Agosto

Grabe ang paggubatay. Ang kasundalohan sa Israel nga gipangulohan ni Gideon naggukod sa ilang mga kaaway​—ang kasundalohan sa Midian ug sa mga kaalyado niini—​sa tibuok gabii sa gilay-ong 32 kilometros! Ang mga Israelinhon nahibalo nga dili kini panahon nga mosurender. Busa aron mapuo ang kaaway, sila “nagpadayon sa paggukod” ug napildi nila ang mga Midianhon. (Maghu. 7:22; 8:4, 10, 28) Kita usab dunay malisod nga pagpakiggubat. Ang atong mga kaaway naglakip kang Satanas, sa iyang kalibotan, ug sa atong pagkadili-hingpit. Ang pipila kanato dugay nang nakiggubat, ug sa tabang ni Jehova, kita nagmadaogon. Apan usahay, kapoyon tingali kita sa pagpakiggubat sa atong mga kaaway ug sa pagpaabot sa kataposan. Sa pagkatinuod, wala pa nato maangkon ang bug-os nga kadaogan. Si Jesus nagpasidaan nga kitang nagkinabuhi sa kataposang mga adlaw makasinatig grabeng mga pagsulay ug pagdaogdaog, apan miingon usab siya nga kita magmadaogon kon kita molahutay.​—Luc. 21:19. w16.04 2:1, 2

Diha sa tigom, ang atong Dakong Instruktor naggiya kanato pinaagi sa iyang Pulong, ang Bibliya. (Isa. 30:20, 21) Bisan ang mga dili magtutuo nga motambong sa tigom mahimong makahinapos: “Ang Diyos anaa gayod sa inyong taliwala.” (1 Cor. 14:23-25) Si Jehova nagapanalangin sa mga tigom pinaagi sa iyang balaang espiritu ug aktibong nagagiya sa Kasulatanhong programa sa pagpanudlo. Busa, diha sa tigom, kita nagapaminaw sa tingog ni Jehova ug nakasinati sa iyang mahigugmaong pag-atiman. Ingong resulta, kita masuod kaniya. Si Jesus miingon: “Kay diin gani adunay duha o tulo nga nagkatigom sa akong ngalan, anaa ako sa ilang taliwala.” (Mat. 18:20) Ingong ulo sa kongregasyon, si Kristo “nagalakaw taliwala” sa mga kongregasyon sa katawhan sa Diyos. (Pin. 1:20–2:1) Hunahunaa kana! Si Jehova ug Jesus aktibong nagpalig-on kanato diha sa mga tigom. Unsa kahay bation ni Jehova kon iyang mamatikdan ang atong kahinam nga makigsuod kaniya ug sa iyang Anak? w16.04 3:13, 14

Duha ka brader ang gitimbaya sa usa ka sister sa paagi nga wala maangayi sa usa kanila. Dihang milakaw na ang sister, ang nahiubos nga brader mireklamo sa gisulti sa sister. Pero gipahinumdoman siya sa laing brader nga ang maong sister maunongong nag-alagad kang Jehova sa malisod nga mga kahimtang sulod na sa 40 ka tuig, busa segurado nga walay daotang intensiyon ang sister. Human kini mapamalandong, ang nahiubos nga brader miingon, “Husto ka.” Ingong resulta, wala na modako ang maong isyu. Unsay gipakita sa maong eksperyensiya? Nagdepende kanimo kon unsaon nimo pag-atubang ang mga situwasyon nga posibleng makapahiubos nimo. Ang usa ka mahigugmaong tawo magtabon sa ginagmayng kalapasan. (Prov. 10:12; 1 Ped. 4:8) Kon atong ‘palabyon’ ang kasaypanan, kini ‘matahom’ sa panan-aw ni Jehova. (Prov. 19:11) Busa dihang may mosulti o mobuhat ug butang nga makapasakit nimo, pangutan-a una ang imong kaugalingon: ‘Mapalabay ra ba nako ni? Kinahanglan ba gyod nakong padak-on ang isyu?’ w16.05 1:8, 9

Kinsa man gayod ang nagsangyaw sa maayong balita sa Gingharian karon? Masaligon kitang makaingon: “Ang mga Saksi ni Jehova!” Nganong masaligon man kaayo ta? Tungod kay atong gisangyaw ang hustong mensahe, ang maayong balita sa Gingharian. Pinaagi sa atong pagduol sa mga tawo, gigamit usab nato ang hustong mga paagi. Ang atong buluhatong pagsangyaw gihimo uban ang hustong motibo​—gugma, dili pinansiyal nga ganansiya. Ang atong buluhaton mao ang kinadak-ag gilapdon, nga nakaabot sa katawhan sa tanang kanasoran ug pinulongan. Ug kita magpadayon niining buluhatona nga walay hunong, hangtod moabot ang kataposan. Makapahingangha gayod ang nalampos sa katawhan sa Diyos niining kulbahinam nga panahon. Apan nganong naposible kini? Si apostol Pablo mitubag pinaagi sa atong teksto karong adlawa. Hinaot nga kitang tanan padayong palig-onon sa atong mahigugmaong Amahan samtang ginahimo nato ang atong maarangan sa pagtuman sa bug-os sa atong ministeryo.​—2 Tim. 4:5. w16.05 2:17, 18

Pinaagi sa pagpili nga buhaton ang kabubut-on sa Diyos ug pagpaningkamot nga himoon kana, atong gipakita kon unsa ka lalom ang atong gugma kang Jehova ug ang atong tinguha nga pahimut-an siya. Gipakita sab nato nga kita nagsuportar sa iyang pagkasoberano. Gikuwestiyon ni Satanas ang katungod ni Jehova sa pagmando, busa ang atong kinabubut-ong paningkamot sa pagdapig sa pagmando ni Jehova seguradong giapresyar pag-ayo sa atong mahinatagon ug mapabilhong langitnong Amahan. (Job 2:3-5; Prov. 27:11) Hinunoa, kon gimaniobra pa ni Jehova nga dili na ta kinahanglang maningkamot sa pagbuntog sa atong mga kahuyangan aron pahimut-an siya, way kapuslanan ang atong pangangkon nga kita maunongon ug misuportar sa iyang pagkasoberano. Busa, giawhag kita ni Jehova nga ‘tim-os nga maningkamot’ sa pag-ugmad sa diyosnong mga hiyas. (2 Ped. 1:5-7; Col. 3:12) Iyang gidahom nga maningkamot ta sa pagkontrolar sa atong hunahuna ug pagbati. (Roma 8:5) Kon mohimo tag sinserong paningkamot niining bahina, kita mas magmalipayon kay nahibalo ta nga ginabag-o gihapon sa Bibliya ang atong kinabuhi. w16.05 4:12, 13

Si Jehova nahibalo sa matang ug kalidad sa “yutang-kulonon” nga iyang umolon. (Sal. 103:10-14) Gani, siya makiglabot nato ingong mga indibiduwal, nga magkonsiderar sa atong mga kahuyangan, limitasyon, ug espirituwal nga pag-uswag. Ang tinamdan niya sa dili hingpit nga mga alagad gipakita sa iyang Anak. Tagda kon giunsa pag-atubang ni Jesus ang kahuyangan sa iyang mga apostoles, ilabina ang ilang kiling nga maglalis kon kinsay labaw. Kon nasaksihan pa nimo ang grabeng panaglalis sa mga apostoles, isipon kaha nimo sila ingong mapainubsanon ug daling umolon? Bisan pa niana, dili negatibo ang panglantaw ni Jesus kanila. Siya nahibalo nga ang iyang matinumanong mga apostoles mahimong umolon pinaagi sa mabination, mapailobong tambag ug pinaagi sa pagpaniid sa iyang ehemplo sa pagkamapainubsanon. (Mar. 9:33-37; 10:37, 41-45; Luc. 22:24-27) Human mabanhaw si Jesus ug mabubo ang balaang espiritu kanila, ang mga apostoles nagpokus, dili na sa posisyon o pagkalabaw, kondili sa buluhaton nga gihatag niya kanila.​—Buh. 5:42. w16.06 1:10

Walay laing matuod nga Diyos gawas kang Jehova; walay laing diyos nga sama kaniya. (2 Sam. 7:22) Busa, gipahinumdoman ni Moises ang mga Israelinhon nga kinahanglang bug-os ang ilang pagsimba kang Jehova. Kinahanglang dili nila sundogon ang mga tawo sa ilang palibot, kinsa nagsimbag lainlaing mga diyos ug diyosa. Ang pipila niadtong bakak nga mga diyos gituohan nga maoy nagkontrolar sa usa ka bahin sa kinaiyahan. Ang uban maoy lain nga matang sa mao ra nga diyos. Pananglitan, ang mga Ehiptohanon nagsimba sa diyos sa adlaw nga si Ra, sa diyosa sa langit nga si Nut, sa diyos sa yuta nga si Geb, sa diyos sa Nilo nga si Hapi, ug sa daghan pang sagradong mananap. Daghan niining bakak nga mga diyos ang napamatud-ang walay gahom dihang gipadangat ni Jehova ang Napulo ka Hampak. Ang prominenteng diyos sa Canaan mao si Baal, ang diyos sa pertilidad, kinsa mao usab ang diyos sa langit, ulan, ug bagyo. Sa daghang dapit, siya usab ang ginasimba. (Num. 25:3) Angayng hinumdoman sa mga Israelinhon nga ang ilang Diyos, ang “matuod nga Diyos,” maoy “usa lamang ka Jehova.”​—Deut. 4:35, 39. w16.06 3:4, 5

May basehanan ang pagsalig ni Jesus kang Jehova ug sa Iyang katawhan, ug mao man usab karon. Sa pagkatinuod, mahingangha gyod ta kon atong konsiderahon ang mga butang nga ginahimo ni Jehova pinaagi sa iyang mga alagad niining kataposang mga adlaw. Walay laing katawhan ang nagsangyaw sa kamatuoran sa tibuok yuta, kay ang uban wala giyahi ni Jehova sama sa iyang paggiya sa iyang nahiusang kongregasyon. Gihubit sa Isaias 65:14 ang espirituwal nga kahimtang sa katawhan sa Diyos: “Tan-awa! Ang akong mga alagad managhugyaw sa kalipay tungod sa maayong kahimtang sa kasingkasing.” Malipayon ang mga alagad ni Jehova sa maayong mga butang nga ilang mahimo kay sila gigiyahan ni Jehova. Sa kasukwahi, magul-anon ang kalibotan ilalom sa impluwensiya ni Satanas samtang nagkagrabe ang kahimtang. Kinahanglan tang magmaunongon kang Jehova ug sa iyang mga kahikayan. w16.06 4:10-12

Duna tay makat-onan sa karaang panahon bahin sa kahinungdanon sa pagkamabinantayon. Niadtong panahona, daghang dagkong siyudad​—sama sa Jerusalem—​ang gilibotag tag-as nga mga paril. Kini nanalipod kanila batok sa mga kaaway ug gikan niana makita sa mga tigbantay ang palibot. Adlaw ug gabii, may mga tigbantay diha sa mga paril ug sa mga ganghaan. Sila magpahibalo sa mga molupyo sa siyudad kon dunay nagsingabot nga mga kaaway. (Isa. 62:6) Hinungdanon nga padayon silang magtukaw ug magbantay, kay kon dili, mameligro ang kinabuhi sa mga tawo. (Ezeq. 33:6) Ang Hudiyong historyano nga si Josephus nag-ingon nga sa 70 C.E., nailog sa Romanong kasundalohan ang Torre sa Antonia, nga sumpay sa paril sa Jerusalem, kay ang mga guwardiya sa ganghaan nakatulog! Busa nakasulod ang mga Romano sa templo ug gisunog kini. Kini ang kataposang bahin sa dakong kasakitan nga nasinati sa Jerusalem ug sa nasod sa mga Hudiyo. w16.07 2:2, 7, 8

Bisan pag ang dili-takos nga kalulot ni Jehova naghatag kanatog daghang panalangin, dili ta angayng maghunahuna nga konsentihon ni Jehova ang tanang panggawi. Ang pipila sa unang siglong mga Kristohanon, nangahas sa ‘paghimo sa dili-takos nga kalulot sa Diyos nga katarongan alang sa malaw-ayng panggawi.’ (Jud. 4) Kining dili matinumanong mga Kristohanon naghunahuna nga puwede ra silang magpakasala, dayon pasayloon ni Jehova. Mas grabe pa, ilang gidani ang mga igsoon nga sundogon ang ilang salawayong binuhatan. Bisag karon, ang mga nagabuhat ug ingon niana “nagpasipala sa espiritu sa dili-takos nga kalulot.” (Heb. 10:29) Gipatuo ni Satanas ang pipila ka Kristohanon karon nga puwede ra silang magpakasala unya awtomatikong pasayloon sa Diyos. Bisan pag andam si Jehova nga pasayloon ang mga mahinulsolon, iyang gidahom nga suklan nato ang atong makasasalang tendensiya. w16.07 3:16, 17

Ang legal nga diborsiyo nga wala ipasukad sa seksuwal nga imoralidad dili maghatag sa usa ug kagawasan sa pagminyo pag-usab. Siyempre, mahimong pasayloon sa usa ang nanapaw apan mahinulsolong kapikas, sama sa gibuhat ni propetang Oseas sa iyang imoral nga asawang si Gomer. Sa susama, gipasaylo ni Jehova ang Israel dihang naghinulsol kini sa ilang espirituwal nga pagpanapaw. (Os. 3:1-5) Dugang pa, kon ang usa nahibalo nga ang iyang kapikas nakapanapaw ug siya midesisyon nga makigdulog na usab sa nakasala, kini nagpasabot nga gipasaylo na niya ang iyang kapikas. Niini nga kahimtang, wala nay Kasulatanhong basehanan sa diborsiyo. Human isulti ang mga pulong sa teksto karong adlawa, si Jesus naghisgot niadtong “adunay gasa” sa pagkatagsaanon. Siya midugang: “Siya nga makahatag ug luna alang niini magahatag ug luna niini.” (Mat. 19:10-12) Daghan ang midesisyon nga magpabiling tagsaanon aron makaalagad kang Jehova nga walay kabaldahan ug angay silang komendahan. w16.08 1:15, 16

Ang mga batan-on daghag mahimo sa pag-alagad kang Jehova kay sila kusgan ug himsog. (Prov. 20:29) Ang pipila ka batan-ong brader nga nag-alagad sa Bethel nakatabang sa pag-imprentag Bibliya ug mga literatura sa Bibliya. Daghang batan-ong brader ug sister ang nakigbahin sa pagpanukod ug pagmentinar sa mga Kingdom Hall. Kon may katalagman, ang mga batan-on, kauban sa mas eksperyensiyadong mga Saksi, miboluntaryo sa paghatag ug hinabang. Ug daghang batan-ong payunir ang mitabang sa pagsangyaw ngadto sa mga tawong lumad ug nagsultig laing pinulongan. Ang salmista miawit: “Silang nagapangita kang Jehova, dili sila makulangan ug bisan unsang butang nga maayo.” (Sal. 34:10) Oo, dili gayod pakyason ni Jehova ang madasigong nag-alagad kaniya. Atong ‘matilawan ug makita nga si Jehova maayo’ samtang ginabuhat nato ang tanan sa pag-alagad kaniya. Ug kon tibuok kinabuhi natong alagaron si Jehova, maeksperyensiyahan nato ang kalipay nga way sama. w16.08 3:5, 8

Si Jehova andam ug makahimo sa paghatag natog kusog pinaagi sa iyang balaang espiritu. (1 Cron. 29:12) Hinungdanon nga pangayoon nato ang maong espiritu aron masuklan ang bisan unsang pagsulay nga ipahinabo ni Satanas ug sa iyang daotang sistema. (Sal. 18:39; 1 Cor. 10:13) Dugang pa, mapasalamaton usab kita nga nabatonan nato ang Pulong sa Diyos, nga nasulat sa tabang sa balaang espiritu. Hunahunaa sab ang binase sa Bibliyang espirituwal nga pagkaon nga atong madawat kada bulan. Ang mga pulong sa Zacarias 8:9, 13 gisulti samtang gitukod pag-usab ang templo sa Jerusalem, ug ang maong mga pulong makatabang usab kanato. Gipalig-on usab kita pinaagi sa balaang edukasyon nga madawat diha sa atong mga tigom, asembliya, kombensiyon, ug sa atong teokratikanhong mga tunghaan. Ang maong pagbansay makatabang kanato sa pag-alagad sa Diyos uban ang hustong motibo, sa pagtakdag espirituwal nga mga tumong, ug sa pagtuman sa daghan natong responsabilidad ingong Kristohanon. (Sal. 119:32) Naningkamot ka ba nga mapalig-on pinaagi niana nga edukasyon? w16.09 1:10, 11

Ang Balaod sa Diyos sa mga Israelinhon nagpakita nga dili gayod dalawaton kang Jehova ang sininaan nga dili na mailhan ang kalainan tali sa lalaki o babaye​—nga gitawag karong unisex fashion. (Deut. 22:5) Sa sugo sa Diyos, tin-aw natong makita nga wala siya mahimuot sa estilo sa sinina nga makapahimo sa lalaki nga babaye tan-awon, makapahimo sa babaye nga lalaki tan-awon, o lisod mailhan kon ang usa lalaki ba o babaye. Ang Pulong sa Diyos dunay mga prinsipyo nga makatabang sa mga Kristohanon sa paghimog maayong desisyon bahin sa sininaan. Kana mapadapat bisan asa sila magpuyo, bisan unsay ilang kultura, o bisan unsay klima. Wala ta magkinahanglag detalyadong listahan kon unsang mga estilo sa sinina ang dalawaton ug dili. Hinunoa, kita gigiyahan sa mga prinsipyo sa Kasulatan nga nagtugot gihapon kanato sa pagpili kon unsay atong isul-ob. w16.09 3:3, 4

Konsideraha ang kaisog ug pagkamatinud-anon sa mga tawo nga nagsulat sa Bibliya. Daghang karaang magsusulat ang naghisgot lang sa maayong mga butang bahin sa ilang mga lider ug gingharian. Apan ang mga manalagna ni Jehova kanunayng nagsulti sa tinuod. Gihisgotan pa gani nila ang kasaypanan sa ilang katawhan, bisan sa ilang mga hari. (2 Cron. 16:9, 10; 24:18-22) Ug gisulat nila ang ilang mga kapakyasan ug nianang sa ubang alagad sa Diyos. (2 Sam. 12:1-14) Tungod sa giya niini, daghan ang kombinsido nga ang Bibliya inspirado sa Diyos. (Sal. 19:7-11) Ang mga prinsipyo sa Bibliya manalipod kanato batok sa bakak nga pagsimba ug sa mga patuotuo nga nag-ulipon sa daghan. (Sal. 115:3-8) Ang mga pagtulon-an sama sa ebolusyon daw naghimo sa kinaiyahan ingong usa ka diyos, nga nag-isip nianang gamhanan imbes si Jehova. Kadtong miingon nga walay Diyos nangangkon nga ang atong kaugmaon nagdepende lang sa atong kaugalingong paningkamot. Pero, dili sila makagarantiya ug maayong kaugmaon.​—Sal. 146:3, 4. w16.09 4:10, 11

Si Boaz naghunahuna kang Ruth ug sa iyang walay kasegurohang kahimtang ingong langyaw. Pananglitan, giawhag niya si Ruth sa pagpanghagdaw uban sa batan-ong mga babaye aron dili siya samokon sa mga lalaki nga nagtrabaho diha sa uma. Giseguro pa gani niya nga si Ruth may makaon ug mainom, sama sa sinuholang mga trabahador. Dugang pa, wala pakamenosa ni Boaz ang pobre nga langyawng babaye, hinunoa, gidasig niya kini. (Ruth 2:8-10, 13, 14) Si Boaz wala lamang matandog sa dili mahakogong gugma ni Ruth sa ugangan niini nga si Noemi, kondili nakadayeg usab siya kang Ruth kay nahimo kining magsisimba ni Jehova. Sa pagkatinuod, ang kaayo ni Boaz maoy pagpahayag sa maunongong gugma ni Jehova ngadto sa usa ka babaye nga ‘midangop ilalom sa mga pako sa Diyos sa Israel.’ (Ruth 2:12, 20; Prov. 19:17) Sa susama, ang kaayo nga atong ipakita makatabang sa “tanang matang sa mga tawo” nga makaila sa kamatuoran ug makasinati kon unsa ka dako ang gugma ni Jehova kanila.​—1 Tim. 2:3, 4. w16.10 1:10-12

Mahimo sab natong isulti ang atong mga kabalaka kang Jehova, kay nahibalo kita nga siya mamati ug magpalig-on kanato aron kita makalahutay nga malipayon. Ug dihang matubag ang atong mga pag-ampo, mas molig-on ang atong pagtuo. (1 Juan 5:14, 15) Tungod kay ang pagtuo maoy bahin sa bunga sa espiritu, kinahanglan kitang ‘magpadayon sa pagpangayo’ sa espiritu sa Diyos, sama sa gidasig ni Jesus kanato. (Luc. 11:9, 13) Hinunoa, kon moampo ta sa Diyos, dili lang personal nga tabang ang atong pangayoon. Daghan kaayo ang “katingalahang mga buhat” ni Jehova ug kita makapasalamat ug makadayeg kaniya adlaw-adlaw! (Sal. 40:5) Angay usab madayag diha sa atong mga pag-ampo nga atong ‘gihinumdoman silang mga binilanggo nga may mga talikala nga daw [kita] tinalikalaan uban kanila.’ Ug kinahanglan sab natong iampo ang atong mga igsoon sa tibuok kalibotan, ilabina ‘kanila nga nagapanguna [kanato].’ Matandog gayod kita dihang makita nato kon giunsa pagtubag ni Jehova ang atong hiniusang mga pag-ampo!​—Heb. 13:3, 7. w16.10 3:8, 9

Karon, ang katawhan ni Jehova nagpasundayag sa ilang pagtuo diha sa natukod nang Gingharian sa Diyos. Kini miresulta sa paglungtad sa usa ka tibuok kalibotang espirituwal nga paraiso nga dunay kapig walo ka milyong molupyo. Usa kini ka dapit diin dagaya ang bunga sa espiritu sa Diyos. (Gal. 5:22, 23) Pagkadakong pasundayag sa tinuod nga Kristohanong pagtuo ug gugma! Walay tawong makaangkon niini nga kalamposan. Kini milungtad sa tabang sa atong Diyos. Kining talagsaong buluhaton nakahatag ug ‘kabantog kang Jehova, usa ka ilhanan hangtod sa panahong walay tino nga dili pagaputlon.’ (Isa. 55:13) Ang atong espirituwal nga paraiso magkadako ug magpadayon sa paglambo hangtod nga ang tibuok yuta mapuno sa hingpit, matarong, ug malipayong mga tawo nga maghatag ug kadayeganan sa ngalan ni Jehova sa walay kataposan. Hinaot nga magpadayon kita sa pagpasundayag ug pagtuo sa mga saad ni Jehova! w16.10 4:18, 19

Kinahanglan natong sundon ang binase sa Bibliyang instruksiyon gikan sa mga ansiyano. Hinumdomi ang tambag ni Pablo bahin sa mga badlonganon sa kongregasyon. Ang pipila “nanghilabot sa mga butang nga wala silay labot.” Seguradong gitambagan sila sa mga ansiyano apan padayong gibalewala ang tambag. Sa unsang paagi makiglabot ang kongregasyon sa maong mga tawo? Si Pablo nagsugo: “Timan-i ninyo siya, hunong na sa pagpakig-uban kaniya.” Balanse ang maong tambag kay wala kini mag-ingon nga isipon ang maong tawo nga kaaway. (2 Tes. 3:11-15) Karon, ang mga ansiyano mahimong mohatag ug pakigpulong ingong pasidaan kon dunay padayong magkinabuhi sa paagi nga makadaot sa reputasyon sa kongregasyon, sama nianang pagpakigdeyt sa dili Saksi. (1 Cor. 7:39) Unsay imong reaksiyon sa ilang tambag? Kon nahibalo ka sa kahimtang nga gihisgotan sa pakigpulong, likayan ba nimo ang pagpakigsuod sa maong indibiduwal? Ang imong gugma ug lig-ong baroganan mahimong magpalihok kaniya sa pagbiya sa dili maayong binuhatan. w16.11 2:13

Niadtong Pentekostes 33 C.E., libolibo ka Hudiyo ug kinabig ang gidihogan ug balaang espiritu. Kining bag-ong mga Kristohanon nahimong “usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya.” (1 Ped. 2:9, 10) Gibantayan pag-ayo sa mga apostoles ang mga kongregasyon sa katawhan sa Diyos samtang buhi pa sila. Hinunoa, ilabina human sa kamatayon sa mga apostoles, mitungha ang mga tawo nga nagsultig “tinuis nga mga butang” aron “ipahilayo ang mga tinun-an” gikan sa kamatuoran. (2 Tes. 2:6-8) Daghan kanila ang may katungdanan sa kongregasyon, nga nag-alagad ingong mga tigdumala ug sa ulahi ingong “mga obispo.” Naporma ang klero nga matang, bisan pag miingon si Jesus sa iyang mga sumusunod: “Kamong tanan mga igsoon.” (Mat. 23:8) Ang prominenteng mga tawo nga pabor sa pilosopiya ni Aristotle ug Plato nagpasiugdag sayop nga mga pagtulon-an sa relihiyon, nga anam-anam nga mipuli sa putli nga mga pagtulon-an sa Pulong sa Diyos. w16.11 4:8

Sa wala pa ta mahimong Kristohanon, kita sagad makasala, tingali wala ta makaamgo kon unsa ka sayop o ka daotan ang atong gibuhat diha sa panglantaw sa Diyos. Kita samag “mga ulipon ngadto sa kahugawan ug pagkamalinapason.” Ikaingon nga kita “mga ulipon pa sa sala.” (Roma 6:19, 20) Dayon kita nakakat-on sa kamatuoran, naghimog mga kausaban sa atong kinabuhi, nagpahinungod sa Diyos, ug nabawtismohan. Kita “gipagawas na gikan sa sala” ug “nahimong mga ulipon sa pagkamatarong.” (Roma 6:17, 18) Pero, atong ‘gitugotan nga magpadayon pagmando ang sala’ kon magpadaog ta sa atong makasasalang mga hunahuna ug tinguha. Tungod kay mahimong ‘tugotan’ nato o dili nga mandoan ta sa sala, motungha ang pangutana, Unsa man gyoy gitinguha sa atong kasingkasing? Pangutan-a ang imong kaugalingon: ‘May mga higayon ba nga gitugotan nako ang akong dili hingpit nga lawas o hunahuna nga motultol nako sa daotang dalan ug dayon mosubay niana? O ako ba namatay maylabot sa sala?’ Nagdepende gayod kana kon unsa ka dako ang atong pagpabili sa dili takos nga kalulot nga gipakita sa Diyos pinaagi sa pagpasaylo kanato. w16.12 1:11, 12

Ang usa ka rason kon nganong nakabaton tag kalinaw sa hunahuna mao ang atong pagpaningkamot nga motunhay ang kalinaw diha sa atong pamilya ug sa kongregasyon. Nasayod ta nga kita ug ang atong mga igsoon dili hingpit. Tungod niini, motungha usahay ang problema. Ug kon mahitabo kana, kita natudloan sa pagsunod sa tambag ni Jesus: “Pakigdait . . . sa imong igsoon.” (Mat. 5:24) Mas sayon kining himoon kon hinumdoman nato nga ang atong mga igsoon nag-alagad usab sa “Diyos nga nagahatag ug kalinaw.” (Roma 15:33; 16:20) Ug dunay laing matang sa kalinaw nga bililhon kaayo. Pinaagi sa “paghunahuna sa espiritu,” nabatonan nato ang malinawong relasyon uban sa atong Magbubuhat. Gisulat ni Isaias ang mga pulong nga natuman sa iyang adlaw apan dunay mas dakong katumanan karon: “Hatagan mo, O [Jehova], ug hingpit nga kalinaw kadtong kanunay nga naglaom kanimo ug misalig kanimo.”​—Isa. 26:3, Ang Bag-ong Maayong Balita Biblia; Roma 5:1. w16.12 2:5, 18, 19

Bisan niining mangitngit nga kataposang mga adlaw sa daotang sistema ni Satanas, si Jehova nagpanalangin sa iyang katawhan. Giseguro niyang mouswag ang iyang matuod nga mga magsisimba diha sa ilang espirituwal nga kahimtang, diin talagsaon kaayo ang espirituwal nga kadagaya. (Isa. 54:13) Ingon sa gisaad ni Jesus, gigantihan ta ni Jehova karon pinaagi sa pagtugot kanato nga mahimong bahin sa mahigugmaong pamilya sa espirituwal nga mga igsoon, usa ka internasyonal nga pamilya. (Mar. 10:29, 30) Dugang pa, kadtong matinuorong nagapangita sa Diyos gigantihan ug way samang panalangin nga kalinaw sa hunahuna, katagbawan, ug kalipay. (Filip. 4:5-7) Makaseguro ka nga ‘human ka makabuhat sa kabubut-on sa Diyos, ikaw makadawat sa katumanan sa saad.’ (Heb. 10:35, 36) Busa, padayon natong palig-onon ang atong pagtuo ug tibuok kalag nga mag-alagad kang Jehova. Mahimo nato kini, kay kombinsido ta nga si Jehova magganti kanato.​—Col. 3:23, 24. w16.12 4:17, 20

Ang kagawasan sa pagpili nga may mga limitasyon tinuod ba nga kagawasan? Oo! Nganong makaingon ta niana? Ang mga limitasyon sa atong kagawasan makapanalipod kanato. Pananglitan, mahimong gamiton nato ang atong kagawasan sa pagpili sa pagmaneho sa atong sakyanan paingon sa usa ka layong siyudad. Apan, mobati ba tang luwas kon magbiyahe ta sa dalan nga walay balaod sa trapiko, diin ang tanan makadesisyon kon unsa ka paspas mopadagan o kon asang bahina sa karsada mosubay? Siyempre dili. Gikinahanglan ang mga limitasyon aron matagamtam natong tanan ang mga panalangin sa tinuod nga kagawasan. Aron ipakita pa nga maalamon ang paggamit sa atong kagawasan sa pagpili sumala sa mga limitasyon nga gitakda ni Jehova, atong hisgotan ang nahitabo kang Adan. Midesisyon siya nga lapason ang gitakda sa Diyos nga limitasyon pinaagi sa pagkaon sa gidiling bunga. Kining grabeng pag-abuso sa kagawasan sa pagpili miresulta sa libolibo ka tuig nga pag-antos ug kasakit sa mga kaliwat ni Adan. (Roma 5:12) Kay nahibalo na ta sa sangpotanan sa desisyon ni Adan, angay tang mapalihok sa paggamit sa atong kagawasan sa hustong paagi ug sumala sa mga limitasyon nga gitakda ni Jehova. w17.01 2:6, 8

Kon makadawat ug bag-ong asaynment, ang pag-ampo ug realistikong pagtimbangtimbang motabang nato nga makita ang atong mga limitasyon. Kon makasaranganon ta, mahimong dili nato dawaton ang maong asaynment. Bisan pa niana, dihang modawat tag bag-ong asaynment, ang ehemplo ni Gideon magpahinumdom kanato nga dili ta molampos kon wala ang giya ug panalangin ni Jehova. Kon buot hunahunaon, gidapit ta sa “paglakaw nga makasaranganon uban sa [atong] Diyos.” (Miq. 6:8) Busa dihang modawat tag bag-ong responsabilidad, kinahanglang pamalandongon nato ang gisulti ni Jehova pinaagi sa iyang Pulong ug organisasyon. Angay tang magpagiya kaniya. Atong hinumdoman nga ang pagpaubos ni Jehova, dili ang atong katakos, ang ‘magapadako kanato.’ (Sal. 18:35) Busa, ang desisyon nga molakaw nga makasaranganon uban sa Diyos makatabang nato nga dili maghunahunag labaw o ubos kaayo bahin sa atong kaugalingon. w17.01 3:17, 18

Si Jesus nahibalo nga ang iyang pagministeryo sa yuta matapos ra ug ang uban maoy mopadayon sa iyang buluhaton. Bisag dili hingpit ang iyang mga tinun-an, siya misalig kanila ug giingnan sila nga mas labaw pa ang ilang mahimo kay kaniya. (Juan 14:12) Gibansay niya sila pag-ayo, ug ilang giwali ang maayong balita sa tanang nasod niadtong panahona. (Col. 1:23) Human sa iyang kamatayon, si Jesus nabanhaw ngadto sa langit diin siya gihatagag dugang buluhaton uban ang awtoridad “nga labaw kaayo sa tanang kagamhanan ug awtoridad ug gahom ug pagkaginoo.” (Efe. 1:19-21) Kon kita mamatay nga matinumanon sa dili pa moabot ang Armagedon, mabanhaw ta sa matarong nga bag-ong kalibotan, diin duna unyay daghang makapatagbawng buluhaton. Bisan pa niana, dunay importanteng buluhaton karon diin kitang tanan puwedeng makigbahin​—ang pagsangyaw sa maayong balita ug paghimog mga tinun-an. Hinaot kitang tanan, bata man o tigulang, “kanunayng puliki diha sa buluhaton sa Ginoo.” w17.01 5:17, 18

Bug-os nga nabayran ang lukat. (Heb. 9:24-26) Wagtangon niini ang silot nga napanunod nato gikan kang Adan. Tungod sa halad ni Kristo, wala na kita maulipon sa kalibotan nga gigamhan ni Satanas, ug wala na ta magkinabuhi nga may kahadlok sa kamatayon. (Heb. 2:14, 15) Kasaligan gayod ang mga saad sa Diyos. Maingon nga ang iyang mga balaod sa kalalangan dili mapakyas, dili sab ta pakyason ni Jehova. Siya dili mausab. Gihatagan ta ni Jehova ug labaw pa sa gasa nga kinabuhi. Gihatagan ta niya sa iyang gugma. “Kita nakahibalo ug nagtuo sa gugma nga nabatonan sa Diyos sa atong kahimtang. Ang Diyos gugma.” (1 Juan 4:16) Ang tibuok yuta mahimo unyang nindot kaayong paraiso, ug ang tanan magbanaag sa gugma sa Diyos. Hinaot moduyog kita sa matinumanon nga langitnong mga linalang sa Diyos sa pag-ingon: “Ang pagdayeg ug ang himaya ug ang kaalam ug ang pagpasalamat ug ang dungog ug ang gahom ug ang kusog maiya unta sa atong Diyos hangtod sa kahangtoran. Amen.”​—Pin. 7:12. w17.02 2:16, 17

Tagda ang nahitabo niadtong 1973. Ang Disyembre 1 nga Bantayanang Torre nangutana: “Ang mga tawo bang wala makakuha sa ilang bisyo sa tabako kuwalipikado sa bawtismo?” Ang tubag mao: “Ang Kasulatanhong ebidensiya nagapunting sa konklusyon nga dili sila kuwalipikado.” Human isitar ang pipila ka konektadong teksto, gipatin-aw sa Bantayanang Torre kon nganong kinahanglang palagpoton ang dili mahinulsolong tigtabako. (1 Cor. 5:7) Kini nag-ingon: “Wala kini maghawas sa panlimbasog nga molihok nga dinalidali, diniktador nga paagi. Ang [estriktong sukdanan] nagagikan gayod sa Diyos, nga nagpahayag sa iyang kaugalingon pinaagi sa iyang sinulat nga Pulong.” Usa ka libro sa United States bahin sa relihiyon ang di pa dugayng miingon: “Ang Kristiyanong mga lider sagad mag-usab-usab sa ilang mga doktrina aron mohaom sa mga pagtulon-an ug opinyon sa ilang mga membro ug sa publiko.” May lain pa bang relihiyon, gawas sa mga Saksi ni Jehova, nga bug-os nagsalig sa Pulong sa Diyos, bisag lisod kaayo kining himoon sa pipila ka membro niini? w17.02 4:15

Ingong pamatuod sa ilang pagkamapaubsanon, dili gusto sa mga ansiyano nga trataron sila nga samag mga artista. Lahi sila sa daghang lider sa relihiyon karon ug sa unang siglo kinsa gihubit ni Jesus: “Buot nila ang labing dungganong dapit panahon sa mga panihapon ug ang unahang mga lingkoranan sa mga sinagoga, ug ang mga timbaya diha sa mga tiyanggihan.” (Mat. 23:6, 7) Ang tinuod nga Kristohanong mga magbalantay mapaubsanong nagtuman sa giingon ni Jesus: “Ayaw kamo pagpatawag nga Rabbi, kay usa ra ang inyong magtutudlo, samtang kamong tanan mga igsoon. Dugang pa, ayaw ninyo tawgang amahan si bisan kinsa dinhi sa yuta, kay usa ra ang inyong Amahan, ang langitnong Usa. Ayaw kamo pagpatawag nga ‘mga pangulo,’ kay usa ra ang inyong Pangulo, si Kristo. Apan ang labing dako taliwala kaninyo kinahanglang mahimong inyong alagad.” (Mat. 23:8-11) Busa, masabtan nimo kon nganong ang mga ansiyano gimahal, gitahod, ug gipasidunggan sa ilang mga isigka-Saksi. w17.03 1:14, 15

Nagdepende nato ang pagdesisyon, ug ang maalamong mga desisyon gipasukad sa Kasulatan. Dili gayod nato tugotan nga ang uban maoy modesisyon para nato. Hinuon, kinahanglang personal natong makat-onan kon unsay matarong para sa Diyos ug modesisyon sa paghimo niana. Sa unsang paagi ta maaghat sa pagtugot sa uban nga modesisyon para nato? Ang atong mga kauban mahimong makaimpluwensiya nato sa paghimog dili maayong desisyon. (Prov. 1:10, 15) Bisan pa niana, bisag presyuron ta sa uban, responsabilidad nato ang pagsunod sa atong nabansay sa Bibliya nga konsensiya. Pero kon tugotan nato ang uban nga modesisyon para nato, kita midesisyon sa “paglakat sa dalan [o, pagsunod] . . . kanila.” Ang maong desisyon moresulta sa kadaot. Si apostol Pablo nagpasidaan sa mga taga-Galacia bahin sa kapeligrohan sa pagtugot sa uban nga modesisyon para nila. (Gal. 4:17) Ang pipila sa kongregasyon gustong modesisyon para sa uban aron ipahilayo sila sa mga apostoles. w17.03 2:8-10

Si Josias madasigon sa paghimo kon unsay makapahimuot sa Diyos. Sama kang Josias, ang mga batan-on angayng mosugod sa pagpangita kang Jehova sukad sa ilang pagkabata. Lagmit gitudloan si Josias sa mahinulsolon nga Haring Manases bahin sa kaluoy sa Diyos. Mga batan-on, pakigsuod sa matinumanong mga tigulang diha sa inyong pamilya ug sa kongregasyon ug sayra kon unsa ka maayo si Jehova kanila. Hinumdomi usab nga ang pagbasa sa Kasulatan nakatandog sa kasingkasing ni Josias ug nagpalihok niya. Ang imong pagbasa sa Pulong sa Diyos mahimong magpalihok usab kanimo sa pagbuhat sa mga butang nga makadugang sa imong kalipay ug makapasuod nimo kang Jehova. Dugang pa, makadasig usab kini kanimo sa pagtabang sa uban sa pagpangita sa Diyos. (2 Cron. 34:18, 19) Ang pagtuon sa Bibliya makatabang usab kanimo nga masayran ang mga paagi nga mapauswag ang imong pag-alagad sa Diyos. Kon buhaton nimo kana, gisundog nimo si Josias. w17.03 3:18, 19