila nga pilion ang kinalabwang paagi sa pagsimba​—ang pagsimba kang Jehova. Nganong daw nalisdan sila sa paghimog maalamong desisyon? Una, sila nawad-ag pagtuo kang Jehova ug wala na mamati kaniya. Wala silay maayong pundasyon sa tukmang kahibalo o kaalam gikan sa Diyos; wala sab silay pagsalig kang Jehova. Kon sila midesisyon pa pinasukad sa tukmang kahibalo, makahimo unta silag maalamong desisyon. (Sal. 25:12) Dugang pa, gitugotan nila ang uban nga moimpluwensiya nila o modesisyon para nila. Ang mga dili magsisimba ni Jehova nag-impluwensiya sa panghunahuna sa mga Israelinhon, nga nagdani kanila sa pagsunod nianang paganong katawhan. Dugay nang nagpasidaan si Jehova bahin niana.​—Ex. 23:2. w17.03 2:6, 7

Sa pagpamalandong sa ehemplo ni Ezequias, mamatikdan nato ang usa ka butang nga angayng wagtangon kay nakababag kini sa atong relasyon sa Diyos o nakapatipas nato gikan sa matuod nga pagsimba. Klaro, dili nato gustong sundogon ang kalibotan kinsa, gamit ang social media, nagtratar sa uban ingong idolo. Siyempre, ang pipila ka Kristohanon malipayng makigkomunikar sa ilang pamilya o suod nga mga higala pinaagi niana. Pero daghan ang nagpalabig gamit sa social media, nga nag-follow sa post sa dili nila kaila. O migahin silag dakong panahon sa pagtan-aw sa mga letrato o pagbasa bahin sa maong mga indibiduwal. Apan, mahimong mahurot ang atong panahon nianang dili kaayo hinungdanong mga butang. Ang usa ka Kristohanon mahimong magmapahitas-on tungod sa daghang nag-like sa iyang post o masuko kon dili na i-follow. Mahimong pangutan-on nato ang kaugalingon, ‘Gilikayan ba nako ang pag-idolo ug mga tawo o paggahin ug dakong panahon sa dili hinungdanong mga butang?’​—Efe. 5:15, 16. w17.03 3:14, 17