Ministeryal nga mga Alagad—Usa ka Panalangin sa Katawhan ni Jehova
“Kinahanglang sila pagasulayan una kon angayan ba, unya paalagara sila ingong mga ministro, kay sila nahigawas sa sumbong sa buhat nga daotan.”—1 TIMOTEO 3:10.
SI Jehova mao “ang malipayong Diyos,” ug buot niyang magmalipayon ang iyang mga alagad. (1 Timoteo 1:11) Sa maong katuyoan, iyang gitagana ang mga ansiano ug ministeryal nga mga alagad ingong panalangin sa iyang katawhan. Kining kasaligang mga lalaki nagaalagad ug mapuslanong katuyoan ug nagtabang sa pagseguro sa kalipay, panaghiusa, ug hapsayng paglihok sa Kristohanong kongregasyon. Pagkamapasalamaton sa mga Saksi ni Jehova tungod sa mahigugmaon ug makatabang nga pag-alagad nga ginahimo niining tinudlong mga lalaki sulod sa teokratikanhong organisasyon sa Diyos!
2 Hinuon, bisan pa sa bililhong amot nga ginahatag sa mga ansiano ug ministeryal nga mga alagad sa kongregasyon, kinahanglang dili nila padak-on ang kaugalingon nilang bili. Kinahanglang hinumdoman nilang si Jesu-Kristo mitambag sa iyang mga sumusunod nga magpaubos. Kas-a siya misulti kanila: “Si bisan kinsa nga magpakaubos sa iyang kaugalingon sama niining gamayng bata mao ang labing dako sa gingharian sa mga langit.” (Mateo 18:4) Ug ang tinun-ang si Santiago misulat: “Ipahiubos ninyo ang inyong kaugalingon sa mga mata ni Jehova, ug siya magatuboy kaninyo.” (Santiago 4:10; Roma 12:3) Apan, sa pagbatog mapaubsanong tinamdan dili kinahanglang kining mga tawhana magpakamenos sa bili sa ilang mga buluhaton ingong mga ansiano ug ministeryal nga mga alagad. Sila mahimong mapaubsanon ug sa gihapon magapanguna sa kalihokan sa pag-alagad. Dili gayod angay nilang hikalimtan ang mapuslanong mga katuyoan nga gialagaran sa ilang buluhaton, apan angay nilang kanunayng hinumdoman ang ilang obligasyon, ngadto kang Jehova ug sa ilang Kristohanong mga igsoon, sa pagbuhat sa ilang maarangan sa pagtuman sa ilang mga katungdanan.
3 Ang nagkahiusang kalihokan sa mga Saksi ni Jehova karong adlawa ikatandi sa panaghiusa sa tawhanong lawas. Sa pagkamatuod, gipanig-ingon ni apostol Pablo ang espirituhanong lawas ni Kristo ngadto sa tawhanong lawas nga nalangkoban sa daghang sangkap. Apan alang sa kaayohan sa tanan, ang tanang sangkap sa lawas nagabuhat nga nagkahiusa. (1 Corinto 12:12-31) Ug, sa pagkamatuod, ang tinudlong mga ansiano ug ministeryal nga mga alagad usa ka panalangin sa katawhan ni Jehova, kay kining mga tawhana nagapauswag sa nagkahiusang kalihokan sa Kristohanong kongregasyon karong adlawa. (Itandi ang Colosas 2:18, 19.) Ang nagpahinungod nga mga lalaking sakop sa kongregasyon nga nagapaningkamot sa pagpaluyo sa organisasyonal nga kahikayan ni Jehova pinaagi sa “pagtinguha sa katungdanan sa magtatan-aw” nagahimog bililhong amot ngadto sa Kristohanong panaghiusa ug sa kauswagan sa intereses sa Gingharian. (1 Timoteo 3:1) Apan sa unsang paagi ang usa ka Kristohanong lalaki mahimong takos, sa unang bahin, nga ministeryal nga alagad?
“Kinahanglang Pagasulayan Una Kon Angayan Ba”
4 Gisultihan ni apostol Pablo ang kauban niyang magbubuhat si Timoteo kon unsay gikinahanglan una ang mga lalaki ikatudlong ministeryal nga mga alagad. Apil sa ubang mga butang, si Pablo misulat: “Kinahanglang sila pagasulayan una kon angayan ba, unya paalagara sila ingong mga ministro, kay sila nahigawas sa sumbong sa buhat nga daotan.” (1 Timoteo 3:10) Kini makapugong sa pagtudlog mga lalaki nga walay katakos, kadtong wala makakab-ot sa tinong pangunang Kasulatanhong mga kinahanglanon. Kini mohatag usab ug panahon sa pagtino sa mga motibo sa umaabot ministeryal nga mga alagad. Sa pagkamatuod, kining mga tawhana dili angayng itukmod sa tinguhang makabatog dungog, kay kana magpaila sa kakulang sa pagpaubos. Hinunoa, sa pag-ila sa kamatuorang ang pagpahinungod sa Kristohanon ngadto sa Diyos walay kondisyon ug masakopon sa tanan, ang usa ka igsoong lalaki angayng mag-alagad sa bisan unsang kapasidad nga nakita ni Jehova nga angay siyang gamiton diha sa Iyang organisasyon. Oo, ang umaabot ministeryal nga mga alagad kinahanglang andam moalagad sama sa matinumanong si Isaias, kinsa miingon: “Ania ako! Ipadala ako.”—Isaias 6:8.
5 “Ang ministeryal nga mga alagad kinahanglang magmaugdang, dili duhag sinultihan, dili tig-inom ug daghang bino, dili hakog sa dili-matarong nga panapi,” misaysay si Pablo. (1 Timoteo 3:8) Bisan pag ang pila ka ministeryal nga alagad may pagkabata pa, sila dili kay mga tin-edyer ug sila kinahanglang “ugdang.” Kinahanglang makatuon sila sa pag-isip nga ugdang sa hinungdanong mga butang. (Itandi ang Proverbio 22:15.) Kinahanglang sila kasaligan ug buotan, dili mga lalaking makiling sa dili pag-isip nga ugdang sa responsabilidad. Sa pagkamatuod, sila angayng kapiyalan, nga magaisip nga seryoso sa ilang katungdanan. Kon buot sabton, unsa ba ang labi pang ugdang pagaisipon kay sa sagradong pag-alagad kang Jehova? Kini butang maylabot sa kinabuhi ug kamatayon—alang kanila ug sa uban. (Itandi ang 1 Timoteo 4:16.) Dugang pa, sa pag-ingong ang ministeryal nga mga alagad kinahanglang dili “duhag sinultihan,” gipasabot ni Pablo nga sila angayng prangka ug maminatud-on, dili tabian, salingkapaw o malalangon.—Proverbio 3:32.
6 Ang maayong panimbang usa ka kinahanglanon sa personal nga kinabuhi sa mga lalaki nga takos mahimong ministeryal nga mga alagad. Dayag gipasabot ni Pablo nga kinahanglang molikay sila sa pagkahubog, kadalo, ug pagkalimbongan sa miingon siya nga sila kinahanglang dili “tig-inom ug daghang bino” ni “mahimong hakog sa dili-matarong nga panapi.” Kining Kristohanong mga lalaki kinahanglan usab molikay sa paghatag gani sa impresyong sila labihan ka interesado sa mga kalingawan o sa materyal nga mga butang. Kinahanglang silang maningkamot kanunay sa pagbutang sa espirituwal nga mga butang nga una sa kinabuhi. Kini mobulig kanila sa paghupot ug hinlo nga tanlag atubangan sa mga tawo ug, labi pang hinungdanon, sa mga mata sa Diyos.—1 Timoteo 3:8, 9.
7 Ang mabug-at nga mga responsabilidad nga pas-anon sa ministeryal nga mga alagad dili angay sa mga bata. Kining mga lalakiha gihisgotan sa Kasulatan nga diha sa pangedarong sila mahimong maminyo na ug may pamilya. Sa maong mga kahimtang, kinahanglang sila “magadumala sa maayong paagi sa mga anak ug sa kaugalingon nilang panimalay.” (1 Timoteo 3:12) Nagkahulogan ba kini nga ang usa ka batan-ong lalaki dili takos mahimong ministeryal nga alagad hangtod nga siya magminyo una ug may pamilya? Dili, dili gayod. Sa pagkamatuod, ang iyang pagpanuko nga magdali sa pagminyo nga walay igong pangandam o sa dili pa makakitag angayang bawtismadong Kristohanong kapikas tingali mopadayag sa usa ka sukod sa kahamtong nga gikinahanglan sa pag-atiman sa personal nga mga kahikayan ug sa labi pang seryosong mga responsabilidad sa kongregasyon.
8 Si Pablo miingon nga “ang mga lalaki nga nagaalagad sa maayong paagi makaangkon sa ilang kaugalingon sa maayong dungog ug sa dakong kagawasan sa pagsulti diha sa pagtuo maylabot kang Kristo Jesus.” (1 Timoteo 3:13) Usa ka paagi nga ilang ikapadayag ang gikinahanglang “dakong kagawasan sa pagsulti” maoy pinaagi sa aktibong pagpakigbahin sa pagsangyaw “niining maayong balita sa gingharian.” (Mateo 24:14) Kinahanglang amgohon nilang kauban sa mga ansiano sila dunay responsabilidad sa pagpanguna sa pagsangyaw sa balay-balay ug pag-apil sa ubang dagway sa ministeryo. (Buhat 5:42; 20:20, 21) Samtang tuling nagkahiduol sa iyang kataposan ang daotang sistema ni Satanas, ang buluhaton sa pagsangyaw mahimong labi pang dinalian. Busa, ang ministeryal nga mga alagad kinahanglang magbutang sa pagkadinalian sa buluhatong pagsangyaw sa Gingharian atubangan sa kongregasyon pinaagi sa paghatag ug ekselenteng personal nga panig-ingnan sa pagsangyaw sa kanataran.
Natabangan sa Bug-os-Panahong Ministeryo
9 Tungod sa pagkadinalian sa lisod natong kapanahonan, daghang Kristohanong lalaki ug babaye ang nanulod sa bug-os-panahong ministeryo. Daghan, nga gitawag mga payunir, sa matag adlaw nagagugol sa aberids nga tali sa duha ug lima ka oras sa buluhaton sa pagsangyaw, nga ang pipila kanila ingong mga misyonaryo sa langyawng kayutaan. Ang uban nagaalagad sa bug-os panahon diha sa hedkuwarter sa Watch Tower Society o sa mga sangang buhatan niini sa tibuok yuta. Ang ilang pag-alagad maoy tinubdan sa kalipay ug katagbawan kanila ug niadtong ilang gialagaran. Ug sa daghang hitabo ang kasinatian sa bug-os-panahong pag-alagad nakatabang sa mga lalaki sa pag-ugmad sa mga katakos nga gikinahanglan sa pag-alagad sa kongregasyon sa mapuslanong paagi ingong ministeryal nga mga alagad.
10 Ang usa ka kanhi ministeryal nga alagad, karon usa ka ansiano sa usa ka kongregasyon sa Berlin, Alemanya, nag-ingon mahitungod sa buluhatong payunir nga iyang gisudlan katuigang miagi ingong batan-ong lalaki: “Ako makaingong kadto usa ka tikang nga wala ko gayod pagbasoli. Gipanalanginan ako ni Jehova. Ang akong relasyon uban kaniya nahimong labi pang suod. Oo, sama sa kaliboan pang uban, ang maong igsoong lalaki nakadiskobreng ang bug-os-panahong ministeryo makapalalom sa relasyon sa usa ka tawo uban kang Jehova ug makapadali sa pag-uswag ngadto sa Kristohanong pagkahamtong.
11 Ang laing dugay nang payunir misaysay sa unsang paagi ang bug-os-panahong pag-alagad nakatabang kaniya. “Ako mas malipayon ug nahimong labawng mapailin-ilinon sa pagpakiglabot sa nagkalainlaing matang sa katawhan.” Dili ba kini apil sa mga hiyas nga gikinahanglan sa mga lalaking buot moalagad nga ministeryal nga mga alagad?
12 Ang pag-apil sa bug-os-panahong ministeryo, kon itugot sa Kasulatanhong mga responsabilidad mahimong kahibulongang higayon nga ang Kristohanong mga lalaki “masulayan una kon angayan ba.” Ang pipila makasulod sa maong ministeryo nga permanente, ang uban sa matag karon ug unya. Ang mga batan-on makahimo niana sa panahon sa bakasyon sa eskuylahan, ug ang mga gulanggulang sa panahon sa bakasyon o sa ubang nahiangayng mga panahon sa tuig. Siyempre, ang pag-apil sa bug-os-panahong pag-alagad nagkinahanglag katimbang ug mainampingong pagplano. Kanang mga hiyasa kinahanglanon sa ministeryal nga alagad ug makatabang kaniya sa pagtuman sa iyang mga buluhaton. Unsang mga buluhatona?
Mga Buluhaton sa Ministeryal nga mga Alagad
13 Bisan tuod ang Buhat 6:1-6 laktud dili mapadapat sa pagtudlog ministeryal nga mga alagad, ang gipamulong dinha nagapaila sa matang sa buluhaton o sa kinaiya sa mga buluhatong kasagarang itudlo sa ministeryal nga mga alagad. Dili pinaagi sa pagpanudlo sa isigkamagtutuo kondili sa pag-apod-apod sa mga pagkaon, ang “pito ka lalaki nga hingpamatud-ang maayo” nga niadto gipili naghatag ug kagawasan sa mga apostol aron ‘sila makaatiman sa pag-ampo ug sa ministeryo sa pulong.’ Pinaagi sa pag-atiman sa susamang mga buluhaton karong mga adlawa, ang ministeryal nga mga alagad nagahatag sa mga ansiano ug labawng panahon sa pag-atiman ug pagtudlo sa “panon sa Diyos.”—1 Pedro 5:2, 3.
14 Mahitungod sa mga buluhaton sa ministeryal nga mga alagad, ang librong Organisado sa Pagtuman sa Atong Ministeryo nagaingon: “Ang usa ka ministeryal nga alagad mahimong itudlo sa pag-atiman sa literatura sa kongregasyon nga magpasayon alang sa tanan sa pagkuhag mga basahon nga atong gikinahanglan sa gamit nga personal ug sa pag-alagad sa kanataran. Ang lain hayan magaatiman sa mga magasin diha sa kongregasyon. Ang uban gitudlog mga buluhaton sa paghupot sa mga rekord sama sa mga kuwenta sa kongregasyon o pagtudlog teritoryo, o sila maoy mag-atiman sa mga mikropono, mooperet sa mga himan sa “sound,” magtagad sa plataporma o tingali moabag sa mga ansiano diha sa ubang mga paagi. Adunay daghang buhatonon sa pagmentenar sa Kingdom Hall ug sa paghupot nianang malinis, mao nga ang ministeryal nga mga alagad sagad gikinahanglan aron sa pagbulig sa pagtuman niining mga kaakohana. Ginatudlo usab ang ministeryal nga mga alagad ingong mga atendant, nga nagaabiabi sa mga bag-ohan o nagatabang sa pagmentenar sa kahusay sa mga tigom sa kongregasyon.”—Mga panid 57 ug 58.
15 Si bisan kinsa ba lang nga igsoong lalaki nga may praktikal nga katakos ang mohimo sa maong buluhaton? Dili, kay ang “mga lalaking hingpamatud-ang maayo” nga gipili sa unang siglo sa Jerusalem “puno sa espiritu ug sa kaalam,” o “praktikal ug mahunahunaon sa espirituwal.” (Buhat 6:3, Phillips) Bisan pag sila mga ansiano na taliwala sa katawhan ni Jehova, sila gitudlo sa buluhatong susama sa ginabuhat karon sa ministeryal nga mga alagad. Busa aron matuman sa ministeryal nga mga alagad karong adlawa ang ilang mga buluhaton, sila kinahanglang “praktikal ug mahunahunaon sa espirituwal.” Samtang sila mapuliki sa organisasyonal nga mga detalye, ang panguna nilang interes mao gayod ang pag-alagad sa katawhan nga mapuslanon sa espirituwal nga mga paagi.
16 Sanglit ang ministeryal nga mga alagad kinahanglang mahunahunaon sa espirituwal, may panahong sila magamit alang sa buluhatong kasagarang ginabuhat sa mga ansiano. Ang Organisado sa Pagtuman sa Atong Ministeryo (panid 58 ug 59) nagasaysay: “Kon kulang ang mga ansiano aron dumalahon ang mga Pagtuon sa Libro sa Kongregasyon, ang pila sa mas takos nga ministeryal nga alagad magamit man ingong mga konduktor sa pagtuon sa pag-atiman sa gitudlong mga grupo. Sila mahimong kahatagan ug mga bahin diha sa Tigom sa Pag-alagad ug sa Teokratikanhong Ministeryong Tunghaan ug paghatag ug mga pahayag publiko sa lokal nga kongregasyon. Mahimong ikapaabot ang ubang mga pribilehiyo ngadto sa pipila ka ministeryal nga alagad diin dunay partikular nga panginahanglan ug sila nakakab-ot sa mga kinahanglanon sa maong asaynment.—Itandi ang 1 Pedro 4:10.”
17 Usa sa “pito ka lalaking hingpamatud-ang maayo” sa mga panahon sa Bibliya mao “si Esteban, usa ka lalaking puno sa pagtuo ug balaang espiritu.” (Buhat 6:5) Una mamatay ingong matinumanong martir, si Esteban mihatag sa makapatandog nga pamatuod atubangan sa Hudiyonhong Sanhedrin. Basaha ang asoy, ug ikaw makombinsir nga siya mahunahunaon sa espirituwal, usa ka talagsaong saksi nga nagdawat sa giya sa espiritu sa Diyos ug andam magpakamatay sa pag-alagad kang Jehova. (Buhat 6:8–7:60) Kon usa ka ka ministeryal nga alagad, ginaisip ba nimong ugdang ang imong mga katungdanan sa kongregasyon ug ang pagsangyaw sama sa dayag nga pag-isip ni Esteban sa iyang mga responsabilidad ug sa iyang pribilehiyo sa pagpahayag sa kamatuoran?
Sila Nakakab-ot ba sa mga Sukdanan?
18 Daghang ministeryal nga mga alagad nagahatag ug maayong panig-ingnan sa Kristohanong pagkinabuhi, nagaatiman nga labing maayo sa ilang mga responsabilidad sa kongregasyon, ug nagapanguna gayod sa pagsangyaw sa kanataran. Ang ilang buluhaton gipabilhan ug dako sa kaubang mga magsisimba ug dili kay dili gantihan ni Jehova, kay ang Hebreohanong mga Kristohanon gipasaligan: “Ang Diyos dili hiwi nga hikalimtan ang inyong mga buhat ug ang gugma nga inyong gipakita alang sa iyang ngalan, sa pagkaaging kamo nagaalagad sa mga balaan ug nagapadayon sa pag-alagad.”—Hebreohanon 6:10.
19 Bisan pa niana, ang matag ministeryal nga alagad tingali mangutana sa iyang kaugalingon: “Ako nakakab-ot ba kaha sa mga kinahanglanon sa Kasulatan? Ako nakaamot ba gayod sa panaghiusa sa kongregasyon? Nagaatiman ba ako sa gitudlo kanakong mga buluhaton sa tukma ug makugihong paagi? Ug nagahatag ba akog maayong panig-ingnan sa pagsangyaw sa kanataran? Ang pipila ka ministeryal nga alagad may mga suliran sa pagkab-ot sa ilang mga kinahanglanon. Busa atong hisgotan ang pila nianang mga sulirana. Ang pagbuhat niana makatabang sa matag usa ka ministeryal nga alagad sa “pagsusi kon unsa ang iyang kaugalingong buhat.” (Galacia 6:4) Kini angayng magpauswag usab sa apresasyong nabatonan sa uban alang sa mga kahago sa gugma nga gibuhat niining mga lalakiha nga nagaalagad sa mapuslanong mga katuyoan taliwala sa mga Saksi ni Jehova ug usa ka dakong panalangin sa katawhan sa Diyos.
Makapatin-aw Ka Ba?
◻ Sa unsang paagi ang ministeryal nga mga alagad usa ka panalangin sa katawhan ni Jehova?
◻ Sa unsang paagi ang bug-os-panahong ministeryo makatabang sa mga igsoong lalaki nga buot mahimong ministeryal nga mga alagad?
◻ Nganong ang ministeryal nga mga alagad kinahanglang “praktikal ug mahunahunaon sa espirituwal”?
◻ Sa unsang paagi ang matinumanong si Esteban usa ka maayong panig-ingnan sa ministeryal nga mga alagad karong adlawa?
[Mga Pangutana nga Pagatun-an]
1. Kinsay nagatabang sa pagseguro sa kalipay ug panaghiusa sa kongregasyon?
2. Unsang tinamdan ang kinahanglang batonan sa mga ansiano ug ministeryal nga mga alagad, apan unsa ba ang dili angay nilang hikalimtan?
3. Ang nagkahiusang kalihokan sa mga Saksi ni Jehova ikatandi sa unsa, ug sa unsang paagi ikapasiugda sa napahinungod nga mga lalaki ang maong panaghiusa ug ang kauswagan sa intereses sa Gingharian?
4. (a) Nganong ang umaabot ministeryal nga mga alagad kinahanglang “pagasulayan una kon angayan ba”? (b) Kining mga lalakiha angay nga maandam sa pagbuhat sa unsa?
5. (a) Unsang mga kinahanglanon sa ministeryal nga mga alagad ang gipahayag sa 1 Timoteo 3:8? (b) Unsay kahulogan nga “magmaugdang”? (c) Gipasabot ni Pablo ang unsa sa pag-ingon nga ang ministeryal nga mga alagad kinahanglan dili “duhag sinultihan”?
6. Unsa ang pipila ka paagi nga niana angay ipakita sa ministeryal nga mga alagad ang katimbang?
7. (a) Nganong ikaingong ang mga responsabilidad sa ministeryal nga mga alagad dili alang sa mga bata pa? (b) Ang pagkaulitawo sa usa ka ministeryal nga alagad tingali magpadayag sa unsa bahin kaniya?
8. May labot sa 1 Timoteo 3:13 ug Mateo 24:14, unsang responsabilidad ang nahimutang sa ministeryal nga mga alagad?
9. Tungod sa pagkadinalian sa atong mga panahon, unsang pag-alagad ang gisudlan sa daghang Kristohanon?
10, 11. Sumala sa gipaila sa personal nga mga ekspresyon nga gisitar dinhi, sa unsang paagi ang mga lalaki nga tingali matinguhaon nga mahimong ministeryal nga mga alagad makapahimulos sa bug-os-panahong pag-alagad?
12. (a) Unsa ang kahigayonan sa pagsulod sa bug-os-panahong ministeryo? (b) Ang pagsulod sa bug-os-panahong ministeryo nagkinahanglan sa unsang mga abilidad nga makatabang sa usa ka ministeryal nga alagad sa pagtuman sa iyang mga buluhaton?
13. Ang Buhat 6:1-6 nagasugyot sa unsa kon bahin sa matang sa buluhatong itudlo sa ministeryal nga mga alagad?
14. Unsang nagkadaiyang mga buluhaton ang tingali ikatudlo sa ministeryal nga mga alagad?
15. (a) Sa pag-alagad nga epektibo ingong ministeryal nga alagad, unsa pa ang gikinahanglan gawas sa praktikal nga katakos? (b) Bisan pag ang ministeryal nga mga alagad nagaatiman sa nagkadaiyang mga butang, unsa ang kinahanglang una nilang tagdon?
16. Kon kulang ang mga ansiano sa usa ka kongregasyon, ang ministeryal nga mga alagad ikatudlo sa unsang mga buluhaton?
17. Unsang matang sa lalaki si Esteban, ug unsang pangutana ang ipatungha niini mahitungod sa ministeryal nga mga alagad?
18. Unsay ikaingon sa buluhaton sa daghang ministeryal nga mga alagad, ug sa unsa sila makasalig?
19. (a) Unsang mga pangutana ang tingali isukna sa iyang kaugalingon sa matag ministeryal nga alagad? (b) Nganong mapuslanon ang paghisgot sa mga sulirang naagoman sa pipila ka ministeryal nga alagad?