Kaso Bahin sa Dugo Nahibalita sa Hapon

“PADAYON sa paglikay sa . . . dugo.” Kining tin-awng sugo gihatag sa Bibliya sa Buhat 15:29. Bahin kini sa desisyong gipakanaog sa nagmandong lawas sa Kristohanong kongregasyon sa unang siglo ug natala sa dinasig nga Pulong sa Diyos alang sa instruksiyon sa mga Kristohanon hangtod niining panahona.

Hinuon, kining balaang kasugoan dili bag-o sa unang siglo. Ang paglikay sa dugo gisugo 3,500 ka tuig nga miagi diha sa Kasugoan ni Moises, sumala sa gipahayag sa Levitico 17:10-16. Sa pagkamatuod, ang susamang sugo gihatag kapin ug 4,300 ka tuig nga miagi kang Noe, ang gigikanan sa tanang tawo sa yuta karong adlawa. Kini atong mabasa sa Genesis 9:4: “Ang unod lamang uban ang kalag niini—ang dugo niini—dili ninyo pagakan-on.”

Gikan niining mga kasulatana yano alang niadtong nagasunod sa Bibliya diha sa kinabuhi nga ang dugo bililhon sa panan-aw sa Diyos. Ingong Maglalalang sa tawo ug ang Magtatagana niining sapasapa sa kinabuhi, siya ang tukmang makamando kon unsaon paggamit ang dugo. Kon kini dili pagakan-on sa pagsustener sa kinabuhi, nan makataronganong kini dili mahimong gamiton sa pagsustener sa kinabuhi pinaagi sa pagpasulod sa ugat o abuno sa dugo. Kadtong nagasimba sa Diyos sa Bibliya nagaamping sa pagsunod sa iyang mga kinahanglanon. Ug gikan sa iyang punto de vista, hinungdanon ang paglikay sa dugo sama sa paglikay sa idolatriya ug pakighilawas, sumala sa tin-awng ginapakita sa Buhat 15:28 ug 29.

Usa ka Kasong Nakapakurat sa Hapon

Sa Hunyo 6, 1985, sa 4:35 s.h., ang diyes-anyos nga si Dai Suzuki nagsakay sa iyang bisikleta. Nagpadulong siya sa lokal nga Kingdom Hall sa mga Saksi ni Jehova sa pagpraktis sa iyang unang pakigpulong nga ipahayag sa Tunghaan sa Teokratikanhong Ministeryo. Mihunong siya sa usa ka suga sa trapiko tali sa usa ka dakong trak ug sa barandilya. Sa naberde ang suga, si Dai milarga. Siya nasakpan sa dagkong mga ligid sa likod sa trak ug nalabog, nga naligsan ang iyang mga batiis. Kusog ang pagdugo sa mga samad. Lima ka oras tapos madala ngadto sa duol nga ospital, si Dai namatay tungod sa iyang mga samad.

Kadtong hitaboa nahibalita sa tibuok nasod. Ang nakapatalagsaon niadtong balitaa mao ang kamatuorang midumili ang mga ginikanan sa mga abuno sa dugo. Ang amahan ni Dai nagatuon sa Bibliya uban sa mga Saksi ni Jehova, ug ang iyang inahan usa na ka bawtismadong Saksi. Pinasikad sa relihiyosong mga hinungdan, malig-on nilang gidumilian ang mga hangyo nga itugot ang pag-abuno sa dugo. Ila pa ganing gitimrihan ang ilang sinulat nga pagdumili pinaagi sa mga marka sa tudlo, nga legal kon ang usa ka tawo walay dalang opisyal nga timri sa maong panahon. Giisip nilang tukma ang pagsunod sa Kasulatan nga diha niana ang Diyos nagasugo gayod sa iyang mga alagad sa ‘paglikay sa dugo.’

Niadtong panahona, ang mga ginikanan gibaharang ikiha sa pagpatay kon mamatay ang bata tungod sa dili nila pagtugot sa mga abuno sa dugo. Ugaling, ang maampingong awtopsiya sa ulahi nagpadayag nga ang pagkamatay wala ipahinabo sa pagpasagad sa bahin kaha sa mga ginikanan o sa ospital. Busa, walay gipasaka nga sumbong sa kapolisan.

Ang tulo ka pangunang nasodnong peryodiko sa Hapon, uban ang impluwensiyadong lokal nga mga peryodiko, mipatik ug tag-as nga mga artikulo bahin sa kaso. Kadto gibalita usab sa balita sa TV ug radyo. Sa maong paagi nahimo sa mga paagi sa komunikasyon ang kusganong mga pagdani sa pagbati sa kadaghanan, ug maingong kasagaran kaayo sa maong emosyonal kaayong mga kaso, ilang gituis pag-ayo ang mga kamatuoran. Daghan sa mga artikulo yanong mahagiton.

Hinuon, usa ka komentarista miuyon nga ang mga Hapones dili anad nga gamhan sa lig-on kaayong relihiyosong pagtuo sama sa gipakita sa pamilyang Suzuki. Siya miingong ‘kon napugos pa ang abuno diha sa pasyente ug siya nabuhi, ang mga ginikanan ug pasyente labaw untang masakit kay sa kon kadto misangpot sa kamatayon.’ Pinasukad niini, iyang gibating ang usa dili gayod makahukom sa pagtuo sa lain.

Ang Hapones nga mga estasyon sa telebisyon mihimog dakong kuskos-balungos bahin sa kaso, nga mipukaw sa emosyonal nga mga pagdapigdapig. Apan gikan sa punto de vista sa pamilyang Suzuki, hinungdanon ang pagsugot sa tin-awng mga mando sa Diyos sa Bibliya. Busa ang mahigugmaon, mahadlokon-sa-Diyos nga mga ginikanan nagsugot sa mando sa Bibliya, “Likayi ninyo . . . ang dugo.” (Buhat 15:20, 29; 21:25) Ang kamatuorang ang paglikay sa dugo gipasiugda diha sa tulo ka bulag nga bersikulo sa basahong Mga Buhat, ug kini giapil sa paglikay sa idolatriya ug pakighilawas, nagapakita unsa ka seryoso ang pag-isip niana sa Maglalalang.

Sa tagsaong hitabo nga ang matinumanong Kristohanon mamatay ugaling tungod sa pagdumilig dugo, kana siya tinong pagabanhawon sa nahaigong panahon sa Diyos, sumala sa Iyang saad. Ang mga ginikanan ni Dai masaligong makaingon, sama sa giingon ni Marta mahitungod sa iyang igsoong lalaki si Lasaro, “Ako nahibalo nga siya mobangon sa kataposang adlaw.”—Juan 11:24; 5:28, 29.

Ang isyu sa mga Saksi ni Jehova maoy relihiyoso sa bug-os. Tinuod, ikaergo nga sa daghang kaso menos ang riyesgo sa pagdumilig abuno sa dugo kay sa pagdawat, kay sa ingon ang usa ka tawo mapanalipdan batok sa seryosong mga sakit nga ipasa sa abuno sa dugo, sama sa AIDS ug hepatitis. Apan, alang sa Kristohanon, kinsa nagasunod sa Pulong sa Diyos, kini ikaduhang butang. Ang pangunang kabalaka mao ang pagsugot ug pagpabiling inuyonan sa Maghahatag-sa-Kinabuhi, si Jehova nga Diyos, kinsa makaarang usab sa paghatag ug kinabuhing walay kataposan.—Salmo 36:9; Roma 2:6, 7.

Kinahanglan tingali usahay ang gamayng sakripisyo sa pagdapig sa sugo sa Bibliya nga ‘padayon kamo sa paglikay sa dugo.’ Bisan pa niana, ang pagsakripisyo-sa-kaugalingon maoy usa ka maayong hiyas nga giila diha sa daghang katilingban, ug ang pagsakripisyo-sa-kaugalingon sa pagsugot sa Maglalalang sa usa tinong mopatungha sa iyang pahiyom sa pag-uyon.—Lucas 9:23, 24.

Ang pamilyang Suzuki mipalabi gayod sa pagsunod sa sugo sa Bibliya sa pagkamasinugtanon sa Diyos nga Gamhanan sa Tanan, bisan pa sa emosyonal kaayong mga pagpit-os gikan niadtong wala makasabot sa mga prinsipyong nalangkit. (Buhat 5:29) Hinaot ang “Diyos sa tanang paglipay” mopadayon sa pag-atiman niining pamilyaha sa ilang integridad ug ihatag kanila ang dakong panalangin sa pagkabanhaw!—2 Corinto 1:3, 4.

[Letrato sa panid 19]

Si Dai dihang misugod siya sa unang grado sa 1981.