Septiyembre

Sa Bibliya, ang paglahutay wala lamang magpasabot ug pag-antos sa mga pagsulay o kalisdanan. Kini naglangkit sa atong hunahuna ug kasingkasing, o sa atong paagi sa pag-atubang sa mga kalisdanan. Ang usa ka tawong malahutayon magpakitag kaisog, kalig-on, ug pailob. Ang paglahutay mao ang “pag-antos sa mga butang, dili tungod kay wala nay mahimo, kondili tungod sa nagdilaab nga paglaom,” matod sa usa ka reperensiya. “Kini ang hiyas nga makapaarang sa tawo sa pagbarog atubangan sa unos. Pinaagi niini, mahimong mabuntog bisan ang malisod nga mga pagsulay tungod kay saylo sa kasakit makita niini ang tumong.” Ang pagkamalahutayon sa usa ka Kristohanon gipalihok sa gugma. (1 Cor. 13:4, 7) Ang gugma kang Jehova magpalihok kanato sa pag-antos sa bisan unsa nga kaharmonya sa iyang kabubut-on. (Luc. 22:41, 42) Ang atong gugma sa atong mga igsoon motabang kanato sa pag-antos sa ilang mga kahuyangan. (1 Ped. 4:8) Ang atong gugma alang sa atong kapikas motabang kanato sa paglahutay sa “kasakitan” nga masinati bisan sa malipayong mga magtiayon ug magpalig-on sa bugkos sa kaminyoon.​—1 Cor. 7:28. w16.04 2:3, 4

Ang Gregong pulong nga gihubad ug “pagdeboto sa ilang kaugalingon” nagpasabot ug paglahutay uban ang paningkamot. Ubos sa pagmando sa Roma ug sa paglutos gikan sa Hudiyong mga lider sa relihiyon, dili sayon alang sa mga Kristohanon kaniadto ang pagtambong sa tigom. Bisan pa niana, sila milahutay. Daghang alagad ni Jehova karon ang nagpabili pag-ayo sa mga tigom. Si George Gangas, nga nag-alagad ingong membro sa Nagamandong Lawas sa kapig 22 ka tuig, miingon: “Para nako, ang pagtambog tigom uban sa mga igsoon maoy usa sa labing makalilipayng bahin sa kinabuhi ug tuboran sa pagdasig.” Siya midugang: “Ang akong hunahuna ug tinguha mao usab ang pagtambong sa tigom.” Mao ba sab nay imong pagbati sa pagtambong sa tigom? Nan, magmadeterminado nga molahutay ug padayong maningkamot sa pagtambong sa tigom nga makanunayon. Sa ingon, imong gipakita nga uyon ka sa giingon ni Haring David: “Jehova, nahigugma ako sa puloy-anan sa imong balay.”​—Sal. 26:8. w16.04 3:16-18

Ibutang ta nga nasayran nimo nga nasilo ang usa ka igsoon sa imong gisulti o gibuhat. Unsay angay nimong buhaton? Angay kang makig-estorya sa imong igsoon. Hinumdomi ang imong tumong: Dili aron pamatud-an nga nasayop sab siya kondili aron angkonon ang imong sayop ug makigdait. Ang pagpakigdait sa atong mga igsoon mao ang labing importante. Matikdi si Abraham ug ang iyang pag-umangkong si Lot. Silang duha may mga kahayopan, ug ang mga magbalantay nag-away labot sa sibsibanan. Aron mahusay ang kabingkilan, gipapili ni Abraham si Lot kon asa kini gustong mopuyo. (Gen. 13:1, 2, 5-9) Pagkamaayong ehemplo! Gipangita ni Abraham ang kalinaw, dili ang iyang kaugalingong kaayohan. Naalkanse ba siya tungod sa iyang pagkamahinatagon? Wala gayod. Human sa maong panghitabo uban kang Lot, si Jehova nagsaad kang Abraham ug daghang panalangin. (Gen. 13:14-17) Dili gayod tugotan sa Diyos nga ang iyang mga alagad mag-antos hangtod sa hangtod tungod sa ilang pagsunod sa iyang mga prinsipyo ug paghusay sa kabingkilan sa mahigugmaong paagi. w16.05 1:11, 12

Pinaagi sa iyang Pulong, si Jehova naghatag kanatog daghang espesipikong mga balaod. Pananglitan, iyang gidili ang seksuwal nga imoralidad, idolatriya, pagpangawat, ug paghuboghubog. (1 Cor. 6:9, 10) Dugang pa, ang Anak sa Diyos nga si Jesu-Kristo naghatag sa iyang mga sumusunod niining malisod, pero makapahinam, nga sugo: “Panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo. Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mat. 28:19, 20) Ang mga balaod ug sugo sa Diyos maoy usa gayod ka panalipod! Ang pagsunod niana nakapauswag sa atong pagtahod sa kaugalingon, nakatabang nato sa pagbatog maayong panglawas, ug nakapahimo sa pamilya nga mas malipayon. Labaw sa tanan, kon kita maunongong mosunod sa mga sugo ni Jehova, lakip sa sugo nga makigbahin sa buluhatong pagsangyaw, siya malipay ug magpanalangin kanato. w16.05 3:1

Samtang magpagiya kita sa balaang espiritu sa Diyos ug magpahiuyon sa atong hunahuna sa panglantaw ni Jehova nga gipadayag sa iyang Pulong, mas masundog nato ang iyang panghunahuna, sinultihan, ug binuhatan. (Luc. 11:13; Gal. 5:22, 23) Bisan pa niana, kinahanglan gihapon kitang magbantay nga dili madaog sa atong mga kahuyangan. (Prov. 4:23) Kon morag hinay ang imong espirituwal nga pag-uswag, hinumdomi nga kana nagkinahanglag panahon. Ang pag-ugmad sa espirituwal nga mga hiyas maoy nagpadayong proseso. Kinahanglan tang magpailob samtang gitugotan nato ang Bibliya sa paghimog positibong mga kausaban sa atong kinabuhi. Sa sinugdan, kinahanglan tingali natong disiplinahon ang kaugalingon aron mahimo nato ang giingon sa Bibliya. Pero sa ngadtongadto, samtang mas maningkamot kita sa paghunahuna ug paglihok sa paagi nga giuyonan ni Jehova, mahimong mas dali ug natural na para nato ang paghunahuna ug paglihok sa diyosnong paagi.​—Sal. 37:31; Prov. 23:12; Gal. 5:16, 17. w16.05 4:14, 16

Si Jehova pangunang nagaumol sa iyang mga alagad karon pinaagi sa iyang Pulong, balaang espiritu, ug kongregasyon. Ang Pulong sa Diyos makaumol kanato samtang atong basahon ug pamalandongon kini ug hangyoon si Jehova nga tabangan ta sa pagpadapat niini. “Mahinumdom ako kanimo sa akong higdaanan,” misulat si David. “Panahon sa mga pagbantay sa gabii mamalandong ako kanimo.” (Sal. 63:6) Siya misulat usab: “Dayegon ko si Jehova, nga naghatag ug tambag kanako. Sa pagkatinuod, sa mga panahon sa kagabhion ang akong mga rinyon [o, kinasulorang mga hunahuna] nagtul-id kanako.” (Sal. 16:7) Oo, gitugotan ni David ang tambag sa Diyos sa pagtandog ug pag-umol sa iyang kinasulorang mga hunahuna ug pagbati, bisan pag lisod kadtong dawaton. (2 Sam. 12:1-13) Pagkamaayong ehemplo sa pagkamapainubsanon ug pagpasakop ang gipakita ni David! Imo bang gipamalandong ang Pulong sa Diyos, nga gitugotan kana sa pagtandog sa imong kinasulorang mga hunahuna ug pagbati? Mapauswag pa ba nimo ang pagbuhat niana?​—Sal. 1:3. w16.06 1:11

Angay natong hunahunaon nga kitang tanan mga 6,000 ka tuig nang nahilayo sa kahingpitan nga naglungtad kaniadto sa Eden. Ang mga tawong dili hingpit masayop gayod. Busa dili ta makadahom nga pirmeng husto ang isulti ug buhaton sa atong mga igsoon. Kon magsige tag hunahuna sa ilang kasaypanan, mawad-an tag kalipay sa pag-alagad sa Diyos. Ug ilabinang dili maayo nga mapandol ta sa kasaypanan sa uban ug mobiya sa organisasyon ni Jehova. Kon mahitabo kana, dili na kita makabuhat sa kabubut-on sa Diyos ni makalaom nga mabuhi sa bag-ong kalibotan. Aron mahuptan nato ang atong kalipay ug paglaom, angayng hinumdoman nato ang makapahupayng saad ni Jehova: “Ania, ako naglalang ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni kini sila motungha pa sa kasingkasing.” (Isa. 65:17; 2 Ped. 3:13) Ayaw tugoti ang kasaypanan sa uban nga mobabag nimo sa pagdawat sa maong mga panalangin. w16.06 4:13, 14

Ang pulong nga “usa” nagpasabot usab ug panaghiusa sa katuyoan ug buluhaton. Si Jehova nga Diyos wala mabahin ug dili palingpaling. Hinunoa, siya kasaligan, walay pagkausab, ug maunongon. Gisaaran niya si Abraham nga ang mga kaliwat niini makapanunod sa Yutang Saad, ug siya mihimog gamhanang mga buhat aron matuman ang maong saad. Bisag milabay na ang 430 ka tuig, determinado gihapon si Jehova nga tumanon kana. (Gen. 12:1, 2, 7; Ex. 12:40, 41) Kasiglohan sa ulahi, dihang gitawag ni Jehova ang mga Israelinhon ingong iyang mga saksi, siya miingon kanila: “Ako mao gihapon Siya. Una kanako walay Diyos nga nahimo, ug wala nay mosunod pa kanako.” Aron ipasiugda nga ang iyang katuyoan dili mausab, siya midugang: “Sa tanang panahon ako mao gihapon Siya.” (Isa. 43:10, 13; 44:6; 48:12) Pagkatalagsaong pribilehiyo alang sa mga Israelinhon​—ug kanato—​nga mahimong mga alagad ni Jehova, ang Diyos nga walay pagkausab ug maunongon sa tanan niyang mga paagi!​—Mal. 3:6; Sant. 1:17. w16.06 3:6, 7

Kadaghanang nasod karon may “mga tigbantay” o mga guwardiya diha sa ilang mga utlanan ug high-tech nga mga surveillance system. Magbantay sila kon may mosulod sa ilang teritoryo ug kon dunay magpameligro sa seguridad sa nasod. Apan, makita lamang sa maong “mga tigbantay” ang mga kapeligrohan gikan sa mga gobyerno sa tawo o sa mga tawo mismo. Wala sila mahibalo sa paglungtad sa langitnong Gingharian sa Diyos nga gimandoan ni Kristo ug sa mga buluhaton niini karon ug sa papel niini sa pagpahamtang ug paghukom sa tanang kanasoran. (Isa. 9:6, 7; 56:10; Dan. 2:44) Sa laing bahin, kon kita magmaalerto ug magmabinantayon sa espirituwal, mahimo kitang andam bisag kanus-a moabot ang adlaw sa paghukom. (Sal. 130:6) Samtang magkaduol kita sa kataposan niining sistema sa mga butang, mas lisod ang pagpabiling magtukaw. Pagkamakapasubo kon makatulog kita! w16.07 2:2, 9, 10

Nahibalo pag-ayo si Pablo nga dili siya angayan o takos nga modawat sa kaluoy sa Diyos kay siya maglulutos sa mga Kristohanon kaniadto. Sa hinapos nga bahin sa iyang kinabuhi, gisulatan ni Pablo si Timoteo: “Ako mapasalamaton kang Kristo Jesus nga atong Ginoo, nga naghatag ug gahom kanako, tungod kay siya nag-isip kanako nga kasaligan pinaagi sa pagtudlo kanako sa usa ka ministeryo.” (1 Tim. 1:12-14) Unsa kana nga ministeryo? Giingnan ni Pablo ang mga ansiyano sa Efeso kon unsay nalakip niana: “Wala ko pakamahala ang akong kalag, basta lamang akong mahuman ang akong ginadagan ug ang ministeryo nga akong nadawat sa Ginoong Jesus, nga bug-os magpamatuod sa maayong balita bahin sa dili-takos nga kalulot sa Diyos.” (Buh. 20:24) Tungod sa iyang kadasig sa ministeryo, si Pablo nahimong maayo kaayong ehemplo para sa mga Kristohanon karon. Gipamatud-an sab niya nga ang dili-takos nga kalulot sa Diyos nga gipakita kaniya “wala makawang.” w16.07 4:1-3

Kanunayng tabangan ni Jehova ang iyang matinumanong mga alagad, bisag usahay tugotan niyang maghulat sila una mahatagag pribilehiyo o mahimong paborable ang kahimtang. Gisaaran niyag anak si Abraham, pero kinahanglang magpakita ang patriarka ug pagtuo ug pailob. (Heb. 6:12-15) Bisag dugay siyang naghulat hangtod matawo si Isaac, si Abraham wala mawad-ig paglaom, ug wala siya pakyasa ni Jehova. (Gen. 15:3, 4; 21:5) Dili sayon ang paghulat. (Prov. 13:12) Kon magsige tag hunahuna sa atong kapakyasan, kita maluya pag-ayo. Hinunoa, mas maalamong gamiton nato ang atong panahon sa pagpauswag sa atong espirituwal nga mga katakos. Pinaagi sa pagbasa ug pagpamalandong sa Pulong sa Diyos, maugmad nato ang kaalam, pagsabot, maayong panghukom, kahibalo, katakos sa panghunahuna, ug maayong panghunahuna. Matag adlaw, kita kinahanglang mohimog mga desisyon maylabot sa kalingawan, sinina ug pamostura, paggamit sa kuwarta, ug pagpakiglabot sa uban. Pinaagi sa pagpadapat sa atong nakat-onan sa Bibliya, makahimo tag desisyon nga makapalipay kang Jehova. w16.08 3:9-11

Gitabangan ni Jehova ang mga Israelinhon aron mapildi ang mga Amalekanhon ug Etiopianhon, ug gipalig-on niya si Nehemias ug ang mga kauban niini aron mahuman ang pagtukod sa mga paril. Palig-onon usab kita sa Diyos aron makabarog kita batok sa pagsupak, pagkadili-matinagdanon sa mga tawo, ug kabalaka. Sa ingon, makapadayon kita sa atong buluhatong pagsangyaw. (1 Ped. 5:10) Dili nato dahomon nga si Jehova mohimog mga milagro alang kanato. Hinunoa, angay natong buhaton ang atong bahin. Naglakip kana sa atong pagbasa sa Pulong sa Diyos kada adlaw, pagpangandam ug pagtambong sa mga tigom matag semana, pagpadayon sa atong personal nga pagtuon ug pamilyahanong pagsimba, ug pagsalig kanunay kang Jehova pinaagi sa pag-ampo. Dili gyod nato tugotan ang ubang buluhaton ug kalihokan nga makababag sa mga paagi nga gigamit ni Jehova sa pagpalig-on ug pagdasig kanato. Kon mamatikdan nimo nga ang imong mga kamot mihuyhoy na niining bahina, pangayog tabang sa Diyos. Makita nimo kon sa unsang paagi ang iyang espiritu ‘molihok sa sulod nimo aron ikaw magtinguha ug ingon man mobuhat.’ w16.09 1:12

Si apostol Pablo nagrekomendar sa pagkatagsaanon; bisan pa niana, iyang gisulti ang mga pulong sa ibabaw. Siya midugang: “Kon sila walay pagpugong-sa-kaugalingon, paminyoa na lang sila, kay mas maayong magminyo kay sa mag-uros-uros sa pangibog.” Ang pagminyo makatabang sa usa ka tawo aron malikayan nga ang iyang kusganong seksuwal nga tinguha moresulta sa masturbasyon ug seksuwal nga imoralidad. Dugang pa, angayng konsiderahon ang edad, kay siya miingon: “Kon adunay naghunahuna nga siya nagagawing dili husto sa iyang pagkaulay, kon siya lapas na sa pagbuswak sa pagkabatan-on, ug kini mao ang angayng mahitabo, ipabuhat kaniya kon unsay iyang gusto; siya dili makasala. Paminyoa sila.” (1 Cor. 7:9, 36; 1 Tim. 4:1-3) Bisan pa niana, ang usa dili angayng maaghat sa pagminyo tungod lang sa kusganong seksuwal nga tinguha dala sa pagkabatan-on. Lagmit dili pa niya mapas-an ang responsabilidad sa kinabuhing minyo. w16.08 1:17

Daghan ang mohukom ug mohimog opinyon pinaagi sa ilang “makita.” (1 Sam. 16:7) Busa, ingong mga ministro sa Diyos, atong nasabtan nga dili lang ta basta mosul-ob ug sinina nga komportable o gusto nato. Ang mga prinsipyo nga atong nakat-onan sa Pulong sa Diyos angayng magpalihok kanato nga likayan ang pagsul-ob ug sinina nga fitting ug seksi kaayo. Lakip niana ang mga sinina diin makita o mahulma ang pribadong mga parte sa lawas. Ayaw tugoti nga ang uban mobating dili komportable o molingiw tungod sa imong sininaan. Kon kita hapsay, hinlo, desente, ug maayog pamostura, lagmit mas tahoron ta sa mga tawo ug madani sila sa Diyos nga atong ginasimba. Dugang pa, makadayeg sila sa organisasyon nga atong girepresentahan. Ingong resulta, lagmit mas maminaw ang mga tawo sa atong nagaluwas ug kinabuhing mensahe. w16.09 3:5, 6

Ayaw dayon paghunahuna nga nahibalo na ka sa gituohan sa uban. Ang pipila moingon nga sila nagtuo sa ebolusyon, pero gibati sab nila nga naglungtad ang Diyos. Sila naghunahuna nga gigamit sa Diyos ang ebolusyon sa paglalang sa lainlaing matang sa kinabuhi. Ang uban moingon nga nagtuo sila sa ebolusyon kay gibati nila nga dili kana itudlo sa eskuylahan kon dili nâ tinuod. Ug ang pipila wala na motuo ug Diyos kay sila nahigawad sa relihiyon. Busa, kon makighisgot ka bahin sa sinugdan sa kinabuhi, maayong mangutana usa ka. Sayra ang gituohan sa imong kaestorya. Kon rasonable ka ug andam maminaw niya, lagmit mamati pod siya nimo. Kon dunay mokuwestiyon sa imong pagtuo sa paglalang, mahimo nimong ipasaysay niya kon sa unsang paagi nagsugod ang kinabuhi kon walay Maglalalang. Kon mitungha pa ang kinabuhi pinaagig ebolusyon, ang unang matang sa kinabuhi kinahanglang modaghan, nga magpatunghag matang sa kinabuhi nga pareho niana. Usa ka propesor sa chemistry miingon: “Mahingangha gayod ang usa sa kakomplikado bisan sa kinasimplehang matang sa kinabuhi.” w16.09 4:12, 13

Bisag dili nato maseguro kon kinsay gitumong ni Pablo, ang pipila, sama kang Nabot ug Zacarias, gibato hangtod namatay tungod sa ilang pagsunod sa Diyos ug pagbuhat sa iyang kabubut-on. (1 Hari 21:3, 15; 2 Cron. 24:20, 21) Tin-aw nga si Daniel ug ang iyang mga kauban may kahigayonan nga “modawat ug kagawasan” pinaagi sa pagkompromiso. Imbes buhaton kana, ang ilang pagtuo sa gahom sa Diyos nakatabang nila, ingnon ta, sa ‘pagpatak-om sa baba sa mga leyon’ ug sa ‘pagpahunong sa puwersa sa kalayo.’ (Heb. 11:33, 34; Dan. 3:16-18, 20, 28; 6:13, 16, 21-23) Tungod sa ilang pagtuo, ang mga propeta sama kang Micaias ug Jeremias ‘nakaagom ug pagsulay pinaagig mga pagyagayaga ug pagkabilanggo.’ Ang uban, sama kang Elias, “naglatagaw sa mga desyerto ug sa kabukiran ug sa mga langob ug sa mga lungib sa yuta.” Silang tanan nakalahutay tungod kay sila ‘masaligong nagpaabot sa mga butang nga gilaoman.’​—Heb. 11:1, 36-38; 1 Hari 18:13; 22:24-27; Jer. 20:1, 2; 28:10, 11; 32:2. w16.10 3:10, 11

Kita makapakitag kaayo sa mga langyaw pinaagi sa mainitong pagtimbaya kanila diha sa Kingdom Hall. Tingali mamatikdan nato nga ang mga bag-ong namalhin usahay maulawon ug magpalain. Tungod sa pagmatuto kanila o sa ilang kahimtang sa kinabuhi, lagmit mobati silang ubos niadtong lahig rasa o nasyonalidad. Busa angay tang mouna sa pagpakita kanilag mainiton ug sinserong interes. Kon mabatonan sa inyong pinulongan, ang JW Language app makatabang ninyo sa pagkat-on kon unsaon pagtimbaya ang mga langyaw diha sa ilang kaugalingong pinulongan. (Filip. 2:4) Basin magpanuko ka sa pagduol niadtong lahig kultura. Aron mabuntog ang maong pagbati, puwede kang mosultig pipila ka butang bahin sa imong kaugalingon. Lagmit maamgohan nimo nga mas daghan diay mog kaamgiran kay sa kalainan​—tinuod man o giimadyin​—ug nga ang matag kultura may kaugalingong katakos ug kahuyangan. w16.10 1:13, 14

Makaamot ta sa espirituwal nga kahinlo sa kongregasyon pinaagi sa pagsunod sa instruksiyon gikan sa Pulong sa Diyos. Tagda ang situwasyon sa karaang Corinto. Gihimo ni Pablo ang tanan sa pagsangyaw nianang siyudara, ug gihigugma niya ang iyang kaubang “mga balaan” didto. (1 Cor. 1:1, 2) Busa lagmit naguol siya pag-ayo dihang nahibal-an niya ang problema bahin sa seksuwal nga imoralidad nga gitugotan sulod sa kongregasyon! Gisugo ni Pablo ang mga ansiyano sa pagtugyan sa maong imoral nga tawo ngadto kang Satanas​—o sa pagpalagpot kaniya. Aron magpabiling hinlo ang kongregasyon, kinahanglang tangtangon sa mga ansiyano ang “lebadura.” (1 Cor. 5:5-7, 12) Dihang atong suportahan ang desisyon sa mga ansiyano sa pagpalagpot sa dili mahinulsolong makasasala, mitabang ta sa pagmentinar sa kahinlo sa kongregasyon ug tingali mapalihok ang usa sa paghinulsol ug sa pagpangayo sa kapasayloan ni Jehova. w16.11 2:14

Ang pagdasig makahatag ug kaayohan. “Dugay na kong nakigbisog sa pagbating wala koy pulos,” matod ni Rubén. “Pero usa ka higayon niana, nagsangyaw ko uban sa usa ka ansiyano kinsa nakamatikod nga masulob-on ko. Mabination siyang namati samtang gipahayag nako ang akong gibati. Dayon gipahinumdoman ko niya sa maayong butang nga akong nahimo. Gipahinumdoman sab ko niya sa gisulti ni Jesus​—nga ang matag usa kanato labaw pag bili kay sa daghang goryon. Nakahupay gyod nako ang giingon sa maong ansiyano.” (Mat. 10:31) Dili katingad-an nga ang Bibliya nagpasiugda sa panginahanglan sa kanunayng pagdasig. Gisulatan ni apostol Pablo ang Hebreohanong mga Kristohanon: “Magpadayon sa pagtinambagay [o, pagdinasigay] ang usag usa sa matag adlaw, . . . kay basin may si bisan kinsa kaninyo nga magmatig-a tungod sa malimbongong gahom sa sala.” (Heb. 3:13) Maamgohan nimo ang kaimportante sa pagdasig kon imong mahinumdoman ang mga pulong sa pagdasig nga nakapalipay nimo. w16.11 1:2, 3

Niadtong 313 C.E., ang “Kristiyanidad” legal nga giila sa paganong emperador sa Roma nga si Constantino. Human sa Konsilyo sa Nicaea, si Constantino, kinsa presente niadto, nagmando nga ipalagpot sa laing nasod ang pari nga si Arius, kay wala niini ilha si Jesus ingong Diyos. Sa ulahi, sa panahon ni Emperador Theodosius I (379-395 C.E.), ang Simbahang Katoliko​—nga maoy pagtawag sa ulahi sa nahugawang matang sa Kristiyanidad—​mitungha ug nahimong opisyal nga relihiyon sa Imperyo sa Roma. Sumala sa mga historyano, ang paganong Roma “gihimong Kristiyano” sa ikaupat nga siglo. Ang tinuod, nianang panahona, ang usa ka apostatang matang sa Kristiyanidad mianib sa paganong relihiyosong mga organisasyon sa Imperyo sa Roma ingong membro sa Dakong Babilonya. Bisan pa niana, may pipila ka samag trigong dinihogang Kristohanon nga naningkamot pag-ayo sa pagsimba sa Diyos.​—Mat. 13:24, 25, 37-39. w16.11 4:8, 9

Kita nagkinabuhi sa panahon nga makahatag ug grabeng stress. Si Satanas nga Yawa suko kaayo ug “nagasuroysuroy sama sa usa ka leyon nga nagangulob, nga nagapangitag matukob.” (1 Ped. 5:8; Pin. 12:17) Busa, dili ikatingala nga usahay bisan kita nga mga alagad sa Diyos mabalaka. Kon buot hunahunaon, nagmagul-anon usahay ang mahinadlokon sa Diyos nga mga alagad ni Jehova kaniadto, sama kang Haring David. (Sal. 13:2) Hinumdomi usab nga si apostol Pablo ‘nahingawa [o, nabalaka] sa tanang kongregasyon.’ (2 Cor. 11:28) Apan unsay atong mahimo kon kita malumsan sa kabalaka? Ang atong mahigugmaong langitnong Amahan mitabang sa iyang mga alagad kaniadto, ug naghimo siyag mga paagi karon nga kita makabatog igong kahupayan gikan sa kaguol o kabalaka. Sa unsang paagi? Pinaagi sa kinasingkasing nga pag-ampo, pagbasa ug pagpamalandong sa Pulong sa Diyos, pagpangayo sa balaang espiritu ni Jehova, ug pagsulti sa imong gibati ngadto sa usa ka kasaligang higala. w16.12 3:1, 2

Gitalikdan sa katawhan ni Jehova “ang bunga nga [ilang] nabatonan” sa wala pa sila makaila, mahigugma, ug mag-alagad sa Diyos. Ang ilang kanhing pagkinabuhi mahimong naglakip sa “mga butang nga [ila] nang gikaulaw karon” ug takos unta sa kamatayon. (Roma 6:21) Dayon sila nagbag-o. Mao nay gibuhat sa daghan didto sa Corinto kinsa gisulatan ni Pablo. Ang pipila kaniadto mga tigsimbag idolo, mananapaw, homoseksuwal, kawatan, palahubog, ug susama niana. Apan sila “nahugasan na” ug “nabalaan na.” (1 Cor. 6:9-11) Lagmit mao sab nay nahitabo sa pipila diha sa kongregasyon sa Roma. Si Pablo giinspirar sa pagsulat kanila: “[Ayaw pagpadayon] sa pagtugyan sa inyong mga sangkap ngadto sa sala ingon nga mga hinagiban sa pagkadili-matarong, apan itugyan ang inyong kaugalingon sa Diyos ingon nga mga nabuhi gikan sa mga patay, usab ang inyong mga sangkap ngadto sa Diyos ingon nga mga hinagiban sa pagkamatarong.” (Roma 6:13) Segurado si Pablo nga sila makapabiling hinlo sa espirituwal ug sa ingon makapadayon sa pagdawat sa dili takos nga kalulot sa Diyos. w16.12 1:13

Gilalang ni Jehova ang tawo uban ang talagsaong mga katakos. Gihatagan ta niyag katakos sa panghunahuna sa pagsulbad sa mga problema ug pagplano sa umaabot. (Prov. 2:11) Gihatagan ta niyag kusog aron molampos ang atong mga plano ug makab-ot ang atong mga tumong. (Filip. 2:13) Gilalang sab ta niya nga may konsensiya​—usa ka kinaiyanhong katakos sa pag-ila kon unsay husto ug sayop—​nga makatabang kanato sa paglikay sa sayop nga binuhatan ug pagtul-id sa atong kasaypanan. (Roma 2:15) Pinaagi sa iyang Pulong, si Jehova balikbalik nga nag-awhag nga gamiton nato ang atong mga katakos alang sa ikaayo. Pananglitan, sa Hebreohanong Kasulatan, atong mabasa: “Ang mga plano sa kugihan mosangpot gayod sa kaayohan”; ug “ang tanan nga makaplagan sa imong kamot nga buhaton, buhata uban sa imong kusog.” (Prov. 21:5; Eccl. 9:10) Ang Kristohanon Gregong Kasulatan nag-ingon: “Samtang kita may kahigayonan alang niini, buhaton nato ang maayo ngadto sa tanan”; ug “sumala sa nadawat nga gasa sa matag usa, gamita kini sa pag-alagad sa usag usa.” (Gal. 6:10; 1 Ped. 4:10) Klaro, gusto ni Jehova nga buhaton nato ang tanan alang sa atong kaayohan ug sa uban. w17.01 1:1, 2

Ang mga kaliwat ni Adan ug Eva nakapanunod sa pagkadili-hingpit ug kamatayon gikan sa ilang masinupakong ginikanan. Hinunoa, magamit gihapon nila ang ilang kagawasan sa pagpili. Makita kini sa paagi nga nakiglabot ang Diyos sa Israel. Pinaagi sa iyang alagad nga si Moises, gihatagan ni Jehova ang katawhan ug kagawasan sa pagdawat o pagsalikway sa pribilehiyo nga mahimong Iyang linaing katigayonan. (Ex. 19:3-6) Unsay ilang sanong? Sila kinabubut-ong midesisyon nga tumanon ang mga sukdanan sa pagkahimong katawhan sa Diyos, ug sila nagkahiusa sa pag-ingon: “Andam kami sa pagbuhat sa tanan nga gisulti ni Jehova.” (Ex. 19:8) Ikasubo nga sa ulahi gigamit nila sa sayop nga paagi ang ilang kagawasan sa pagpili ug wala nila tumana ang maong saad. Hinaot nga tagdon nato kini nga pasidaan ug kanunayng pabilhan ang atong kagawasan sa pagpili pinaagi sa pagpabiling suod kang Jehova ug pagtuman sa iyang matarong nga mga balaod. w17.01 2:9

Panahon sa pagmando ni Haring Jeroboam, si Jehova nagpadalag usa ka propeta gikan sa Juda aron imantala ang bug-at nga mensahe sa paghukom nianang apostatang hari sa Israel. Ang mapaubsanong propeta matinumanong nagmantala sa mensahe sa Diyos, ug giproteksiyonan siya ni Jehova batok sa mabangis nga kasuko ni Jeroboam. (1 Hari 13:1-10) Sa iyang pagpauli, wala damha sa propeta nga makatagbo siyag usa ka tigulang nga lalaki gikan sa Bethel. Ang lalaki nagpaila nga siya propeta ni Jehova. Iyang gilimbongan ang bata-batang propeta nga supakon ang espesipikong instruksiyon ni Jehova nga ‘dili mokaon ug tinapay o moinom ug tubig sa Israel’ ug ‘dili mobalik sa dalan nga iyang giagian.’ Wala malipay si Jehova niini. Sa pagpauli sa bata-batang propeta, usa ka leyon ang mipatay kaniya. (1 Hari 13:11-24) Nganong ang usa ka kanhing makasaranganong propeta nangahas sa pagsunod sa malimbongong tigulang nga lalaki? Walay gisulti ang Bibliya. Apan posible nga bug-os niyang nalimtan nga kinahanglan siyang ‘maglakaw nga makasaranganon uban sa Diyos.’ w17.01 4:1-3

Ang unang mga pulong sa Bibliya maoy simple apan makahuloganon: “Sa sinugdan gilalang sa Diyos ang mga langit ug ang yuta.” (Gen. 1:1) Tinuod, diyutay ra ang atong nahibaloan sa daghang butang nga gilalang sa Diyos, sama sa kawanangan, kahayag, ug grabidad, ug tipik ra sa uniberso ang atong nakita. (Eccl. 3:11) Bisan pa niana, si Jehova nagpadayag kanato sa iyang katuyoan sa yuta ug sa katawhan. Ang yuta mahimong haom nga puy-anan alang sa mga lalaki ug babaye nga gilalang sa larawan sa Diyos. (Gen. 1:26) Sila mahimong iyang mga anak, ug si Jehova mahimong ilang Amahan. Sumala sa gihisgotan sa kapitulo tres sa Genesis, gibabagan ang katuyoan ni Jehova. (Gen. 3:1-7) Pero ang maong babag mabuntog gayod. Walay makapugong kang Jehova. (Isa. 46:10; 55:11) Busa, makaseguro ta nga ang orihinal nga katuyoan ni Jehova matuman sa iyang gitakdang panahon! w17.02 1:1, 2

Tungod kay ang balaang espiritu maoy dili makitang gahom, giunsa pagkahibalo sa mga Israelinhon nga kini naglihok diha kang Moises? Pinaagi sa balaang espiritu, si Moises nakahimog mga milagro ug nakapahayag sa ngalan sa Diyos ngadto kang Paraon. (Ex. 7:1-3) Ang balaang espiritu nakapatungha usab diha kang Moises sa nindot nga mga hiyas, sama sa gugma, kaaghop, ug pailob, nga nakapahimo niyang takos nga manguna sa mga Israelinhon. Tin-aw ang ebidensiya: Gipili ni Jehova si Moises nga mahimong lider sa Iyang katawhan. Sa ulahi, gihatag ni Jehova ang iyang balaang espiritu sa ubang tawo nga iyang gitudlo sa pagpanguna sa iyang katawhan. “Si Josue nga anak ni Nun napuno sa espiritu sa kaalam.” (Deut. 34:9) “Ang espiritu ni Jehova milimin kang Gideon.” (Maghu. 6:34) Ug “ang espiritu ni Jehova milihok diha kang David.” (1 Sam. 16:13) Silang tanan misalig sa tabang sa espiritu sa Diyos, ug ang maong espiritu nakatabang nila sa paghimog mga butang nga dili nila mahimo sa kaugalingong kusog.​—Jos. 11:16, 17; Maghu. 7:7, 22; 1 Sam. 17:37, 50. w17.02 3:3-5

Si Pablo nagpakitag maayong ehemplo sa pagtahod sa katungod sa uban sa paghimog desisyon. Karon, dihang magtambag maylabot sa mga butang nga naglangkit sa personal nga desisyon, ang mga ansiyano angayng mosundog sa maong ehemplo. Malipay sila sa pagpaambit sa mga igsoon ug binase sa Bibliya nga impormasyon. Bisan pa niana, tinoon sa mga ansiyano nga ang mga igsoon maoy modesisyon. Makataronganon kana kay ang mga igsoon maoy moabaga sa resulta sa ilang desisyon. Kini ang importanteng leksiyon: Makatabang ta sa uban sa pagsabot sa prinsipyo o tambag sa Kasulatan nga mapadapat sa ilang kahimtang. Bisan pa niana, ang mga igsoon may katungod ug responsabilidad sa pagdesisyon. Kon buhaton nila kini nga maalamon, makabenepisyo sila. Tin-aw, kinahanglang likayan nato ang paghunahuna nga may katungod kita sa pagdesisyon alang sa atong mga igsoon. w17.03 2:11

Ang matinumanong ulipon nagpakitag dakong pagtuo pinaagi sa madasigong pagwali ug pagpakaylap sa maayong balita sa Gingharian. Usa ka ba sa ubang mga karnero nga nagpaluyo sa mga dinihogan niining importanteng buluhaton? Malipay ka gayod dihang ang imong Lider, si Jesus, moingon: “Sa sukod nga gibuhat ninyo kini sa usa sa labing ubos niining akong mga igsoon, gibuhat ninyo kini kanako.” (Mat. 25:34-40) Pagbalik ni Jesus sa langit, wala niya pasagdi ang iyang mga sumusunod. (Mat. 28:20) Nasayod siya nga ang balaang espiritu, mga manulonda, ug Pulong sa Diyos nakatabang niya sa pagpanguna dihang dinhi siya sa yuta. Busa, gitagan-an niya ang matinumanong ulipon karon sa samang tabang. Ingong dinihogang mga Kristohanon, ang mga membro sa maong ulipon “nagpadayon pagsunod sa Kordero bisan asa siya moadto.” (Pin. 14:4) Busa, dihang sundon nato ang ilang giya, kita nagsunod sa atong Lider, si Jesus. Sa dili madugay, iya tang giyahan ngadto sa kinabuhing walay kataposan. (Pin. 7:14-17) Ug walay tawhanong lider ang makasaad niana! w17.02 4:17-19

Dihang mag-atubag mga problema nga daw di nato masulbad, sagad modangop dayon ta kang Jehova. Apan unsay atong buhaton dihang mag-atubang tag ginagmayng problema sa matag adlaw? Mosalig ba ta sa tawhanong panghunahuna pinaagi sa pagsulbad niini sa atong kaugalingong paagi? O susihon ba nato ang mga prinsipyo sa Bibliya ug maningkamot sa pagpadapat niini, sa ingon nagpakita nga misalig ta sa paagi ni Jehova sa pagsulbad sa mga problema? Pananglitan, makasinati ka tingalig pagsupak gikan sa imong pamilya maylabot sa pagtambong ug mga tigom o asembliya. Midangop ka kang Jehova aron magiyahan ug matabangan ka nga masayran ang kinamaayohang buhaton sa maong situwasyon. O unsa kaha kon mawad-an kag trabaho, ug nalisdan ka sa pagpangitag lain? Dihang interbiyohon ka sa usa ka posibleng amo, pahibaloon ba nimo siya nga kinahanglan kang motambong sa mga tigom matag semana? Bisag unsa tingaliy problema, maayong hinumdoman nato ang mga pulong sa salmista sa teksto niining adlawa. w17.03 4:6