Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • g86 6/8 p. 24-28
  • Ministeryal nga mga Alagad—Hupti ang Maayong Dungog!

Walay video nga available.

Sorry, dunay problema sa pag-load sa video

  • Ministeryal nga mga Alagad—Hupti ang Maayong Dungog!
  • Pagmata!—1986
  • Sub-ulohan
  • Susamang Materyal
  • Pagkaulitawo ug Kaminyoon
  • Trabaho ug Materyalismo
  • Pag-unong sa Gingharian sa Diyos
  • Panginahanglan sa Labaw nga Kasinatian
  • Pagsagubang sa Pagkamawad-ag Kadasig
  • Kon sa Unsang Paagi ang Uban Makatabang
  • Ministeryal nga mga Alagad—Usa ka Panalangin sa Katawhan ni Jehova
    Pagmata!—1986
  • Hinungdanon ang Buluhaton sa Ministeryal nga mga Alagad
    Organisado Aron Buhaton ang Kabubut-on ni Jehova
  • Unsa ang Papel sa mga Ministeryal nga Alagad?
    Kinsay Nagabuhat sa Kabubut-on ni Jehova Karon?
  • Pagpadayon Paghupot sa Panag-uyon Tali sa mga Ansiano ug Ministeryal nga mga Alagad
    Ang Bantayanang Torre Nagapahayag sa Gingharian ni Jehova—1994
Uban Pa
Pagmata!—1986
g86 6/8 p. 24-28

Ministeryal nga mga Alagad—Hupti ang Maayong Dungog!

“Ang mga lalaki nga nagaalagad sa maayong paagi makaangkon sa ilang kaugalingon sa maayong dungog ug sa dakong kagawasan sa pagsulti diha sa pagtuo maylabot kang Kristo Jesus.”—1 TIMOTEO 3:13.

ANG mga lalaki nga karon ministeryal nga mga alagad “nasulayan na kon angayan ba.” (1 Timoteo 3:10) Apan ang ilang pagkatinudlo dili mao ang kataposan. Ang ilang tumong mao ang magpadayong “makaangkon sa ilang kaugalingon sa maayong dungog” pinaagi sa pagtuman sa ilang mga buluhaton sa “maayong paagi.” (1 Timoteo 3:13) Ang matag membro sa nagkahiusang Kristohanong kongregasyon buot mopaluyo kanila sa pagkab-ot nianang tumonga.

2 Gipaila ni apostol Pablo nga ang tanang membro sa espirituwal nga lawas ni Kristo makabatog kaayohan pinaagi sa pagbuhat nga nagkahiusa ug pag-atiman sa usag usa. (1 Corinto 12:12-31) Sa susamang paagi, sa dihang ang ministeryal nga mga alagad nagatuman sa ilang hinatag-sa-Diyos nga buluhaton sa “maayong paagi,” ang matag membro sa Kristohanong kongregasyon karong adlawa makabatog kaayohan. Apan kon maagoman sa ministeryal nga mga alagad ang mga suliran nga magapugong kanila sa pagtuman sa tukma sa ilang mga katungdanan, kini basin makahatag ug kalisod sa tanang membro sa kongregasyon.

3 Ang tanang katawhan ni Jehova may samang pakig-away, “usa ka pagpakig-away, dili batok sa dugo ug unod, kondili . . . batok sa daotang espirituhanong mga gahom sa langitnong mga dapit.” (Efeso 6:12) Dugang pa, ang tanang alagad ni Jehova adunay pakig-away batok sa iyang kaugalingong mga pagkadili-hingpit ug makasasalang mga hilig. Ugaling, ingong usa ka pundok ang ministeryal nga mga alagad nagaatubang sa pila ka suliran sa ilado pang paagi kay sa ubang pundok. Makatabang sa pag-ilustrar niini mao ang bag-ong surbi sa kapin ug 320 ka kongregasyon nga may 1,360 ka ministeryal nga alagad sa usa ka nasod sa kasadpan sa Uropa.

Pagkaulitawo ug Kaminyoon

4 Sa ministeryal nga mga alagad nga gisurbi, kapin ug diyutay sa 10 porsiento ang ulitawo pa. Sa ingon ilang gipahimuslan ang kagawasan sa pila ka responsabilidad nga kasagaran sa halos 90 porsiento nga minyo. Apan ang ulitawong mga igsoon kinahanglang mag-amping nga dili gamiton kini nga kagawasan sa pagpangagpas sa personal nga mga butang sama sa hinobrang kalingawan o pagpakigsosyal. Ni tugotan nilang ang kinaiyanhong tinguha sa pagminyo mao ang maglabi sa ilang kinabuhi. (Mateo 6:33) Ni ilang tugotang ang pagsulogsulog sa ilang minyong mga higala moduso kanila ngadto sa dinalidali o dili-maalamong kaminyoon. Ug, sa pagkamatuod, ang mga Kristohanon nga nagamahal sa usag usa motahod sa pagkatagsaanon sa dili-minyong kaubang mga magtutuo ug modasig kanila sa pagpahimulos sa ilang labawng kagawasan, sa paghatag ug dugang panahon sa teokratikanhong mga buluhaton, lagmit pinaagi sa pagsulod sa bug-os-panahong ministeryo.

5 Sumala sa nahisgotan nang surbi, duolag 62 porsiento sa ministeryal nga mga alagad maoy mga ginikanan. Alang kanila, ang kapeligrohang ang ilang mga kasingkasing “mabug-atan” sa “mga kabalaka sa kinabuhi” labaw kay sa ulitawong mga igsoon. (Lucas 21:34-36) Busa, sa pagsugyot sa pagkatagsaanon, si Pablo miingon: “Buot kong mahigawas kamo sa kabalaka. Ang lalaking dili minyo mabalak-on sa mga butang maylabot sa Ginoo, kon unsaon niya pag-angkon ang pag-uyon sa Ginoo. Apan ang lalaking minyo mabalak-on sa mga butang sa kalibotan, kon unsaon niya pag-angkon ang pag-uyon sa iyang asawa, ug siya nabahin. . . . Siya nga nagahatag sa iyang pagkaulay diha sa kaminyoon nagabuhat ug maayo, apan siya nga wala maghatag niana diha sa kaminyoon nagabuhat ug labi pang maayo.”—1 Corinto 7:32-38.

6 Bisan tuod ang katawhan ni Jehova wala magtuo nga ‘ang mga kaminyoon ginahimo sa langit,’ sila nasayod nga ang langitnong kaalam gikinahanglan sa pagsulbad sa mga suliran sa kaminyoon. (Salmo 19:7; Proverbio 3:5.) Busa, ang minyong ministeryal nga mga alagad kinahanglang mosunod sa tambag sa Pulong sa Diyos nga labing suod kon mahimo. Kinahanglang maningkamot silang makahupot ug tukmang katimbang sa pagtuman sa mga responsabilidad sa pamilya ug dili gamiton kana ingong pasangil sa pagpasagad sa teokratikanhong mga buluhaton sa kongregasyon. Apil sa ubang mga butang, ang maayong pagkaplanong eskedyul kinahanglanon. Ang mas tigulang ug mas eksperyensiadong mga magtiayon tingali makahatag sa mga batan-on sa mapuslanong mga sugyot bahin niini kon sila pangayoan niana.

7 Ang pagpaluyo sa iyang pamilya dakong tabang sa usa ka minyong ministeryal nga alagad. Siyempre, ang mga sakop sa pamilya nga nagapangayog hinobra sa iyang panahon ug pagtagad o kaha daghan kaayog materyal nga panginahanglan makapugong sa iyang espirituwal nga pag-uswag. Apan usa ka panalangin kon ang tibuok niyang pamilya mopaluyo sa tanan niyang paningkamot sa “pag-alagad sa maayong paagi.” (1 Timoteo 3:13) Busa hinungdanon kaayo nga sa dili pa malangkit sa emosyonal nga paagi sa umaabot nga kapikas sa kaminyoon ang ulitawong ministeryal nga alagad iyang sulayan ang pagtino kon ang babaye lagmit bang makapausbaw sa ilang espirituwal nga pag-uswag!

Trabaho ug Materyalismo

8 Walo sa matag napulo ka ministeryal nga alagad wala pay 60 sa edad. Busa sa kadaghanang kaso sila may sekular pang trabaho sa pagbuhi sa ilang kaugalingon ug sa ilang mga pamilya. Halos lima sa matag pulo kanila ang tali sa 20 ug 40 anyos sa edad—ang panahong ang mga lalaki sa kalibotan kasagarang mahimong establisado sa trabaho o karera ug nagapaningkamot nga moasenso ug makabatog kasegurohan sa salapi. Kon ikaw ministeryal nga alagad sa maong edad, ayaw gayod pakamenosa ang kapeligrohang maugmad ang kalibotanon, materyalistikanhong mga tinamdan nga makapahuyang kanimo sa espirituwal. Hinunoa, hinumdoming si Pablo miingon: “Kay nakabaton sa pagkaon ug panapot, kita magmatagbawon niining mga butanga.” (1 Timoteo 6:8) Si Jesus, usab, mihatag ug maayong tambag nga makatabang kanatong tanan sa pagbuntog sa materyalismo. Basaha kini sa imong kaugalingon diha sa Mateo 6:19-34.

9 Kamong batabatang ministeryal nga mga alagad, tan-awa ang “malamposong” mga lalaki nga nanagbatog kalibotanong mga karera o nagatigom ug bahandi apan wala manumbaling kang Jehova diha sa ilang mga plano. (Itandi ang Proverbio 16:3; 19:21.) Unsa ba ka maalamon nga inyong sundon ang dili-espirituwal, materyalistikanhong mga tawo kansang mga kinabuhi duol nang matigbak sa panahon sa “dakong kasakitan”? (Mateo 24:21) Kinsa ba ang alagad ni Jehova nga makig-ilis kanila? “Kay,” matud ni Jesus, “unsa bay kapuslanan sa usa ka tawo kon maangkon niya ang tibuok kalibotan apan mapildihan sa iyang kalag?” (Mateo 16:26) Sa pagkamatuod, ang dalang maalamon mao ang pagtukod sa kaugmaong may kasegurohan uban sa organisasyon ni Jehova inay sa walay-kasegurohan ug hamubo nga kaugmaon uban niining himalatyong kalibotan nga nahiluna sa gahom ni Satanas.—1 Juan 5:19.

Pag-unong sa Gingharian sa Diyos

10 Sa matagnaon, kini gikaingon mahitungod sa Mesiyanikong Hari ni Jehova: “Ang imong katawhan magahalad sa ilang kaugalingon nga kinabubut-on sa adlaw sa imong militaryong gahom. Sa mga katahoman sa pagkabalaan, gikan sa tagoangkan sa banagbanag ikaw dunay imong pundok sa mga lalaking batan-on ingon sa mga yamog.” (Salmo 110:3) Kining tagnaa nagakatuman sukad 1914, ug ang mga sakop niadtong nagakadaghang “pundok sa mga lalaking batan-on” nakaamgong ang ilang unang pag-unong kinahanglang maoy ngadto sa Gingharian sa Diyos nga ang Hari mao ang hinimayang Jesu-Kristo. Busa samtang kining napahinungod nga mga lalaki, apil ang ministeryal nga mga alagad, nagapasakop nga relatibo sa kagamhananong “labawng mga pagbulot-an,” sa bisan unsang panagkasumpaki sa intereses sila “kinahanglang mosugot sa Diyos ingong magmamando inay sa mga tawo.” (Roma 13:1; Buhat 5:29) Sumala sa giingon ni Jesus, ang iyang mga sumusunod “dili bahin sa kalibotan.” (Juan 15:19; 18:36) Sila nagapabiling neyutral kon bahin sa politikanhong mga kahikayan sa kalibotan, kay nakaamgong ang pagbuhat sa lahi niana maghimo kanilang mga maluibon sa Gingharian sa Diyos.

11 Unsa na man kon ang ministeryal nga mga alagad o uban mawad-an sa ilang mga trabaho o bisan sa ilang kagawasan tungod sa paghupot sa Kristohanong neyutralidad? (Isaias 2:2-4; Juan 17:16) Nan sila nasayod nga ang ilang espirituwal nga mga igsoong lalaki ug babaye mohatag kanila sa tanang pagsuportar sa espirituwal nga paagi, ug, kon kinahanglan man, sa materyal nga paagi. Kini matuod tungod kay ang katawhan ni Jehova mahigugmaong nagaatiman sa usag usa.—Itandi ang Juan 13:34, 35; 1 Corinto 12:24, 25.

Panginahanglan sa Labaw nga Kasinatian

12 Mga un-tersiya sa ministeryal nga mga alagad nga gisurbi maoy mga Saksi ni Jehova nga wala pay napulo ka tuig. Dayag, kining mga lalakiha nagdawat sa tabang ug giya sa labi pang hanas nga membro sa kongregasyon. Apan ang ‘paghupot ug maayong dungog’ maglangkit sa pagpadayon sa pagkat-on gikan sa uban ug pagtigom ug kasinatian. Kini magkahulogan usab sa kanunayng pagbutang ug personal nga mga tumong ug binuotang paningkamot sa pagkab-ot kanila. Busa kon matinguhaon ka sa tim-os sa pag-alagad sa mapuslanong mga katuyoan ingong ministeryal nga alagad o nagatinguha nianang pribilehiyoha, nakabutang ka bag pila ka personal nga tumong? Pananglitan, nganong dili nimo ihukom nga mabasa ang enterong Bibliya sa pag-abot sa usa ka linaing petsa o mahimong auxiliary payunir sa tinong mga bulan?

13 Kon bata ka pa sa edad o sa kasinatian, makabaton kag kaayohan sa giingon sa 1 Timoteo 4:12-15. Bisan pag ang maong mga pulong gitumong ngadto sa batan-ong magtatan-aw si Timoteo, ang kadaghanan sa gisulti ni Pablo dinha mahitungod sa sinultihan ug sa kagawian makahatag ug kaayohan kang bisan kinsang igsoong lalaki nga matinguhaong mahimong ministeryal nga alagad o nagaalagad na sa maong kapasidad. Misulat ang apostol: “Ayaw itugot nga may tawong magatamay kanimo tungod sa imong pagkabatan-on. Hinunoa, mahimong panig-ingnan sa mga magtutuo sa sinultihan, sa kagawian, sa gugma, sa pagtuo, sa kaputli. Samtang ako umaabot, kugihi ang pagbasa sa kapunongan, ang pagmaymay, ang pagpanudlo. Ayaw pasagdi ang hiyas nga anaa kanimo nga gikahatag pinaagi sa panagna ug dihang gipandong sa lawas sa mga ansiano ang ilang mga kamot diha kanimo. Pamalandonga kining mga butanga; ibug-os ang imong hunahuna niana, aron ang imong pag-uswag makita sa tanang tawo.” Sa unsa kinahanglang magkugi ka aron ang “imong pag-uswag makita sa tanang tawo”? Sa mainampoon tinoa kon unsay kinahanglang imong pagabuhaton, ug unya buhata kana sa tabang ni Jehova!

Pagsagubang sa Pagkamawad-ag Kadasig

14 Ang daghan kaayong ministeryal nga alagad dili na kinahanglang makigbisog sa mga sulirang iya sa mga batan-ong lalaki. Sila nagaatubang sa pagkatigulang o maluyahong lawas, nga tingali mosangko sa pagkamawad-an sa kadasig. Apan kadtong nagapabiling lig-on sa espirituwal makakuhag paglipay gikan niining mga pulong ni Pablo ngadto sa kaubang dinihogang mga Kristohanon: “Kita dili mawad-an sa paglaom, apan kon ang pagkatawo nato sa gawas nagakahugo, ang pagkatawo nato sa kahiladman ginabag-o sa adlaw-adlaw. Kay bisan kon ang kasakitan lumalabay ug magaan, alang kanato kini mosangpot sa himaya nga may labaw ug labaw nga gibug-aton ug walay kataposan. Samtang atong itutok ang atong mga mata, dili sa mga butang makita, kondili sa mga butang dili makita. Kay ang mga butang makita lumalabay apan ang mga butang dili makita walay kataposan.” (2 Corinto 4:16-18) Ang mga alagad ni Jehova nga may yutan-ong mga paglaom nakabaton usab sa makapadasig kaayong kalaoman—ang kinabuhing walay kataposan sa usa ka paraisong yuta.—Lucas 23:43; Juan 17:3.

15 Busa, ang ministeryal nga mga alagad nga dili makaarang sa pagbuhat sama sa uban tungod sa maluyahong lawas o pagkatigulang may maayong hinungdan nga maghupot sa mangayaon ug positibong tinamdan. Kini nagabanaag sa pagpabili sa kamatuoran ug lalom nga pagtuo sa mga butang nga walay kataposan. Ang maong maayong espiritu, inubanan sa mapaubsanong pag-alagad, makahatag ug dakong kaayohan ug pagdasig sa tanan sa kongregasyon.

16 Kon ikaw usa ka ministeryal nga alagad, magpadayon sa “pagtinguha sa katungdanan sa magtatan-aw” pinaagi sa pagpauswag sa imong katakos sa pagpanudlo ug sa espirituwal nga mga hiyas. (1 Timoteo 3:1) Apan ayaw wad-a ang kadasig kon ikaw dili dayon itudlong ansiano. Hinumdoming ingong ministeryal nga alagad nga nagaatiman sa imong mga katungdanan “sa maayong paagi” ikaw nagaalagad sa mapuslanong mga katuyoan ug usa ka dakong kaayohan sa kongregasyon. Usa ka dakong pribilehiyo ang pag-alagad sa bisan unsang paagi ug pagtabang sa kaubang mga magtutuo sa pagtuman sa sugo nga isangyaw ang Gingharian.—Mateo 24:14; 28:19, 20.

Kon sa Unsang Paagi ang Uban Makatabang

17 Kay nakaamgo sa mapuslanong mga katuyoan nga ginaalagaran sa ministeryal nga mga alagad, ang tanang katawhan ni Jehova buot mopaluyo sa ilang paningkamot. Pananglitan, mas sayong ang usa ka lalaki magpadayong ‘magaalagad sa maayong paagi’ kon ang iyang asawa ug mga anak makontento sa pangunang mga kinahanglanon sa kinabuhi ug dili mangayog daghang kaluhoan nga magkinahanglan nga siya mogugol ug ekstrang paningkamot sa sekular nga trabaho.—1 Timoteo 6:6-8.

18 Ang mga ansiano makatabang sa ministeryal nga mga alagad pinaagi sa paghatag kanila sa gikinahanglang pagtultol ug tambag. Ug kon nahimo ang pag-uswag, angay ihatag ang sinserong pagdayeg. Apil sa ubang mga butang, ang mga ansiano makakuyog sa ministeryal nga mga alagad sa pagsangyaw sa kanataran, makabulig kanila sa pag-andam sa mga pakigpulong, ug makapaambit kanila sa ilang dakong Kristohanong kasinatian. Lagmit mapasagdan usahay ang maong interes ug komunikasyon. Pananglitan, sa gisukna bahin sa iyang mubo nga taho sa pag-alagad, usa ka ministeryal nga alagad misulti sa usa ka magtatan-aw sa sirkito: “Nganong mangutana ka man? Sa daghang katuigan kini maoy mubo, apan ikaw ang unang may gikasulti bahin niana.” Ang mga ansianong nagahatag sa ministeryal nga mga alagad sa mapuslanon, mahigugmaong tambag ug mapailobong nagatabang kanila sa ilang mga suliran kadaghanan makabatog kalipay sa pagkakitag talagsaong mga resulta.

19 Sa aktuwal, ang matag membro sa kongregasyon makatabang sa ministeryal nga mga alagad sa paghupot sa ilang maayong dungog. Sa unsang paagi? Pinaagi sa pagkooperar kanila ug pagpakitag kinasingkasing nga pagpabili sa ilang buluhaton. Maingong ang tanang bahin sa lawas sa tawo kasagarang nagakahiusa sa pagbuhat sa paghupot ug maayong panglawas, ang tanang membro usab sa kongregasyon kinahanglang mokooperar sa pagseguro sa maayong panglawas sa espirituwal. (Itandi ang 1 Corinto 12:24, 25.) Sa maong katuyoan, dako ang ginabuhat sa kugihang ministeryal nga mga alagad nga nagaalagad sa mapuslanong mga katuyoan ug nagahupot sa maayong dungog. Hinaot sila, ug ang tanang maunongong mga saksi ni Jehova, magapanglantaw sa umaabot nga may walay-kataposang kalipay ug magkahiusa sa pagpadayon sa paglipay sa kasingkasing sa “malipayong Diyos.”—1 Timoteo 1:11; Proverbio 27:11.

Palihog Ipatin-aw

◻ Unsang mga suliran ang tingali atubangon sa ministeryal nga mga alagad?

◻ Unsay mahimo sa mga asawa ug mga anak sa ministeryal nga mga alagad sa pagtabang kanila?

◻ Unsay mahimo sa mga ansiano sa pagbulig sa ministeryal nga mga alagad?

◻ Unsay mahimo sa matag membro sa kongregasyon sa pagtabang sa ministeryal nga mga alagad?

[Mga Pangutana nga Pagatun-an]

1. Tapos matudlong ministeryal nga alagad, kinahanglan unsa ang tumong sa usa ka lalaki, ug unsay kinahanglang buhaton sa uban sa kongregasyon?

2. Sa unsang paagi ang mga membro sa kongregasyon apektado sa ginabuhat sa ministeryal nga mga alagad?

3. (a) Unsang mga suliran ang nabatonan sa tanang katawhan ni Jehova? (b) Unsay ginailustrar sa usa ka bag-ong surbi?

4. Unsaon pag-isip sa dili-minyong ministeryal nga mga alagad ang ilang pagkaulitawo, ug unsang pagdasig ang ikahatag sa uban kanila?

5. Unsang labaw nga kapeligrohan ang anaa sa minyong ministeryal nga mga alagad kay niadtong sa mga ulitawo?

6. Ang minyong ministeryal nga mga alagad kinahanglang magbuhat sa unsa, ug kinsa ang makahatag ug mapuslanong mga sugyot?

7. (a) Sa unsang paagi ang pamilya sa minyong ministeryal nga alagad makaapektar sa iyang paningkamot ug ministeryal nga pag-uswag? (b) Unsa ang ibutang sa hunahuna sa ministeryal nga alagad nga nagaplanong magminyo?

8. (a) Unsang lagmit nga kapeligrohan ang ginaatubang sa pila ka ministeryal nga alagad maylabot sa sekular nga trabaho? (b) Ang pagpamalandong sa unsang mga kasulatan ang makatabang sa usa ka tawo sa pagbuntog sa materyalismo?

9. Nahiuyon sa Mateo 16:26, unsa ang maalamong dalan alang sa batabatang ministeryal nga mga alagad?

10. Mahitungod sa politikanhong kahikayan, unsang baroganan ang gikuha sa nagkadaghang “pundok sa batan-ong mga lalaki,” apil ang ministeryal nga mga alagad?

11. Ang mga igsoong lalaki nga nagaantos tungod sa paghupot sa Kristohanong neyutralidad makaseguro sa unsa?

12. Ang ‘pag-angkon sa maayong dungog’ mag-apil sa unsa?

13. Unsang tambag nga gihatag kang Timoteo ang makahatag kaayohan sa usa ka igsoong lalaki nga buot mahimong ministeryal nga alagad o si kinsa karon nagaalagad sa maong kapasidad?

14, 15. (a) Unsang Kasulatanhong pagdasig ang anaa alang sa ministeryal nga mga alagad nga kinahanglang mosagubang sa katigulangon o sa maluyahong lawas? (b) Sa unsang paagi kining mga tawhana makadasig sa uban diha sa kongregasyon?

16. Nganong ang usa ka ministeryal nga alagad dili angay mawad-ag kadasig kon dili siya itudlong ansiano?

17. Sa unsang paagi ang usa ka ministeryal nga alagad matabangan sa iyang asawa ug mga anak?

18. (a) Sa unsang paagi ang mga ansiano makatabang sa ministeryal nga mga alagad? (b) Nganong hinungdanon ang maayong komunikasyon tali sa mga ansiano ug sa ministeryal nga mga alagad?

19. Sa unsang paagi ang matag usa sa kongregasyon makatabang sa ministeryal nga mga alagad sa paghupot sa ilang maayong dungog?

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa